Nunavut Tunngavik Clarifies Policies and Suspension

(ᓯᑎᐱᕆ 1, 2010 – ᐃᖃᓗᐃᑦ, ᓄᓇᕗᑦ)

1. ᓄᓇᕗᑦ ᑐᙵᕕᒃ ᑎᒥᖓᑦᑕ ᐊᑐᐊᒐᖏᑦ ᕿᒥᕐᕈᔭᐅᓯᒪᔪᑦ ᐊᒻᒪᓗ ᓇᓗᓇᐃᖅᑕᐅᓯᒪᓪᓗᑎᒃ ᓱᓕᓂᖏᑦ ᑕᐃᒪᖓᓂᑦ 2008-ᒥᑦ ᐃᓚᖃᖅᖢᑎᒃᓗ ᐊᒻᒪᓗ ᐃᓱᓕᕝᕕᖃᕋᑎᒃ ᐅᑯᓄᖓ ᓄᓇᕗᑦ ᑐᙵᕕᒃ ᑎᒥᖓᓐᓄᑦ ᐊᐅᒃᑕᔫᓄᑦ ᐊᑐᐊᒐᐃᑦ, ᓄᓇᕗᑦ ᑐᙵᕕᒃ ᑎᒥᖓᑦᑕ ᑮᓇᐅᔭᓄᑦ ᐊᑐᕐᓂᕐᒥᑦ ᐊᑐᐊᒐᐃᑦ, ᓄᓇᕗᑦ ᑐᙵᕕᒃ ᑎᒥᖓᑦᑕ ᐃᖏᕐᕋᓂᕐᒧᑦ ᐊᑐᐊᒐᖏᑦ ᐊᒻᒪᓗ ᓄᓇᕗᑦ ᑐᙵᕕᒃ ᑎᒥᖓᑦᑕ ᐊᐅᓚᑦᑎᔨᖏᑦ ᐅᑎᖅᑎᕝᕕᐅᕙᖕᓂᖏᓐᓄᑦ ᐊᑐᐊᒐᐃᑦ (“ᒫᓐᓇ ᐊᑐᖅᑐᑦ ᐊᑐᐊᒐᐃᑦ”). ᑕᒪᒃᑯᐊ ᕿᒥᕐᕈᔭᐅᓚᐅᖅᑐᑦ ᐊᒻᒪᓗ ᐊᖏᖅᑕᐅᓪᓗᑎᒃ ᐅᑯᓄᖓ ᓄᓇᕗᑦ ᑐᙵᕕᒃ ᑎᒥᖓᑦᑕ ᐊᖓᔪᖃᐅᑎᑦ ᐊᐅᓚᑦᑎᔨᖏᓐᓄᑦ ᐊᑐᕆᐊᓕᖅᑎᓪᓗᒍ 2009 ᐊᒻᒪᓗ ᓇᓗᓇᐃᖅᓯᒃᑲᓐᓂᖅᖢᑎᒃ ᐃᓚᒋᓪᓗᒍ ᓄᓇᕗᑦ ᑐᙵᕕᒃ ᑎᒥᖓᑦᑕ ᐊᖓᔪᖅᑳᖓᑦ ᓄᓇᕗᑦ ᑐᙵᕕᒃ ᑎᒥᖓᑦᑕ ᐊᖓᔪᖃᐅᑎᖏᑦ ᐊᐅᓚᑦᑎᔨᑦ ᑲᑎᒪᓂᖓᓐᓂ ᖃᐅᓱᐃᑦᑐᒥᖅ ᓯᑎᐱᕆ 2009. ᑐᑭᓯᒍᑎᒃᓴᑦ ᐊᑐᐃᓐᓇᕈᖅᑎᑕᐅᑎᓪᓗᒋᑦ ᐅᑯᓄᖓ ᓄᓇᕗᑦ ᑐᙵᕕᒃ ᑎᒥᖓᑦᑕ ᑲᑎᒪᔨᖏᓐᓄᑦ 2009-ᒥ ᓄᓇᕗᑦ ᑐᙵᕕᒃ ᑎᒥᖓᑦ ᐊᕐᕌᒍᑕᒫᖅᓯᐅᑎᓄᑦ ᑲᑎᒪᕕᒃᔪᐊᖅᑎᓪᓗᒋᑦ ᓄᕕᑉᐸ, 2009, ᐅᑯᐊ ᓄᓇᕗᑦ ᑐᙵᕕᒃ ᑎᒥᖓᑦᑕ ᑲᑎᒪᔨᖏᑦ ᑭᖑᕙᕆᐊᖅᓯᓚᐅᖅᑐᑦ ᐱᔾᔪᑎᒥᑦ ᐃᓕᓪᓗᒍ ᕕᕝᔪᐃᕆ, 2010, ᓄᓇᕗᑦ ᑐᙵᕕᒃ ᑎᒥᖓᑦᑕ ᑲᑎᒪᔨᖏᓐᓄᑦ ᑲᑎᒪᓂᐅᓚᐅᖅᑐᒥ ᐃᖃᓗᒃᑑᑎᑦᐊᒥ, ᑕᐃᓱᒪᓂ ᐅᑯᐊ ᓄᓇᕗᑦ ᑐᙵᕕᒃ ᑎᒥᖓᑦᑕ ᑲᑎᒪᔨᖏᑦ ᓇᓗᓇᐃᖅᓯᒃᑲᓐᓂᓚᐅᖅᑐᑦ ᐊᑐᐊᒐᓂᑦ ᓱᓕ ᐃᓚᒋᓪᓗᒍ ᓄᓇᕗᑦ ᑐᙵᕕᒃ ᑎᒥᖓᑦᑕ ᐊᖓᔪᖅᑳᖓᑦ ᑕᐃᑲᓃᑎᓪᓗᒍ ᑲᑎᒪᓂᐅᔪᒥ.

2. ᐃᒪᓐᓇᐃᒋᐊᖃᕐᒪᑕ ᐅᑯᐊ ᓄᓇᕗᑦ ᑐᙵᕕᒃ ᑎᒥᖓᑦᑕ ᑎᒥᖁᑎᐊᓄᑦ ᑎᒍᒻᒥᔪᑦ ᐊᐅᒃᑕᔫᒥᑦ ᐱᔭᒃᓴᕆᓪᓗᓂᐅᒃ ᐊᑐᐃᓐᓇᕈᐃᔭᕆᐊᖃᕐᓂᕐᒧᑦ ᑕᒪᐃᓐᓂᒃ ᑭᖑᕝᕕᖅᓯᒍᑎᓂᑦ ᓂᐅᕕᕈᑎᓄᑦ ᐊᒻᒪᓗ ᐱᐊᓂᒃᓗᒋᑦ ᓇᓕᒧᒃᑎᓕᕆᐊᓕᑦ. ᓇᓪᓕᐊᑐᐃᓐᓇᖅ ᔭᒐᓯᒪᔪᖅ ᑐᑭᓯᒍᑎᒃᓴᖅ ᐱᓇᓱᒋᐊᖃᖅᑕᖓ ᑖᑦᓱᒪ ᑎᒍᒻᒥᔫᑉ ᐊᐅᒃᑕᔫᒥᑦ. ᐃᖅᑲᓇᐃᔭᖅᑎᑦ ᐃᑲᔪᕈᓐᓇᖅᑐᑦ ᑎᒍᒻᒥᔪᒥᑦ ᐊᐅᒃᑕᔫᒥᑦ ᐱᓕᕆᐊᖃᖅᑎᓪᓗᒍ ᓇᓕᒧᓕᖅᑎᕆᓂᕐᒧᑦ ᑭᓯᐊᓂ ᐊᔪᕋᔭᖅᑐᖅ ᐊᑐᐃᓐᓇᕈᐃᓂᕐᒥᑦ ᐱᑕᖃᖏᑦᑐᓂᑦ ᑭᒍᕝᕕᖅᓯᒍᑎᓂᑦ ᓂᐅᕕᕈᑎᓄᑦ ᐱᑕᖃᖏᑉᐸᑕ ᐅᕝᕙᓘᓐᓃᑦ ᐅᓂᒃᑳᕐᓂᕐᒥᑦ ᐱᓕᕆᐊᒧᑦ ᐱᔾᔪᑎᖏᓐᓂᑦ ᐊᑭᓕᒃᓴᖅᑖᕈᑎᒧᑦ ᑖᓐᓇ ᑎᒍᒻᒥᔨ ᐊᐅᒃᑕᔫᒥᑦ ᐊᔪᖅᐸᑦ ᓇᖕᒥᓂᖅ. ᐊᑐᐊᒐᖅ ᓇᓗᓇᐃᖅᓯᒪᔪᖅ ᑖᓐᓇ ᑎᒍᒻᒥᔨ ᐊᐅᒃᑕᔫᒥᑦ ᐱᕕᖃᖅᑐᖅ ᐅᑉᓗᓂᒃ ᖁᓕᓂᒃ ᓇᓕᒧᓕᖅᑎᕆᔭᕆᐊᖃᕐᓂᐊᓂᒃ ᐊᐅᒃᑕᔫᒧᑦ ᓇᓗᓇᐃᖅᓯᒪᔪᓂᑦ ᐊᑐᓂᕐᓂᑯᓄᑦ ᑕᐃᒃᑯᐊ ᐱᔭᐅᕙᒃᑐᑦ ᑕᖅᑭᑕᒫᑦ. ᐊᖓᔪᖅᑳᖅ ᑐᓂᔭᐅᓯᒪᖃᑦᑕᖅᑲᐅᔪᖅ ᐊᒥᓱᐊᖅᑕᖅᖢᑎᒃ ᐅᖓᔭᕆᐊᖅᑕᐅᕙᒃᖢᓂ ᐱᐊᓂᒃᕕᒃᓴᖓ ᓇᓕᒧᓕᖅᑎᕆᓂᕐᒧᑦ ᑭᓯᐊᓂ ᑐᖓᐅᑦᑏᓐᓇᖅᑐᖅ.
ᐊᑐᐊᒐᑦ ᑐᑭᓯᓇᖅᓯᓯᒪᑦᑎᐊᖅᑐᑦ ᐅᖃᖅᓯᒪᓂᖏᑦ ᑖᒃᑯᐊ ᐊᐅᒃᑕᔫᑦ ᐊᑐᖅᑕᐅᔭᕆᐊᖃᖏᓐᓂᖏᓐᓂᑦ ᐃᖕᒥᓄᑦ ᓇᖕᒥᓂᖅ ᐊᑭᓕᐅᑎᒋᓗᒍ. ᒪᓕᒃᖢᒍ ᐊᑐᐊᒐᖅ, ᐊᑭᓕᒃᓴᖅᑖᕈᑎᒃᓴᖓᑦ ᐊᔪᖅᑎᑕᐅᒃᐸᑦ ᑎᒥᐅᔪᑦ ᐊᑭᓕᐅᑎᒋᔭᐅᓇᓱᖕᓂᐊ (ᓱᓇᑐᐃᓐᓇᒥ ᐱᔾᔪᑎᖃᖅᑎᓪᓗᒍ (ᐆᒃᑑᑦ., ᐱᐊᓂᒃᓯᒪᖏᑦᑐᑦ ᑭᖑᕝᕕᖅᓯᕈᑎᑦ ᓂᐅᕕᕈᑎᕕᓂᓄᑦ ᐅᕝᕙᓘᓐᓃᑦ ᐅᓂᒃᑳᖅᓯᒪᖏᑉᐸᑕ ᓱᓇᒧᑦ ᐊᑐᕐᓂᐅᔪᑦ), ᑎᒍᒻᔨ ᐊᐅᒃᑕᔫᒥᑦ ᐱᖁᔭᐅᓂᐊᖅᑐᖅ ᐊᑐᐃᓐᓇᕈᐃᖁᔭᐅᓗᓂ ᐃᓗᐃᑦᑐᒥᑦ ᐅᑎᖅᑎᑦᑎᓂᕐᒧᑦ ᐅᑯᓄᖓ ᓄᓇᕗᑦ ᑐᒥᕕᒃ ᑎᒥᖓᓐᓄᑦ ᓯᕗᓪᓕᖅᐹᖅ ᐃᓗᐊᓂ ᐅᑉᓗᐃᑦ ᖁᓕᑦ (10) ᓇᓕᒧᓕᖅᑎᕆᓂᕐᒧᑦ ᐃᓕᖓᔪᑦ. ᑎᒍᒻᒥᔨ ᐊᐅᒃᑕᔫᒥᑦ ᐅᑎᖅᑎᕝᕕᐅᔪᓐᓇᕋᔭᖅᑐᖅ ᑭᖑᓂᐊᒍᑦ ᑎᒍᒻᒥᔨ ᐊᐅᒃᑕᔫᒥᑦ ᑕᑯᒃᓴᐅᑎᑦᑎᔪᓐᓇᖅᐸᑕ ᐊᑭᓕᒃᓴᖅᑖᕈᑖᓄᑦ ᐃᒪᓐᓇᓗ ᐱᓕᕆᐊᖓᓄᑦ ᐊᒃᑐᐊᓂᖃᖅᐸᑦ. ᐊᑐᐊᒐᖅ ᐱᔪᓐᓇᖅᑎᑦᑎᖏᒻᒪᑦ ᐃᓱᓕᕝᕕᖃᖅᑎᑦᑎᖏᑦᑐᖅ ᐅᑉᓗᓂᑦ ᐊᒻᒪᓗ ᐱᕕᖃᖅᑎᑦᑎᔪᖅ ᑎᒍᒻᒥᔨᐅᔪᒥᑦ ᐊᐅᒃᑕᔫᒥᑦ ᓇᓕᒧᓕᖅᑎᕆᓂᕐᒧᑦ ᑮᓇᐅᔭᓕᕆᓂᕐᒧᑦ.

3. ᓄᓇᕗᑦ ᑐᙵᕕᒃ ᑎᒥᖓᑦᑕ ᐊᐅᓚᓂᖃᕐᒪᑦ ᐊᖏᖅᑕᐅᓯᒪᔪᑎᒍᑦ ᐊᑐᐊᒐᓂᑦ ᐊᒻᒪᓗ ᒪᓕᒃᑕᐅᔪᒃᓴᑦ ᐊᒻᒪᓗ ᐱᑕᖃᖏᒻᒪ ᑎᑎᕋᖅᓯᒪᖏᑦᑐᓂᑦ ᐊᑐᐊᒐᓂᑦ ᐅᕝᕙᓘᓐᓃᑦ ᑕᐃᔭᐅᔪᑦ-ᐃᒪᓐᓇ “ᐊᖏᖃᑎᒌᒃᑐᑦ ᑎᑎᕋᖅᓯᒪᖏᑦᑐᒃᑯᑦ” ᓯᓚᑖᓂ ᐊᑐᐊᒐᐃᑦ. ᐅᒃᐱᕆᔭᐅᒃᐸᑕ ᐃᓚᐃᓐᓇᖏᒃ ᐃᑲᔫᓯᐊᑦ ᐅᕝᕙᓘᓐᓃᑦ ᐊᖏᕈᑎᑦ ᓴᖅᑯᒥᒃᐸᑕ ᓯᓚᑖᓂ ᐊᑐᐊᒐᐃᑦ, ᑕᒪᒃᑯᐊ ᑕᐃᒪ ᓴᖅᑭᑎᑕᐅᔭᕆᐊᖃᓚᐅᕋᓗᐊᖅᑐᐳᑦ ᐱᓕᕆᐊᖃᖅᑎᓪᓗᒋᑦ ᒫᓐᓇᓵᖅ ᕿᒥᕐᕈᐃᓂᐅᓚᐅᖅᑐᓂᑦ ᐊᑐᖅᑐᓂᑦ ᒫᓐᓇ ᐊᑐᐊᒐᓂᑦ.

4. ᐃᖅᑲᐃᑎᔾᔪᑎᑦ ᒪᑯᓄᖓ ᑲᒪᒋᔭᐅᓯᒪᖏᑦᑐᓄᑦ ᐆᒧᖓ ᐊᖓᔪᖅᑳᑉ ᐊᐅᒃᑕᔫᖓᓄᑦ ᐱᒋᐊᓚᐅᖅᓯᒪᔪᑦ ᔮᓐᓄᐃᕆ 2009-ᒥᑦ. ᐃᖅᑲᓇᐃᔭᖅᑎᕗᑦ ᐱᓪᓗᕆᒃᓯᓯᒪᐃᓐᓇᖅᑐᑦ ᐊᒻᒪᓗ ᐅᔾᔨᕆᓯᒪᓪᓗᑎᒃ ᐱᔾᔪᑎᐅᔪᓂᑦ ᖃᐅᔨᔭᖏᑦᑎᒍᑦ ᓴᖅᑭᑐᐊᕌᖓᑕ ᐱᒋᐊᖅᓗᒍ ᔮᓐᓄᐃᕆ 2009-ᒥᑦ ᐊᒻᒪᓗ ᑲᔪᓰᓐᓇᖅᓯᒪᔪᑦ ᓴᖅᑭᑎᑦᑎᕙᒃᖢᑎᒃ ᐃᓱᒫᓘᑎᓂᑦ ᐊᖓᔪᖅᑳᑉ ᑎᒥᒧᑦ ᐊᐅᒃᑕᔫᖓᓄᑦ ᐊᑯᓚᐃᑐᒥᑦ ᑭᖑᓂᐊᒍᑦ.

5. ᑮᓇᐅᔭᖁᑎᑦ ᒪᑯᓄᖓ ᑐᖓᓱᒃᑎᑦᑎᓂᕐᒧᑦ ᐊᖓᔪᖅᑳᒧᑦ ᐃᒪᓐᓇ ᐊᖏᓂᓕᒃ $20,000.00 ᐊᕐᕌᒍᑕᒫᑦ. ᑕᒪᓐᓇ ᕿᒥᕐᕈᔭᐅᕙᒃᑐᖅ ᐊᕐᕌᒍᑕᒫᑦ ᐊᒻᒪᓗ ᐊᑐᐃᓐᓇᕈᖅᑕᐅᕙᒃᖢᓂ ᐆᒧᖓ ᓄᓇᕗᑦ ᑐᒥᕕᒃ ᑎᒥᖓᑦᑕ ᐊᖓᔪᖅᑳᖓᓐᓄᑦ.

6. ᓄᓇᕗᑦ ᑐᙵᕕᒃ ᑎᒥᖓᑦᑕ ᑲᑎᒪᔨᖏᑦ ᐱᖁᔨᕗᖔᕈᑎᒃᑯᑦ ᓄᖅᑲᖅᑎᑦᑎᑲᐃᓐᓇᓚᐅᖅᑐᑦ ᓄᓇᕗᑦ ᑐᙵᕕᒃ ᑎᒥᖓᑦᑕ ᐊᖓᔪᖅᑳᖓᓐᓂᑦ ᑎᑭᐅᑎᓪᓗᒍ ᐊᒃᑑᐸ 30, 2010. ᐃᓕᖓᔪᓂᒃ ᐱᑕᖃᖏᑦᑐᖅ ᒪᓕᒃᒐᒃᓴᓂᑦ ᐊᓯᔾᔨᕈᑕᐅᔪᒃᓴᓄᑦ ᐅᑉᓗᒥᒧᑦ ᓄᓇᕗᑦ ᑐᙵᕕᒃ ᑎᒥᖓᑦᑕ ᑲᑎᒪᔨᖏᑦᑕᓗ ᐱᖁᔨᕗᒑᓕᐊᖓᓐᓄᑦ ᑭᓯᐊᓂ ᑲᑎᒪᔨᑦ ᑲᑎᒋᐊᓕᕐᒥᒃᐸᑕ ᐊᒻᒪᓗ ᐋᖅᑭᒃᓱᔪᓐᓇᖅᑐᑦ ᓄᑖᓂ ᐃᓱᒪᓕᐅᕈᑎᓂᑦ.

-30-

ᑐᑭᓯᒋᐊᒃᑲᓐᓂᕈᒪᒍᕕᑦ:

ᕗᖄᓐᑯ ᐳᓯᐊᓯ
ᑐᑭᒥᐊᒃᑎᑦᑎᔨ ᑐᓴᐅᒪᖃᑕᐅᑎᓕᕆᔨᒃᑯᓐᓄᑦ
ᓄᓇᕗᑦ ᑐᙵᕕᒃ ᑎᒥᖓᑦ
ᐅᖃᓘᑦ: (867) 975-4939 ᐊᑭᖃᖏᑦᑐᖅ: 1-888-646-0006
fbuscemi @ tunngavik.com