Nunavut Tunngavik Disappointed by Polar Bear Quota Reduction
(ᒫᑦᓯ 5, 2010 -- ᑲᖏᕐᖠᓂᖅ, ᓄᓇᕗᑦ) ᓄᓇᕗᑦ ᑐᓐᖓᕕᒃ ᑎᒥᖓᑕ ᑮᓇᐅᔭᓕᕆᓂᕐᒧᑦ ᐊᖏᔪᖅᑳᑉ ᑐᒡᓕᐊ ᕋᐃᒪᓐ ᓂᖏᐅᑦᓯᐊᖅ ᐅᓪᓗᒥ ᐅᖃᖅᑲᐅᔪᖅ ᖁᕕᐊᓱᓐᖏᓂᕐᒥᓂᒃ ᐋᖅᑭᑦᑕᐅᓚᐅᖅᑐᒥᒃ ᐃᓱᒪᓕᐅᕈᑕᐅᓂᒃᑯᑦ ᓇᓐᓄᑦᑕᐅᔪᓐᓇᖅᑐᓂᒃ ᓴᓐᓂᕈᒻᒥ ᓇᓄᖏᓐᓂᒃ 105-ᒥᒃ 65-ᒧᑦ ᓯᑕᒪᓄᑦ ᐊᕐᕌᒍᓄᑦ ᐃᓕᖓᓂᐊᖅᑐᒥᒃ. ᐋᖅᑭᑦᑕᐅᔪᖅ ᐅᖃᐅᓯᐅᖅᑲᐅᔪᖅ ᐅᓪᓗᒥ ᓄᓇᕗᑦ ᒐᕙᒪᒃᑯᖏᑕ ᐊᕙᑎᓕᕆᔨᒃᑯᓐᓂ ᒥᓂᔅᑕᖓᓄᑦ ᑖᓂᐅᓪ ᓯᐅᑦᓴᒃ. ᑰᑕ ᐃᓅᓴᓪᓕᒋᐊᖅᑕᕐᔪᐊᒻᒪᕆᐊᓘᓂᐊᖅᑐᖅ ᖁᓕᓂᒃ ᓇᓄᕐᓂᒃ ᐊᕐᕌᒍᒥ ᓇᓐᓄᒐᑦᓴᐅᑎᑕᐅᔪᑦ ᓄᑖᓐᖑᕋᓱᐊᕐᓂᖏᓐᓂ ᑰᑕᑦ ᑎᑭᐅᑎᓇᓱᐊᕐᓂᖏᓐᓂ.
ᓂᖏᐅᑦᓯᐊᖅ ᐃᓱᒫᓘᑎᖃᕐᓂᕋᖅᑐᖅ ᐃᓱᒪᓕᐅᕈᑕᐅᔪᒥᒃ ᑖᒃᑯᓇᓐᖔᖅᓯᒪᓂᖏᓐᓄᑦ ᐱᑐᖃᕐᔪᐊᒻᒪᕆᐊᓘᓕᖅᑐᓂᒃ ᐅᓪᓗᒥᓂᓴᐅᒍᓐᓃᖅᑐᓂᒃ ᖃᐅᔨᓴᖅᑎᕐᔪᐊᑦ ᓇᓄᕐᓂᒃ ᑐᓴᕈᓯᐊᕆᓯᒪᔭᖏᓐᓂᒃ, ᐊᒻᒪᓗ ᓴᖑᑦᓯᓪᓗᑎᒃ ᐃᓱᒪᓕᐅᕈᑎᒋᓚᐅᖅᑕᖏᓐᓂᒃ ᓄᓇᕗᑦ ᒐᕙᒪᒃᑯᖏᑕ ᐆᑦᑑᕝᕙ, 2008-ᒥ, ᑰᑕᐃᑦ ᐃᓅᓴᓪᓕᒋᐊᖅᑕᐅᖁᓇᒋᑦ ᐃᓄᖕᓂᒃ ᑐᓴᕋᓱᐊᓚᐅᖅᑳᖏᓐᓂᖏᓐᓂ.
"ᓯᕗᓪᓕᖅ ᐃᓱᒪᓕᐅᕈᑕᐅᓚᐅᖅᑐᖅ ᑖᒃᑯᓇᓐᖔᓚᐅᖅᑐᖅ ᐃᓄᐃᑦ ᖃᐅᔨᒪᓂᕐᒥᒍᑦ ᐱᖕᒪᕆᐅᔪᖁᑎᒋᔭᖏᓐᓂᒃ ᑐᓐᖓᕕᖏᓐᓂᓪᓗ. ᑖᓐᓇ ᓄᑖᖅ ᐃᓱᒪᓕᐅᕈᑕᐅᔪᖅ ᓴᖅᑭᕈᑕᐅᔪᖅ ᓈᖕᒪᓐᖏᓐᓂᖓᓂᒃ ᐅᓪᓗᒥᓯᐅᑎᐅᔪᑦ
ᐆᒪᔪᓕᕆᓂᕐᒧᑦ ᐊᐅᓚᑦᓯᔾᔪᑏᑦ ᐊᒻᒪᓗ ᐃᓄᐃᑦ," ᐅᖃᓚᐅᖅᑐᖅ ᓂᖏᐅᑦᓯᐊᖅ.
ᓂᖏᐅᑦᓯᐊᖅ ᒥᓂᔅᑕ ᓯᐅᑦᓴᒃᒥᒃ ᐊᐱᖅᓱᖅᑐᖅ ᐃᓄᐃᑦ ᐊᑭᓕᖅᑕᐅᓂᐊᕐᒪᖔᑕ ᐊᒃᑐᖅᑕᐅᔪᑦ ᓄᓇᓖᑦ ᑖᑦᓱᒧᖓ, ᑖᒃᑯᐊᖑᔪᑦ ᒥᑦᑎᒪᑕᓕᒃ, ᑲᖏᕐᖢᒑᐱᒃ ᐊᒻᒪᓗ ᕿᑭᖅᑕᕐᔪᐊᖅ. " ᒥᓂᔅᑕ ᐊᑭᓕᖅᑕᐅᔾᔪᑎᒃᓴᖃᓚᖓᒐᓗᐊᕐᒪᖔᑕ ᐃᓄᐃᑦ ᓇᓗᓇᐃᖅᓯᒋᐊᓕᒃ ᐊᒃᑐᖅᑕᐅᔪᓂᒃ ᓄᓇᓕᓐᓂᒃ ᒐᕙᒪᒃᑯᑦ ᐃᓱᒪᓕᐅᕈᑎᒋᔭᖓᓄᑦ. ᐃᓅᓴᓪᓕᒋᐊᖅᑕᐅᓂᖅ ᑕᒪᓐᓇ ᑲᑕᑉᐸᓪᓕᕈᑎᒻᒪᕆᐊᓘᓂᐊᕐᒪᑦ ᐊᒃᑐᐃᓂᖓᓄᑦ ᐃᓄᐃᑦ ᒪᑭᒪᔾᔪᑎᖏᓐᓂᒃ ᑖᒃᑯᓇᓂ ᓄᓇᓕᓐᓂ."
ᓂᖏᐅᑦᓯᐊᖅ ᐅᖃᓚᐅᖅᑐᖅ ᐃᓄᐃᑦ ᐅᖃᖅᓯᒪᔪᑦ ᓇᓄᓕᒻᒪᕆᐊᓘᓕᕐᓂᖓᓂᒃ ᐅᓄᖅᓯᕙᓪᓕᖅᓯᒪᓂᖏᓐᓂᒃ ᐅᑭᐅᓂ ᖁᓕᓂ, ᑭᓯᐊᓂᓕ ᓄᓇᕗᑦ ᒐᕙᒪᒃᑯᖏᑦ ᐋᖅᑭᐅᒪᑦᓯᔪᑦ ᐃᓅᓴᓪᓕᕙᓪᓕᖅᓯᒪᔪᒻᒪᕆᐅᓂᖏᓐᓂᒃ. ᓄᓇᕗᑦ
ᒐᕙᒪᒃᑯᖏᑦ ᓇᓗᓇᐃᖅᓯᒪᔪᑦ ᐸᕐᓇᓯᒪᓂᕐᒥᓂᒃ ᓄᑖᓐᖑᕆᐊᕈᑎᒃᓴᓂᒃ ᖃᐅᔨᓴᕐᓂᐅᓯᒪᔪᓄᑦ ᖃᐅᔨᓴᓛᕐᓂᕐᒥᓂᒃ ᓇᓄᖃᕐᓂᕆᓕᖅᑕᖓᓂᒃ ᓴᓐᓂᕈᒻᒥ.