Nunavut Tunngavik Reacts to Territorial Budget
(ᒫᑦᓯ 9, 2010 - ᑲᖏᖅᖠᓂᖅ, ᓄᓇᕗᑦ)ᓄᓇᕗᑦ ᑐᙵᕕᒃ ᑎᒥᖓᑦ ᓯᕗᓪᓕᖅ ᐊᖏᔪᖅᑳᑉ ᑐᒡᓕᐊ ᔭᐃᒥᓯ ᐃᑦᑐᓗᒃ ᐅᖃᖅᑲᐅᔪᖅ ᓄᓇᕗᑦ ᒐᕙᒪᒃᑯᑦ 2010/11 ᑮᓇᐅᔭᖅᑐᕈᑎᒃᓴᖏᑦ ᐅᖃᐅᓯᐅᑎᓪᓗᒋᑦ ᐃᓅᓯᓕᕆᓂᖅ ᐃᓕᖅᑯᓯᓕᕆᓂᕐᓗ ᐱᒻᒪᕆᐅᓂᖏᓐᓂᒃ, ᐊᒻᒪ ᑐᙵᕕᒃᑯᑦ ᓂᕆᐅᒃᐳᑦ ᐱᓕᕆᖃᑎᖃᑦᓯᐊᖃᑦᑕᕐᓂᐊᕐᓂᒥᓂᒃ ᒐᕙᒪᒃᑯᓐᓂ ᓯᕗᓪᓕᐅᔾᔭᐅᖁᔭᖏᓐᓄᑦ, ᐃᓚᒋᓪᓗᒋᑦ ᐃᓕᓐᓂᐊᖅᑐᓕᕆᓂᖅ, ᐅᖃᐅᓯᓕᕆᓂᖅ, ᐃᓕᖅᑯᓯᓕᕆᓂᖅ, ᐃᒡᓗᓕᕆᓂᖅ, ᐊᖏᕐᕋᖃᖏᑦᑐᓕᕆᓂᖅ ᐊᒻᒪ ᓂᕿᒃᓴᖃᖏᓗᐊᖅᐸᒃᑐᓂᒃ ᓄᖅᑲᐅᒥᑎᑦᓯᓇᓱᐊᕐᓂᕐᒧᑦ. ᑮᓇᐅᔭᓕᕆᓂᕐᒧᑦ ᒥᓂᔅᑕ ᑮᑦ ᐲᑐᓴᓐ ᑮᓇᐅᔭᖅᑐᕈᑎᒃᓴᓂᒃ ᓴᖅᑮᖅᑲᐅᔪᖅ ᓄᓇᕗᑦ ᒪᓕᒐᓕᐅᕐᕕᖓᓂ ᐃᒃᐸᔅᓴᖅ.
ᐃᑦᑐᓗᒃ ᐅᖃᖅᑲᐅᔪᖅ ᓄᓇᕗᑦ ᒐᕙᒪᒃᑯᖏᑦ ᓇᓗᓇᐃᖅᓯᑦᑎᐊᕆᐊᓖᑦ ᓴᖅᑮᓗᑎᒃ ᐊᑯᓃᖅᑐᒧᑦ ᐃᓪᓗᓕᕆᓂᕐᒧᑦ ᐊᑐᖅᑕᐅᔪᒃᓴᓂᒃ. ᓇᓗᓇᐃᖅᓯᒋᐊᖅᑐᓂᓗ ᑐᙵᕕᒃᑯᑦ ᓄᓇᕗᓪᓗ ᒐᕙᒪᒃᑯᖏᑦ ᐱᕙᓪᓕᐊᔪᑦ ᓄᓇᕗᒻᒥ ᐊᕐᕌᒍᓄᑦ ᖁᓕᓄᑦ ᐃᓄᐃᑦ ᐃᓕᓪᓗᓕᕆᓂᕐᒧᑦ ᐸᕐᓇᐅᑎᖏᑦ 2004-ᖑᑎᓪᓗᒍ, ᑭᓯᐊᓂ ᓴᖅᑭᑕᐅᓚᐅᖅᑎᓪᓗᒋᑦ ᒐᕙᒪᑐᖃᒃᑯᓐᓂ ᑮᓇᐅᔭᖃᐅᑎᒃᓴᐃᑦ 2006-ᒥ, ᐊᒥᓱᑦ ᐊᑐᖅᑕᐅᔭᕆᐊᓖᑦ ᐊᑐᖅᑕᐅᓚᐅᙱᒻᒪᑕ. ᐃᑦᑐᓗᒃ ᐅᖃᖅᑐᖅ ᑐᙵᑯᒃᑯᑦ ᓂᕆᐅᒃᐳᑦ ᐱᓕᕆᖃᑎᖃᕐᓂᐊᓂᕐᒥᓂᒃ ᓄᓇᕗᑦ ᒐᕙᒪᒃᑯᖏᓐᓂ ᐃᓪᓗᓕᕆᓂᕐᒧᑦ, ᑭᓯᐊᓂ ᑲᑐᔾᔨᖃᑎᒌᑦᑎᐊᕆᐊᖃᕐᓂᐊᖅᑐᑦ.
ᐊᔾᔨᐸᓗᐊᓂᒃ, $1.5 ᒥᓕᐊᓐ ᐊᑐᐃᓐᓇᐅᑎᑕᐅᔪᑦ ᐊᕐᕌᒎᒃ ᒪᕐᕉᓐᓄᑦ ᕿᒥᕐᕈᔭᐅᑎᐊᓂᐊᕐᓗᑎᒃ ᓱᕈᓯᕐᓄᑦ ᓴᐳᔾᔨᔾᔪᑏᑦ ᐊᑐᐃᓐᓇᐅᑎᑕᐅᒧᑦ, ᐱᔨᑦᓯᕋᐅᑏᑦ ᐊᑐᐊᒐᐃᓪᓗ, ᐃᑦᑐᓗᒃ ᐅᖃᖅᑐᖅ ᑐᙵᑯᒃᑯᑦ ᐃᓚᐅᖃᑦᑕᕆᐊᖃᕐᓂᐊᕐᓂᖏᓐᓂᒃ ᐱᓕᕆᐊᖑᔪᓄᑦ, ᒪᓕᒃᖢᒋᑦ ᑎᑎᕋᖅᓯᒪᔪᑦ ᐃᓛᒃᑯᑦ 32 ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᑎᒍᑦ. ᐃᓚᒋᐊᕐᖢᓂᐅᒃ ᑐᙵᕕᒃᑯᑦ ᖃᓄᖅᑑᓂᐊᕐᓂᖏᑦ ᓄᓇᕗᑦ ᒐᕙᒪᒃᑯᓐᓄᑦ ᒪᑐᐃᖅᓯᖁᓪᓗᒋᑦ ᓱᕈᓯᕐᓄᑦ ᒪᒃᑯᑦᑐᓄᓪᓗ ᒋᒡᒐᑐᖅᑎᖃᕆᐊᖃᕐᓂᖏᑦ ᒫᓐᓇᒫᒃᑯᑦ.
ᐃᑦᑐᓗᒃ ᐅᖃᑐᖅ ᑮᓇᐅᔭᖅᑐᕈᑎᒃᓴᖏᑦ ᖁᐊᖅᓵᓇᖅᑐᖃᓚᐅᖏᑦᑐᑦ, ᑐᙵᕕᒃᑯᑦ ᓂᕆᐅᒃᐳᑦ ᓄᓇᕗᑦ ᒐᕙᒪᒃᑯᖏᑦ ᓴᖅᑮᓂᐊᕐᓂᖏᓐᓂᒃ ᑕᕝᕙᙵᑦ $1.3 ᒥᓕᐊᓐ ᑮᓇᐅᔭᖅᑐᕈᑎᒃᓴᓂ.
“ᓄᓇᕗᑦ ᑐᙵᕕᒃ ᑎᒥᖓᑦ ᖁᕕᐊᒃᐳᑦ ᑕᑯᒋᐊᒃᓴᖅ ᐊᖏᓪᓕᒋᐊᖅᑕᐅᓯᒪᓂᖏᓐᓂᒃ ᑮᓇᐅᔭᖃᖅᑎᑕᐅᔾᔪᑎᒃᓴᖏᑦ ᐱᖅᑯᓯᓕᕆᕝᕕᒃ, ᓄᓇᕗᒻᒥ ᐃᖅᑲᓇᐃᔭᕆᐅᖅᓴᓂᕐᒧᑦ ᐃᓕᓐᓂᐊᕐᕕᒃ, ᐃᓐᓇᕐᓄᑦ ᐃᓕᓐᓂᐊᕐᓂᖅ ᐊᒻᒪ ᐃᓄᐃᑦ ᐅᖃᐅᓯᖏᓐᓂᒃ ᑕᐃᒎᓯᓕᐅᖅᑏᑦ. ᑐᙵᕕᒃᑯᑦ ᓂᕆᐅᒃᐳᑦ ᐱᔭᕇᔭᖅᑕᐅᓂᐊᕐᓂᖏᓐᓂᒃ ᐊᐅᓚᓕᕐᓂᐊᕐᓂᖓᓂᓪᓗ ᐃᓕᓐᓂᐊᕐᕕᐅᑉ, ᐊᑯᓂᐊᓗᒃ ᑕᒪᓐᓇ ᓴᖅᑭᑕᐅᒐᓱᐊᖅᓯᒪᔪᖅ,” ᐅᖃᖅᑐᖅ ᐃᑦᑐᓗᒃ.
ᐅᖃᒃᑲᓐᓂᕆᓪᓗᓂ ᑐᙵᕕᒃᑯᑦ ᖁᕕᐊᒃᐳᑦ ᐃᓚᔭᐅᓂᖏᓐᓂᒃ ᑮᓇᐅᔭᐃᑦ ᐱᕙᓪᓕᐊᓂᕐᒧᑦ ᐊᖏᕐᕋᖃᖏᑦᑐᓕᕆᓂᐅᑉ ᐊᒻᒪ ᓂᕿᖃᖏᓗᐊᖃᑦᑕᖅᑐᓄᑦ. “ᓂᕿᒃᓴᖃᖏᓗᐊᖃᑦᑕᕐᓂᖅ ᐊᑲᐅᙱᓕᐅᕈᑎᒻᒪᕆᐅᔪᖅ ᓄᓇᕗᒻᒥ, ᑐᙵᕕᒃᑯᓪᓗ ᐊᖏᖃᑎᖃᖅᖢᑎᒃ ᑕᒪᓐᓇ ᐱᓕᕆᐊᖑᔭᕆᐊᖃᕐᓂᖓᓂᒃ. ᑐᙵᕕᒃᑯᑦ ᑐᙵᓱᑦᑎᑦᓯᕗᑦ ᒥᓂᔅᑕ ᐲᑕᓴᓐ ᐃᓕᑕᖅᓯᓯᒪᓂᖓᓂᒃ ᑕᒪᒃᓱᒪ ᐊᑲᐅᙱᓕᐅᕈᑎᐅᔫᑉ. ᑐᙵᕕᒃᑯᑦ ᐱᓕᕆᖃᑎᖃᕐᓂᐊᖅᐳᑦ ᓄᓇᕗᑦ ᒐᕙᒪᒃᑯᓐᓂ ᐊᓯᖏᓐᓂᓪᓗ ᐃᓚᒋᔭᐅᔪᓂᒃ ᓄᓇᕗᒻᒥ ᐱᕙᓪᓕᐊᔪᓕᕆᓂᕐᒧᑦ ᑲᑎᒪᔨᓂᒃ ᓴᖅᑮᕙᓪᓕᐊᑎᓪᓗᒋᑦ ᓂᕿᒃᓴᖃᖏᓗᐊᓂᐅᕙᒃᑐᒥᒃ ᐋᖅᑮᕙᓪᓕᐊᓇᓱᐊᖅᑎᓪᓗᒋᑦ,” ᐅᖃᑐᖅ. ᓂᕿᒃᓴᖃᙱᓗᐊᕐᓂᐅᕙᒃᑐᒧᑦ ᐋᒃᑭᒋᐊᕈᑏᑦ ᐊᒃᑐᐊᓂᖃᕐᓂᐊᖅᑐᑦ ᓄᓇᕗᒻᒥ ᐱᕙᓪᓕᐊᔪᓕᕆᓂᕐᒧᑦ ᐋᖅᑭᒃᓯᒪᔾᔪᑎᓂ, ᑐᙵᕕᒃᑯᓐᓂ ᐃᑲᔪᖅᑐᖅᑕᐅᔪᖅ 2003-ᒥᓂᒃ.
-30-