Nunavut Suicide Prevention Strategy Action Plan Released
ᓄᓇᕗᑦ ᓯᕗᓕᖅᑎᖓ ᐃᕙ ᐋᕆᐊᒃ ᐃᓚᖃᖅᖢᓂ ᓄᓇᕗᑦ ᑐᙵᕕᒃᑯᑦ ᐊᖏᔪᖅᑳᖓᑕ ᑐᒡᓕᐊᓂ ᔮᒃ ᐊᓇᕈᐊᖅ, ᓄᓇᕗᑦ ᒐᕙᒪᒃᑯᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᒥᓂᔅᑕ ᑕᒑᖅ ᑯᓕ, ᐃᓵᔅᓯᒪᒋᑦ ᐃᓅᓯᕐᒧᑦ ᑲᑎᒪᔨᖏᑕ ᐊᖏᔪᖅᑳᖓ ᕕᐊᑭ ᕿᓚᕝᕙᖅ, ᐊᒻᒪ ᐸᓖᓯᒃᑯᑦ “V” ᐊᖏᔪᖅᑳᒻᒪᕆᖓ ᕼᐅᕗᑦ ᐄᑕᓐ ᐅᓪᓗᒥ ᐊᑎᓕᐅᖅᑐᑦ ᓴᖅᑮᓪᓗᑎᒡᓗ ᓄᓇᕗᒻᒥ ᐃᒻᒥᓃᖅᑎᑎᑦᑕᐃᓕᒪᓂᕐᒧᑦ ᐸᕐᓇᐅᑎᒥᒃ.
2011-2014 ᐸᕐᓇᐅᑎ ᓴᖅᑭᑕᐅᓚᐅᖅᑐᖅ ᑲᑐᔾᔨᖃᑎᒌᒃᖢᑎᒃ ᓄᓇᕗᑦ ᑐᙵᕕᒃ ᑎᒥᖓ, ᓄᓇᕗᑦ ᒐᕙᒪᒃᑯᑦ, ᐃᓵᔅᓯᒪᒋᑦ ᐃᓅᓯᕐᒧᑦ ᑲᑎᒪᔨᖏᑦ, ᐊᒻᒪ ᐸᓖᓯᒃᑯᑦ, ᐊᐅᓚᑦᓯᓪᓗᑎᒃ 8-ᖑᔪᓂᒃ ᐱᓕᕆᐊᒃᓴᐅᔪᓂᒃ ᓄᓇᕗᒻᒥ ᐃᒻᒥᓃᖅᑎᑎᑦᑕᐃᓕᓂᕐᒧᑦ ᐸᕐᓇᐅᑎᒥᒃ.
ᓯᕗᓕᖅᑎ ᐃᕙ ᐋᕆᐊᒃ ᐅᐱᒍᓱᖃᐅᔪᖅ ᐱᓕᕆᐊᖃᒌᑦᑐᑦ ᑲᔪᓯᑦᑎᐊᖅᓯᒪᓂᖏᓐᓂᒃ ᐊᒻᒪ ᓇᓗᓇᐃᒃᑲᓂᖅᖢᓂ ᐃᑲᔪᖅᑐᐃᓂᕐᒥᓂᒃ ᓄᓇᕗᒻᒥ ᐃᒻᒥᓃᖅᑎᑎᑦᑕᐃᓕᓂᕐᒧᑦ ᐸᕐᓇᐅᑎᒥᒃ. “ᐃᒻᒥᓃᖃᑦᑕᖅᑐᑦ ᓄᓇᕗᒻᒥ ᖁᕝᕙᓯᓐᓂᖓ ᖁᐊᖅᓵᓇᒻᒪᕆᑦᑐᖅ, ᐊᒻᒪ ᐊᒃᑐᐃᕙᒃᑐᓂ ᓄᓇᕗᒻᒥᐅᓕᒫᓂᒃ. ᐅᖃᐅᓯᕇᓐᓇᖃᑦᑕᕆᐊᖃᖅᑕᕗᑦ, ᖃᓄᐃᓕᐅᕈᑎᒋᕙᓪᓕᐊᓗᒍ ᐃᓅᓕᓯᒍᓐᓇᖁᓪᓗᑕ ᓯᕗᓂᑦᑎᓐᓂ,” ᐅᖃᖅᑐᖅ ᓯᕗᓕᖅᑎ ᐃᕙ ᐋᕆᐊᒃ.
“ᓴᐳᔾᔨᓯᒪᓇᓱᐊᖏᓐᓇᓂᐊᖅᑐᒍᑦ ᐃᒻᒥᓃᖅᑎᑦᑎᑕᐃᓕᓂᕐᒥ ᓄᓇᕗᒻᒥ, ᐊᒻᒪ ᐸᕐᓇᐅᑎᒥ ᓇᓗᓇᐃᖅᓯᒪᓪᓗᑎᒃ ᐊᑐᖅᑕᐅᔪᓐᓇᖅᑐᑦ ᐱᓕᕆᐊᖃᒌᓪᓗᑕ. ᑕᒫᓂ ᐊᕐᕌᒍᑦᑎᓐᓂ, 23 ᐃᒻᒥᓃᓚᐅᖅᑐᑦ ᓄᓇᕗᒻᒥ. ᑕᒪᓐᓇ ᓈᒻᒪᖏᒻᒪᑦ ᐊᓯᔾᔨᕈᓐᓇᖅᑕᕗᑦ” ᐅᖃᖅᑐᖅ ᐊᓇᕈᐊᖅ. “ᐱᓕᕆᓂᖅᓴᐅᔭᕆᐊᖃᖅᑐᒍᑦ ᒪᒥᓴᕐᓂᕐᒧᑦ ᐊᒻᒪ ᐊᑦᑕᓇᖏᑦᑐᒥᒃ ᐃᑲᔪᖅᑐᓂᖅᓴᕆᓗᒋᑦ ᓱᕈᓯᕗᑦ ᒪᒃᑯᑦᑐᖁᑎᕗᓪᓗ, ᐱᓕᕆᐊᖃᒌᑦᑐᐃᓐᓇᐅᓗᑕ ᓄᓇᕗᒻᒥ.”
“ᐸᕐᓇᐅᑎ ᐊᑐᐃᓐᓇᐅᑎᑦᓯᓂᐊᖅᐳᖅ ᑭᐅᔾᔪᑕᐅᔪᓐᓇᑦᓯᐊᖅᑐᓂᒃ ᓴᐳᔾᔨᓂᕐᒧᑦ ᐃᒻᒥᓃᕈᒪᔪᓂᒃ,” ᐅᖃᑐᖅ ᑰᓕ. “ᐱᓕᕆᖃᑎᒌᓪᓗᑎᒃ ᐊᐃᒃᐸᕇᑦ, ᐃᓄᐃᑦ, ᖃᑕᓐᖑᑎᒌᑦ ᐊᒻᒪ ᓄᓇᓖᑦ ᐊᓯᔾᔩᔪᓐᓇᓂᐊᖅᐳᑦ. ᒐᕙᒪᒃᑯᑦ ᓯᕗᓕᖅᑎᐅᔪᓐᓇᖅᑐᑦ ᑕᒪᒃᓱᒧᖓ, ᑲᑐᔾᔨᖃᑎᒌᑦᓯᐊᕐᓗᑎᒃ ᓄᓇᕗᒻᒥ ᐅᓄᖏᓂᖅᓴᐅᓕᖅᑎᒍᓐᓇᖅᐸᕗᑦ ᐃᒻᒥᓃᖃᑦᑕᖅᑐᑦ ᓄᓇᑦᑎᓐᓂ,” ᐅᖃᑐᖅ ᑰᓕ.
“ᐃᒻᒥᓃᖅᑎᑎᑦᑕᐃᓕᒪᓂᖅ ᖃᓄᐃᖏᑎᐊᕐᓂᖅᓴᐅᓗᑎᒃ ᓄᓇᓕᖁᑎᕗᑦ ᓄᓇᕗᒻᒥ ᐱᔭᕆᐊᑐᔫᒐᓗᐊᖅ, ᑭᓯᐊᓂ ᓂᕆᐅᓐᓂᖅᑕᖃᒻᒪᕆᑦᑐᖅ ᐊᒻᒪ ᐱᔪᒪᓂᖅᑕᖃᑦᓯᐊᖅᑐᓂ. ᐱᔪᒪᓂᖃᖅᐳᒍᑦ ᓴᖏᔪᒥᒃ, ᖃᓄᐃᖏᑦᓯᐊᖅᑐᒥᒃ ᐆᒻᒪᕆᒃᑐᒥᓪᓗ ᓄᓇᕗᖃᕐᓗᑕ ᓴᖓᑎᒋᐊᖅᑕᐅᓯᒪᕗᖅ ᐸᕐᓇᐅᑎᒃᑯᑦ,” ᐅᖃᑐᖅ ᕿᓚᕝᕙᖅ.
“ᐸᓖᓯᒃᑯᑦ "V" ᑲᑐᔾᔨᖃᑕᐅᑦᓯᐊᓂᐊᖅᐳᑦ ᒐᕙᒪᒃᑯᓐᓄᑦ, ᓄᓇᓕᖕᓂ ᑎᒥᐅᔪᓄᑦ ᐊᒻᒪ ᓄᓇᖃᖅᑐᓄᑦ ᐃᒻᒥᓃᖅᑎᑎᑦᑕᐃᓕᕐᓂᕐᒧᑦ,” ᐅᖃᑐᖅ ᐄᑕᓐ.