NTI Mourns Deaths of Nunavut Agreement Negotiators Meeka Kilabuk and Terry Fenge
(ᓄᕕᐱᕆ 10, 2015 -- ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᓐᖓᕕᒃ ᑎᒥᖓᑦ ᐅᑉᓗᒥ ᕿᒃᓵᖅᑐᑦ ᐃᓅᔪᓐᓇᐃᕐᓂᖏᓐᓂᒃ ᐱᓇᓱᐊᕈᓯᐅᑉ ᓄᓐᖑᐊᓂ ᖄᖏᓵᖅᑐᒥ ᒪᕐᕉᒃ ᑖᒃᑯᐊᒃ ᐱᓪᓗᒋᒃ - ᒦᑲ ᕿᓚᕝᕙᖅ ᐸᓐᓂᖅᑑᒥᐅᑕᖅ ᐊᒻᒪᓗ ᐃᖃᓗᖕᓂᑦ, ᐊᒻᒪᓗ ᑎᐅᕆ ᕕᓐᔾ ᐋᑐᐋᒥᐅᑕᖅ ─ ᐃᓚᐅᓂᖃᒻᒪᕆᒃᓯᒪᔫᒃ ᐱᒻᒪᕆᐅᑎᐊᓗᖕᓂᑦ ᐃᓚᖏᑦ ᑲᔪᓯᓯᒪᑦᑎᐊᓕᖅᑎᓪᓗᒋᑦ ᐊᐃᕙᓂᒃᑯᒃ ᐋᔩᖃᑎᒌᓂᒃᑯᑦ 1993-ᒥ ᓄᓇᕗᑦ ᐊᖏᕈᑎᖏᓐᓂᒃ, ᐊᖏᓂᖅᐹᖅ ᒫᓐᓇᐅᔪᖅ ᐊᖏᕈᑎᑦ ᑲᓇᑕᒥ ᑕᐃᒪᖓᓂᑦ. ᑕᒪᒃᑮᒃ ᐱᔨᑦᑎᖅᓯᒪᔫᒃ ᐊᐃᕙᔨᒻᒪᕆᐅᖃᑕᐅᓪᓗᑎᒃ ᐋᔩᖃᑎᒌᒃᓂᒃᑯᑦ ᐅᑭᐅᓄᑦ ᐅᓄᖅᑐᓄᑦ, ᐊᒻᒪᓗ ᐊᔾᔨᒌᒃᑐᒥᑦ ᐱᓪᓗᕆᒃᓯᒪᓂᖃᖅᑑᒃ ᑕᒪᐃᓐᓂᒃ ᖃᐅᔨᓴᕐᓂᕐᒧᑦ, ᐊᑐᐊᒐᓕᕆᓂᕐᒧᑦ ᐊᐃᕙᓂᐅᔪᓂᒃ, ᓄᓇᓕᖕᓄᑦ ᐅᖃᖃᑎᖃᕆᐊᖅᑐᖅᓯᒪᓂᕐᒧᑦ, ᐊᒻᒪᓗ ᐊᖏᖅᑕᐅᓂᖏᓐᓂᒃ ᐊᑐᓕᖅᑎᑕᐅᑎᓪᓗᒋᑦ ᐱᓕᕆᐊᑦ ᑕᒪᒃᑯᐊ ᐃᓚᒋᓪᓗᒋᑦ ᐊᐃᕙᔾᔪᑕᐅᓯᒪᔪᑦ ᐋᔩᖃᑎᒌᒃᓂᒃᑯᑦ.
ᓱᓕᒃᑲᓐᓂᖅ ᒦᑲᐅᑉ ᐱᒃᑯᓇᕐᓂᖏᑦ ᐊᒻᒪᓗ ᐃᓚᐅᖏᓐᓇᕐᓂᐊ ᓄᓇᕗᒥ ᐊᖏᕈᑎᓂᒃ ᐊᐃᕙᓂᐅᓚᐅᖅᑐᓂᒃ ᐋᔩᖃᑎᒌᒍᑎᑎᒍᑦ ᐊᒻᒪᓗ ᐸᕐᓇᐃᖃᑕᐅᓂᕐᒧᑦ ᐋᖅᑭᒃᓱᐃᖃᑕᐅᓂᕐᒥᑦ. ᒦᑲ ᐊᒃᓱᐊᓗ ᐊᖏᔪᒥᑦ ᐃᓚᐅᓂᖃᖅᓯᒪᔪᑦ ᐱᒋᐊᓕᓵᖅᑎᓪᓗᒋᑦ ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪᓗ, ᑭᖑᓂᐊᒍᑦ, ᒐᕙᒪᓕᕆᓂᕐᒧᑦ ᐱᓕᕆᐊᖑᓚᐅᖅᑐᓪᓗ ᕿᑭᖅᑕᓂ ᑕᒫᓂ, ᐊᒻᒪᓗ ᑐᓂᓯᖃᑕᐅᓪᓗᓂ ᐊᑦᑕᓇᖅᑐᒥ ᓯᕗᓕᖅᑎᐅᓂᕐᒧᑦ ᐅᑭᐅᖑᔪᑦ ᓯᕗᓂᐊᓂ ᐅᑭᐅᖏᑦᑕ ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪᓗ ᐊᓯᖏᑦ ᐃᓄᐃᑦ ᑎᒥᖁᑎᖏᓐᓂ.
ᓱᓕ ᑎᐅᕆ ᐱᓕᕆᐊᕆᓚᐅᖅᑕᖏᑦ ᓄᓇᕗᒥ ᐊᖏᕈᑎᓄᑦ ᐊᐃᕙᓂᐅᔪᓂ ᐋᔩᖃᑎᒌᒃᓂᒃᑯᑦ, ᑎᐅᕆ ᐱᓕᕆᓚᐅᖅᑐᖅ ᐃᓄᖕᓄᑦ ᐊᒻᒪ ᐊᔾᔨᒌᖏᑦᑐᓄᑦ ᓯᓚᕐᔪᐊᒥ ᑲᑐᔾᔨᖃᑎᒌᓄᑦ ᐱᔾᔪᑎᒋᔭᐅᔪᑦ ᐱᓪᓗᒋᑦ ᑕᒪᑦᓱᒧᖓ. ᐱᓗᐊᖅᑐᒥᑦ ᑕᐃᒃᑯᓄᖓ ᐊᒃᑐᐊᔪᓂᒃ ᐅᑭᐅᖅᑕᖅᑐᒥ ᑲᑎᒪᔨᓄᑦ, ᐊᒻᒪᓗ, ᒫᓐᓇᓵᖅ ᐅᑭᖑᔪᓂ, ᑕᒪᑦᓱᒧᖓ ᓄᓇᕗᒥ ᐊᖏᕈᑏᑦ ᐊᑐᓕᖅᑎᑕᐅᕙᓪᓕᐊᓂᖏᓐᓂᒃ ᐃᓂᓪᓚᐃᓂᒃᑯᑦ ᐊᒻᒪᓗ ᒫᓂᑑᕙᓂ ᑎᐊᓂ ᐊᓪᓚᐃᑦ ᓄᓇᐃᑦ ᖃᓕᕇᖕᓂᖏᓐᓄᑦ ᐊᐃᕙᔾᔪᑕᐅᓂᖏᓐᓄᑦ.
“ᓄᓇᕗᑦ ᐃᓄᖏᑦ ᐃᖅᑲᐅᒪᓂᐊᖅᑐᑦ, ᐱᓪᓗᒋᑦ ᐅᐱᒍᓱᖕᓂᑦ ᐊᒻᒪᓗ ᖁᔭᓕᓂᑦ, ᐊᔪᖏᑦᑐᓂᒃ ᐊᒃᓱᐊᓗᒃ ᐊᒻᒪᓗ ᓴᖅᑭᑦᑎᔪᓐᓇᕐᓂᖏᓐᓂᒃ ᐊᔾᔨᐅᖏᑦᑐᓂᒃ ᑐᓂᓯᖃᑕᐅᓂᕐᒥᑦ ᑕᒪᒃᑮᑦ ᒦᑲ ᐊᒻᒪᓗ ᑎᐅᕆ ᑕᒪᑦᓱᒧᖓ ᐱᐊᓂᒃᓯᒪᓕᖅᑐᓂᒃ ᓄᓇᕗᒥ ᐊᖏᕈᑎᓄᑦ, ᐃᒪᓐᓇ ᓇᓗᓇᐃᖅᓯᔪᖅ ᑐᖓᕕᓪᓚᕆᖏᓐᓂᒃ ᐃᓗᓕᖏᑕ ᐃᓄᐃᑦ ᐱᔪᓐᓇᐅᑎᖏᓐᓂᒃ ᐊᒃᑐᐊᔪᑦ ᑕᒪᑦᓱᒧᖓ ᓇᖕᒥᓂᖃᕐᓂᕐᒥᑦ ᐊᒻᒪᓗ ᐊᐅᓚᑦᑎᓂᕐᒥᑦ ᓄᓇᓂᒃ ᐊᒻᒪᓗ ᐊᑐᖅᑕᐅᕙᒃᑐᑦ ᐱᔾᔪᑎᒃᓴᑎᒍᑦ ᓄᓇᕗᒥ, ᐃᓚᒋᓪᓗᒋᑦ ᐆᒪᔪᐃᑦ ᓂᕐᔪᑎᑦ, ᐊᒻᒪᓗ ᐊᖅᑯᓯᐅᖅᖢᑎᒃ ᒪᑭᑎᕆᓂᕐᒥᑦ ᓄᓇᕗᒥᑦ ᐊᒻᒪᓗ ᒐᕙᒪᒥᑦ 1999-ᒥ”, ᐅᖃᖅᑐᖅ ᐊᖓᔪᖅᑳᖅ ᑳᑎ ᑕᐅᑐᖏ. “ᖃᐅᔨᒪᖕᒥᔪᒍᑦ ᑕᒪᒃᑯᐊ ᐱᓕᕆᐊᖏᑦ ᖃᐅᑕᒫᑦ ᑐᓂᓯᓯᒪᔪᑦ ᐃᓅᓯᕐᒥᑦ ᓄᓇᕗᒧᑦ ᐃᓚᒋᑐᐃᓐᓇᓚᐅᖅᑕᖏᑦ ᖃᓄᖅ ᒦᑲ ᐊᒻᒪᓗ ᑎᐅᕆ ᑐᓂᓯᓚᐅᕐᓂᖏᓐᓂᒃ. ᐊᑐᓂᑦ ᑐᓂᓯᓚᐅᖅᑑᒃ ᐊᑭᖃᖏᑦᑐᓂᒃ ᐃᖃᕐᕋᖏᓐᓂᒃ, ᐊᒻᒪᓗ ᓇᖕᒥᓂᖅ ᐃᑲᔪᖅᑐᐃᓂᕆᓚᐅᖅᑕᖏᓐᓂᒃ, ᐊᒻᒪᓗ ᓇᖕᒥᓂᖅ ᐆᒻᒪᕆᖕᓂᖏᓐᓂᒃ ᖃᖓᑐᐃᓐᓇᖅ ᐊᒻᒪᓗ ᖃᓄᑐᐃᓐᓇᖅ ᐊᐱᕆᔭᐅᒍᑎᒃ, ᑕᒪᒃᑮᒃ ᐱᓗᐊᖅᑐᒥᑦ ᑐᓂᓯᒪᓂᕆᓚᐅᖅᑕᖏᒃ ᐊᔭᐅᖅᑐᐃᓂᒃᑯᑦ ᐱᓪᓗᕆᒃᓯᖁᔨᓂᕐᒥᑦ ᐊᒻᒪᓗ ᐃᑲᔪᖅᑐᐃᓂᕐᒥᑦ ᐃᓅᓱᒃᑐᓂᒃ ᒪᒃᑯᑐᑦ ᐃᓄᖏᓐᓂᒃ.”
ᔭᐃᒪᓯ ᐃᒃᑐᓗᒃ, ᐊᖓᔪᖅᑳᑉ ᑐᖏᓕᐊ ᓄᓇᕗᑦ ᑐᓐᖓᕕᒃ ᑎᒥᖓᓐᓄᑦ, ᐅᖃᖅᑐᖅ ᓇᓗᓇᐃᖅᓯᓪᓗᓂ ᖃᐅᔨᒪᓚᐅᖅᑐᖅ ᐊᒻᒪᓗ ᐱᓕᕆᖃᑎᒋᓚᐅᖅᖢᒋᒃ ᑕᒪᕐᒥᒃ ᒦᑲ ᐊᒻᒪᓗ ᑎᐅᕆ ᐊᔾᔨᒌᖏᑦᑐᒃᑯᑦ ᐊᒻᒪᓗ ᐊᔾᔨᒌᖏᑦᑐᓂᒃ ᐱᓕᕆᔪᓐᓇᓂᖏᒃ ᐅᑭᐅᑲᓵᓗᖕᓄᑦ ᐅᓄᖅᑐᓄᑦ. ᖃᐅᔨᒪᓂᖏᑦ ᐊᒻᒪᓗ ᐊᔪᖏᓐᓂᖏᑦ, ᒦᑲ ᐊᒻᒪᓗ ᑎᐅᕆ - ᑕᒪᒃᑮᒃ ᑐᓂᓯᓚᐅᖅᑑᑦ ᖁᕕᐊᓱᐃᓐᓇᕐᓂᕐᒥᑦ ᐊᒻᒪᓗ ᐆᒻᒪᕆᖕᓂᕐᒥᑦ ᑕᒪᐃᓐᓄᑦ ᐱᓇᓱᐊᖅᑕᖏᓐᓂ, ᖁᕕᐊᓲᑎᒋᓚᐅᖅᑕᕗᑦ ᐱᓗᐊᖅᑐᒥᑦ ᐊᔪᕐᓇᖅᑲᑕᖅᑎᓪᓗᒍ ᐊᒻᒪᓗ ᐊᒃᓱᕈᕐᓇᖅᑎᓪᓗᒋᑦ ᐅᑉᓗᐃᑦ ᐃᓛᓐᓂᒃᑯᑦ. ᑭᖑᓂᖃᓈᕐᓂᐊᖅᑕᕗᑦ ᐊᒃᓱᐊᓗᒃ. ᐃᒃᐱᖕᓂᐊᖃᑎᒋᕙᕗᑦ ᐊᒻᒪᓗ ᖃᓄᐃᖏᑦᑎᐊᖁᕙᕗᑦ ᖃᑕᖑᑎᖏᑦ ᐃᓚᖏᑦ ᒫᓐᓇ ᐊᔪᕐᓇᖅᑎᓪᓗᒍ ᐅᑉᓗᒥ.”