ᓄᓇᕗᒻᒥ ᐃᓅᓯᕐᒥᒃ ᑭᐱᓯᑎᑦᑎᑦᑕᐃᓕᒪᓂᕐᒧᑦ ᐱᓕᕆᐊᖑᕙᓪᓕᐊᔪᒪᔪᖅ 2010
Description
ᐃᖕᒥᓃᕐᓂᖅ ᐊᒃᑐᖅᓯᕙᒃᐳᖅ ᐃᓅᓯᕆᔭᐅᔪᓕᒫᓂᒃ ᓄᓇᕗᒻᒥᐅᓕᒫᓂᒃ. ᐊᖏᔪᒻᒪᕆᖕᒥᒃ ᐃᓅᔪᓐᓃᖅᑐᖃᖅᐸᖕᓂᖓ − ᐱᓗᐊᙳᐊᖅᖢᓂ ᐃᓄᐃᑦ ᒪᒃᑯᒃᑐᖁᑎᖏᓐᓂ − ᖃᐅᔨᒪᔭᐅᑦᑎᐊᖅᐳᖅ ᑕᒫᓂ ᐅᑭᐅᖅᑕᖅᑐᒥ ᐊᕕᒃᓯᒪᓂᕆᔭᐅᔪᒥ. ᖃᔅᓰᓐᓇᑯᓗᐃᑦ ᐃᓄᐃᑦ ᖃᐅᔨᖃᑦᑕᖅᓯᒪᕗᑦ ᐊᖏᑎᒋᔪᒥᒃ ᐃᖕᒥᓃᖅᑐᖃᖅᐸᖕᓂᖓᓂᒃ ᓄᓇᕗᒻᒥᐅᑦ ᐃᓄᐃᑦ ᐊᑐᖅᓯᒪᔭᖏᓐᓂᒃ ᐊᕐᕌᒍᓂ 40−ᓂ ᖄᖏᖅᓯᒪᓕᖅᑐᓂ, ᖃᔅᓰᓐᓇᐃᓪᓗ ᐃᓂᒋᔭᐅᔪᑦ ᐊᑐᖅᓯᒪᕗᑦ ᐊᖏᑎᒋᔪᒥᒃ ᐃᖕᒥᓃᕐᓂᕐᒧᑦ−ᐊᒃᑐᐊᓂᓕᖕᓂᒃ ᖁᐊᖅᓵᖅᓯᒪᓂᕆᔭᐅᕙᒃᑐᒥᒃ ᓄᓇᕗᒻᒥᑎᑐᑦ. ᓄᓇᕗᒻᒥᐅᑦ ᓵᑦᑎᐊᕐᒥᐅᑕᖃᖃᑦᑕᖅᓯᒪᕗᑦ ᐊᑕᐅᓰᓐᓇᓕᔪᒥᒡᓗ ᐃᖕᒥᓃᖅᑐᖃᖅᐸᖕᓂᖓᓄᑦ ᐊᖏᖅᓯᓯᒪᓕᖅᖢᑎᒡᓗ ᖃᓄᐃᓕᖓᓂᕆᔭᐅᔪᒥᒃ ᑕᐃᒪᐃᒐᔪᖕᓂᖓᓂᒃ. ᑕᐃᒪᐃᒃᑲᓗᐊᖅᑎᓪᓗᒍ, ᐊᔪᕐᓇᖅᑐᒻᒪᕆᐊᓘᓯᒪᕗᖅ ᒪᑐᐃᙶᑦᑎᐊᖅᖢᓂ ᐅᖃᐅᓯᖃᕆᐊᒃᓴᖅ ᑕᒪᑐᒥᖓ ᐃᓱᒪᒋᔭᒃᓴᒥᒃ ᓄᓇᕗᒻᒥ, ᓇᖕᒥᓂᖅ, ᖃᑕᙳᑎᒌᑎᒍᑦ, ᓄᓇᓕᖕᓂ, ᒐᕙᒪᓕᕆᓂᒃᑯᓪᓘᓐᓃᑦ. [...]