Perry River Oral History Project Launched

(ᑎᓯᐱᕆ, 2011 –ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᓐᖓᕕᒃᑯᑦ ᐊᖓᔪᖅᑳᖓᑦ ᑳᑎ ᑕᐅᑐᓐᖏ ᐅᓪᓗᒥ ᐱᒋᐊᖅᑎᑦᓯᔪᖅ ᑖᒃᑯᐊ ᐅᒥᖕᒪᒃᑑᖅ ᐅᓂᒃᑳᖑᓂᖓᓄᑦ ᐱᓕᕆᐊᒃᓴᓂᒃ ᑕᒡᕙᓂ ᓄᓇᕗᑦ ᑐᓐᖓᕕᒃᑯᑦ ᖃᕆᐅᓴᔭᒃᑯᑦ ᑐᑭᓯᒋᐊᖅᑎᑦᓯᕕᐊᓂ. ᑖᓐᓇ ᐱᓕᕆᐊᖅ ᐃᓗᓕᖃᖅᑐᖅ ᐅᖃᐅᓯᒃᑯᑦ ᐅᓂᒃᑳᖑᓯᒪᔪᓂᒃ ᓂᐱᓕᐅᖅᓯᒪᔪᓂᒃ ᑖᒃᑯᓇᓐᖓᑦ ᐅᒥᖕᒪᖅᑑᕐᒥᐅᓂᒃ, ᓄᒃᑎᖅᑕᐅᓚᐅᖅᑐᓂᒃ ᐅᖅᓱᖅᑑᒧᑦ 1967. ᓄᓇᕗᑦ ᑐᓐᖓᕕᒃᑯᑦ ᐱᒋᐊᓚᐅᖅᓯᒪᔪᑦ ᐱᓕᕆᐊᒥᒃ ᖃᑦᓯᑲᓪᓚᐅᓕᖅᑐᓂᒃ ᐊᕐᕌᒍᓂᒃ ᐃᓄᑦ ᐅᖅᓱᖅᑑᒥ ᑎᑎᕋᓚᐅᕐᒪᑕ ᓄᓇᕗᑦ ᑐᓐᖓᕕᒃᑯᑦ ᐊᖓᔪᖅᑳᖓᑦᑕ ᑐᒡᓕᐊᓄᑦ ᔭᐃᒻᔅ ᐃᑦᑐᓗᒃ, ᐊᐱᖅᓱᖅᑐᑎᒃ ᐃᑲᔪᖅᑕᐅᒍᓐᓇᕐᒪᖔᕐᒥᒃ ᐅᓂᒃᑳᓕᐅᖅᑎᓪᓗᒋᑦ. ᓄᓇᕗᑦ ᑐᓐᖓᕕᒃᑯᑦ ᐅᖃᐅᓯᒃᓴᑦ−ᖃᖓᓂᑕᓕᕆᔨᖓᑦ ᑏᕕᑦ ᐱᓕ ᐋᖅᑭᒃᓱᐃᓚᐅᖅᑐᖅ ᐊᐱᖅᓱᐃᓂᐅᔪᓂᒃ ᐅᖅᓱᖅᑑᒥ. ᑕᒪᓐᓇ ᐱᕙᓪᓕᐊᓂᖅ ᐃᓚᖃᓚᐅᖅᑐᖅ ᑲᑎᒪᖃᑎᒋᓗᒋᑦ ᑖᒃᑯᐊ ᑲᑐᔾᔨᔪᑦ, ᐋᖅᑭᒃᓱᐃᓪᓗᑎᒃ ᐸᕐᓇᐅᑎᓂᒃ ᐱᖃᑎᒋᓪᓗᒋᑦ, ᐊᐱᖅᓱᖅᑐᒋᑦ ᐊᑐᓂ ᐊᒻᒪ ᑕᒻᒪᖅᓯᒪᑎᑦᑕᐃᓕᓪᓗᒋᑦ ᑎᑎᕋᖅᑕᐅᕙᓪᓕᐊᔪᑦ, ᐊᒻᒪ ᓴᓗᓇᐃᖅᓯᕙᓪᓕᐊᓂᖅ ᐱᓕᕆᐊᒃᓴᓂᒃ ᓇᓗᓇᐃᖅᑕᐅᓪᓗᓂ ᑏᕕᑦ ᐱᓕᒧᑦ. “ᖁᕕᐊᓱᑦᓯᐊᐳᖓ ᐅᓪᓗᒥ ᐱᒻᒪᕆᐅᔪᓂᒃ ᑎᑎᕋᖅᓯᒪᔪᓂᒃ ᓴᖅᑭᑎᑦᓯᒋᐊᒃᓴᖅ ᐃᓄᖕᓄᑦ ᐊᒻᒪ ᑲᓇᑕᒥᐅᑕᓕᒫᓄᑦ. ᐅᓂᒃᑳᖏᑦ ᐃᓄᐃᑦ ᓄᒃᑎᖅᑕᐅᓚᐅᖅᓯᒪᔪᑦ ᐅᒥᖕᒪᒃᑑᕐᒥᑦ, ᐅᖅᓱᖅᑑᒧᑦ ᑎᑎᕋᖅᑕᐅᓯᒪᑦᓯᐊᓕᖅᐳᑦ ᐊᒻᒪ ᓄᓇᕐᔪᐊᒥᐅᑦ ᐅᖃᓕᒫᕈᓐᓇᖅᓯᕗᑦ ᐊᒃᓱᕈᓚᐅᕐᓂᖏᓐᓂᒃ ᐊᒻᒪ ᐊᑐᓚᐅᕐᓂᖏᓐᓂᒃ ᑲᒪᓇᖅᑐᒥ ᐃᖏᕐᕋᓂᕐᒥᓂᒃ,” ᐅᖃᖅᑐᖅ ᑕᐅᑐᓐᖏ. ᑖᒃᑯᐊ ᐅᖅᓱᖅᑑ ᐅᓂᒃᑳᖏᓐᓄᑦ ᐱᓕᕆᐊᑦ ᑕᑯᔭᐅᔪᓐᓇᖅᑐᑦ ᓄᓇᕗᑦ ᑐᓐᖓᕕᒃᑯᑦ ᖃᕆᓴᐅᔭᒃᑯᑦ ᑐᑭᓯᒋᐊᒋᐊᖅᑎᑦᓯᕕᐊᓄᑦ:

https://tunngavik.com/current-initiatives/perry-river/?lang=iu