NTI responds to the Publication of Nunavut Inuit Child Health Survey Results
(ᔮᓐᓄᐃᕆ 28, 2010 -- ᐃᖃᓗᐃᑦ, ᓄᓇᕗᑦ)ᓄᓇᕗᑦ ᑐᙵᕕᒃ ᑎᒥᖓᑦᑕ ᐊᖓᔪᖅᑳᖓᑦ ᐹᓪ ᖃᓗᔾᔭᖅ ᐅᑉᓗᒥ ᑭᐅᔪᖅ ᐅᑯᓄᖓ ᑲᓇᑕᒥ ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ ᑲᑐᔾᔨᖃᑎᒌᖏᓐᓄᑦ ᐅᖃᓕᒫᒐᓕᐊᖑᕙᒃᑐᑦ ᐅᓂᑉᑳᓕᐊᖏᓐᓄᑦ ᑕᐃᒎᓯᓕᒃ ᓂᕿᑦ ᐊᑦᑕᓇᖅᑐᖅᑕᖃᕐᓂᖏᓐᓄᑦ ᐊᑯᓐᓂᖏᓐᓂ ᐃᓄᐃᑦ ᓄᑕᕋᐃᑦ ᐃᓕᓐᓂᐊᓕᓵᕐᓂᐊᖅᑐ:ᓄᓇᕗᑦ ᐃᓄᐃᑦ ᓄᑕᕋᑦ ᒥᒃᓵᓄᑦ ᐋᓐᓂᐊᖅᑕᐃᓕᒪᓂᕐᒧᑦ ᖃᐅᔨᓴᕈᑎᑦ, 2007-2008.
ᓄᓇᕗᑦ ᑐᙵᕕᒃ ᑎᒥᖓᑦ ᐃᓚᐅᓚᐅᖅᑐᑦ ᓴᖅᑭᑎᕆᓕᖅᑎᓪᓗᒋᑦ ᐅᑯᓄᖓ ᓄᓇᕗᒥ ᐃᓄᐃᑦ ᓄᑕᕋᑦ ᒥᒃᓵᓄᑦ ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ ᖃᐅᔨᓴᕈᑎᓂ (ᐃᓚᒋᓪᓗᓂᒋᑦ ᐅᑯᓄᖓ ᐃᓄᐃᑦ ᒥᒃᓵᓄᑦ ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ ᖃᐅᔨᓴᖅᑕᐅᓂᖏᓐᓄᑦ ᖃᐅᔨᓴᕈᑎᓂ) ᑐᓂᔭᐅᖁᓪᓗᒋᑦ ᐃᓄᐃᑦ ᓄᓇᓕᖏᑦ, ᓴᐳᓐᓂᐊᖅᑎᑦ, ᖃᐅᔨᓴᖅᑎᑦ, ᐊᒻᒪᓗ ᐊᑐᐊᒐᓂᑦ -ᓴᓇᔨᑦ ᐊᖅᑭᒃᓱᐃᓂᕐᒧᑦ ᑐᑭᓯᒋᐸᕈᒪᔭᕌᖓᑕ ᐱᔪᓐᓇᖅᑕᖏᓐᓄᑦ, ᐃᓚᖏᓐᓄᑦ ᐊᓯᖏᓐᓄᑦ ᕿᒥᕐᕈᐃᓂᕐᒧᑦ ᖃᐅᔨᓴᕈᑎᑦ ᐃᒪᓐᓇ ᐊᑐᐃᓐᓇᕈᕐᕕᐅᔪᓐᓇᕐᓗᑎᒃ ᑕᑯᓂᕐᒥᑦ ᒪᑯᓄᖓ ᑐᕌᖅᑐᓂᑦ ᐊᓐᓂᐊᖅᑕᐃᓕᒪᓂᕐᒧᑦ ᐃᓄᑦ ᓄᑕᕋᖏᓐᓄᑦ, ᐅᑭᐅᓕᑦ 3-5-ᒧᑦ ᓄᓇᕗᒥ.
ᐱᑉᓗᒋᑦ ᖃᐅᔨᔭᐅᓯᒪᔪᑦ ᓂᕿᑦ ᐃᓚᖏᓐᓄᑦ ᓄᑕᕋᐃ ᓱᕈᓯᑦ ᓂᕆᕙᒃᑕᖏᓐᓂᑦ, ᓄᓇᕗᑦ ᑐᙵᕕᒃ ᑎᒥᖓᑦᑕ ᐊᖓᔪᖅᑳᖓᑦ ᐹᓪ ᖃᓗᔾᔭᖅ ᐅᖃᖅᑐᖅ, “ᐃᓄᐃᑦ ᐱᐅᓱᒋᔮᕈᑎᖃᕆᐊᖃᖅᑐᑦ ᓴᕆᒪᓱᒃᓗᑎᒃ ᑕᒪᒃᑯᐊ ᐊᓈᓇᕗᑦ ᐊᒫᒪᒃᑎᑦᑎᖃᑦᑕᕐᒪᑕ ᐃᖕᒥᖕᓂᑦ ᓄᑕᕋᓂᑦ ᐊᒃᓲᓂᖅᓴᖅ ᖃᑉᓗᓈᓂᑦ ᑕᐅᓇᓂ ᓄᓇᓕᖕᓂᑦ, ᐊᒻᒪᓗ ᐱᖅᑯᓯᑦᑎᒍᑦ ᓂᕿᖁᑎᑦᑎᓐᓂᑦ ᑲᔪᓯᔪᖅ ᓂᕆᔭᐅᕙᖕᓂᖏᓐᓂᒃ ᐃᓗᐃᑦᑐᒥᑦ ᐃᓚᒋᓪᓗᒋᑦ ᓂᕆᕙᒃᑕᖏᓐᓂ. ᐃᓱᒫᓗᒃᑐᖓ ᐊᒻᒪᓗ ᖁᐊᖅᓵᖅᖢᖓ, ᑭᓯᐊᓂ, ᐊᖏᓂᖏᑦ ᓂᕿᑦᑎᐊᕙᐅᙱᑦᑐᑦ ᓂᐅᕕᕐᕕᓂ-ᓂᐅᕕᐊᒃᓴᓂᑦ ᐃᓄᐃᑦ ᓄᑕᕋᖏᓐᓄᑦ ᓂᕆᔭᐅᕙᒃᑐᑦ, ᑕᐃᒪᐃᑦᑐᑦ ᓯᐅᕋᐅᔮᖅᑐᓕᒻᒪᕆᐊᓗᐃᑦ ᐃᒥᒐᐃᑦ, ᓄᒍᓴᒐᐃᑦ, ᐊᒻᒪᓗ ᑕᒧᓗᒐᒃᓴᕈᓘᔭᐃᑦ ᓂᕿᑦ. ᐊᖏᓗᐊᖅᑐᑦ ᓂᕿᑦᑎᐊᕙᐅᙱᑦᑐᑦ ᓱᕈᐃᕙᒃᑐᑦ ᓄᑕᕋᐅᑉ ᐱᕈᖅᐸᓪᓕᐊᓂᐊᓂᑦ."
ᐅᓇ ᐅᖃᓕᒫᒐᖅ ᐅᖃᖅᓯᒪᖕᒥᔪᖅ ᖁᐊᖅᓵᕐᓇᖅᑐᓂᑦ ᐊᒥᓱᐊᓗᐃᑦ ᐃᓄᐃᑦ ᓄᑕᕋᖏᑦ ᑳᒃᐸᖕᓂᖏᓐᓂᒃ.
ᑕᑯᔭᕌᖓᑕ ᐊᖅᑯᓵᖅᓯᓪᓗᑕᓗ ᐊᒥᓱᐊᓗᓂᑦ ᓄᑕᕋᐃᑦ ᐊᑐᖅᐸᒃᑐᑦ ᓂᕿᖃᑦᑎᐊᙱᑦᑐᑦ, ᐅᕙᒍᑦ ᐊᒧᐊᔮᐅᕗᒍᑦ ᐱᒋᐊᕈᑎᒃᓴᓄᑦ. ᓈᒻᒪᙱᑦᑐᖅ ᑕᒪᒃᑯᐊ ᓱᕈᓯᑯᓗᐃᑦ ᓂᕿᖃᑦᑎᐊᖅᑎᑕᐅᖃᑦᑕᖏᑦᑐᑦ ᐊᑐᐃᓐᓇᐅᔪᓂᒃ. ᑕᒪᐃᑕ ᒐᕙᒪᑉᑯᑦ ᐊᐅᓪᓗᔾᔨᔭᕆᐊᖃᖅᑐᑦ ᐱᔪᓐᓇᖅᑎᑦᑎᓗᑎᒃ ᐃᓄᐃᑦ ᓄᑕᕋᖏᓐᓂᒃ ᐱᔪᓐᓇᖅᑎᑕᐅᓗᑎᒃ ᐊᒻᓐᓂᐊᕐᓇᖏᑦᑐᓄᑦ, ᐊᑭᑐᓗᐊᙱᑦᓄᑦ ᓂᕿᑖᖃᑦᑕᐃᓂᐃᒧᑦ” ᐅᖃᖅᑐᖅ ᖃᓗᔾᔭᖅ.
-30-