Office of the Languages Commissioner, Qikiqtani Inuit Association & Nunavut Tunngavik Inc. call for immediate action on language
(ᐅᒃᑐᐱᕆ 27, 2010) – ᐃᖃᓗᐃᑦ, ᓄᓇᕗᑦ -- ᓄᓇᕗᑦ ᒐᕙᒪᖓᑦ ᒥᓂᔅᑕᖓᑦ ᐅᖃᐅᓯᕐᓄᑦ ᓗᐃ ᑕᐹᕐᔪᒃ ᐃᑉᐸᒃᓴᖅ ᓇᓗᓇᐃᖅᓯᓚᐅᕐᒪᑦ ᑕᒪᑐᒪᓂ ᒪᓕᒐᓕᐅᖅᑎᑦ ᑲᑎᒪᓂᕆᔭᖓᓂ ᓴᖅᑭᑎᑦᑎᔾᔮᙱᓐᓂᕋᖅᖢᓂ ᐃᓄᐃᖅ ᐅᖃᐅᓯᖓᑕ ᓴᐳᒻᒥᔭᐅᓂᖓᓄᑦ ᐱᖁᔭᐅᑉ ᐊᒻᒪ ᐅᖃᐅᓰᑦ ᐃᓕᓴᕆᔭᐅᓯᒪᔪᑦ ᐱᖁᔭᐅᑉ ᐃᓗᓕᕆᔭᖏᑎᒍᑦ ᐊᑐᐊᖅᑕᐅᔭᕆᐊᖃᖅᑎᑕᖅ ᐊᑐᓕᖅᑎᑦᑎᓂᕐᒧᑦ ᐸᕐᓇᐅᑎᒥᒃ.
ᑕᒪᑐᒧᖓ ᐅᖃᐅᓯᕐᓄᑦ ᑲᒥᓯᓇ ᓄᓇᕗᒻᒧᑦ ᐊᓕᒃᓯᓇ ᑯᑉᓗ ᐃᒪᐃᓕᔾᔪᑎᖃᓚᐅᖅᐳᖅ, “ᒥᓂᔅᑕ ᐅᖃᐅᓯᕐᓄᑦ ᐊᑐᐊᖅᓯᙱᓐᓂᖃᖅᐳᖅ ᐱᓂᐊᖅᑕᕆᔭᒥᓂᒃ ᓄᓇᕗᒻᒥᐅᓄᑦ. ᒥᓂᔅᑕ ᐱᖁᔭᖅᑎᒍᑦ ᓴᖅᑭᑦᑎᔭᕆᐊᖃᖅᑎᑕᐅᓚᐅᖅᐳᖅ ᐊᑐᓕᖅᑎᑦᑎᓂᕐᒧᑦ ᐸᕐᓇᐅᑎᒥᒃ ᒫᔾᔨ 31, 2010-ᒥ. ᑕᒪᑐᒥᖓ ᐊᑐᖅᓯᙱᓚᖅ.”
ᓇᓕᐊᒃ ᐅᖃᐅᓰᑦ ᐃᓕᓴᕆᔭᐅᓯᒪᖕᒪᖔᑕ ᓇᓗᓇᐃᖅᑕᐅᓯᒪᕗᑦ ᐅᖃᓰᑦ ᐃᓕᓴᕆᔭᐅᓯᒪᔪᑦ ᐱᖁᔭᕐᒥ. ᐃᓄᐃᑦ ᐅᖃᐅᓯᖓᑕ ᓴᐳᒻᒥᔭᐅᓂᖓᓄᑦ ᐱᖁᔭᖅ ᐱᑕᖃᖅᐳᖅ ᐃᓄᐃᑦ ᐅᖃᐅᓯᖓᑦ ᓴᐳᒻᒥᔭᐅᖁᓪᓗᒍ ᐊᑐᖅᑕᐅᒃᑲᓐᓂᖅᐸᓪᓕᐊᑎᑕᐅᖁᓪᓗᒍᓗ. ᑖᒃᑯᐊᒃ ᐱᖁᔮᒃ ᑕᒪᒃᑮ ᐊᑐᐊᖅᓯᔭᕆᐊᖃᖅᑎᑦᑎᓯᒪᕘᒃ ᒥᓂᔅᑕᒥᒃ ᑐᓐᓂᖅᑯᑎᖃᕆᐊᖃᖃᑦᑕᖅᑎᑦᑎᓪᓗᑎᒃ ᐊᕐᕌᒍᑕᒪᑦ ᐅᓂᒃᑳᓕᐊᒥᒃ ᑮᓇᐅᔭᐃᑦ ᐊᕐᕌᒍᖓᑕ ᐃᓱᓕᓐᓂᐊᓂ (ᓴᐳᒻᒥᒃᖠᕐᓂᕐᒧᑦ ᐃᓚᖓ 27, ᐃᓕᓴᖅᓯᓂᕐᒧᑦ ᐃᓚᖓ 15(1)). ᑕᒪᑐᒪᓂ ᐊᕐᕌᒎᔪᒥ ᑖᓐᓇ ᐅᓂᒃᑳᓕᐊᖅ ᐃᓚᖃᓪᓗᐊᖅᐳᖅ ᐊᑐᓕᖅᑎᑦᑎᓂᕐᒧᑦ ᐸᕐᓇᐅᑎᒥᒃ ᓴᖅᑭᑦᑎᓂᕐᒥᒃ (ᓴᐳᒻᒥᒃᖠᕐᓂᕐᒧᑦ ᐃᓚᖓ 25, ᐃᓕᓴᖅᓯᓂᕐᒧᑦ ᐃᓚᖓ 13(3)). ᐊᑐᓕᖅᑎᑦᑎᓂᕐᒧᑦ ᐸᕐᓇᐅᑎ ᐊᑐᖅᑕᐅᓇᔭᖅᐳᖅ ᒐᕙᒪᒃᑯᓐᓄᑦ ᖃᓄᖅ ᐱᒪᒃᖠᖅᓯᓇᔭᕐᒪᖔᑕ ᐅᖃᐅᓯᒃᑯᑦ ᐱᔪᓐᓇᐅᑎᓂᒃ, ᖃᓄᖅ ᓴᐳᒻᒥᒃᖠᕐᓂᖅᑕᖃᕋᔭᕐᒪᖔᑦ ᖃᓄᕐᓗ ᐊᑐᖅᑕᐅᒃᑲᓐᓂᖅᑎᑦᑎᓂᖅᑕᖃᕋᔭᕐᒪᖔᑕ. ᒐᕙᒪᒃᑯᑦ ᐱᒍᔾᔨᕕᓕᒫᖏᑦ ᐱᔭᒃᓴᖃᖅᑎᑕᐅᔪᐃᓐᓇᐅᕗᑦ ᑐᓐᓂᖅᑯᑎᖃᕆᐊᖃᕐᓂᕐᒥᒃ ᐊᑐᓕᖅᑎᑦᑎᓂᕐᒧᑦ ᐸᕐᓇᐅᑎᒥᓂᒃ (ᓴᐳᒻᒥᒃᖠᕐᓂᕐᒧᑦ ᐃᓚᖓ 25(3), ᐃᓕᓴᖅᓯᓂᕐᒧᑦ ᐃᓚᖓ 13(4)).
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐊᖏᔪᖅᑳᖓᑦ ᐅᑲᓕᖅ ᐃᔨᑦᓯᐊᖅ ᐅᖃᖅᑐᖅ “ᑭᖑᕙᕆᐊᖅᑕᐅᑲᓐᓂᖃᑦᑕᑐᐃᓐᓇᓂᐊᖅᑲᑦ, ᑕᒪᓐᓇ, ᓄᖅᑲᖓᑎᑦᑎᓂᐊᖅᑐᖅ ᖁᕕᐊᓲᑕᐅᕕᔾᔪᐊᓚᐅᖅᑑᒐᓗᐊᖅ ᒪᓕᒐᖅ. ᓯᕗᓕᖅᑎ ᓴᖅᑭᑎᑦᑎᑦᑎᐊᕆᐊᓕᒃ ᐃᓄᓐᓄᑦ ᑎᓕᓯᔾᔪᑎᖃᕐᓗᓂ ᐱᓕᕆᕖᑦ ᐱᓕᕆᖃᑎᖃᖁᓗᒋᑦ ᒥᓂᔅᑕᒥᒃ ᐅᖃᐅᓯᓕᕆᓂᕐᒧᑦ, ᐊᑐᓕᖅᑎᑕᐅᔭᕆᐊᓕᓐᓂᒃ ᑲᔪᓯᑎᑦᑎᕙᓪᓕᐊᓂᕐᒧᑦ ᐸᕐᓇᑕᐅᓯᒪᔪᖅ ᓱᓕᓪᓚᑦᑖᖅᑐᒥᒃ ᓄᓇᕗᑦ ᒐᕙᒪᒃᑯᓐᓂ-ᑕᒪᐃᓐᓂᑦ ᐱᓇᓱᐊᕈᑕᐅᖁᓪᓗᒍ ᑐᕌᒐᔅᓴᖃᑦᑎᐊᕐᓗᑎᒃ.”
“ᐊᖏᕐᕋᒥ ᐊᑐᖅᑕᐅᔪᓐᓃᖅᐹᓪᓕᖅᓯᒪᓂᖃᕐᓂᖓᓄᑦ 10 ᐳᓴᓐᑎᒥᒃ ᐊᕐᕌᒍᑦ 1996ᓗ 2006ᓗ ᐊᑯᓐᓂᖏᓐᓂ. ᒫᓐᓇ ᒫᓐᓇ ᐱᓕᕆᕙᓪᓕᐊᓂᖅᑕᖃᕆᐊᖃᖅᐳᖅ”, ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᕆᑲᐃᓐᓇᖅᑕᖓ ᔭᐃᒥᓯ ᐃᑦᑐᓗᒃ ᐅᖃᖅᐳᖅ. “ᐃᓱᒫᓘᖕᓇᖅᐳᖅ ᑖᒻᓇ ᒥᓂᔅᑕ ᐊᖏᖅᑕᐅᑎᑦᓯᔨᐅᓚᐅᖅᑐᖅ ᐊᕐᕌᒎᒃ ᒪᒃᕉᒃ ᐊᓂᒍᖅᓯᒪᓕᖅᑎᓪᓗᒋᒃ ᓇᖕᒥᓂᖅ ᐊᑐᐊᖅᓯᙱᓚᖅ ᐱᖁᔭᓂᒃ ᓴᖅᑭᑎᑕᐅᖁᓚᐅᖅᑕᒥᓂᒃ.”
ᐅᖃᐅᓯᕐᓄᑦ ᑲᒥᓯᓇ, ᑐᙵᕕᒃᑯᑦ ᐊᖏᔪᖅᑳᕆᑲᐃᓐᓇᖅᑕᖓᑦ ᐊᒻᒪ ᕿᑭᖅᑕᓂᒃᑯᑦ ᐊᖏᔪᖅᑳᖓᑦ ᑕᒪᕐᒥᒃ ᐱᓂᐊᕐᓂᖃᖁᔨᕗᑦ ᓄᓇᕘᑉ ᒐᕙᒪᒃᑯᖏᓐᓂᒃ ᐊᐅᓚᑦᑎᓂᕐᒧᑦ ᐸᕐᓇᐅᑎᒥᒃ ᓴᖅᑭᑕᐅᔪᖃᖁᓪᓗᒍ ᒪᓕᒐᓕᐅᕐᕕᖕᒥ ᑲᑎᒪᓂᖅᑕᖃᒃᑲᓐᓂᓕᖅᐸᑦ.
-30-