Nunavut Community Wellness Plans Report Released
ᓄᓇᕗᑦ ᑐᙵᕕᒃᑯᑦ ᐊᖏᔪᖅᑳᖓᑦ ᑳᑎ ᑕᐅᑐᙱ, ᐄᕙ ᐋᕆᐊᒃ, ᓄᓇᕗᒻᒥ ᓯᕗᓕᖅᑎ ᐊᒻᒪᓗ ᓕᐅᓇ ᐊᒡᓗᒃᑲᖅ, ᒐᕙᒪᑐᖃᒃᑯᑦ ᒥᓂᔅᑕᖓᑦ ᐋᓐᓂᐊᖃᕐᓇᖏᑦᑐᓕᕆᔨᕐᔪᐊᒃᑯᓐᓄᑦ ᐅᓪᓗᒥ ᐅᖃᐅᓯᖃᖅᑲᐅᔪᑦ ᓴᖅᑭᖅᓯᓪᓗᑎᓪᓗ ᓄᓇᕗᒻᒥ ᓄᓇᓕᓐᓂ ᐃᓅᖃᑎᒌᑦᓯᐊᕐᓂᕐᒧᑦ ᐸᕐᓇᐅᑎᖃᕐᓂᕐᒧᑦ ᐆᑦᑐᕋᐅᑎᐅᓗᑎᒃ ᐱᓕᕆᐊᖑᓂᐊᖅᑐᓂᒃ. ᐱᓕᕆᐊᖅ ᑲᒪᒋᔭᐅᓯᒪᔪᖅ ᑲᑐᔾᔭᐅᓪᓗᓂ ᓄᓇᕗᑦ ᑐᙵᕕᒃᑯᓐᓄᑦ, ᓄᓇᕗᑦ ᒐᕙᒪᒃᑯᖏᓐᓄᑦ, ᐋᓐᓂᐊᖃᕐᓇᖏᑦᑐᓕᕆᔨᕐᔪᐊᒃᑯᓐᓄᑦ ᑲᓇᑕ ᐱᖓᓲᔪᖅᑐᓄᓪᓗ ᓄᓇᓕᓐᓄᑦ ᓄᓇᕗᒻᒥ. ᐋᓐᓂᐊᖃᕐᓇᖏᑦᑐᓕᕆᔨᕐᔪᐊᒃᑯᑦ ᑲᓇᑕᒥ ᑮᓇᐅᔭᖃᖅᑎᑦᓯᓯᒪᔪᑦ $2.4 ᒥᓕᐊᓐᓂᒃ ᐱᓕᕆᐊᒧᑦ ᓄᓇᖃᖅᑳᖅᑐᒥᓂᕐᓄᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᑮᓇᐅᔭᖏᓐᓂᒃ.
ᐱᖓᓲᔪᖅᑐᐃᑦ ᓄᓇᕗᒻᒥ ᓄᓇᓖᑦ - ᐊᕐᕕᐊᑦ, ᓴᓪᓕᖅ, ᑲᖏᖅᑐᒑᐱᒃ, ᐃᒡᓗᓕᒃ, ᖁᕐᓗᖅᑑᖅ, ᐊᒻᒪᓗ ᑰᒑᕐᔪᒃ - ᐋᖅᑭᑦᓱᐃᓯᒪᔪᑦ ᓄᓇᓕᓐᓂ ᐃᓅᖃᑎᒌᑦᓯᐊᕐᓂᕐᒧᑦ ᐸᕐᓇᐅᑎᓂᒃ, ᑲᒪᒋᔭᐅᓯᒪᓪᓗᑎᒃ ᓯᕗᒃᑲᑕᖅᑎᖃᖅᑐᑎᓪᓗ ᐊᑐᓂᑦ ᓄᓇᓕᓐᓂ ᐃᑲᔪᖅᓱᖅᑕᐅᓪᓗᑎᒃ NCWP ᐱᓕᕆᐊᖃᖅᑐᓂᒃ. ᖄᒃᑲᓐᓂᖓᒍᑦ ᓄᓇᓕᓐᓂ ᐸᕐᓇᐅᑏᑦ, ᑭᖑᓪᓕᖅᐹᖅᓯᐅᒻᒥᒃ ᐅᓂᒃᑳᓕᐊᒥᒃ ᐋᖅᑭᑦᑕᐅᔪᖃᖅᓯᒪᒻᒥᔪᖅ ᖃᐅᔨᓴᕈᑕᐅᓂᐊᕐᓗᓂ ᐊᑐᐊᒐᐅᓚᐅᖅᑐᓂᒃ ᐋᖅᑭᑦᓱᖅᑕᐅᕙᓪᓕᐊᑎᓪᓗᒋᑦ ᓄᓇᓕᓐᓂ ᐃᓅᖃᑎᒌᑦᓯᐊᕐᓂᕐᒧᑦ ᐸᕐᓇᐅᑏᑦ.
“ᖁᕕᐊᓪᓚᕆᑦᑐᖓ ᑕᑯᒍᓐᓇᕋᒪ ᐊᒥᓱᓂᒃ ᑭᒃᑯᑐᐃᓐᓇᕐᓂᒃ ᑎᒥᐅᔪᓂᓪᓗ ᑲᑐᔾᔨᖃᑎᒌᓕᖅᓯᒪᔪᓂᒃ ᐃᓱᒪᓕᐅᕋᓱᐊᖅᑐᑎᒃ ᖃᓄᖅ ᑐᙵᕕᓕᐅᕐᓂᐊᕐᒪᖔᕐᒥᒃ ᐃᓅᖃᑎᒌᑦᓯᐊᖅᑐᓂᒃ, ᓴᙱᔪᓂᒃ ᓄᓇᓕᓐᓂᒃ. ᓱᓕᔪᖅᓴᖅᑐᖓ ᓄᓇᕗᒻᒥ ᓄᓇᓕᓕᒫᑦ ᐱᕕᖃᖅᑎᑕᐅᒋᐊᖃᕐᓂᖏᑦ ᐋᖅᑭᑦᓱᐃᒍᓐᓇᕐᓗᑎᒃ ᓇᒻᒥᓂᖅ ᐃᓅᖃᑎᒌᑦᓯᐊᕐᓂᕐᒧᑦ ᐸᕐᓇᐅᑎᒥᓐᓂᒃ,” ᐅᖃᖅᓯᒪᔪᖅ ᑕᐅᑐᙱ. “ᓄᓇᓕᓐᓂ ᐃᓅᖃᑎᒌᑦᓯᐊᕐᓂᕐᒧᑦ ᐸᕐᓇᐅᑏᑦ ᓴᖅᑭᔮᖅᑎᑦᓯᔪᑦ ᑲᔪᖏᕈᑎᖃᓪᓚᕆᓐᓂᖏᓐᓂᒃ ᓄᓇᓖᑦ ᐱᐅᓯᕚᓪᓕᖅᑎᑦᓯᒐᓱᐊᕐᓂᕐᒧᑦ ᐃᓅᖃᑎᒌᑦᓯᐊᕐᓂᕐᒥᒃ.”
“ᓄᓇᕗᑦ ᒐᕙᒪᒃᑯᖏᑕ ᑕᒪᑦᑕ ᑐᕌᒐᖏᓐᓂ ᓇᓗᓇᐃᖅᓯᓯᒪᔪᑦ ᓇᒻᒥᓂᖅ ᒪᑭᑕᔪᓐᓇᖅᓯᕙᓪᓕᐊᓂᕐᒥᒃ, ᑖᓐᓇᓗ ᐱᓕᕆᐊᖅ ᑕᐃᒪᐃᓕᐅᕈᑕᐅᓂᐊᖅᑐᓂ ᐃᑲᔪᖅᓱᐃᓗᑎᒃ ᓄᓇᓕᓐᓂ ᐃᓱᒪᒋᔭᐅᓯᒪᔪᓂᒃ ᐋᖅᑭᐅᒪᔾᔪᑎᑦᓴᓂᒃ,” ᐅᖃᖅᓯᒪᔪᖅ ᓯᕗᓕᖅᑎ ᐄᕙ ᐋᕆᐊᒃ. “ᖁᔭᓐᓇᒦᕈᒪᔭᒃᑲ ᑲᑐᔾᔨᖃᑎᒋᕙᑦᑕᕗᑦ ᓄᓇᕗᑦ ᑐᙵᕕᒃᑯᑦ, ᑲᓇᑕᐅᑉ ᒐᕙᒪᒃᑯᖏᑦ ᐊᑕᖏᖅᑐᒋᓪᓗ ᐱᖓᓲᔪᖅᑐᐃᑦ ᓄᓇᓖᑦ ᐱᓕᕆᐊᖃᕐᓂᐊᑎᓪᓗᒋᑦ ᑐᙵᕕᓕᐊᕐᓗᑎᒃ ᐊᑦᓱᕉᑎᒋᔭᑦᑎᓐᓂᒃ ᐱᐅᓯᕚᓪᓕᖅᑎᑦᓯᒐᓱᐊᕐᓂᕐᒧᑦ ᐋᓐᓂᐊᖃᕐᓇᖏᑦᑐᓕᕆᓂᕐᒥᒃ ᐃᓅᖃᑎᒌᑦᓯᐊᕐᓂᒥᓪᓗ ᓄᓇᕗᒻᒥᐅᓄᑦ.”
“ᑲᓇᑕᐅᑉ ᒐᕙᒪᒃᑯᖏᑦ ᐅᐱᒍᓱᑦᑐᑦ ᐃᑲᔪᖅᓱᐃᒍᓐᓇᖅᓯᒪᒻᒪᑕ ᑲᔪᓯᓂᖃᑦᓯᐊᖅᓯᒪᔪᒥᒃ ᐱᓕᕆᐊᒥᒃ ᐃᑲᔪᕐᓂᖃᖅᓯᒪᒻᒪᑦ ᐱᐅᓯᕚᓪᓕᖅᑎᑦᓯᒋᐊᕐᓂᕐᒧᑦ ᐋᖅᑭᑦᓱᐃᓂᕐᒧᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐸᕐᓇᐅᑎᖏᓐᓂᒃ ᓄᓇᕗᒻᒥ ᓄᓇᓕᖏᓐᓂ,” ᐅᖃᖅᓯᒪᔪᖅ ᓕᐅᓇ ᐊᒡᓗᒃᑲᖅ, ᒥᓂᔅᑕ ᐋᓐᓂᐊᖃᕐᓇᖏᑦᑐᓕᕆᔨᕐᔪᐊᒃᑯᓐᓄᑦ. “ᓂᕆᐅᑦᓯᐊᖅᑐᒍᑦ ᑐᙵᕕᓕᐅᕐᓂᐊᕋᑦᑕ ᑲᑐᔾᔨᖃᑎᒌᓐᓂᕆᔭᑦᑎᓐᓂᒃ ᑲᔪᓯᒍᑎᖃᕐᓗᑕᓗ ᐊᑲᐅᓈᖅᑐᓂᒃ ᐃᑲᔪᕈᑎᖃᕐᓂᕐᒧᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᓄᓇᕗᒻᒥᐅᓕᒫᓄᑦ.”
ᓄᓇᕗᒻᒥ ᓄᓇᓕᓐᓂ ᐃᓅᖃᑎᒌᑦᓯᐊᕐᓂᕐᒧᑦ ᐸᕐᓇᐃᓂᕐᒧᑦ ᐱᓕᕆᐊᖅ ᐋᖅᑭᑦᑕᐅᓯᒪᔪᖅ ᑲᑐᔾᔭᐅᓪᓗᓂ ᓄᓇᕗᑦ ᑐᙵᕕᒃᑯᓐᓄᑦ, ᓄᓇᕗᑦ ᒐᕙᒪᒃᑯᖏᓐᓄᑦ, ᑲᓇᑕᒥᓗ ᐋᓐᓂᐊᖃᕐᓇᖏᑦᑐᓕᕆᔨᕐᔪᐊᒃᑯᖏᓐᓄᑦ ᐅᑭᐅᖅᑕᖅᑐᒥ. ᑐᒡᓕᕆᔭᖓ ᐱᖓᓲᓕᖓᔪᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᑲᑐᔾᔨᖃᑎᒌᓐᓂᐅᕙᑦᑐᓄᑦ ᐊᐅᓚᑕᐅᓪᓚᑦᑖᓂᐊᕐᓗᑎᒃ ᑐᑭᒧᐊᖅᑎᑕᐅᓗᑎᓪᓗ ᓄᓇᕗᑦ ᑐᙵᕕᒃᑯᓐᓄᑦ, ᐱᓕᕆᐊᖅ ᐊᐅᓚᑕᐅᒍᓐᓇᖁᓪᓗᒍ ᐃᓄᓐᓃᖔᖅᑐᓂᒃ ᐃᓱᒪᒋᔭᐅᓯᒪᔪᓂᒃ.
ᐊᔾᔨᖏᓐᓂᒃ ᐅᓂᒃᑳᓕᐊᒥᓂᐅᑉ ᐊᑐᐃᓐᓇᖅᑕᓕᒃ ᓄᓇᕗᑦ ᑐᙵᕕᒃᑯᑦ ᓄᓇᕗᑦ ᒐᕙᒪᒃᑯᖏᑕᓗ ᐃᑭᐊᖅᑭᕕᖏᓐᓂ.