ᑎᑎᕋᖅᑎᒻᒪᕆᐅᓂᖅᓴᖅ – ᓴᖅᑭᖅᑕᐅᒃᑲᓐᓂᖅᑐᖅ

ᑐᓴᐅᒪᔾᔪᑎᓕᕆᔨᒃᑯᑦ ᐱᓕᕆᕝᕕᖓ
ᐃᖃᓗᐃᑦ, ᓄᓇᕗᑦ

ᐊᖓᔪᖅᑳᖃᕐᓗᓂ ᑐᑭᒧᐊᑦᑎᑦᑎᔨᖓᓂᒃ ᑐᓴᐅᒪᔾᔪᑎᓕᕆᔨᒃᑯᑦ, ᑎᑎᕋᖅᑎᒻᒪᕆᐅᓂᖅᓴᖅ ᐱᓕᕆᐊᒃᓴᓕᒃ ᑎᑎᕋᕐᓂᕐᒥᒃ ᐋᖅᑭᒋᐊᕆᓂᕐᒥᓪᓗ ᑐᑭᒧᐊᒍᑎᒃᓴᓂᒃ ᑐᓴᐅᒪᔾᔪᑎᓕᕆᓂᕐᒧᑦ ᓄᓇᕗᑦ ᑐᙵᕕᒃ ᑎᒥᖓᓄᑦ ᐊᒻᒪᓗ ᑐᑭᒧᐊᒍᑎᒃᓴᓄᑦ ᐃᑲᔫᑏᓂᒃ ᑐᓴᐅᒪᔾᔪᑎᓕᕆᓂᕐᒧᑦ ᐱᓕᕆᕝᕕᐊᓄᑦ. ᑎᑎᕋᖅᑎᒻᒪᕆᐅᓂᖅᓴᖅ ᐱᓕᕆᐊᒃᓴᖃᕐᓂᐊᖅᑐᖅ ᓯᕗᓕᕐᓂᕐᒥᒃ ᐱᕙᓪᓕᐊᑎᑦᓯᓂᕐᒧᑦ ᑲᔪᓯᑎᑦᓯᕙᓪᓕᐊᓂᕐᒧᓪᓗ ᑕᒪᐃᓐᓂᒃ ᑐᙵᕕᒃᑯᑦ ᑐᓴᐅᒪᔾᔪᑎᓕᕆᐊᖏᓐᓂᒃ ᐃᓚᒋᔭᐅᓗᑎᒃ ᑭᓯᐊᓂ ᑖᒃᑯᑑᖏᑦᑐᑦ ᑐᙵᕕᒃᑯᑦ ᐊᕐᕌᒎᑕᒫᖅᓯᐅᒻᒥᒃ ᐅᓂᒃᑳᖏᓐᓂᒃ, ᑐᓴᕋᑦᓴᙳᖅᑎᑕᐅᔪᓂᒃ, ᓇᖕᒥᓂᖅ−ᒐᕙᒪᖃᕐᓂᕐᒧᑦ ᕿᒥᕐᕈᓂᖅ, ᐊᒻᒪᓗ ᐊᓯᖏᓐᓂᒃ ᓴᖅᑭᖅᑕᐅᔪᓂ.

ᐊᐱᖅᓱᖅᑕᐅᔪᓐᓇᖁᓪᓗᑎᑦ; ᐃᓕᓐᓂᐊᕕᔾᔪᐊᒥ ᐃᓕᓴᕆᔭᐅᔾᔪᑎᑖᖅᓯᒪᒋᐊᖃᖅᑐᑎᑦ ᑐᓴᐅᒪᔾᔪᑎᓕᕆᓂᕐᒧᑦ, ᐱᕙᓪᓕᐊᔪᓕᕆᓂᕐᒧᑦ, ᐅᕝᕙᓘᓐᓃᑦ ᐊᑦᑐᐊᓂᓕᒻᒥᒃ ᑖᒃᑯᓄᖓ; ᐅᕝᕙᓘᓐᓃᑦ ᓈᖕᒪᒋᔭᐅᔪᓐᓇᖅᑐᓂᒃ ᑕᒪᒃᑮᓐᓂᒃ ᐃᓕᓐᓂᐊᓂᕐᒥᒃ, ᐱᓕᖕᒪᒃᓴᓂᕐᒥᒃ ᐊᒻᒪᓗ/ᐅᕝᕙᓘᓐᓃᑦ ᐱᓕᕆᓯᒪᓂᒃᑯᑦ. ᐃᖅᑲᓇᐃᔮᖅᑖᖅᑐᖅ ᓇᖕᒥᓂᖅ ᐋᖅᑭᑦᓱᐃᔪᓐᓇᕆᐊᓕᒃ ᓯᕗᓪᓕᐅᔾᔭᐅᔭᕆᐊᓕᖕᓂᒃ ᐊᒻᒪᓗ ᐊᐅᓚᑦᓯᒍᓐᓇᕐᓗᓂ ᐊᒥᓱᓂᒃ ᐅᓇᒻᒥᓴᐅᑎᓂᒃ, ᐱᔭᕆᐊᑐᔪᓂᒃ, ᐊᑕᐅᓯᐅᖏᑦᑐᒧᑦ ᐱᓕᕆᐊᓂᒃ; ᐊᐅᓚᑦᓯᒍᓐᓇᓯᐊᕐᓗᓂ ᑲᑎᒪᔪᓂᒃ ᑐᑭᓯᑎᑦᓯᒍᓐᓇᕐᓗᓂ ᐊᒻᒪᓗ ᑎᒍᓯᒍᓐᓇᕐᓗᓂ ᐃᓱᒪᒋᔭᐅᔪᓂᒃ ᐅᖃᐅᓯᐅᔪᓂᓪᓘᓐᓃᑦ; ᐊᒻᒪᓗ ᐋᖅᑭᑦᓱᐃᓯᒪᒍᓐᓇᕐᓗᓂ, ᑐᑭᓯᑎᑦᓯᒋᐊᕈᓐᓇᕐᓗᓂ ᐊᒻᒪᓗ ᐅᖃᖃᑎᖃᕈᓐᓇᕐᓗᓂ ᐱᔭᕆᐊᑐᔪᓂᒃ ᐱᖕᒪᕆᐅᔪᓂᓪᓗ ᐃᓱᒪᒋᔭᐅᔪᓂᒃ ᐃᑲᔫᑎᒍᓐᓇᖅᑐᓂᒃ ᐃᓚᐅᑎᑦᓯᓗᓂ ᑐᑭᓯᓇᑦᓯᐊᖅᑐᓂᒃ ᑐᓴᖅᑎᑦᓯᒍᑎᓂᒃ.
ᓴᓇᑐᓗᓂ ᐊᒻᒪᓗ ᐊᔪᙱᓯᐊᕐᓗᓂ ᑎᑎᕋᕐᓂᕐᒥᒃ ᐋᖅᑭᒋᐊᕆᓂᕐᒥᓪᓗ ᐱᕙᓪᓕᐊᔪᓅᖓᔪᓂᒃ. ᐱᓕᕆᓕᒻᒪᓗᓂ ᐱᐊᓂᖃᑦᑕᓂᕐᒥᒃ ᐱᓕᕆᐊᓂᒃ ᑐᑭᖏᓐᓅᖓᑦᓯᐊᖅᑐᓂᒃ ᐱᐊᓂᒡᓗᒋᑦ ᐊᒻᒪᓗ ᐃᓂᕈᑎᓂᒃ ᐅᓂᒃᑳᓕᐊᓄᑦ. ᓇᓕᖅᑯᓯᑦᓯᐊᖅᑐᓂᒃ ᐊᐅᓚᑕᐅᔪᓂᒃ ᐱᓕᕆᐊᓂᒃ ᑕᒪᕐᒥᒃ ᐱᓕᕆᖃᑎᒌᑦᑐᓄᑦ ᐃᓚᒋᔭᐅᓗᓂ ᐊᖓᔪᖅᑲᐅᑏᑦ ᐊᒻᒪᓗ ᑲᑎᒪᔩᑦ ᑐᓂᔭᐅᖃᑦᑕᕈᓐᓇᖁᓪᓗᒋᑦ ᓇᓕᖅᑯᑦᑐᓂᒃ ᑐᓴᕈᑎᓂᒃ ᐅᖃᓕᒪᒍᓐᓇᑦᓯᐊᕈᑎᒃᓴᓂᒃ ᑭᒃᑯᑐᐃᓐᓇᐃᑦ ᓵᖓᓂ ᐊᒻᒪᓗ ᐱᕙᓪᓕᐊᔪᓕᕆᔨᒃᑯᑎᒍᑦ. ᐋᖅᑭᑦᓯᒪᑦᓯᑦᓯᐊᕈᓐᓇᕐᓗᓂ ᑎᑎᕋᕈᓐᓇᕐᓗᓂᓗ ᑐᓴᐅᒪᔾᔪᑎᑦᓴᓄᑦ ᑐᑭᒧᐊᒍᑎᒃᓴᓂᒃ, ᐸᕐᓇᐅᑎᓂᒃ ᐊᑐᕋᑦᓴᓂᓪᓗ. ᐅᖃᕈᓐᓇᖅᐸᑦ ᖃᓪᓗᓈᑎᑐᑦ ᐃᓄᒃᑐᓪᓗ ᐱᔪᒐᕆᔭᐅᓂᖅᓴᐅᔪᖅ.

ᐱᔪᒐᕆᔭᐅᓂᖅᓴᐅᓂᐊᖅᑐᑦ ᐃᓄᐃᑦ ᐊᑎᖃᖃᑕᐅᔪᑦ ᓄᓇᕗᑦ ᐊᖏᕈᑎᖏᓐᓂ

ᐱᒋᐊᕐᕕᖓ ᑮᓇᐅᔾᔭᒃᓴᐅᑎᐅᑉ $145,800.00 ᐊᕐᕌᒍ ᐊᑕᐅᓯᖅ (ᑮᓇᐅᔾᔭᓴᕐᓂᖅᓴᐅᒍᓐᓇᖅᑐᖅ ᐱᓇᓱᐊᖅᓯᒪᓂᖓᒍᑦ) ᐃᓚᖃᕐᓗᓂ ᐊᑕᖏᖅᑐᓂᒃ ᐃᑲᔫᑎᓂᒃ ᐃᓚᒋᔭᐅᓗᑎᒃ ᐃᖅᑲᓇᐃᔭᖅᑎᓄᑦ ᐃᑦᑐᖅᓯᐅᑎᑖᕈᑎᒃᓴᓄᑦ ᐲᔭᐃᓂᖅ, ᑲᑐᔾᔨᖃᑎᒌᑦ ᓇᓪᓕᐅᒃᑯᒫᖏᑦ ᐊᒻᒪᓗ ᕿᑲᕐᓂᕐᒧᑦ ᐃᑲᔫᑏᑦ.

ᑐᙵᕕᒃᑯᑦ ᐃᑲᔫᑎᖃᓲᑦ ᐊᔾᔨᒌᙱᑐᖅᑎᒍᑦ ᐃᓪᓗᒧᑦ ᐃᑲᔫᑎᓂᒃ ᐃᖅᑲᓇᐃᔭᖅᑎᓄᑦ ᐃᓚᒋᔭᐅᓗᑎᒃ ᐃᓪᓗᒥᒃ ᑎᒍᓯᔾᔪᑎᒃᓴᒧᑦ ᐃᑲᔫᑎ ᐊᒻᒪᓗ ᐃᓪᓗᒧᑦ ᐃᑲᔪᖅᑕᐅᔾᔪᑎᑦ $36,639.36

ᐊᑕᖏᖅᑐᒥᒃ ᓇᓪᓕᖅᑲᑖᕈᒪᒍᕕᑦ ᐃᖅᑲᓇᐃᔮᒧᑦ ᓇᓗᓇᐃᔭᐅᑎᒥᒃ ᖃᐅᔨᒃᑲᕐᓗᒍ;

ᐃᖅᑲᓇᐃᔭᖅᑐᓕᕆᔨᒃᑯᑦ
ᓄᓇᕗᑦ ᑐᙵᕕᒃ ᑎᒥᖓ
ᑲᖏᕐᖠᓂᖅ, ᓄᓇᕗᑦ
ᐃᕐᖐᓐᓈᕈᑖ: NTIHR@tunngavik.com
ᐅᖄᓚᐅᑖ: (867) 645-5440
ᓱᒃᑲᔪᒃᑰᕈᑖ: (867) 645-5414

ᒪᑐᕕᑦᓴᖓ ᐅᓪᓗᖅ: ᐆᑦᑑᑉᐱᕆ 16, 2026

ᐱᓂᐊᕐᓂᕋᐅᑎᕗᑦ: ᐃᓄᖕᓄᑦ ᐱᕚᓪᓕᕈᑎᒃᓴᐅᔪᑦ ᐃᓅᓯᒃᑯᑦ, ᐱᖅᑯᓯᑐᖃᒃᑯᑦ, ᐱᕙᓪᓕᐊᔪᓕᕆᓂᒃᑯᑦ ᐊᖏᖃᑎᒌᒍᑦ ᐊᑐᕐᓗᒍ