THE SECOND LAUNCH OF INUKTUUQTA! WRITING PRIZE

(ᒫᑦᓯ 3, 2022 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓᑕ (ᑐᙵᕕᒃᑯᑦ) ᐊᖓᔪᖅᑳᖓ ᐊᓗᑭ ᑰᑦᑎᖅ ᖁᕕᐊᓱᑦᑐᖅ ᓴᖅᑮᒋᐊᑦᓴᖅ ᑐᒡᓕᐊᓂᒃ ᐃᓄᒃᑑᖅᑕ! ᐃᓄᒃᑐᑦ ᑎᑎᕋᕐᓗᓂ ᓵᓚᒃᓴᕋᓱᐊᕐᓂᕐᒥᒃ. ᐃᓄᒃᑑᖅᑕ! ᐃᓄᒃᑐᑦ ᑎᑎᕋᕐᓗᓂ ᓵᓚᒃᓴᕋᓱᐊᕐᓂᒃᑯᑦ ᑐᓂᔭᐅᓂᐊᖅᑐᖅ ᐊᑕᐅᓯᖅ ᑎᑎᕋᖅᑐᖅ $80,000−ᓂᒃ ᐊᒻᒪᓗ ᐃᑲᔪᖅᓱᐃᓗᓂ ᑎᑎᕋᖃᑦᑕᓂᕐᒥᒃ ᐊᕐᕌᒍᓕᒫᖅ, ᐱᓕᕆᐊᕆᖃᓯᐅᑎᓗᒍ ᐊᒻᒪᓗ ᐃᓕᓴᐃᖃᑦᑕᓂᕐᒥᒃ, ᐋᖅᑭᓱᕐᓗᒋᑦ ᐅᓂᒃᑳᓂ ᐅᖃᓕᒫᒐᓕᐊᕆᓗᒍ. ᓯᑕᒪᓂᒃ ᓵᓚᒃᓴᐅᓯᐊᖅᑐᖃᖃᓯᐅᑎᓂᐊᖅᑐᖅ ᑐᓂᔭᐅᔪᑦ ᐊᑭᖃᕐᓗᑎᒃ $10,000, $5,000, $3,000 and $2,000. ᓄᓇᕗᑦ ᑐᙵᕕᒃ ᐃᑲᔫᑎᒃᓴᓕᕆᔨᒃᑯᑦ ᐱᓕᕆᖃᑎᖃᕐᓂᐊᖅᑐᑦ ᓵᓚᒃᓴᖅᑐᓂᒃ ᐅᓂᒃᑳᓕᐅᖅᑎᓂᒃ ᐱᐊᓂᒡᓗᒋᑦ ᓴᖅᑭᕐᓗᒋᓪᓗ ᐅᖃᓕᒫᒐᑦ ᐱᓕᕆᐊᖏᑦ. “ᐃᓄᒃᑑᖅᑕ! ᐱᕚᓪᓕᐅᑕᐅᓯᒪᔪᖅ ᐃᓄᒃᑑᕈᓐᓇᓯᐊᕐᓂᖏᓐᓂᒃ ᐊᔾᔨᒌᙱᓐᓂᖏᓐᓂᓪᓗ ᐃᓄᒃᑐᑦ ᓄᓇᕗᒻᒥ ᐊᒻᒪᓗ ᓴᖅᑭᐅᒪᑎᑦᑎᓯᐊᖅᑐᖅ ᐅᐱᒍᓱᓐᓂᕐᒥᒃ ᐃᓄᒃᑎᒍᑦ ᐃᓕᖅᑯᓯᑦᑎᓐᓂᒃ ᐅᖃᐅᓯᑦᑎᓂᓪᓗ. ᓯᕗᓪᓕᕐᒥ ᐃᓄᒃᑑᖅᑕ! ᑐᙵᕕᒃᑯᑦ ᑐᓂᔭᐅᓚᐅᖅᑐᑦ 67−ᓂᒃ ᐃᓄᓐᓂᒃ ᐅᖃᓕᒫᒐᓕᐅᖅᑎᓂᒃ. ᑐᓴᓚᐅᖅᑐᒍᑦ, ᑐᑭᓯᑦᓯᐊᖅᑐᑕ ᖃᐅᔨᔭᐅᑎᑕᐅᔪᒥᒃ, ᑕᑯᔭᐅᒃᑲᓐᓂᕈᒪᔪᒻᒪᕆᐅᓂᖓᓂᒃ ᑎᑎᕋᖅᓯᒪᔪᓂᒃ ᐱᓕᕆᐊᒥᓂᖏᓐᓂᒃ ᐃᓄᐃᑦ ᐊᒻᒪᓗ ᐃᓄᓐᓄᑦ ᑐᕌᖓᔪᓂᒃ. ᑕᕝᕘᓇ ᓇᓗᓇᐃᕈᑕᐅᔪᖅ ᐅᖃᐅᓯᕗᑦ ᐱᕙᓪᓕᐊᔪᒻᒪᕆᐅᓂᖓᓂᒃ”, ᐅᖃᖅᑐᖅ ᐊᖓᔪᖅᑳᖅ ᑰᑦᑎᖅ. ᓴᓇᑐᔪᒻᒪᕆᓐᓃᖔᖅᑐᑦ ᑕᒪᕐᒥᒃ ᑐᖓᓱᑦᑐᑦ, ᓇᓕᑐᐃᓐᓇᖏᑎᒍᑦ ᓄᓇᕗᑦ ᐃᓄᒃᑐᑦ ᐅᖃᐅᓯᖏᑎᒍᑦ ᐊᒻᒪᓗ ᐅᖃᓕᒫᒐᓕᐅᖅᑐᖅ ᐊᑐᕈᒪᔭᖓᒍᑦ ᑎᑎᕋᐅᓯᒃᑯᑦ. ᓄᓇᕗᒻᒥ ᐃᓄᐃᑦ ᐅᑭᐅᓖᑦ 18−ᓂᒃ ᐅᖓᑖᓂᓗ ᐱᓇᓱᐊᖃᑕᐅᔪᓐᓇᖅᑐᑦ. ᑐᓂᔭᐅᔪᑦ/ᓇᓗᓇᐃᔭᖅᓯᒪᔪᑦ ᓴᖅᑭᓚᐅᖅᓯᒪᒋᐊᖃᙱᑦᑐᑦ, ᐃᔾᔪᐊᕆᓂᕐᒦᙶᖏᓪᓗᓂ ᐅᖃᓕᒫᒐᖅ ᐅᕝᕙᓘᓐᓃᑦ ᓄᐊᑕᐅᓯᒪᔪᑦ ᓇᐃᑦᑑᑏᑦ ᐅᓂᒃᑳᑦ ᐅᖃᓗᕋᐅᔭᐅᑏᓪᓘᓐᓃᑦ ᐊᒻᒪᓗ ᑐᓂᔭᐅᓯᒪᒋᐊᓖᑦ ᒪᐃ 30, 2022. ᑐᒃᓯᕋᐅᑦ ᑕᑕᑎᕋᑦᓴᖅ ᐊᒻᒪᓗ ᑐᑭᓯᒋᐊᒃᑲᓐᓂᕐᕕᒃᓴᑦ ᐊᑐᐃᓐᓇᐃᑦ ᑐᙵᕕᒃᑯᑦ ᐃᑭᐊᖅᑭᕕᖓᓂ. ᕕᕝᕗᐊᓕ 21, 2022, ᑐᙵᕕᒃᑯᑦ ᐃᓚᒋᔭᐅᓚᐅᖅᑐᑦ ᓴᖅᑭᖅᑕᐅᑎᓪᓗᒍ ᓄᓇᕐᔪᐊᒥ ᖁᓕᓄᑦ ᐊᕐᕌᒍᓄᑦ ᐸᕐᓇᐅᑏᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓄᑦ 2022-2032. ᐊᕐᕌᒎᓂᐊᖅᑐᓂ ᖁᓕᓂ, ᓄᓇᕐᔪᐊᒥ ᓄᓇᓖᑦ ᐱᕙᓪᓕᐊᓂᐊᖅᑐᑦ ᐊᓪᓗᐸᓪᓕᐊᓗᑎᒃ ᑐᕌᖓᔪᒥᒃ ᓴᐳᔾᔨᓯᒪᓂᕐᒥᒃ, ᐅᑎᖅᑎᑦᓯᕙᓪᓕᐊᓂᕐᒥᒃ, ᐱᕚᓪᓕᕈᑎᒃᓴᒥᒃ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓄᑦ ᓄᓇᕐᔪᐊᓕᒫᒥ. ᐃᓄᒃᑑᖅᑕ! ᐃᑲᔫᑎᓂᐊᖅᑐᖅ ᑕᕝᕗᖓ ᑐᕌᒐᕐᒧᑦ ᑲᔪᓯᑎᑦᓯᓂᕐᒥᒃ ᐃᓄᒃᑐᑦ ᐅᖃᓕᒫᒐᓕᐅᕐᓂᒃᑯᑦ ᐊᒻᒪᓗ ᐱᕚᓪᓕᕈᑕᐅᓗᓂ ᖃᐅᑕᒫᑦ ᐊᑐᖅᑕᐅᖃᑦᑕᕐᓂᖓᓂᒃ ᐊᒻᒪᓗ ᑐᑭᓯᐊᑦᓯᐊᓂᕐᒥᒃ ᐃᓄᒃᑐᑦ. ᐃᓄᒃᑑᖅᑕ! ᑮᓇᐅᔭᓕᑕᐅᓯᒪᔪᖅ ᐊᐅᓚᑕᐅᓪᓗᓂᓗ ᓄᓇᕗᑦ ᑐᙵᕕᒃ ᐃᑲᔫᑎᒃᓴᓕᕆᔨᒃᑯᓐᓂᒃ (NTF), ᐃᑲᔫᑎᓂᒃ ᑮᓇᐅᔭᓖᖃᑦᑕᖅᑐᑦ ᑲᑐᔾᔨᖃᑎᒌᑦ ᐊᐅᓚᑕᐅᔪᑦ ᑐᙵᕕᒃᑯᓐᓂᒃ.

-30-

ᑐᑭᓯᒋᐊᒃᑲᓂᕐᕕᒃᓴᑦ: ᓘᓯ ᒪᐃᓈᑦ ᑐᑭᒧᐊᒃᑎᑦᑎᔨᒧᑦ ᑭᖑᕝᕕᐅᑎᓯᒪᔪᖅ ᐃᓄᓐᓄᑦ ᐱᓕᕆᐊᒃᓴᓂᒃ ᐱᔨᑦᓯᕈᑎᓂᓪᓗ ᓄᓇᕗᑦ ᑐᙵᕕᒃ ᑎᒥᖓ ᐅᖄᓚᐅᑖ: (867) 645-5400 ᐊᑭᖃᙱᑦᑐᖅ: 1-888-236-5400 lmaynard@tunngavik.com www.tunngavik.com ᒪᓚᐃᔭ ᒥᑭᔾᔪᒃ ᑐᑭᒧᐊᒃᑎᑦᑎᔨᒧᑦ ᑐᓴᐅᒪᔾᔪᑎᓕᕆᔨᒃᑯᓐᓂ ᐃᓕᓐᓂᐊᖅᑐᖅ ᓄᓇᕗᑦ ᑐᙵᕕᒃ ᑎᒥᖓ ᐅᖄᓚᐅᑖ: (867) 975-4900 ᐊᑭᖃᙱᑦᑐᖅ: 1-888-646-0006 mmikijuk@tunngavik.com www.tunngavik.com ᑲᒪᒋᔭᐅᓯᒪᓂᖓ ᐱᓇᓱᐊᒐᑦᓴᖅ ᓄᓇᕗᑦ ᑐᙵᕕᒃ ᐃᑲᔫᑎᒃᓴᓕᕆᔨᒃᑯᑦ (NTF) ᐃᓕᓴᖅᓯᓯᒪᔪᑦ ᐱᖕᒪᕆᐅᓂᖓᓂᒃ ᓴᐳᔾᔨᓯᒪᓂᕐᒥᒃ, ᐱᕚᓪᓕᕈᑎᒃᓴᓂᒃ ᐊᒻᒪᓗ ᐅᑎᖅᑎᑦᓯᓂᕐᒥᒃ ᐃᓄᒃᑐᑦ ᑎᑎᕋᖅᓯᒪᔪᒃᑯᑦ ᐊᒻᒪᓗ ᑲᔪᖏᖅᓴᐅᑎᒃᓴᒥᒃ ᐃᑲᔪᖅᓯᒍᑎᒃᓴᒥᓪᓗ ᑲᑦᓱᖓᐃᒃᑲᓐᓂᖁᓪᓗᒋᑦ ᐃᓄᐃᑦ ᐊᒥᓲᓂᖅᓴᐃᑦ ᑎᑎᕋᕐᓂᕐᒥᒃ ᓴᖅᑮᓂᕐᒥᓪᓗ ᑎᑎᕋᖅᓯᒪᔪᓂᒃ ᐃᓄᒃᑐᑦ. ᓵᓚᒃᓴᐅᓯᐊᑦᓴᖅ ᐃᓄᒃᑑᖅᑕ! ᓵᓚᒃᓴᖅᑐᖃᕐᓂᐊᖅᑐᖅ ᐊᑕᐅᓯᕐᒥᒃ ᐅᓂᒃᑳᓕᐅᖅᑐᒥᒃ:

1. a) ᑮᓇᐅᔭᑎᒍᑦ ᓵᓚᑦᓴᐅᓯᐊᖑᓂᐊᖅᑐᖅ $80,000.00
2. b) ᐱᕕᒃᓴᖃᖅᑎᑕᐅᓗᓂ ᐊᑭᓕᖅᑕᐅᓯᒪᔪᒥᒃ ᑎᑎᕋᕐᓂᕐᒧᑦ ᐃᓂᒋᓂᐊᖅᑕᖓᓂᒃ; ᐊᒻᒪᓗ
3. c) ᐱᕕᒃᓴᖃᖅᑎᑕᐅᓗᓂ ᐃᖅᑲᓇᐃᔭᖃᑎᖃᕐᓂᕐᒥᒃ ᐊᓯᖏᓐᓂᒃ ᐃᓄᓐᓂᒃ ᓲᕐᓗ ᑎᑎᕋᖅᑎᓂᒃ, ᐅᖃᐅᓯᓕᕆᔨᓂᒃ, ᐃᓕᓴᐃᔨᓂᒃ, ᐊᒻᒪᓗ ᑎᑎᕋᖅᓯᒪᔪᓂᒃ ᐋᖅᑭᒋᐊᕆᔨᓂᒃ ᐊᓯᖏᓐᓂᓪᓗ ᐱᐊᓂᒍᑎᒃᓴᖓᓂᒃ ᑎᑎᕋᖅᓯᒪᔪᓂᒃ ᐱᓕᕆᐊᒥᒍᑦ ᐅᖃᓕᒫᒐᐅᓕᕐᓗᓂ.

ᑮᓇᐅᔭᑦ ᓵᓚᑦᓴᐅᓯᐊᖑᓂᐊᖅᑐᑦ ᓯᑕᒪᓄᑦ (4) ᑭᖑᓕᖏᓐᓄᑦ ᓵᓚᓕᓐᓄᑦ (ᑖᒃᑯᐊ “ᓵᓚᖃᐅᓯᐊᑦᓴᑲᓐᓃᑦ”), ᐊᒻᒪᓗ ᑐᓂᔭᐅᔪᓂᒃ ᑲᑎᖅᓱᐃᓂᕐᒧᑦ ᐊᒻᒪᓗ ᓴᖅᑮᓂᕐᒥᒃ ᑎᑎᕋᖅᓯᒪᔪᓂᒃ, ᐃᓚᒋᐊᕈᑕᐅᓗᑎᒃ ᑲᑎᖅᓱᖅᑕᐅᓯᒪᔪᓄᑦ ᑎᑎᕋᖅᑕᐅᓯᒪᔪᓂᒃ ᐃᓄᓐᓄᑦ ᐃᓄᒃᑐᑦ. ᐅᓄᕐᓂᖏᑦ ᓵᓚᖃᐅᓯᐊᑦᓴᑲᓐᓃᑦ ᑭᖑᓕᖏᓐᓄᑦ ᓵᓚᓕᓐᓄᑦ ᐃᒪᐃᓕᖓᓂᐊᖅᑐᑦ: $10,000.00 - ᑐᓪᓕᐊ $5,000.00 - ᐱᖓᔪᐊᑦ $3,000.00 - ᓯᑕᒪᖓ $2,000.00 - ᑕᓪᓕᒪᖓ ᐱᔪᓐᓇᖅᑎᑕᐅᔪᑦ ᑭᓇᑐᐃᓐᓇᖅ ᐃᓅᑉᐸᑦ ᐊᑎᖃᖃᑕᐅᓗᓂ ᓄᓇᕗᑦ ᐊᖏᕈᑎᖏᓐᓂ ᐅᑭᐅᖃᕐᓗᓂ 18 ᐅᖓᑖᓂᓗ, ᑐᓂᓯᔪᓐᓇᖅᑐᖅ ᐃᓄᒃᑐᑦ ᑎᑎᕋᖅᓯᒪᔪᓂᒃ ᐃᓱᒪᒃᓴᖅᓯᐅᕈᑎᒃᓴᓂᒃ. ᐅᑯᐊ ᐃᓚᒋᔭᐅᔪᓐᓇᖅᑎᑕᐅᙱᑦᑐᑦ ᐱᓇᓱᐊᕐᓂᕐᒧᑦ: NTF ᑲᑎᒪᔨᖏᑦ ᐃᖅᑲᓇᐃᔭᖅᑎᖏᓪᓗ; ᓄᓇᕗᑦ ᑐᙵᕕᒃ ᑎᒥᖓᓂ (ᑐᙵᕕᒃ) ᑲᑎᒪᔩᑦ ᐃᖅᑲᓇᐃᔭᖅᑏᓪᓗ; ᐊᒻᒪᓗ ᐃᓄᒃᑐᑦ ᑎᑎᕋᕐᓗᓂ ᓴᓚᒃᓴᕋᓱᐊᕐᓂᕐᒧᑦ ᓂᕈᐊᖅᑏᑦ ᑲᑎᒪᔨᕋᓛᖏᑦ ᐊᒻᒪᓗ ᐅᓐᓂᓗᕝᕖᑦ ᑲᑎᒪᔨᕋᓛᖏᑦ. ᒪᓕᒐᑦᓴᓕᐊᖑᓯᒪᔪᑦ ᐃᓱᒪᑦᓴᖅᓯᐅᕈᑕᐅᒍᒪᔪᑦ ᐃᓄᒃᑑᖅᑕ! ᓵᓚᒃᓴᕋᓱᐊᕐᓂᕐᒧᑦ, ᐃᓄᒃ ᑐᓂᓯᔭᕆᐊᓕᒃ ᐃᓄᒃᑐᑦ ᑎᑎᕋᖅᓯᒪᔪᓂᒃ ᓇᓗᓇᐃᖅᓯᓯᒪᓗᑎᒃ ᐊᑕᖏᑦᑐᒥᒃ ᑎᑎᕋᕈᒫᕐᓂᐊᑕᕐᓂᒃ ᐃᓄᒃᑐᑦ ᒥᑦᓯᑎᓐᓅᖏᑦᑐᖅ 8 ᐊᓪᓗᐃᓯᒪᓗᓂ ᑎᑎᕐᓂᖓᓂᒃ ᑎᑎᕋᕐᕕᑦᓴᒥ ᐊᒻᒪᓗ ᐊᖏᓂᖅᐹᖑᒍᓐᓇᖅᑐᖅ 12 ᐊᓪᓗᐃᖃᑦᑕᖅᓯᒪᓗᓂ ᑎᑎᕋᕐᓂᖓ ᒪᑉᐱᒐᕐᓂᒃ. ᐃᓄᒃᑐᑦ ᑎᑎᕋᖅᓯᒪᔪᓂᒃ ᐱᓕᕆᐊᖑᓯᒪᔪᑦ ᐃᔾᔪᐊᖅᓯᓯᒪᔭᕆᐊᖃᙱᑦᑐᑦ ᑎᑎᕋᖅᑕᐅᔪᑦ ᐅᓂᒃᑳᓕᐅᖅᑐᒧᑦ ᓴᖅᑭᖅᑕᐅᓚᐅᖅᓯᒪᙱᓪᓗᑎᒃ ᐅᓂᒃᑳᓕᐊᒥᓃᑦ. ᐃᓄᒃᑐᑦ ᑎᑎᕋᕐᓗᓂ ᐱᓕᕆᐊᖅ ᐃᓗᓕᖃᕆᐊᖃᙱᑦᑐᖅ ᑎᑎᕋᖅᑕᐅᓯᒪᔪᓂᒃ ᐊᓯᖏᓐᓄᑦ ᑎᑎᕋᖅᑐᒥᓂᕐᓄᑦ. ᐊᑐᖅᑕᐅᔭᕆᐊᓖᑦ ᑐᓂᔭᐅᔪᖅ ᐃᓄᒃᑐᑦ ᑎᑎᕋᖅᓯᒪᔪᖅ ᐱᓕᕆᐊᖑᔪᒥ ᐃᓚᖃᕆᐊᓕᒃ ᑐᑦᓯᕋᐅᒻᒥᒃ ᑕᑕᑎᒐᑦᓴᒥᒃ. ᑎᑎᕋᖅᑑᑉ ᐊᑎᖓ ᓴᖅᑭᔮᕆᐊᖃᙱᑦᑐᖅ ᓇᓂᓕᒫᖅ ᐃᓄᒃᑐᑦ ᑎᑎᕋᖅᓯᒪᔪᓂ ᑎᑎᕋᖅᑕᖓᑕ ᐃᓗᐊᓂ, ᑕᐃᒎᓯᖓᓂ, ᐅᕝᕙᓘᓐᓃᑦ ᖃᕆᓴᐅᔭᒃᑯᑦ ᐊᑎᖓ ᖃᐅᔨᒪᔭᐅᖁᓇᒍ ᐱᓕᕆᐊᒃᓴᕆᔭᖏᓐᓄᑦ ᓂᕈᐊᕐᓂᐊᖅᑎᐅᓂᐊᖅᑐᓄᑦ. ᑐᓂᔭᐅᓯᒪᒍᓐᓇᕐᕕᖓ ᑐᓂᔭᐅᓯᒪᔭᕆᐊᓖᑦ ᒪᐃ 30, 2022 ᖃᐅᔨᓴᐅᑦ 5-ᒥ ᐅᓐᓄᓴᒃᑯᑦ ᑲᓇᓐᓇᐅᑉ ᖃᐅᔨᓴᐅᑖᒍᑦ. ᕿᒥᕐᕈᔭᐅᓂᖏᑦ ᑐᓂᔭᐅᔪᑦ ᑐᓂᔭᐅᔪᑦ ᖃᐅᔨᓴᖅᑕᐅᒋᐊᙵᖅᑳᕐᓂᐊᖅᑐᑦ ᑐᙵᕕᒃᑯᑦ ᐃᖅᑲᓇᐃᔭᖅᑎᖏᓐᓄᑦ ᓱᖅᑯᐃᒪᒍᑎᒃᓴᓂᒃ ᑐᓂᔭᐅᔪᑦ ᒪᓕᑦᓯᒪᑦᓯᐊᕋᓗᐊᕐᒪᖔᑕ ᐊᑐᖅᑕᐅᒋᐊᓕᓐᓂᒃ ᓵᓚᒃᓴᐅᓯᐊᕐᓂᕐᒧᑦ ᐊᒻᒪᓗ ᐊᑐᖅᑕᐅᒋᐊᓖᑦ ᐃᓚᒋᔭᐅᔪᓐᓇᕈᑎᒃᓴᖓᓄᑦ ᒥᑦᓯᑎᓐᓅᖓᒋᐊᖃᕐᓂᕐᒧᑦ ᐅᓄᕐᓂᖅᐹᖑᔭᕆᐊᖃᕐᓂᖏᓐᓂᓪᓗ ᒪᑉᐱᒐᑦ. ᑐᓂᔭᐅᔪᑦ ᕿᒥᕐᕈᔭᐅᓂᐊᖅᑐᑦ ᓂᕈᐊᖅᑏᑦ ᑲᑎᒪᔨᕋᓛᖏᓐᓄᑦ ᐅᑯᓇᙶᖅᓯᒪᓂᐊᖅᑐᑦ ᖃᐅᔨᒪᔪᕐᔪᐊᓂᒃ ᐃᓄᒃᑐᑦ ᐅᖃᐅᓯᓕᕆᓂᕐᒥᒃ, ᓴᓇᑐᔪᒥᒃ ᑎᑎᖅᑭᕆᔩᑦ, ᐊᒻᒪᓗ ᐅᖃᓕᒫᒐᑦᓴᓂᒃ ᓴᖅᑮᓂᕐᒥᒃ. ᑲᑎᒪᔨᕋᓛᓃᖃᑕᐅᓂᐊᖅᑐᑦ ᐊᕕᑦᑐᖅᓯᒪᓂᕐᓂᒃ ᑭᒡᒐᖅᑐᐃᔪᑦ ᓄᓇᕗᒻᒥ, ᐊᒻᒪᓗ ᐃᓚᒋᔭᐅᒍᓐᓇᓂᐊᕐᒥᔪᑦ ᑎᒃᑯᐊᖅᑕᐅᓯᒪᔪᑦ ᐊᓯᖏᓐᓄᑦ ᐃᓚᒋᔭᐅᔪᓄᑦ ᕿᒥᕐᕈᔪᑦᓴᒫᓂᒃ ᐃᓄᐃᓐᓇᖅᑐᓐ ᑎᑎᕋᖅᓯᒪᔪᓂᒃ. ᕿᒥᕐᕈᓂᖏᑦ ᓂᕈᐊᖅᑏᑦ ᑲᑎᒪᔨᕋᓛᑦ ᐊᔾᔨᒌᑎᑦᓯᓂᐊᖅᑐᑦ, ᐃᓚᐃᓐᓇᓱᙱᓪᓗᑎᒃ ᐊᒻᒪᓗ ᐃᓚᐅᑎᑦᓯᓗᑎᒃ ᑕᒪᐃᓐᓂᒃ ᐃᓄᒃᑐᑦ ᑎᑎᕋᖅᓯᒪᔪᓂᒃ. ᕿᒥᕐᕈᓂᖅ ᐃᑉᐱᒋᔭᖃᑦᓯᐊᕆᐊᖃᕐᓂᐊᕐᒥᔪᖅ ᐅᖃᐅᓯᖃᑎᒌᙱᑦᑐᓂᒃ ᐊᒻᒪᓗ ᐊᑐᕈᒪᓯᒪᔭᖏᓐᓂᒃ ᐅᖃᐅᓯᖃᑎᒌᙱᓂᒃᑯᑦ ᐱᓇᓱᐊᖃᑕᐅᔪᒥᒃ. ᕿᒥᕐᕈᓂᕐᒦᖃᑕᐅᒍᓐᓇᖅᑐᑦ ᓈᖕᒪᒃᑲᓗᐊᕐᒪᖔᑕ ᐊᕕᑦᑐᖅᓯᒪᓂᕐᓂ ᑭᒡᒐᖅᑐᐃᔪᑦ ᐃᓄᒃᑐᑦ ᑎᑎᕋᖅᓯᒪᔪᓕᒪᓂᒃ. ᐅᓐᓂᕐᓗᓐᓂᕐᒧᑦ ᐊᐅᓚᓂᖓ ᓵᓚᖃᖃᑕᐅᙱᑦᑐᖅ ᐱᓇᓱᐊᖃᑕᐅᔪᖅ ᐅᓐᓂᕐᓘᑎᖃᕈᓐᓇᖅᑐᖅ ᐃᓱᒪᓕᐅᕈᑕᐅᔪᒥᒃ ᐅᓐᓂᕐᓗᕝᕖᑦ ᑲᑎᒪᔨᕋᓛᖏᓐᓄᑦ ᑖᒃᑯᐊ ᐱᖓᓲᒍᓐᓇᖅᑐᑦ (3) ᑎᒃᑯᐊᖅᓯᒪᔭᖏᑦ ᑐᙵᕕᒃᑯᑦ ᐊᖓᔪᖅᑳᖓᑕ. ᐃᓱᒪᓕᐅᕈᑎᖓ ᐅᓐᓂᕐᓗᕝᕖᑦ ᑲᑎᒪᔨᕋᓛᖅ ᓵᓚᒋᔭᑦᓴᐅᖏᑦᑐᖅ. ᐅᓐᓂᕐᓗᓐᓂᕐᒧᑦ ᑐᒃᓯᕋᐅᑎᒦᒋᐊᓕᒃ ᐱᔾᔪᑕᐅᔪᓂᒃ ᐅᓐᓂᕐᓗᓐᓂᕐᒧᑦ ᐃᓱᒪᑦᓴᖅᓯᐅᕈᑕᐅᖁᔭᐅᔪᑦ. ᐅᓐᓂᕐᓗᑦᑐᖃᕐᐸᑦ ᓯᓚᐃᕐᕆᑦᓯᔪᖃᕆᐊᖓ, ᐅᕝᕙᓘᓐᓃᑦ ᖃᐅᔨᓴᕐᓂᕐᒧᑦ ᐃᖅᑲᓇᐃᔭᖅᑏᑦ, ᐅᕝᕙᓘᓐᓃᑦ ᐃᓚᒋᔭᐅᔪᒥᒃ ᓂᕈᐊᖅᑎᓃᙶᖅᑐᒥᒃ ᑲᖐᓱᑦᑐᖃᖅᐸᑦ ᑐᓂᓯᓯᒪᔪᖃᕆᐊᖓ ᓯᓚᐃᕐᕆᑦᓯᒍᑎᒥᒃ, ᑐᙵᕕᒃᑯᑦ ᐊᐅᓚᔾᔭᐃᓂᐊᖅᑐᑦ ᖃᐅᔨᓴᖅᑎᑦᓯᓕᕐᓗᑎᒃ ᓈᖕᒪᑦᑐᒃᑯᑦ ᐊᒻᒪᓗ ᐊᔪᖅᑎᑕᐅᓕᕐᓗᓂ ᑐᓂᔭᐅᓯᒪᔪᖅ ᓯᓚᐃᕐᕆᑦᓯᒍᑎᒥᓂᐅᓂᖓ ᖃᐅᔨᔭᐅᑉᐸᑦ.

📄 NR 2022 03 03 Inuuktuuqta INUK

📄 IWPSubmissionGuidelines inuk 2022

📄 2022 02 22 Inuktut Writing Prize Application Form Inuktitut