NTI President Signs Devolution Agreement

ᓴᒃᑯᑕᐅᑲᐅᑎᒋᔭᕆᐊᓕᒃ (ᔮᓐᓄᐊᕆ 18, 2024 – ᐃᖃᓗᐃᑦ, ᓄᓇᕗᑦ) ᐅᓪᓗᒥ, ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᐊᓗᑭ ᑰᑦᑎᖅ ᐊᑎᓕᐅᖅᑲᐅᕗᖅ ᓄᓇᕗᒻᒥ ᓄᓇᓕᕆᓂᕐᒧᑦ ᐊᒻᒪᓗ ᓄᓇᒦᙶᖅᑐᓕᕆᓂᕐᒧᑦ ᓇᒻᒥᓂᖅᓱᕆᐊᓕᕐᓂᑦᑕ ᐊᖏᕈᑎᒥᒃ ᐊᑎᓕᐅᖃᑎᖃᖅᑐᓂ ᑲᓇᑕᑉ ᓯᕗᓕᖅᑎᕐᔪᐊᖓᓂᒃ ᔭᔅᑎᓐ ᑐᕉᑐ ᐊᒻᒪᓗ ᓄᓇᕗᑦ ᓯᕗᓕᖅᑎᖓ ᐸᐅᓗᓯ ᐊᕿᐊᕈᖅ. ᐋᒡᒌᓯ 15, 2019−ᖑᔪᒻᒪᓂᑦ, ᐋᔩᕋᕈᑎᒋᔭᐅᓯᒪᓪᓗᑎᑦ ᐱᔾᔪᑎᐅᔪᑦ ᐊᖏᕈᑎᒋᔭᐅᓂᐊᖅᑐᑦ ᐊᖏᕈᑎᖓ ᐊᑎᓕᐅᖅᑕᐅᔪᒻᒪᓂᑦ, ᓄᓇᕗᑦ ᑐᙵᕕᒃ ᑎᒥᖓ ᐃᖅᑲᓇᐃᔭᖃᑎᖃᖅᓯᒪᔪᖅ ᑲᓇᑕᒥ ᒐᕙᒪᒃᑯᓐᓂᑦ ᐊᒻᒪᓗ ᓄᓇᕗᑦ ᒐᕙᒪᖏᓐᓂᒃ ᒐᕙᒪᑐᖃᒃᑯᑦ ᓄᓇᖁᑎᖏᑦ ᓄᓇᒦᙶᖅᑐᓪᓗ ᐊᐅᓪᓛᖅᑎᑕᐅᓂᖏᓐᓂᒃ ᒐᕙᒪᑐᖃᒃᑯᓐᓂ  ᓄᓇᕗᑦ ᒐᕙᒪᖓᓄᑦ. ᓄᓇᕗᑦ ᑭᖑᓪᓕᖅᐹᖑᕗᖅ ᐱᖓᓱᓂᑦ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᔪᓂᑦ ᒐᕙᒪᓂᑦ ᐊᐅᓪᓛᖅᑎᑕᐅᓪᓗᑎᑦ ᐊᐅᓚᑕᐅᓂᖏᑦ ᒐᕙᒪᑐᖃᒃᑯᑦ ᓄᓇᖁᑎᖏᑦ, ᐅᖅᓱᐊᓗᒃ, ᒑᓯ, ᐊᒻᒪᓗ ᐅᔭᕋᓐᓂᐊᕋᒃᓴᑦ ᑲᓇᑕᒥ. “ᐊᒃᓱᕈᖅᑐᑎᑦ ᐃᖅᑲᓇᐃᔮᖃᖅᓯᒪᓕᖅᑐᑕ 30 ᐊᕐᕌᒍᑦ ᐊᓂᒍᖅᓯᒪᓕᖅᑎᓪᓗᒋᑦ ᐊᑎᓕᐅᖅᑕᐅᓚᐅᖅᓯᒪᒻᒪᓂᑦ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᖓᓂᒃ, ᓄᓇᕗᒻᒥᐅᑦ ᐃᓄᐃᑦ ᑕᑯᓂᐊᓕᖅᑐᑦ ᐊᒃᓱᕐᔪᐊᒻᒪᕆᐊᓗᒃ ᐱᕙᓪᓕᐊᓂᖃᓕᕐᓂᑦᑕ ᓇᒻᒥᓂᖅ ᐱᓕᕆᐊᖃᕋᓱᐊᕈᑎᒋᓯᒪᔭᕗᑦ ᑕᒪᒃᑯᓂᖓ ᑎᑭᑦᑎᓗᑕ,” ᐅᖃᖅᑐᓂ ᐊᖓᔪᖅᑳᖅ ᑰᑦᑎᖅ. “ᐊᑎᓕᐅᖅᑕᐅᓪᓗᓂ ᓇᒻᒥᓂᖅᓱᓕᕐᓂᕐᒧᑦ ᐊᖏᕈᑎᖓ, ᐃᓚᓕᐅᑎᑦᓯᒪᔪᑦ ᐃᖅᑲᓇᐃᔭᖅᑐᓕᕆᓂᕐᒧᑦ ᖃᓄᖅᑑᕈᑎ, ᓄᓇᕗᒻᒥᐅᑦ ᐃᓄᐃᑦ ᐱᔪᓐᓇᐅᑎᖃᕐᓂᐊᓕᕐᒪᑕ ᖃᓄᐃᓕᖓᓛᕐᓂᖓᓂᒃ ᓄᓇᖁᑎᑦᑕ.” ᓇᒻᒥᓂᖅᓱᕐᓂᕐᒧᑦ ᐊᖏᕈᑎ ᐊᖏᓛᕐᒥᒃ ᓄᓇᓂᑦ ᐊᐅᓪᓛᖅᑎᑦᑎᓂᐅᕗᖅ ᑲᓇᑕᑉ ᐊᑐᓚᐅᖅᓯᒪᔭᖓᓂᒃ. ᓄᓇᕗᑦ ᐊᒻᒪᓗ ᓄᓇᕗᒻᒥᐅᑦ ᐃᓄᐃᑦ ᒫᓐᓇ ᐃᓱᒪᓕᐅᕈᓐᓇᕐᓗᑎᑦ ᓴᙱᓂᖃᕐᓂᐊᓕᖅᑐᑦ ᐊᐅᓚᑕᐅᓂᖏᓐᓂᒃ ᐃᓄᐃᑦ ᓄᓇᖁᑎᖏᑦ, ᐃᒪᑦᑎᐊᕙᖏᑦ, ᐊᒻᒪᓗ ᓄᑖᕈᖅᑎᒐᒃᓴᐅᙱᑦᑐᑦ ᓄᓇᒦᙶᖅᑐᑦ ᓄᓇᕗᒻᒥ. ᐊᑐᓕᖅᑎᑦᑎᓗᑕᓗ ᐃᖅᑲᓇᐃᔭᖅᑐᓕᕆᓂᕐᒧᑦ ᖃᓄᖅᑑᕈᑎᒥᒃ ᓱᑲᓐᓂᖅᓴᐅᓕᖅᑎᑦᑎᓂᐊᖅᑐᖅ ᐃᓄᐃᑦ ᐱᓕᒻᒪᒃᓴᖅᑎᑕᐅᓂᖏᓐᓂᒃ, ᐊᒥᓱᕈᕆᐊᖅᑎᑕᐅᓗᑎᑦ ᐃᓄᐃᑦ ᐃᖅᑲᓇᐃᔭᖅᑐᑦ, ᐊᒻᒪᓗ ᐃᖅᑲᓇᐃᔮᒃᓴᖅᑖᖅᑎᑦᑎᒃᑲᓐᓂᕈᑕᐅᓂᐊᖅᑐᖅ ᓄᓇᕗᒻᒥᐅᑦ ᐃᓄᖏᓐᓄᑦ ᐃᓱᒪᓕᐅᕈᓐᓇᕐᓗᑕ ᑐᑭᒧᐊᑦᑎᑕᐅᓂᖓᓂᒃ ᐱᕙᓪᓕᐊᓂᖏᑦᑕ ᐸᐸᑕᐅᓂᖏᑕᓗ ᓄᓇᐃᑦ ᓄᓇᕗᒻᒥ. “ᓇᒻᒥᓂᖅᓱᓕᕐᓂᖅ ᐱᕐᔪᐊᕌᓗᒻᒥᒃ ᓯᕗᒧᐊᑦᑎᑦᑎᒍᑕᐅᕙᓪᓕᐊᓂᐊᖅᑐᖅ ᓄᓇᕗᒻᒥᐅᑦ ᐃᓄᐃᑦ ᐃᓱᒪᖅᓱᓂᖅᓴᐅᓗᑎᑦ ᓄᓇᓂ ᐊᖏᕐᕋᕆᓂᕋᖅᓯᒪᔭᑦᑎᓐᓂ ᐊᒥᓱᐊᓗᓐᓄ ᐊᕐᕌᒍᓄᑦ,” ᐅᖃᖅᑐᓂ ᐊᖓᔪᖅᑳᖅ ᑰᑦᑎᖅ. “ᐊᕕᑦᑐᖅᓯᒪᓂᖓᓃᑦᑐᓂᑦ 23 ᓄᓇᕗᑦ ᓄᓇᑖᕐᓂᕐᒧᑦ ᐊᖏᕈᑎᒥ ᑎᑎᕋᖅᑕᐅᓯᒪᔪᑦ ᐱᖁᔭᖅᑎᒍᑦ ᒪᓕᖁᓪᓗᒋᑦ ᑎᑭᒐᓱᐊᕆᐊᓕᖏᓐᓂᒃ, ᑲᓇᑕᒥ ᒐᕙᒪᖏᑦ ᐊᒻᒪᓗ ᓄᓇᕗᑦ ᒐᕙᒪᖏᑦ ᐃᖅᑲᓇᐃᔮᖃᕆᐊᖃᕐᒪᑕ ᖃᐅᔨᒪᓇᑦᑎᐊᖁᓪᓗᒍ ᐃᓄᐃᑦ ᐃᖅᑲᓇᐃᔮᖃᕐᓂᐊᕐᒪᑕ ᒐᕙᒪᒃᑯᓐᓂ ᑭᒡᒐᖅᑐᐃᓗᑎᑦ ᐊᒥᓲᓂᖏᑦ ᐃᓄᐃᑦ ᓄᓇᕗᒻᒥᐅᑦ ᐊᒥᓲᓂᖏᑦ ᒪᓕᑦᑐᒋᑦ, ᐊᒻᒪᓗ ᑕᐃᒪᐃᑦᑎᓪᓗᑕ ᐃᓄᐃᑦ ᐱᔪᓐᓇᐅᑎᖏᑦ ᐊᒻᒪᓗ ᐱᔪᒪᔭᖏᑦ ᑐᑦᑕᕐᕕᓪᓗᐊᑕᐅᕗᑦ ᐊᐅᓚᑕᐅᓂᖓᑕ ᓄᓇᕗᑦ. ᑕᒪᐃᓐᓂ ᐊᑐᓕᖅᑎᑕᐅᓂᖓ ᓇᒻᒥᓂᖅᓱᕐᓂᕐᒧᑦ ᐊᖏᕈᑎᒥᒃ, ᓄᓇᕗᑦ ᑐᙵᕕᒃ ᑎᒥᖓ ᓂᕆᐅᑦᑎᐊᖅᑐᑦ ᐃᖅᑲᓇᐃᔭᖃᑎᖃᑦᑎᐊᕐᓂᐊᕐᒪᑕ ᓄᓇᕗᒻᒥ ᒐᕙᒪᖓᓂᒃ ᐊᒻᒪᓗ ᒐᕙᒪᑐᖃᒃᑯᓐᓂᑦ ᑲᒪᒋᔭᐅᖁᓪᓗᒍ ᐃᖅᑲᓇᐃᔭᖅᑐᓕᕆᓂᕐᒧᑦ ᖃᓄᖅᑑᕈᑎ ᐊᒻᒪᓗ ᑕᑯᖁᓪᓗᑕ ᑕᒪᐃᓐᓂ ᐊᐅᓪᓛᖅᑕᐅᓂᖏᓐᓂᒃ ᑲᒪᒋᔭᐅᔭᕆᐊᓖᑦ ᓇᓗᓇᐃᔭᖅᑕᐅᓯᒪᓪᓗᑎᑦ ᓇᒻᒥᓂᖅᓱᕐᓂᕐᒧᑦ ᐊᖏᕈᑎᒥᒃ, ᐱᔭᕇᖅᑕᐅᓛᖅᑐᓂᓗ ᐄᐳᕈᓪ 1, 2027−ᖑᓕᖅᐸᑦ.

-30-

ᐱᕙᓪᓕᐊᔪᓕᕆᔨᓄᑦ ᖃᐅᔨᒃᑲᕋᒃᓴᖅ: ᑭᐊᕙᓐ ᖃᑉᓗᑦᓯᐊᖅ ᑐᑭᒧᐊᑦᑎᑦᑎᔨ ᑐᓴᐅᒪᖃᑎᒌᓐᓂᕐᒧᑦ ᓄᓇᕗᑦ ᑐᙵᕕᒃ ᑎᒥᖓ media@tunngavik.com

📄 2024 01 18 NR Devolution Agreement Signing INUK