ᓄᓇᕗᒻᒥ ᐊᖏᖃᑎᒌᒍᑎᒧᑦ ᓇᓗᓇᐃᒃᑯᑕᖅ

ᔪᓚᐃ 9, 2013-ᖑᓕᖅᐸᑦ, ᓄᓇᕗᑦ ᖁᕕᐊᓲᑎᖃᓛᕐᒪᑦ 20-ᒋᓕᖅᑕᖓᓂᒃ ᓇᓪᓕᐅᓐᓂᖅᓯᐅᖅᑎᓪᓗᒋᑦ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᒥᒃ. ᐃᖅᑲᐅᒪᔭᐅᖁᓪᓗᒍ ᑖᓐᓇ ᐱᕐᔪᐊᖑᓪᓗᓂ ᓄᓇᕗᒻᒥ ᐊᒻᒪ ᑲᓇᑕᒥ ᐱᐅᓯᕆᔭᐅᕙᓚᐅᖅᑐᓂᒃ, ᓄᓇᕗᑦ ᑐᙵᕕᒃᑯᑦ ᑎᓕᓯᓚᐅᖅᐳᑦ ᓇᓗᓇᐃᒃᑯᑕᕐᒥᒃ ᐃᖅᑲᐅᒪᔾᔪᑕᐅᓂᐊᖅᑐᒥᒃ ᐊᕐᕌᒍᒐᓴᖕᓄᑦ ᑕᖃᓱᐃᑦᑑᓪᓗᑎᒃ ᐱᓕᕆᖃᑦᑕᖅᓯᒪᓂᖏᓐᓄᑦ ᑭᒃᑯᓕᒫᑦ ᐃᑲᔪᓚᐅᖅᑐᑦ ᐋᖅᑭᒃᓱᐃᓂᕐᒥᒃ, ᐋᔩᖃᑎᖃᕐᓂᕐᒥᒃ, ᒫᓐᓇᓗ ᐊᑐᓕᖅᑎᑦᑎᓂᕐᒥᒃ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᒥᒃ.

ᓄᓇᕗᑦ ᑐᙵᕕᒃᑯᑦ ᓂᕈᐊᖅᓯᓚᐅᖅᐳᑦ ᐊᑕᐅᓯᕐᒥᒃ ᓴᓇᙳᐊᖅᑎᒻᒪᕆᖕᒥᒃ ᐊᑐᓂ ᓄᓇᓖᑦ ᐊᕕᒃᑐᖅᓯᒪᓂᖏᓐᓂᒃ ᓄᓇᕘᒥ ᓴᓇᙳᐊᕐᓂᐊᖅᑐᒥᒃ ᓇᓗᓇᐃᒃᑯᑕᕐᒥᒃ. ᐊᒥᓱᑦ ᓴᓇᙳᐊᖅᑏᑦ ᐱᓇᔪᓚᐅᖅᐳᑦ ᓴᓇᙳᐊᖅᑕᐅᔪᒪᓪᓗᑎᒃ, ᐱᓇᔪᒍᑕᐅᔪᕐᓗ ᐊᔪᕐᓇᓚᐅᖅᐳᖅ.

ᒪᐃ 2011-ᖑᑎᓪᓗᒍ, ᐃᓄᒃ ᓵᓕ ᑕᓗᕐᔪᐊᕐᒥᐅᑕᖅ, ᐹᓪ ᒪᓕᑭ ᓇᐅᔮᕐᒥᐅᑕᖅ, ᓘᑎ ᐱᔾᔭᒥᓂ ᐊᐅᓱᐃᑦᑐᕐᒥᐅᑕᖅ ᐃᖃᓗᓐᓅᓚᐅᕐᒪᑕ ᑎᑎᕋᐅᔭᕆᐊᖅᖢᑎᒃ ᓇᓗᓇᐃᒃᑯᑕᕐᒥᒃ.

ᐱᓇᓱᐊᕈᓯᓕᒫᒥᒃ ᓴᓇᓚᐅᖅᐳᑦ ᐋᖅᑭᒃᓯᒪᓂᒃᓴᖓᓂᒃ, ᑭᖑᓂᐊᒍᓪᓗ, ᒥᑭᓐᓂᖅᓴᒥᒃ ᓴᓇᓯᒪᔪᒥᒃ ᐋᖅᑭᒃᓯᓪᓗᑎᒃ ᐅᖃᓚᐅᖅᖢᑎᒃ ᑕᑯᒃᓴᐅᑎᑦᑎᓂᖏᓐᓂᒃ ᐅᓄᖅᑐᓂᒃ ᐱᒻᒪᕆᐅᓛᓂᒃ ᓇᓗᓇᐃᒃᑯᑕᕐᓂᒃ ᐃᓄᐃᑦ ᐃᓕᖅᑯᓯᖏᓐᓂᒃ.

ᑖᒃᑯᐊ ᐱᖓᓱᑦ ᓴᓇᙳᐊᖅᑏᑦ ᐅᑎᓚᐅᖅᑐᑦ ᐃᖃᓗᓐᓄᑦ ᔫᓂ, 2012-ᖑᑎᓪᓗᒍ, ᐊᒻᒪᓗ ᐱᔭᕇᖅᓯᓪᓗᑎᒃ ᑕᒪᕐᒥᑲᓴᒃ ᐊᖏᔫᑕᐅᓂᖅᓴᓂᒃ ᓴᓇᙳᐊᖅᑕᐅᔪᓂᒃ.

ᐅᑎᖅᖢᑎᒃ ᐃᖃᓗᖕᓄᑦ ᐊᐃᕐᕆᓕ, 2013-ᒥ, ᐱᐊᓂᒃᓯᔭᖅᑐᖅᖢᑎᒃ ᓇᓗᓇᐃᒃᑯᑕᕐᒥᒃ ᓅᖦᖢᒍᓗ ᐃᓂᒋᓂᐊᖅᑕᖓᓄᑦ ᐃᓕᔭᐅᓂᐊᕐᓗᓂ. ᓇᓗᓇᐃᒃᑯᑕᖅ ᓴᖅᑭᑕᐅᓛᖅᑐᖅ ᖁᕕᐊᓲᑎᖃᓕᖅᐸᑕ ᓄᓇᕗᑦ ᑐᙵᕕᒃᑯᑦ ᑎᑎᕋᕐᕕᖓᓂ ᐃᖃᓗᖕᓂ ᓄᓇᕗᑦ ᐅᓪᓗᖓᓂ, ᔪᓚᐃ 9, 2013-ᒥ.

ᑖᓐᓇ ᓇᓗᓇᐃᒃᑯᓯᖅᑕᐅᓯᒪᔪᖅ ᐃᓕᑕᕐᓯᔾᔪᑕᐅᕗᖅ ᐊᒻᒪᓗ ᐊᒃᓱᐊᓗᒃ ᖁᔭᓐᓇᒦᕈᑕᐅᓪᓗᓂ ᐃᓄᓕᒫᓄᑦ ᐱᒻᒪᕆᐅᔪᒥᒃ ᐱᓕᕆᐊᖃᓚᐅᖅᑐᓄᑦ ᐋᔩᖃᑎᖃᖅᑎᓪᓗᑕ ᓄᓇᕘᒥ ᓄᓇᑖᕐᓂᕐᒧᑦ ᐊᖏᕈᑎᐅᔪᒥᒃ.

ᐊᑕᐅᓯᕐᒨᖓᓚᐅᓐᖏᑦᑐᖅ ᑭᓯᐊᓂ ᐊᖏᖃᑎᒌᒐᓱᐊᖅᑎᓄᑦ, ᑲᑎᒪᔨᓄᑦ, ᑐᓵᔨᓄᑦ, ᑐᑭᓕᐅᕆᔨᓄᑦ, ᒪᓕᒐᓕᕆᔨᓄᑦ, ᐊᓪᓛᑦ ᓄᓇᓕᕆᔨᓄᑦ, ᐃᑲᔪᓚᐅᖅᑐᑦ ᓄᓇᑖᕐᓂᕐᒧᑦ ᐊᖏᕈᑎᒥᒃ. ᓄᓇᕗᑦ ᑐᙵᕕᒃᑯᑦ ᖁᔭᓕᕗᑦ ᐃᓄᓕᒫᓂᒃ ᓄᓇᓕᓐᓃᑦᑐᓂᒃ ᐊᑐᓚᐅᖅᑐᓂᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐃᑲᔪᓚᐅᖅᑐᓂᒃ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᒧᑦ. ᐃᓄᐃᑦ ᐊᒃᓱᕈᖃᑦᑕᓚᐅᖅᑐᑦ ᐊᒻᒪᓗ ᐅᓇᑕᖅᑐᑎᒃ ᐊᒻᒪᓗ ᐊᑐᖅᑐᑎᒃ ᖃᐅᔨᒪᓂᕐᒥᓂᒃ ᐊᒥᓱᐊᓗᓐᓂᒃ ᐱᕚᓪᓕᕈᑎᖃᖅᑐᑎᒃ ᐊᖏᖃᑎᒌᒍᑎᒥ. ᑖᓐᓇ ᓇᓗᓇᐃᒃᑯᑕᖅ ᐃᓕᓴᖅᓯᔪᖅ ᐃᓚᒌᓕᒫᓂᒃ ᑐᓐᓂᖅᑯᑎᖃᓚᐅᖅᑐᓂᒃ ᐊᐃᑉᐸᕐᒥᓂᒃ ᐊᒻᒪᓗ ᓄᓕᐊᕐᒥᓂᒃ ᐋᔩᖃᑎᒌᑦᑎᓪᓗᒋᑦ ᐊᒻᒪᓗ ᐊᖏᖅᑕᐅᓇᓱᐊᖅᑎᓪᓗᒋᑦ. ᐊᒥᓱᐊᖅᑎᖅᑐᑎᒃ ᐃᓄᐃᑦ ᕿᒪᐃᓯᒪᖃᑦᑕᓚᐅᖅᑐᑦ ᐃᓚᒥᓐᓂᒃ ᐱᓇᓱᐊᕈᓯᒐᓴᓐᓂᒃ, ᐊᕐᕌᒍᑕᒫᑦ, ᐊᒻᒪᓗ ᓄᓇᕗᑦ ᑐᙵᕕᒃᑯᑦ ᐃᓕᓴᖅᓯᕗᑦ ᐊᒻᒪᓗ ᐅᐱᒍᓱᑦᑐᑎᒃ ᑕᒪᑐᒥᖓ ᐱᒻᒪᕆᐅᔪᒥᒃ ᖁᔭᓈᖅᓯᓯᒪᓂᕐᒥᓂᒃ.

ᐹᓪ ᖁᕕᖅ ᒪᓕᑭ

ᐸᐅᓗᓯ ᐃᓅᓚᐅᖅᓯᒪᔪᖅ 1956-ᒥ ᓄᓇᓕᕋᓛᕐᒥ ᐃᒡᓗᓕᐅᑉ ᖃᓂᒋᔮᓂ. ᑕᐃᑲᓂᕐᒥᐅᑕᐅᓚᐅᖅᓯᒪᔪᖅ ᖃᑕᙳᑎᖏᓪᓗ ᖁᓕᓂᒃ ᐅᑭᐅᖃᓕᕋᒥ ᑎᑭᖦᖢᒍ. ᑕᐃᔅᓱᒪᓂᐅᑎᓪᓗᒍ, ᐃᒡᓗᓕᖕᒧᑦ ᓅᓚᐅᖅᓯᒪᔪᑦ, ᑕᐃᑲᓃᓚᐅᖅᓯᒪᓪᓗᓂ 20-ᓂᒃ ᐅᑭᐅᖃᓕᕋᓱᖕᓂᖓᓂ. ᐃᓚᒌᑦ ᓅᓕᓚᐅᖅᓯᒪᕗᑦ ᓇᐅᔮᓄᑦ ᐊᓈᓇᑦᑎᐊᒥᓃᒋᐊᖅᑐᖅᖢᓂ. ᐸᐅᓗᓯ ᓱᓕ ᑕᐃᑲᓂᕐᒥᐅᑕᐅᓚᐅᖅᓯᒪᕗᖅ ᓄᓕᐊᕇᒃ ᐊᒻᒪ 7-ᓂᒃ ᕿᑐᕐᖓᖏᑦ. ᐸᐅᓗᓯ ᓴᓇᙳᐊᕆᐅᓚᐅᖅᓯᒪᕗᖅ 5-ᓂᒃ ᐅᑭᐅᖃᖅᖢᓂ. ᐃᒻᒥᓂᒃ ᐃᓕᑦᑎᓚᐅᖅᓯᒪᔪᖅ, ᐊᓯᒥᓂᒃ ᑕᐅᑐᖃᑦᑕᖅᖢᓂ. "ᐅᕙᓐᓂᙶᓗᐊᙳᐊᖅᖢᓂ. ᑭᓱᓕᒫᑲᓴᖕᓂᒃ ᐃᓕᑦᑎᓯᒪᕗᖓ ᐊᖑᓇᓱᖕᓂᒃᑯᑦ. ᑕᑯᕙᒃᖢᖓ ᐊᕙᑎᓐᓃᑦᑐᓂᒃ. ᐊᖑᓇᓱᓕᕌᖓᒪ ᓂᕐᔪᑎᓂᒃ, ᖃᐅᔨᓴᖅᐸᒃᑕᒃᑲ. ᐆᒪᔪᓕᒫᑦ ᐊᕙᑎᑦᑎᓐᓃᑦᑐᑦ." "ᐃᓄᐃᑦ ᐃᖅᑲᓇᐃᔮᓐᓂᒃ ᐱᔪᒪᐃᓐᓇᐅᔭᖅᐳᑦ. ᐊᑖᑕᒐ ᐊᐅᓪᓚᖅᓯᒪᕙᓚᐅᖅᐳᖅ ᐅᓪᓗᒐᓴᖕᓄᑦ ᐊᖑᓇᓱᒋᐊᖅᖢᓂ, ᑎᕆᒐᓂᐊᕋᓱᒃᐸᒃᖢᓂᓗ. ᐱᖃᑎᒋᙱᒃᑯᒃᑯ ᓴᓇᙳᐊᖅᐸᓚᐅᖅᑐᖓ ᐃᑲᔪᕈᒪᓪᓗᒋᑦ ᐃᓚᒃᑲ, ᐊᖑᓇᓱᒋᐊᖅᓯᒪᙱᒃᑯᒪ, ᐅᑭᐅᕌᓗᖕᒥ" ᐸᐅᓗᓯ ᓴᓇᙳᐊᖅᐸᒃᐳᖅ ᐊᔾᔨᒌᙱᕈᓘᔭᖅᑐᓂᒃ ᓂᕐᔪᑎᓂᒃ ᑮᓇᖏᓐᓂᒡᓗ, ᑭᓯᐊᓂ ᑐᒃᑐᓂᒃ ᖁᕕᐊᒋᔭᖃᓛᖑᕙᒃᐳᖅ. ᓴᓇᙳᐊᖅᓯᒪᔭᖏᑦ ᓇᓂᔭᐅᔪᓐᓇᖅᐳᑦ ᐊᒥᓱᓂ ᓇᖕᒥᓂᕆᔭᐅᔪᓂ ᑭᒃᑯᑐᐃᓐᓇᕐᓄᓪᓗ ᑲᑎᖅᓱᖅᑕᐅᓯᒪᔪᓂ ᐱᔭᐅᔪᒪᕙᒃᖢᑎᒡᓗ ᑕᑯᔭᒐᖃᕐᕕᖕᓂ ᐅᐊᖕᓇᖓᓂ ᐊᒥᐊᓕᑲᒥ, ᐃᓚᒋᔭᐅᓪᓗᓂ ᕕᐊᓕ ᓴᓇᙳᐊᒐᕐᓄᑦ ᑕᑯᔭᒐᖃᕐᕕᒃ ᑐᕌᓐᑐᒥ ᐊᒻᒪ ᔫᑎ ᐴᕐᔅ ᑕᑯᔭᒐᖃᕐᕕᖕᒥ ᕗᔨᓐᑎᐊᒥ ᐊᒻᒪ ᓅᕙ ᓯᑰᓯᐊᒥ. ᐅᓄᖅᑐᓂᒃ ᐱᕐᔪᐊᖑᓂᖅᓴᓂᒃ ᑎᓕᔭᐅᓯᒪᕗᖅ, ᐃᓚᒋᔭᐅᓪᓗᓂ ᑐᓐᓂᖅᑯᓯᐊᓂᒃ ᑲᓇᑕᐅᑉ ᐊᖓᔪᖅᑳᕐᔪᐊᖓᓄᑦ ᐳᕋᐃᔭᓐ ᒪᓪᕉᓂ ᐊᒻᒪ ᔩᓐ ᑯᕇᑎᐊᓐᒧᑦ, ᐊᒻᒪ ᑯᐃᓐ ᑭᒡᒐᖅᑐᖅᑎᖓᓄᑦ ᐄᑐᕆᐊᓐ ᑲᓛᒃᓴᓐᒧᑦ. 2000−ᖑᑎᓪᓗᒍ. ᑎᓕᔭᐅᓚᐅᖅᓯᒪᖕᒥᔪᖅ ᓴᓇᖁᔭᐅᓪᓗᓂ ᐊᕿᒡᒋᕐᒥᒃ ᓇᓗᓇᐃᒃᑯᑕᓪᓚᑦᑖᓄᑦ ᐱᓕᕆᐊᒧᑦ ᒪᓕᒐᓕᐅᕐᕕᖕᒥ ᐃᖃᓗᖕᓂ, ᐊᒻᒪ 1999-ᒥ ᐃᓚᒋᔭᐅᓚᐅᖅᑐᖅ 6-ᖑᔪᓂᒃ ᓴᓇᙳᐊᖅᑎᓂᒃ ᓄᓇᕗᒻᒥ ᐃᖅᓱᒐᕐᒥᒃ ᓴᓇᓚᐅᖅᑐᓂᒃ. ᖃᐃᖁᔭᐅᓯᒪᓚᐅᕐᒥᔪᖅ ᐃᓚᐅᖁᔭᐅᓪᓗᓂ ᓴᓇᙳᐊᕐᓂᕐᒧᑦ ᑲᑎᒪᕕᒡᔪᐊᕐᓂᐅᔪᒥ - ᐅᓂᒃᑳᖅᑐᐊᑦ ᐅᔭᖅᑲᒥ, ᖃᐃᖁᔭᐅᓯᒪᐃᓐᓇᖅᐸᒃᖢᓂᓗ ᐃᓚᐅᖁᔭᐅᓪᓗᓂ ᓄᓇᕗᒻᒥ ᓴᓇᙳᐊᖅᑏᑦ ᑲᑐᔾᔨᖃᑎᒌᖏᑕ ᐊᕐᕌᒍᑕᒫᑦ ᓴᓇᙳᐊᕐᓂᕐᒧᑦ ᖁᕕᐊᓲᑎᖃᕐᓂᐅᔪᒧᑦ. ᓴᓇᙳᐊᙱᖦᖢᓂ, ᐹᓪ ᖁᕕᐊᒋᔭᖃᖅᐳᖅ ᕿᒧᒃᓯᖃᕆᐊᒃᓴᖅ, ᐊᖑᓇᓱᖕᓂᕐᒥᒃ, ᓴᓇᓂᕐᒥᒡᓗ. "ᑭᓱᓕᒫᑲᓴᑦᑎᐊᓂᒃ. ᐃᓅᓯᕋ ᐱᐅᒋᕙᕋ."