NTI Responds to Mandate of Third Legislative Assembly
(ᐄᑉᐳᕉᓪ 1, 2009) 10-ᓂᒃ ᐊᕐᕌᒍᓂᒃ ᓇᓪᓕᐅᓂᖅᓯᐅᖅᑕᐅᑎᓪᓗᒍ ᓴᖅᑭᖅᑕᐅᓂᖓ ᓄᓇᑦᑕ, ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦ ᑐᓐᖓᓱᑦᑎᑦᓯᕗᑦ ᑕᒪᑉᑖᒥᒃ: ᐱᕈᖅᐸᓪᓕᐊᑎᑦᓯᓂᖅ ᓯᕗᓂᑦᑎᓐᓂᒃ ᑲᑐᔾᔨᓗᑕ, ᓄᑖᖑᔪᖅ ᑎᓕᓯᔾᔪᑕᐅᔪᖅ ᐱᖓᔪᐊᓐᓂ ᒪᓕᒐᓕᐅᖅᑏᑦ ᑲᑎᒪᓂᖓᓐᓂ.
ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦᑕ ᐊᖓᔪᖅᑳᖓᑦ ᐹᓪ ᖃᓗᔾᔭᒃ ᖁᕕᐊᒋᔭᖃᒻᒪᕆᓚᐅᖅᐳᖅ ᒐᕙᒪᒃᑯᑦ ᑎᓕᓯᔾᔪᑎᖓᓐᓂᒃ, ᐱᐊᓗᖅᑐᒥᒃ, ᑲᒥᓯᓇᐅᑉ ᐅᖃᐅᓯᖏᓐᓂ, ᑐᓂᒪᓂᖓᑦ ᐊᑕᖏᖅᑐᒥᒃ ᐊᑐᓕᖅᑎᑦᓯᓂᕐᒧᑦ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᒻᒪᕆᒻᒥᒃ. ᑭᓯᐊᓂᓕ, ᖃᓗᔾᔭᒃ ᐅᖃᖅᓯᒪᔪᖅ ᑲᔪᓯᑦᓯᐊᕐᓂᖓ ᑖᒃᑯᐊ ᒐᕙᒪᒃᑯᑦ ᑐᓐᖓᕕᖃᕐᓂᐊᖅᐳᑦ ᐊᑐᓂᑦ ᐊᐅᓚᔾᔭᒋᐊᕈᑕᐅᔪᓂᒃ. ᑕᒪᓐᓇ ᑕᑯᑦᓴᐅᑎᑕᐅᒋᐊᒃᑲᓐᓂᖅᑲᐅᕗᖅ ᓯᕗᓕᖅᑎᒧᑦ ᐄᕙ ᐋᕆᐊᕐᒧᑦ ᐅᓪᓗᒥ ᒪᓕᒐᓕᐅᕐᕕᒻᒥ.
"ᖁᕕᐊᓱᒻᒪᕆᖅᑲᐅᕗᖓ ᑐᓴᕆᐊᑦᓴᖅ ᓄᓇᕗᑦ ᒐᕙᒪᒃᑯᖏᑦ ᐃᖅᑲᓇᐃᔭᖃᑎᖃᕐᓂᐊᕆᐊᖏᑦ ᓄᓇᕗᑦ ᑐᓐᖓᕕᒃᑯᑦ ᑎᒥᖓᓐᓂᒃ ᐊᑐᓕᖅᑎᑦᓯᓗᑎᒃ ᓄᓇᕗᒻᒥ ᓄᓇᑖᕐᓂᒧᑦ ᐊᖏᖃᑎᒌᒍᑎᒻᒪᕆᒻᒥᒃ", ᐅᖃᖅᑐᖅ ᖃᓗᔾᔭᒃ. "ᒐᕙᒪᒃᑯᑦ ᓄᑖᖅ ᑎᓕᔭᐅᔾᔪᑎᖓᑦ ᐱᐅᔪᐹᓗᒃ ᐊᒻᒪᓗ ᑕᑯᑦᓴᐅᑎᑦᓯᑦᓱᓂ ᑭᓇᒃᑯᑐᐃᓐᓇᕐᓄᑦ ᒐᕙᒪᒋᔭᐅᔪᑦ ᐊᒻᒪᓗ ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦ ᑖᒃᑯᓇᓐᖓᓴᐃᓐᓇᖅ ᑎᒍᒥᐊᕐᒪᑕ," ᐅᖃᖅᑐᖅ ᖃᓗᔾᔭᒃ. "ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦ ᓂᕆᐅᓐᓂᖃᖃᑕᐅᕗᖅ ᐊᒻᒪᓗ ᖃᐅᔨᒪᓕᑕᐃᑦ ᑐᓐᖓᕕᐅᔪᑦ ᓇᓗᓴᐃᔭᖅᑕᐅᔪᑦ ᑕᒪᑉᑕ-ᒥ ᓇᒻᒥᓂᖅ ᑎᓕᓯᔾᔭᐅᔾᔪᑎᒋᓯᒪᔭᕗᑦ. ᑭᓯᐊᓂᓕ, ᑕᐃᒪᐃᖏᓐᓇᓲᖑᒻᒪᑦ, ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦᑕ ᐱᔭᕆᐊᓕᖓᑦ ᐊᑐᓕᖅᑎᑦᓯᓂᕐᒧᑦ ᐊᒻᒪᓗ ᑲᑦᓱᖓᐃᑦᓱᑕ ᓂᕆᐅᓐᓂᖃᖅᐳᒍᑦ ᐊᐅᓚᔾᔭᒋᐊᕐᓂᐅᑲᓐᓂᕈᓐᓇᖅᑐᓂᒃ ᒐᕙᒪᒃᑯᑦ ᓄᑖᓄᑦ ᓯᕗᓪᓕᐅᑎᔭᖏᓐᓄᑦ."
ᓄᓇᕗᑦ ᑐᓐᖓᕕᒃᑯᑦ ᐃᑲᔪᖅᓯᕗᑦ ᒐᕙᒪᒃᑯᑦ ᑐᕌᒐᕆᔭᖓᓐᓂᒃ ᖃᓄᐃᓐᖏᑦᓯᐊᖅᑐᓂᒃ ᓄᓇᓕᖃᕐᓂᕐᒧᑦ ᐊᒻᒪᓗ ᑕᑯᒍᒪᓪᓗᓂ ᐅᐱᒋᔭᐅᓂᖅᓴᓂᒃ ᓴᓐᖏᓂᖃᕐᓂᖅᓴᓂᓪᓗ ᓄᓇᓕᓐᓂᒃ, ᐱᓗᐊᖅᑐᒥᒃ ᐋᓐᓂᐊᖅᑐᓕᕆᓂᕐᒧᑦ ᐃᓕᓐᓂᐊᖅᑐᓕᕆᓂᕐᒧᓪᓗ. ᐊᒻᒪᓗ ᓄᓇᕗᑦ ᑐᓐᖓᕕᒃᑯᑦ ᑐᓐᖓᓱᑦᑎᑦᓯᔪᑦ ᒐᕙᒪᒃᑯᑦ ᓄᑖᕈᕆᐊᖅᓯᒪᔪᒥᒃ ᐊᑦᓱᕉᑎᓐᓂᒃ ᐃᓕᓐᓂᐊᖅᑐᓕᕆᓂᕐᒧᑦ ᐃᓕᓐᓂᐊᕐᓂᕐᒧᓪᓗ.
ᐱᒻᒪᕆᐹᓗᑦᑕᐅᖅ ᓯᕗᓪᓕᐅᑎᔭᐅᔪᖅ ᐅᑯᓄᖓ ᒐᕙᒪᒃᑯᓐᓄᑦ ᐃᓪᓗᓕᕆᓂᖅ ᐊᒻᒪᓗ ᓄᓇᕗᑦ ᑐᓐᖓᕕᒃᑯᑦ ᓂᕆᐅᓐᓂᖃᖅᐳᑦ ᐃᖅᑲᓇᐃᔭᖃᑎᖃᕐᓂᕐᒥᒃ ᒐᕙᒪᒃᑯᖏᓐᓂᒃ ᓄᓇᕗᑦ ᐆᒻᒪᐃᒋᐊᒃᑲᓐᓂᕐᓗᑎᒃ ᑐᓂᒪᓂᖃᒃᑲᓐᓂᕐᓗᑎᓪᓗ 2004-ᒥ ᑲᑐᔾᔨᖃᑎᒌᓐᓂᕐᒧᑦ ᓄᓇᕗᒻᒥ ᐊᕐᕌᒍᓄᑦ ᖁᓕᓄᑦ ᐃᓪᓗᓕᕆᓂᕐᒧᑦ ᐸᕐᓇᐅᑎᖓᓐᓂᒃ. ᑭᖑᓪᓕᖅᐹᖅ ᒐᕙᒪᒻᒪᕆᒃᑯᑦ ᑮᓇᐅᔭᖅᑑᑎᑦᓴᖏᑦ ᐱᒋᐊᕈᑕᐅᔪᑦ, ᑭᓯᐊᓂ ᐋᖅᑭᒍᑕᐅᑲᐃᓐᓇᑐᐃᓐᓇᖅᑐᖅ - ᓄᓇᕗᑦ ᐊᑯᓃᖅᑐᒥᒃ ᑐᓂᒪᓂᖅᑕᖃᕆᐊᓕᒃ ᓯᕗᓂᕐᒧᑦ.
ᓄᑖᖅ ᐊᐅᓚᔾᔭᒋᐊᕈᑕᐅᔪᖅ ᑐᓐᖓᓱᑦᑎᑕᐅᓗᐊᓐᖑᐊᕐᒥᔪᖅ ᓴᖅᑭᖅᑕᐅᓂᖏᓐᓄᑦ ᐃᓗᓕᖅᑐᔪᑦ ᓄᓇᕗᒻᒥ ᑐᓴᐅᒪᖃᑦᑕᐅᑎᓂᕐᒧᑦ ᐅᐸᓗᖓᐃᔭᐅᑏᑦ ᐃᓚᐅᑎᑦᓯᔪᑦ ᓄᓇᕗᒻᒥᐅᓂᒃ ᐊᐅᓚᓂᐅᔪᓂᒃ ᒪᕐᕉᓕᖅᑲᖓᔪᓂᒃ ᒐᕙᒪᒃᑯᓐᓂᒃ. ᑕᐃᒪᐃᑦᑐᖅ ᐊᐅᓚᔾᔭᒋᐊᕈᑕᐅᔪᖅ ᐱᑕᖃᖃᑦᑕᖅᓯᒪᓐᖏᒻᒪᑦ ᑕᐃᑲᓂᒋᐊᖅ, ᐊᒻᒪᓗ ᐃᑲᔪᖅᓯᓂᐊᖅᓱᓂ ᑕᕝᕙᐅᒌᖅᑐᓂᒃ ᒐᕙᒪᒃᑯᑦ ᓄᓇᕗᒻᒥ ᑲᒪᒋᔭᕆᐊᓕᖏᓐᓂᒃ ᐊᒻᒪᓗ ᑲᔪᓯᑎᑦᓯᓂᕐᒥᒃ ᐊᑖᓂ ᐋᑎᑯ 32 ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᒻᒪᕆᒻᒥ.
ᑭᖑᓪᓕᖅᐹᒥ, ᓇᓪᓕᐅᓂᖅᓯᐅᕐᓂᖅ ᕿᒥᕐᕈᕕᑦᓴᐅᒻᒪᑦ ᑕᐃᑲᓂ ᐊᑐᖅᓯᒪᔪᓂᒃ ᓯᕗᒧᓪᓗ ᑕᑯᓐᓇᕐᓂᕐᒥᒃ ᐊᒻᒪᓗ ᒫᓐᓇ ᓇᒻᒪᓈᓕᖅᑯᖅ ᕿᒥᕐᖁᓂᖅ ᑲᓲᒪᓂᖏᓐᓂᒃ ᒐᕙᒪᒃᑯᑦ ᓄᓇᕗᒻᒥ ᐊᒻᒪᓗ ᓄᓇᕗᒻᒥ ᑐᓐᖓᕕᒃᑯᑦ ᑎᒥᖓᑦᑕ.
"ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦ ᓂᕆᐅᓐᓂᖃᖅᐳᖅ ᐱᕚᓪᓕᖅᓯᒪᔪᒥᒃ ᑲᓲᒪᖃᑎᖃᕐᓂᕐᒥᒃ ᒐᕙᒪᒃᑯᖏᓐᓂᒃ ᓄᓇᕗᑦ, ᐃᓚᖓᑦ ᑖᑦᓱᒥᖓᑦᓴᐃᓐᓇᖅ ᑐᕌᒐᖃᖅᑐᖅ ᑲᑐᔾᔨᖃᑎᒌᓐᓂᕐᒥᓪᓗ. ᐃᓄᓐᓄᑦ ᓂᕆᐅᒋᔭᐅᓯᒪᔪᖅ ᓴᖅᑭᖅᑕᐅᓕᕐᒪᑦ ᓄᓇᕗᑦ ᐊᕐᕌᒍᐃᑦ ᖁᓕᑦ ᐊᓂᒍᖅᑐᑦ ᐊᒻᒪᓗ ᒫᓐᓇ ᑕᑯᑦᓴᐅᑎᑦᓯᒋᐊᖃᓕᖅᑐᒍᑦ ᑎᑭᑦᓱᓐᓇᕋᑦᑎᒍ ᑲᑐᔾᔨᖃᑎᒌᓪᓗᑕ," ᐅᖃᖅᑐᖅ ᑲᓗᔾᔭᒃ.
ᑐᑭᓯᒋᐊᒃᑲᓐᓂᕐᕕᑦᓴᖅ:
ᐊᒪᓕ ᕗᑦᔅ
ᐊᐅᓚᑦᓯᔨᐅᑉ ᑐᖏᓕᖓ, ᑐᓴᐅᒪᑎᑦᓯᓂᕐᒧᑦ
ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦ
ᐅᖄᓚᐅᑖ: (867) 975-4953
ᐊᑭᖃᓐᖏᑦᑐᖅ: 1-888-646-0006
ewoods@tunngavik.com