ᓄᓇᕗᒻᒥ ᐊᖏᖃᑎᒌᒍᑎᒧᑦ ᓇᓗᓇᐃᒃᑯᑕᖅ

ᔪᓚᐃ 9, 2013-ᖑᓕᖅᐸᑦ, ᓄᓇᕗᑦ ᖁᕕᐊᓲᑎᖃᓛᕐᒪᑦ 20-ᒋᓕᖅᑕᖓᓂᒃ ᓇᓪᓕᐅᓐᓂᖅᓯᐅᖅᑎᓪᓗᒋᑦ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᒥᒃ. ᐃᖅᑲᐅᒪᔭᐅᖁᓪᓗᒍ ᑖᓐᓇ ᐱᕐᔪᐊᖑᓪᓗᓂ ᓄᓇᕗᒻᒥ ᐊᒻᒪ ᑲᓇᑕᒥ ᐱᐅᓯᕆᔭᐅᕙᓚᐅᖅᑐᓂᒃ, ᓄᓇᕗᑦ ᑐᙵᕕᒃᑯᑦ ᑎᓕᓯᓚᐅᖅᐳᑦ ᓇᓗᓇᐃᒃᑯᑕᕐᒥᒃ ᐃᖅᑲᐅᒪᔾᔪᑕᐅᓂᐊᖅᑐᒥᒃ ᐊᕐᕌᒍᒐᓴᖕᓄᑦ ᑕᖃᓱᐃᑦᑑᓪᓗᑎᒃ ᐱᓕᕆᖃᑦᑕᖅᓯᒪᓂᖏᓐᓄᑦ ᑭᒃᑯᓕᒫᑦ ᐃᑲᔪᓚᐅᖅᑐᑦ ᐋᖅᑭᒃᓱᐃᓂᕐᒥᒃ, ᐋᔩᖃᑎᖃᕐᓂᕐᒥᒃ, ᒫᓐᓇᓗ ᐊᑐᓕᖅᑎᑦᑎᓂᕐᒥᒃ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᒥᒃ.

ᓄᓇᕗᑦ ᑐᙵᕕᒃᑯᑦ ᓂᕈᐊᖅᓯᓚᐅᖅᐳᑦ ᐊᑕᐅᓯᕐᒥᒃ ᓴᓇᙳᐊᖅᑎᒻᒪᕆᖕᒥᒃ ᐊᑐᓂ ᓄᓇᓖᑦ ᐊᕕᒃᑐᖅᓯᒪᓂᖏᓐᓂᒃ ᓄᓇᕘᒥ ᓴᓇᙳᐊᕐᓂᐊᖅᑐᒥᒃ ᓇᓗᓇᐃᒃᑯᑕᕐᒥᒃ. ᐊᒥᓱᑦ ᓴᓇᙳᐊᖅᑏᑦ ᐱᓇᔪᓚᐅᖅᐳᑦ ᓴᓇᙳᐊᖅᑕᐅᔪᒪᓪᓗᑎᒃ, ᐱᓇᔪᒍᑕᐅᔪᕐᓗ ᐊᔪᕐᓇᓚᐅᖅᐳᖅ.

ᒪᐃ 2011-ᖑᑎᓪᓗᒍ, ᐃᓄᒃ ᓵᓕ ᑕᓗᕐᔪᐊᕐᒥᐅᑕᖅ, ᐹᓪ ᒪᓕᑭ ᓇᐅᔮᕐᒥᐅᑕᖅ, ᓘᑎ ᐱᔾᔭᒥᓂ ᐊᐅᓱᐃᑦᑐᕐᒥᐅᑕᖅ ᐃᖃᓗᓐᓅᓚᐅᕐᒪᑕ ᑎᑎᕋᐅᔭᕆᐊᖅᖢᑎᒃ ᓇᓗᓇᐃᒃᑯᑕᕐᒥᒃ.

ᐱᓇᓱᐊᕈᓯᓕᒫᒥᒃ ᓴᓇᓚᐅᖅᐳᑦ ᐋᖅᑭᒃᓯᒪᓂᒃᓴᖓᓂᒃ, ᑭᖑᓂᐊᒍᓪᓗ, ᒥᑭᓐᓂᖅᓴᒥᒃ ᓴᓇᓯᒪᔪᒥᒃ ᐋᖅᑭᒃᓯᓪᓗᑎᒃ ᐅᖃᓚᐅᖅᖢᑎᒃ ᑕᑯᒃᓴᐅᑎᑦᑎᓂᖏᓐᓂᒃ ᐅᓄᖅᑐᓂᒃ ᐱᒻᒪᕆᐅᓛᓂᒃ ᓇᓗᓇᐃᒃᑯᑕᕐᓂᒃ ᐃᓄᐃᑦ ᐃᓕᖅᑯᓯᖏᓐᓂᒃ.

ᑖᒃᑯᐊ ᐱᖓᓱᑦ ᓴᓇᙳᐊᖅᑏᑦ ᐅᑎᓚᐅᖅᑐᑦ ᐃᖃᓗᓐᓄᑦ ᔫᓂ, 2012-ᖑᑎᓪᓗᒍ, ᐊᒻᒪᓗ ᐱᔭᕇᖅᓯᓪᓗᑎᒃ ᑕᒪᕐᒥᑲᓴᒃ ᐊᖏᔫᑕᐅᓂᖅᓴᓂᒃ ᓴᓇᙳᐊᖅᑕᐅᔪᓂᒃ.

ᐅᑎᖅᖢᑎᒃ ᐃᖃᓗᖕᓄᑦ ᐊᐃᕐᕆᓕ, 2013-ᒥ, ᐱᐊᓂᒃᓯᔭᖅᑐᖅᖢᑎᒃ ᓇᓗᓇᐃᒃᑯᑕᕐᒥᒃ ᓅᖦᖢᒍᓗ ᐃᓂᒋᓂᐊᖅᑕᖓᓄᑦ ᐃᓕᔭᐅᓂᐊᕐᓗᓂ. ᓇᓗᓇᐃᒃᑯᑕᖅ ᓴᖅᑭᑕᐅᓛᖅᑐᖅ ᖁᕕᐊᓲᑎᖃᓕᖅᐸᑕ ᓄᓇᕗᑦ ᑐᙵᕕᒃᑯᑦ ᑎᑎᕋᕐᕕᖓᓂ ᐃᖃᓗᖕᓂ ᓄᓇᕗᑦ ᐅᓪᓗᖓᓂ, ᔪᓚᐃ 9, 2013-ᒥ.

ᑖᓐᓇ ᓇᓗᓇᐃᒃᑯᓯᖅᑕᐅᓯᒪᔪᖅ ᐃᓕᑕᕐᓯᔾᔪᑕᐅᕗᖅ ᐊᒻᒪᓗ ᐊᒃᓱᐊᓗᒃ ᖁᔭᓐᓇᒦᕈᑕᐅᓪᓗᓂ ᐃᓄᓕᒫᓄᑦ ᐱᒻᒪᕆᐅᔪᒥᒃ ᐱᓕᕆᐊᖃᓚᐅᖅᑐᓄᑦ ᐋᔩᖃᑎᖃᖅᑎᓪᓗᑕ ᓄᓇᕘᒥ ᓄᓇᑖᕐᓂᕐᒧᑦ ᐊᖏᕈᑎᐅᔪᒥᒃ.

ᐊᑕᐅᓯᕐᒨᖓᓚᐅᓐᖏᑦᑐᖅ ᑭᓯᐊᓂ ᐊᖏᖃᑎᒌᒐᓱᐊᖅᑎᓄᑦ, ᑲᑎᒪᔨᓄᑦ, ᑐᓵᔨᓄᑦ, ᑐᑭᓕᐅᕆᔨᓄᑦ, ᒪᓕᒐᓕᕆᔨᓄᑦ, ᐊᓪᓛᑦ ᓄᓇᓕᕆᔨᓄᑦ, ᐃᑲᔪᓚᐅᖅᑐᑦ ᓄᓇᑖᕐᓂᕐᒧᑦ ᐊᖏᕈᑎᒥᒃ. ᓄᓇᕗᑦ ᑐᙵᕕᒃᑯᑦ ᖁᔭᓕᕗᑦ ᐃᓄᓕᒫᓂᒃ ᓄᓇᓕᓐᓃᑦᑐᓂᒃ ᐊᑐᓚᐅᖅᑐᓂᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐃᑲᔪᓚᐅᖅᑐᓂᒃ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᒧᑦ. ᐃᓄᐃᑦ ᐊᒃᓱᕈᖃᑦᑕᓚᐅᖅᑐᑦ ᐊᒻᒪᓗ ᐅᓇᑕᖅᑐᑎᒃ ᐊᒻᒪᓗ ᐊᑐᖅᑐᑎᒃ ᖃᐅᔨᒪᓂᕐᒥᓂᒃ ᐊᒥᓱᐊᓗᓐᓂᒃ ᐱᕚᓪᓕᕈᑎᖃᖅᑐᑎᒃ ᐊᖏᖃᑎᒌᒍᑎᒥ. ᑖᓐᓇ ᓇᓗᓇᐃᒃᑯᑕᖅ ᐃᓕᓴᖅᓯᔪᖅ ᐃᓚᒌᓕᒫᓂᒃ ᑐᓐᓂᖅᑯᑎᖃᓚᐅᖅᑐᓂᒃ ᐊᐃᑉᐸᕐᒥᓂᒃ ᐊᒻᒪᓗ ᓄᓕᐊᕐᒥᓂᒃ ᐋᔩᖃᑎᒌᑦᑎᓪᓗᒋᑦ ᐊᒻᒪᓗ ᐊᖏᖅᑕᐅᓇᓱᐊᖅᑎᓪᓗᒋᑦ. ᐊᒥᓱᐊᖅᑎᖅᑐᑎᒃ ᐃᓄᐃᑦ ᕿᒪᐃᓯᒪᖃᑦᑕᓚᐅᖅᑐᑦ ᐃᓚᒥᓐᓂᒃ ᐱᓇᓱᐊᕈᓯᒐᓴᓐᓂᒃ, ᐊᕐᕌᒍᑕᒫᑦ, ᐊᒻᒪᓗ ᓄᓇᕗᑦ ᑐᙵᕕᒃᑯᑦ ᐃᓕᓴᖅᓯᕗᑦ ᐊᒻᒪᓗ ᐅᐱᒍᓱᑦᑐᑎᒃ ᑕᒪᑐᒥᖓ ᐱᒻᒪᕆᐅᔪᒥᒃ ᖁᔭᓈᖅᓯᓯᒪᓂᕐᒥᓂᒃ.