NTI Welcomes New Seal Market Agreement with China
ᓄᓇᕗᑦ ᑐᙵᕕᒃ ᑎᒥᖓᑦᑕ ᐊᖓᔪᖅᑳᖓᑦ ᑳᑎ ᑕᐅᑐᖏ ᐅᖃᖅᑐᖅ ᐃᓄᐃᑦ ᑐᖓᓱᒃᑎᑦᑎᕗᑦ ᓄᑖᒥᑦ ᓇᑦᑎᓕᕆᓂᕐᒧᑦ ᐊᖏᕈᑎᒥᑦ ᑲᓇᑕᒥ ᐊᑎᓕᐅᕆᖃᑎᖃᕐᓂᐊᕐᓂᖏᓐᓂᑦ ᓴᐃᓃᓯᒥᐅᑕᓂᑦ ᐱᓇᓱᐊᕈᓯᕐᒥ, ᓴᖅᑭᑎᑕᐅᔪᑦ ᐅᑉᓗᒥ ᐅᑯᓄᖓ ᑲᓇᑕᐅᑉ ᒐᕙᒪᖏᑦᑕ ᒥᓂᔅᑕᖓᑦ ᒋᐅᓪ ᓰᐄ.
ᐅᓇ ᓄᑖᖅ ᐊᖏᕈᑦ ᐱᔪᓐᓇᖅᑎᑦᑎᔪᖅ ᑲᓇᑕᒥ ᐊᐅᓪᓚᖅᑎᑦᑎᔪᓐᓇᕐᓗᑎᒃ ᓂᕆᔭᒃᓴᓂᑦ ᓇᑦᑎᕕᓂᕐᓂᑦ ᓴᓇᓯᒪᔪᓂᑦ ᓴᐃᓇᒧᑦ. ᑲᓇᑕ ᑭᓯᐊᓂ ᓄᓇᓕᒃᔪᐊᖅ ᐱᔪᓐᓇᖅᑎᑕᐅᔪᑐᐊᖅ ᐊᐅᓪᓚᖅᑎᑦᑎᔪᓐᓇᕐᓂᐊᓂᒃ ᓂᕆᔭᒃᓴᐅᑎᓪᓗᒋᑦ ᓇᑦᑎᕕᓂᑦ ᓴᓇᓯᒪᔪᑦ ᓴᐃᓇᒧᑦ ᒪᓕᒃᖢᒋᑦ ᓄᑖᑦ ᐊᖏᕈᑎᑦ. ᑲᓇᑕ ᓱᓕ ᒫᓐᓇ ᓂᐅᕐᕈᑎᖃᖅᐸᒃᑐᖅ ᓇᑦᑎᑦ ᕿᓯᖏᓐᓂᑦ ᑕᐅᕗᖓ ᓴᐃᓂᓯᕈᔪᐃᑦ ᓄᓇᖏᓐᓄᑦ.
“ᐃᓄᒻᒪᕇᑦ ᑕᐃᒪᖓᓂᑦ ᕿᓂᖅᐸᖕᒪᑕ ᓄᑖᓂᑦ ᓂᐅᕕᖅᑎᒃᓴᓂᑦ ᓴᓇᓯᒪᔪᖁᑎᑦᑎᓐᓂᑦ. ᐸᑦᑕᒃᑐᕐᕕᒋᕙᕋ ᒥᓂᔅᑕ ᓰᐄ ᐊᑎᓕᐅᕆᓂᐊᓂᑦ ᐊᖏᕈᑎᒥᑦ ᐊᒻᒪᓗ ᖁᒡᕙᖅᑎᑦᑎᓂᐊᓂᒃ ᑲᓇᑕᒥ ᓇᑦᑎᕕᓂᕐᒥᑦ ᕿᓯᖕᓂᑦ ᑕᐅᖅᓯᐅᑎᖃᑦᑕᕐᓂᕐᒧᑦ ᐊᒻᒪᓗ ᐱᔪᓐᓇᖅᑎᓪᓗᒋᑦ ᐃᓄᒻᒪᕇᑦ ᐃᓚᐅᓂᖏᓐᓄᑦ ᖃᓄᐃᖏᑦᑎᐊᖅᑐᒃᑯᑦ ᐱᖅᑯᓯᖏᑦᑎᒍᑦ ᐊᑐᕐᓗᑎᒃ ᑮᓇᐅᔭᓕᐅᕈᑎᒃᓴᓂᑦ,” ᐅᖃᖅᑐᖅ ᑕᐅᑐᖏ. “ᓄᓇᕗᑦ ᑐᙵᕕᒃ ᑎᒥᖓᑦ ᐃᑲᔪᖅᑐᐃᔪᖅ ᑐᒃᓯᕋᐅᑎᒥᑦ ᐊᖏᕈᑎᑎᒍᑦ.”
ᓄᓇᕗᑦ ᐃᒃᓯᓐᓇᐃᓯᒪᖕᒪᑦ ᓇᑎᑦ ᐊᒥᓲᓂᖏᓐᓂᑦ. ᑕᐅᑐᖏᑦ ᐅᖃᖅᑐᖅ ᓄᓇᕗᑦ ᑐᙵᕕᒃ ᑎᒥᖓᑦ ᓂᕆᐅᒃᑐᖅ ᐅᑯᐊ ᐊᖏᕈᑎᑦ ᐃᓇᖐᓂᐊᕐᓂᖏᓐᓂᑦ ᐃᓚᖏᑦᑎᒍᑎᑦ ᑮᓇᐅᔭᓕᐅᕈᑕᐅᕙᑦᑐᑦ ᔭᒐᓚᐅᕐᓂᖏᓐᓂᑦ ᐃᒪᓐᓇ ᓄᖅᑲᖅᑎᑕᐅᓯᒪᓕᖅᑎᓪᓗᒋᑦ ᐊᑲᐅᖏᑦᑐᒥᑦ ᐅᑯᓄᖓ ᑕᕆᐅᑉ ᐊᑭᐊᓂ ᑲᑐᔾᔨᖃᑎᒌᖏᓄᑦ.