Rejection of Polar Bear Proposal Confirmed
(ᒫᑦᓯ 25, 2010 - ᑲᖏᖅᖠᓂᖅ, ᓄᓇᕗᑦ)ᓄᓇᕗᑦ ᑐᙵᕕᒃᑯᑦ ᐊᖏᖅᑲᔪᖅᑳᖓᑕ ᑐᒡᓕᐊ ᑮᓇᐅᔭᓕᕆᓂᕐᒧᑦ ᕋᐃᒪᓐ ᓂᖏᐅᑦᓯᐊᖅ ᓇᓗᓇᐃᖅᓯᔪᖅ ᐅᓪᓗᒥ ᐊᖏᖅᑕᐅᖏᓐᓂᖓᓂ ᐊᒥᐊᓕᒐᐃᑦ ᑐᒃᓯᕋᐅᑎᒋᓯᒪᔭᖓ ᓇᓄᐃᑦ ᑎᑎᕋᖅᑕᐅᓯᒪᓂᖏᓐᓄᑦ ᖁᕝᕙᕆᐊᖅᑕᐅᖁᔨᓪᓗᑎ ᑲᑎᒪᓂᕐᒥ ᓯᓚᕐᔪᐊᓕᒫᒥ ᐆᒪᔪᓕᕆᓂᕐᒧᑦ ᐊᑦᑕᓇᖅᑐᒦᓕᕐᓂᕋᖅᑕᐅᔪᓄᑦ (CITES) 15-ᖓᓐᓂ ᑲᑎᒪᓂᖃᖅᑎᓪᓗᒋᑦ ᑐᕼᐊᕐ, ᑲᑖᕐᒥ.
ᐊᒥᐊᓕᒐᐃᑦ ᑐᒃᓯᕋᐅᑎᖓ ᐊᓯᔾᔩᖁᔨᓪᓗᑎᑦ ᑎᑎᕋᖅᑕᐅᓯᒪᓂᖏᓐᓂᒃ ᓇᓄᐃᑦ ᑲᑎᒪᓂᖃᖅᑎᓪᓗᒋᑦ ᓯᓚᕐᔪᐊᓕᒫᒥ ᐆᒪᔪᓕᕆᓂᕐᒧᑦ ᐊᑦᑕᖅᑐᒦᓕᕐᓂᕋᖅᑕᐅᔪᓄᑦ ᐊᖏᖅᑕᐅᓚᐅᖏᑦᑐᖅ ᐱᓇᓱᐊᕈᓯᐅᓚᐅᖅᑐᒥ ᑐᕼᐊᕐᒥ ᓄᓇᓕᕐᔪᐊᖑᔪᓄᑦ. ᑐᒃᓯᕋᐅᑎᐅᔪᖅ, ᐱᕕᒃᓴᖃᖅᑎᑦᓯᔪᓐᓃᕐᓂᐊᓚᐅᐳᖅ ᓇᓄᐃᑦ ᑕᐅᖅᓰᒍᑕᐅᔪᓐᓇᕐᓂᖏᓐᓂᒃ ᓯᓚᕐᔪᐊᒥ, ᓵᓚᐅᓚᐅᑐᖅ 48 ᓈᒻᒪᓴᖅᑐᑎᒃ, 62 ᓈᒻᒪᓴᕐᓇᑎᒃ ᐊᒻᒪ 11 ᓂᕈᐊᕋᑎᒃ.
“ᐊᑕᐅᓯᔪᖓ ᑐᓴᕋᒪ ᐊᖏᖅᑕᐅᖏᓐᓂᖓ ᑐᒃᓯᕋᐅᑕᐅᓯᒪᔫᑉ,” ᐅᖃᖅᑐᖅ ᓂᖏᐅᑦᓯᐊᖅ. “ᖁᔭᓐᓇᒦᖅᑕᒃᑲ ᐆᒪᔪᓕᕆᓂᕐᒧᑦ ᑭᒡᒐᑐᖅᑎᓕᒫᑦ, ᐃᓄᐃᑦ ᑲᑐᔾᔨᖃᑎᒌᖏᑦ ᓄᓇᕗᒻᒥ ᐊᒻᒪ ᑲᓇᑕ, ᐊᒻᒪ ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑏᑦ ᐊᒃᓱᕈᑦᑎᐊᖅᑐᑎᒃ ᓵᓚᒃᓴᕋᓱᐊᓚᐅᕐᒪᑕ.”
“ᖁᔭᓐᓇᒦᕈᒪᒻᒥᔭᒃᑲ ᕿᑭᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᒃᑯᑦ, ᑭᕙᓪᓕᐊᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᐊᒻᒪ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᑦ, ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐊᒻᒪ ᓄᓇᕗᑦ ᒐᕙᒪᖓ ᐃᑲᔪᓚᐅᕐᒥᒻᒪᑕ ᑮᓇᐅᔭᖃᖅᑎᑦᓯᓪᓗᑎᒃ ᑲᑐᔾᔨᓪᓗᑕ ᖃᓄᖅᑑᖅᑐᑕ.”
ᐊᒥᐊᓕᒐᐃᑦ ᑐᒃᓯᕋᐅᑎᖃᓚᐅᖅᑐᑦ ᖃᐅᔨᓴᕐᓂᒃᑯᑦ ᓇᓚᐅᖅᑖᖅᑕᐅᓯᒪᔪᓄᑦ ᓇᔪᒐᐃᑦ ᐊᓯᐅᕙᓪᓕᐊᓂᖏᓐᓂᒃ ᐊᒻᒪ ᐅᓄᕈᓐᓃᐸᓪᓕᐊᓂᕋᐃᓪᓗᑎᒃ ᓇᓄᕐᓂᒃ ᓯᓚᐅᑉ ᐊᓯᔾᔨᖅᐊᓪᓕᐊᓂᖓᓄᑦ. ᑐᒃᓯᕋᐅᑎᖓ ᐱᔾᔪᑎᓪᓚᑦᑖᖃᓚᐅᖏᑦᑐᖅ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂᒃ ᐅᕝᕙᓘᓐᓃᑦ ᖃᓄᖅᑑᕈᑎᒃᓴᖏᑦ ᐊᒃᑐᐃᓂᖓᓄᑦ ᒥᑭᓪᓕᕚᓪᓕᕈᑎᒃᓴᓂᒃ.