NTI Disappointed in US Proposal to Stop International trade of Polar Bears
(ᐅᑐᐱᕆ 4, 2012 -- ᐃᖃᓗᐃᑦ, ᓄᓇᕗᑦ)ᓄᓇᕗᑦ ᑐᙵᕕᒃᑯᑦ ᑎᒥᖓᑦᑕ ᐊᖏᔪᖅᑳᖓᑕ-ᑐᖏᓕᐊ ᔭᐃᒥᓯ ᐃᑦᑐᓗᒃ ᐅᓪᓗᒥ ᓇᓗᓇᐃᕐᓯᔪᖅ ᓄᓇᕗᑦ ᑐᙵᕕᒃᑯᑦ ᑎᒥᖓᑦ ᖁᓅᒻᒥᕐᓂᕋᖅᑐᓂᒋᑦ ᐊᒥᐊᓕᒐᐃᑦ ᑐᔅᓯᕋᐅᑎᖃᕐᓂᕐᖓᑕ ᑎᑎᕋᖅᑕᐅᖃᓯᐅᑎᖁᓪᓗᒋᑦ ᓇᓄᐃᑦ ᐅᐃᒍᖏᓐᓂᑦ II-ᒥᑦ ᓅᑕᐅᖁᓪᓗᒋᑦ ᐅᐃᒍᖏᓐᓄᑦ I-ᒧᑦ ᓄᓇᕐᔪᐊᕐᒥ ᑲᑎᒪᔩᑦ ᐆᒪᔪᓂᑦ ᓂᐅᕕᐊᔅᓴᐅᒍᓐᓃᑎᑦᑎᓲᑦ ᐃᓱᒫᓗᓇᕐᓂᕋᖅᑕᐅᒐᐃᒻᒪᑕ (CITES). ᑐᔅᓯᕋᐅᑦ ᓂᕈᐊᕈᑕᐅᓛᖅᑐᖅ ᒫᑦᓯ, 2013ᒥ, ᑕᐃᓛᓐᒥ 176 ᓄᓇᓕᒐᓴᕐᔪᐊᖃᕐᕕᓐᓄᑦ ᑲᑎᒪᔩᑦ ᑲᑎᒪᓕᖅᑲᑕ ᑖᒃᑯᓄᖓ ᑲᑎᒪᔨᐅᖃᑕᐅᔪᑦ.
ᑖᓐᓇ ᑐᖏᓕᐊᓂ ᐊᒥᐊᓕᒐᐃᑦ ᒐᕙᒪᒃᑯᖏᓐᓄᑦ ᑐᔅᓯᕋᐅᑕᐅᓯᒪᔪᖅ ᑎᑎᕋᖅᑕᐅᖃᓯᐅᔾᔭᐅᖁᓪᓗᒋᑦ ᓇᓄᐃᑦ. ᓯᕗᓪᓕᖅ ᓵᓚᐅᔪᔪᖅ 2010ᒥ ᐱᔾᔪᑎᒋᓪᓗᒍ ᓄᓇᕐᔪᐊᓕᒫᒥ ᓄᓇᖅᑲᑎᒌᑦ ᑐᑭᓯᔪᒻᒪᑕ ᑕᐅᕐᓰᒍᑕᐅᖃᑦᑕᕐᓂᖏᑦ ᓇᓄᐃᑦ ᐃᓱᒫᓗᓇᙱᒋᐊᔅᓴᖏᓐᓂᒃ ᓄᖑᓕᕐᓂᐊᕆᐊᖏᑕ ᐊᒻᒪᓗ ᑐᔅᓯᕋᐅᑕᐅᓯᒪᔪᔪᖅ ᑕᐃᒪᐃᒻᒪᑦ ᓈᒻᒪᓚᐅᕐᓯᒪᙱᒻᒪᑦ ᒪᓕᒐᔅᓴᒫᖏᓐᓄᑦ ᐅᐃᒍᖏᓐᓄᑦ I-ᒧᑦ ᑎᑎᕋᖅᑕᐅᑉᐸᑕ.
“ᐊᒥᐊᓕᒐᐃᑦ ᒐᕙᒪᒃᑯᖏᑦ ᐱᔾᔪᑎᖃᕐᖓᑕ ᓯᓚᐅᑉ ᐊᓯᔾᔨᐸᓪᓕᐊᓂᖓᓂᒃ ᐋᖅᑮᑎᑦᑎᒐᓱᐊᖅᑐᑎᒃ ᓄᖅᑲᖅᑎᑕᐅᑦᑎᐊᒻᒪᕆᖁᓪᓗᒍ ᓄᓇᕐᔪᐊᓕᒫᒥ ᑕᐅᕐᓰᒍᑎᖃᖃᑦᑕᓂᕐᒥᒃ ᓇᓄᒥᓂᕐᓂᑦ ᐱᓯᒪᔪᓂᑦ, ᖃᓄᖅᑑᕈᑎᖃᕐᐸᓪᓕᐊᖏᑦᑎᐊᖅᑐᑎᓪᓗ ᐸᓚᕐᓯᐅᒥᒍᑎᔅᓴᓂᑦ ᓇᒻᒥᓂᖅ ᐱᓕᕆᐊᕆᕙᑦᑕᖏᓐᓂᒃ ᓄᓇᓕᒐᓴᕐᔪᐊᖃᕐᕕᖓᑦ ᐃᓚᒋᔭᐅᑎᓪᓗᒍ ᓄᓇᕐᔪᐊᓕᒫᒥ ᓯᓚᒥᒃ ᐊᓯᔾᔨᐸᓪᓕᐊᑎᑦᑎᓂᕐᒥᒃ,” ᐅᖃᖅᑐᖅ ᐃᑦᑐᓗᒃ. “ᓄᓇᕗᑦ ᑐᙵᕕᒃᑯᑦ ᐃᑲᔪᕐᓰᖏᑦᑐᑦ ᑐᔅᓯᕋᐅᑕᐅᔪᒥᒃ ᑎᑎᕋᖅᑕᐅᖃᓯᐅᔾᔭᐅᖁᔭᐅᑎᓪᓗᒋᑦ ᓇᓄᐃᑦ ᓄᓇᕐᔪᐊᕐᒥ ᑲᑎᒪᔨᓄᑦ ᐆᒪᔪᓂᑦ ᓂᐅᕕᐊᔅᓴᐅᒍᓐᓃᑎᑦᑎᓲᓄᑦ ᐃᓱᒫᓗᓇᕐᓂᕋᖅᑕᐅᓕᕋᐃᒻᒪᑕ ᐅᐃᒍᖏᓐᓄᑦ I-ᒧᑦ. ᑐᔅᓯᕋᐅᑕᐅᔪᖅ ᐃᓱᒫᓗᓇᕐᓯᑎᑦᑎᙳᓱᒻᒪᑦ ᐊᒻᒪᓗ ᓴᙲᓪᓕᑎᑦᑎᙳᓱᒻᒪᑦ ᓇᓄᓕᕆᓂᖃᑦᑕᓂᕐᒥᒃ ᐋᖅᑭᑦᑕᐅᓯᒪᕐᓴᔪᐊᓗᒻᒥᒃ ᑲᓇᑕᒥ ᐊᕐᕌᒍᓂᑦ 40ᓂᑦ.”
ᑎᓕᐅᕆᓇᓱᐊᖅᑐᑎᒃ ᐊᒥᐊᓕᒐᐃᑦ ᒪᓕᒐᓕᐅᖅᑎᖏᓐᓂᒃ ᑲᑎᒪᔨᓂᑦ ᐊᒻᒪᓗ ᐃᑦᑑᑎᖏᓐᓂᑦ ᑕᖅᑭᐅᔪᔪᒥ, ᓄᓇᕗᑦ ᑐᙵᕕᒃᑯᑦ, ᐃᓄᐃᑦ ᑕᐱᕇᑦ ᑲᓇᑕᒥ, ᐃᓄᕕᐊᓗᐃᑦ ᐊᖑᓇᓱᑦᑐᓕᕆᓂᕐᒧᑦ ᑲᑎᒪᔨᖏᑦ, ᓄᓇᕗᑦ ᒐᕙᒪᒃᑯᖏᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᑦ ᐊᐅᓪᓚᔪᒻᒪᑕ ᐅᐊᓯᖕᑕᓐ ᑏ.ᓰ.ᒧᑦ ᑐᑭᓯᑎᑦᑎᒋᐊᖅᑐᖅᑐᑎᒃ ᐊᒥᐊᓕᒐᐃᑦ ᑲᑎᒪᔨᖏᓐᓂᒃ ᐱᓪᓚᑦᑖᓂᑦ ᐊᒻᒪᓗ ᖃᓄᐃᓐᓂᖏᓐᓂᒃ ᑲᓇᑕᒥᐅᑦ ᓇᓄᖏᑕ ᒥᔅᓵᓄᑦ, ᐊᒻᒪᓗ ᑕᑯᑎᑦᑎᒋᐊᖅᑐᖅᑐᑎᒃ ᖃᓄᖅ ᐃᓄᐃᑦ ᐊᖑᓇᓱᓲᖑᒻᒪᖔᑕ ᐋᖅᑭᐅᒪᑎᑕᐅᖏᓐᓇᕈᑎᒋᕙᑦᑕᖏᓐᓂᒃ ᐊᒻᒪᓗ ᑲᒪᒋᔭᖃᑦᑎᐊᖃᑦᑕᓂᕐᒥᒃ. ᑲᑎᒪᖃᑎᖃᔪᒐᓗᐊᖅᑎᓪᓗᒋᑦ ᐃᑦᑐᓘᑉ ᓇᓗᓇᐃᕐᓯᒪᓪᓗᓂᐅᒃ ᑲᑎᒪᑦᑎᐊᖅᑐᒥᓂᐅᒋᐊᔅᓴᖏᓐᓂᒃ, ᐊᒥᐊᓕᒐᐃᑦ ᒐᕙᒪᒃᑯᖏᑦ ᑲᔪᓯᒋᐊᑐᐃᓐᓇᕐᓯᒪᔪᑦ ᒥᔅᓯᖃᙱᑦᑐᓂᑦ ᑐᑭᓯᑎᑦᑎᒍᑎᖃᕋᓱᐊᖅᑐᑎᒃ ᐊᒻᒪᓗ ᑎᑎᕋᖅᑕᐅᖃᓯᐅᔾᔭᐅᖁᓪᓗᒋᑦ ᓇᓄᐃᑦ, ᑖᓐᓇ ᑎᑎᕋᕐᕕᐅᓯᒪᕙᑦᑐᖅ ᓄᓇᕐᔪᐊᓕᒫᒥ ᓄᖑᓕᕐᓂᕋᖅᑕᐅᔪᓄᑦ ᐆᒪᔪᓄᑦ ᓲᕐᓗ ᒪᑯᐊᑎᑐᑦ ᑕᐃᒍᐃᑦ ᐹᓐᑕᐃᓪᓗ ᓇᓄᐃᑦ, ᑖᓐᓇ ᓄᖅᑲᑎᑦᑎᒍᑕᐅᔪᓐᓇᖅᑐᖅ ᓄᓇᕐᔪᐊᓕᒫᒥ ᑕᐅᕐᓰᒍᑎᖃᖃᑦᑕᓂᕐᒥᒃ.
ᐃᑦᑐᓗᒃ ᐅᖃᖅᑐᖅ ᓄᓇᕗᑦ ᑐᙵᕕᒃᑯᑦ ᐱᓕᕆᖃᑎᖃᕐᖓᑕ ᓄᓇᕐᔪᐊᕐᒥᐅᓕᒫᓂᑦ ᓇᓄᐃᑦ ᐊᐅᓚᑕᐅᑦᑎᐊᖁᓪᓗᒋᑦ.