NTI responds to the Publication of Nunavut Inuit Child Health Survey Results
(February 01, 2010 -- Iqaluit, Nunavut) Nunavut Tunngavikkut Angayuqqaangat Paul Kaludjak uplumi kiuhimayuq taapkununnga Kanatami Aanniaqtailinikkut Katimayiinit (Canadian Medical Association Journal) Naunaitkutainit attiqhimayuq Niqailliuqtut ilihalihaaqtinnagit Inuit nutaqqat: Nunavunmi Inuit Nutaqqat Aanniaqtailinikkut Qauyihautit, 2007-2008.
NTI-kut ilauhimayut hanayautillugit taapkua Nunavunmi Inuit Nutaqqat Aanniaqtailinikkut Qauyihautait (iliqahiutihimayuq taapkununnga Inuit Aanniaqtailinikkut Qauyihautainut) tuniyauyughat Inuit nunallaanginut, ikayuqtinut, qauyihaqtinut, maligaliuqtinullu hapkununnga ayuqnaittunik ilitturiyauhimayunik, qauyihaqtauhimayunik ukiuqatigiingnit naunaitkutauyut inuuhiqattiarninginit Inuit nutaqqat ukiulingnik 3-5-mik Nunavunmi.
Ilitturiyauhimayut qauyihaqtauhimayunit nutaqqat nirivauhiinitt, NTI-kut Angayuqqaangat Paul Kaludjak uqaqhimayuq, “Inuit inmingnik quviahuqtughat amaamait iviangiqtuqtittiyukkamik nutaqqaminik taapkuninngat qaplunaat nunaaninngaaqtunit, imaalu niqituqait niriyauvaktut huli niqigigaptitku. Ihumaaluktunga kihimi, niqittiangunngittut niuviqtauvaktut Inuit nutaqqanit, tahapkuatut aughiriaqpaallait niuqqait, uqummiat, niqittiangungittullu. Nirivallaaraangamik niqittiangungittunik amiqnaqtut nutaqqanut timiinut ilitpalliatjuhiinullu.”
Titiqqanilu titiraqhimayut taimaa amihuuyut Inuit nutaqqat kaaliqpaktut. “Amigaittunik nutaqqanik niqailliuqtunik takugaangapta, ihuaqharahuaqpaktavut. Ihuigigaptitku taimaa nutaqqat niqighailiuqtut. Tamangnik kavamatkut havakpallialiqtughat Inuit nutaqqanut niqighaqtaqnikkut niqittianik, akituvallaanngittunik ayuqnaiyaqlugit,” uqaqtuq Kaludjak.