American Proposal to Uplist Polar Bears is Rejected

(ᒫᑦᓯ 18, 2010-ᑐᕼᐊ, ᖃᑕᕐ) ᑭᒡᒐᑐᖅᑏᑦ ᑐᙵᕕᒃᑯᓐᓄᑦ ᐊᒻᒪ ᐊᕕᒃᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᑲᑎᒪᓂᕐᒨᖅᓯᒪᓚᐅᖅᑐᑦ ᑲᑎᒪᓂᐅᖃᑦᑕᖅᑐᖅ ᓯᓚᕐᔪᐊᓕᒫᒥ ᐆᒪᔪᓕᕆᓂᕐᒧᑦ ᐊᑦᑕᓇᕐᑐᒦᑦᑐᓄᑦ (CITES) 15-ᖓᓐᓂ ᑲᑎᒪᔩᑦ ᑲᑎᒪᓂᖃᖅᑎᓪᓗᒋᑦ ᑐᕼᐊ, ᖃᑕᕐᒥ.

ᐊᒥᐊᓕᒐᓄᑦ ᑐᒃᓯᕋᐅᑎᐅᓚᐅᑐᖅ ᐊᓯᔾᔨᖅᑕᐅᖁᓪᓗᒋᑦ ᓇᓄᐃᑦ ᑎᑎᕋᖅᑕᐅᓯᒪᓂᖏᑦ ᐊᐱᐊᓐᑎᒃᔅ 11-ᒥ ᐊᐱᐊᓐᑎᒃᔅ 1-ᒧᑦ ᐆᒪᔪᓕᕿᓂᕐᒧᑦ ᐊᑦᑕᓇᖅᑐᒦᓕᕐᓂᕆᖃᖅᑕᐅᔪᑦ ᓂᕈᐊᕈᑕᐅᖅᑲᐅᔪᖅ ᐅᓪᓛᖅ ᑐᕼᐊᕐᒥ ᓄᓇᓕᕐᔪᐊᓂ ᑭᒡᒐᑐᖅᑎᐅᔪᓄᑦ. ᑐᒃᓯᕋᐅᑎᐅᔪᖅ ᐱᕕᒃᓴᖃᖅᑎᑦᓯᒍᓐᓃᕋᔭᕐᒪᑦ ᓯᓚᕐᔪᐊᒥ ᑐᐅᖅᓰᒍᑕᐅᖃᑦᑕᕐᓂᖏᓐᓄᑦ ᓇᓄᐃᑦ.

ᑐᒃᓯᕋᐅᑎᐅᔪᖅ ᓵᓚᐅᖃᐅᔪᖅ 48 ᓈᒻᒪᓴᖅᑐᑎᒃ, 62 ᓈᒻᒪᓴᙱᒃᑐᑎᒃ ᐊᒻᒪ 11 ᓂᕈᐊᙱᒃᑐᑎᒃ. ᑭᖑᓪᓕᖅᐹᒥ ᐃᓱᒪᓕᐅᕈᑕᐅᓂᐊᑐᖅ ᐊᒥᐊᓕᒐᐃᑦ ᑐᒃᓯᕋᐅᑎᖓ ᐱᓇᓱᐊᕈᓯᐅᓛᖅᑐᒥ, ᒫᑦᓯ 25-ᖑᓕᖅᐸᑦ, CITES ᓈᒪᓗᑎᒃ ᑲᑎᒪᓂᖃᓕᖅᐸᑕ. ᑐᙵᕕᒃᑯᑦ ᑭᒡᒐᑐᖅᑎᖏᖏᑦ ᓂᕆᐅᒃᐳᑦ ᐊᖏᖅᑕᐅᖏᓐᓂᕆᖅᑲᐅᔭᖓ ᓈᒻᒪᒋᔭᐅᓂᐊᕋᓱᒋᓪᓗᓂᔾᔪᒃ.

ᐊᒥᐊᓕᒐᐃᑦ ᑐᒃᓯᕋᐅᑎᓕᐅᓚᐅᖅᐳᑦ ᖃᐅᔨᓴᕐᓂᒃᑯᑦ ᓇᓚᐅᑦᓵᖅᑐᑎᒃ ᓇᔪᒐᐅᔪᓄᑦ ᐊᓯᐅᔨᕙᓪᓕᐊᓂᕋᐃᓪᓗᑎᒃ ᐊᒻᒪ ᐅᓄᕈᓐᓃᐸᓪᓕᐊᓱᒋᑦᑎᓪᓗᑎᒃ ᓇᓄᕐᓂᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ. ᑲᓇᑕ, ᑲᓛᖡᑦ, ᓄᐊᕐᕙᐃᑦ ᐊᒻᒪ ᕋᓴ ᓇᓄᖃᕐᕕᓪᓗᐊᑕᐅᖕᒪᑕ.

ᑕᒪᕐᒥᒃ ᓯᑕᒪᑦ ᓄᓇᓕᕐᔪᐊᑦ ᐊᖏᖅᑲᐅᖏᑦᑐᑦ ᑐᒃᓯᕋᐅᑎᐅᓯᒪᔪᒥᒃ. ᑐᒃᓯᕋᐅᑎᐅᔪᖅ ᐊᖏᖅᑕᐅᖃᐅᖏᒻᒥᔪᖅ ᔨᐅᕋᑉᒥ ᑲᑐᔾᔨᖃᑎᒌᒃᑯᓐᓄᑦ, ᐊᒻᒪ ᐊᒥᓲᓂᖅᓴᐃᑦ ᐊᕗᕆᑲᐅᑉ ᓄᓇᓕᖁᑎᖏᑦ.

ᑐᙵᕕᒃᑯᑦ ᐊᒻᒪᐊᕕᒃᑐᖅᓯᒪᔪᓂ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᖏᑕ ᑭᒡᒐᑐᖅᑎᖏᑦ ᐱᓇᓱᐊᕈᓯᐅᓚᐅᖅᑐᒥ ᑐᕼᐊᕐᒥ ᖃᓄᖅᑑᓚᐅᖅᐳᑦ ᓇᓗᓇᐃᔭᐃᓪᓗᑎᒡᓗ ᐃᓄᐃᑦ ᐃᓱᒫᓘᑎᖏᓐᓂᒃ ᑐᒃᓯᕋᐅᑎᐅᓯᒪᔪᒧᑦ. ᐅᓪᓗᒥ ᓵᓚᒃᓴᕐᓂᖃᖅᐳᑦ ᖃᓄᖅᑑᖃᑦᑕᕐᓯᒪᓂᖏᓐᓄᑦ ᓄᓇᕗᑦ ᑐᙵᕕᒃ ᑎᒥᖓᑦ, ᐊᕕᒃᑐᖅᓯᒪᔪᓂ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᑦ, ᐊᕕᒃᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᑦ ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐊᒻᒪ ᓄᓇᕗᑦ ᒐᕙᒪᖓ.