NTI Encourages Government to Keep Mandatory Long Form
(ᔪᓚᐃ 23, 2010 - ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃᑯᑦ ᓯᕗᓪᓕᖅ ᐊᖏᔪᖅᑳᑉ ᑐᒡᓕᐊ ᔭᐃᒥᓯ ᐃᑦᑐᓗᑦ ᐅᓪᓗᒥ ᐊᐱᕆᖃᐅᔪᖅ ᒥᓂᔅᑕ ᑑᓂ ᑲᓕᒫᓐᑦᒥᒃ ᐃᓱᒪᓕᐅᕈᑎᒋᓚᐅᖅᑕᖓᓂᒃ ᐊᑐᕈᓐᓃᑎᑦᓯᔪᒪᓂᕐᒧᑦ ᑲᓇᑕᒥ ᐊᐱᖅᓱᖅᑏᑦ ᐊᑐᕆᐊᓕᖓᓄᑦ ᑕᑭᔪᖅ ᑕᑕᑎᕆᐊᓕᒃ. ᑲᓕᒫᓐᑦ ᓇᓗᓇᐃᖅᓯᖃᐅᔪᖅ ᑭᖑᕝᕕᖅᑕᐅᓂᐊᕐᓂᖓᓂᒃ ᑖᒃᓱᒪ ᑕᑭᔫᑉ ᑕᑕᑎᕆᐊᓕᐅᑉ ᑕᑕᑎᕆᔪᒪᔪᑦ ᑭᓯᐊᓂ ᑕᑕᑎᕆᔭᕆᐊᖃᓛᓕᕐᓂᖏᓐᓂᒃ 2011ᒥ ᐊᐱᖅᓱᕐᓂᐅᔪᒧᑦ.
“ᐃᓄᐃᑦ ᑐᑭᓯᐅᒪᔾᔪᑕᐅᓂᐊᖅᑐᑦ ᑲᑎᖅᓱᖅᑕᐅᖃᑦᑕᕐᓂᖏᑎᒍᑦ ᑐᕝᕘᓇ ᑕᑭᔪᒃᑯᑦ ᑕᑕᑎᕆᐊᓕᒃᑯᑦ ᐊᑐᐃᓐᓇᐅᑎᑦᓯᕕᐅᕙᓚᐅᕐᖓᑕ ᓈᒻᒪᓈᖅᓯᒪᔪᒥᒃ ᑕᐅᑐᒐᒃᓴᒥᒃ ᐋᓐᓂᐊᖅᑐᓕᕆᓂᕐᒧᑦ, ᐃᓅᓯᓕᕆᓂᕐᒧᑦ, ᐃᓕᓐᓂᐊᕐᓂᓕᕆᓂᕐᒧᑦ, ᐃᓕᖅᑲᓯᓕᕆᓂᕐᒧᑦ ᐊᒻᒪ ᑮᓇᐅᔭᓕᐅᕋᓱᐊᕐᓂᕐᒧᑦ ᓄᓇᓕᖏᓐᓂ. ᐃᒻᒪᖃ ᐊᒥᓱᑦ ᐃᓪᓗᖁᑎᒌᑦ ᐃᓱᒪᖅᓱᓕᕈᑎᒃ ᖃᐅᔨᓴᕐᓂᕐᒧᑦ ᑭᐅᖃᑦᑕᓛᖏᑦᑐᑦ,” ᐅᖃᖅᑐᖅ ᐃᑦᑐᓗᒃ. “ᐊᓯᔾᔨᕐᓂᖏᑦ ᖃᑎᖅᓱᖅᑕᐅᕙᓐᓂᖏᑕ ᐊᓯᔾᔨᕈᑕᐅᓂᐊᖅᑐᑦ ᑐᑭᓯᐅᒪᔾᔪᑕᐅᕙᒃᑐᓄᑦ ᐃᓄᓯᖅ-ᑮᓇᐅᔭᓕᐅᕋᓱᐊᕐᓂᖅ ᐊᒻᒪ ᐃᓕᖅᑯᓯᖓᓅᖓᔪᑦ ᐃᓄᐃᑦ ᑲᑎᖅᓱᖅᑕᐅᔪᓐᓃᕈᑎᒃ.” “
ᐊᒻᒪᓗ, ᓴᓂᓕᕇᓪᓗᒋᑦ ᕿᒥᕐᕈᓂᕐᒥᒃ, ᑕᐃᒫᒃᓴᐃᓐᓇᓕᖓᔪᒥᒃ ᑐᑭᓯᐅᒪᔾᔪᑎᒃᓴᐃᑦ ᑲᑎᖅᓱᖅᑕᐅᔭᕆᐊᖃᕋᓗᐊᕐᖓᑕ ᑲᓇᑕᐅᑉ ᐊᕕᒃᑐᖅᓯᒪᓂᓕᒫᖏᓐᓄᑦ.
“ᐊᓯᔾᔨᕈᑕᐅᔪᑦ ᐊᒃᑐᐃᓯᒪᓂᐊᖅᑐᑦ ᑐᕌᒐᒃᑎᓐᓄᑦ ᑎᑭᐅᑎᓇᓱᐊᕐᓂᑎᓐᓂᒃ ᐊᒻᒪ ᑲᔪᓯᑎᑦᑕᕆᐊᓕᓐᓄᑦ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᓂ. ᐃᓄᐃᑦ ᐃᓚᐅᓂᖏᑎᒍ ᐋᖅᑭᒃᓯᒪᓂᖏᓐᓂ ᓴᖅᑭᑕᐅᓂᖏᓐᓂᓗ ᐃᓄᓯᓕᕆᓂᕐᒧᑦ ᐃᓕᖅᑯᓯᓕᕆᓂᕐᒧᓪᓗ, ᐊᑐᐊᒐᐃᑦ, ᐱᔨᑦᓯᕋᐅᑏᓪᓗ ᑲᔪᓯᑦᑎᐊᕈᓐᓇᓂᖅᓴᐅᒻᒪᑕ ᓱᓕᔪᓂᒃ ᑐᑭᓯᐅᒪᔾᔪᑎᖃᖅᑎᓪᓗᑕ.” ᐅᖃᖅᑐᖅ ᐃᑦᑐᓗᒃ.
-30-