NTI calls for Firearms Safety Training
(ᐊᒃᑑᑉᐱᕆ 19, 2010 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓᑦᑕ ᐊᖓᔪᖅᑳᕆᑲᐃᓐᓇᖅᑕᖓᑦ ᔭᐃᒻᔅ ᐃᑦᑐᓗᒃ ᐅᑉᓗᒥ ᐅᖃᖅᑐᖅ ᐅᑯᓄᖓ ᓄᓇᕗᑦ ᒐᕙᒪᑉᑯᖏᓐᓄᑦ ᐊᒻᒪᓗ ᑲᓇᑕᐅᑉ ᒐᕙᒪᑉᑯᖏᓐᓄᑦ ᐃᓚᓕᐅᑎᖁᑉᓗᒋᑦ ᓄᓇᕗᑦ ᑐᙵᕕᒃ ᑎᒥᖓᓐᓂᑦ ᓴᖅᑭᑦᑎᓂᕐᒥᑦ ᐱᔾᔪᑎᒃᓴᓂᑦ ᐊᑦᑕᓇᖅᑕᐃᓕᒪᓂᕐᒧᑦ ᑲᒪᖃᑦᑕᕐᓂᕐᒥᑦ ᐊᒻᒪᓗ ᐴᖅᓯᕕᒃᓴᓂᑦ ᖁᑭᐅᑎᓄᑦ ᐅᑯᓄᖓ ᐃᓄᖕᓄᑦ ᓄᓇᓕᖕᓂ.
“ᑭᖑᓪᓕᖅᐹᒥ ᐱᑦᑎᐊᖏᓐᓂᐅᖃᑦᑕᖅᑲᐅᔪᑦᐊᒃᓱᐊᓗᒃ ᐋᓐᓂᖅᑎᕆᓂᕐᒧᑦ ᓴᖅᑭᖃᑦᑕᖅᖃᐅᔪᑦ ᖁᑭᐅᑎᑦ ᐊᑐᖅᑕᐅᑎᓪᓗᒋᑦ ᑐᑭᓯᓇᕈᑕᐅᔪᑦ ᐊᒃᓱᐊᓗᒃ ᐱᑕᖃᕆᐊᖃᕐᓂᑦᑎᓐᓂᑦ ᐱᔾᔪᑎᒃᓴᓂᑦ ᓴᖅᑭᑎᑦᓗᑕ ᐱᓕᕆᐊᕆᓗᒋᑦ ᐊᑦᑕᓇᖏᑦᑐᒥᑦ ᑲᒪᔾᔪᑎᒃᓴᓂᑦ ᐊᒻᒪᓗ ᐴᖅᓯᕝᕕᒃᓴᓂᑦ ᖁᑭᐅᑎᓄᑦ.” ᐅᖃᖅᑐᖅ ᐃᑦᑐᓗᒃ, “ᑕᒪᒃᑯᐊ ᐱᑦᑎᐊᖏᔾᔪᑕᐅᔪᑦ ᓴᖅᑭᖦᖢᑎᒃ ᐱᔾᔪᑎᐅᖏᑦᑐᑦ ᓚᐃᓴᖃᕐᓂᕐᒧᑦ ᐊᒻᒪᓗ ᓇᓗᓇᐃᔭᐃᓂᕐᒧᑦ ᑎᑎᖅᑐᖅᑕᐅᑎᓪᓗᒋᑦ ᖁᑭᐅᑎᑦ. ᑕᒪᓐᓇ ᐱᔾᔪᑎ ᐊᑦᑕᓇᖏᑦᑐᒥᑦ ᑲᒪᓂᕐᒥᑦ ᐊᒻᒪᓗ ᐴᖅᓯᕝᕕᓂᑦ ᖁᑭᐅᑎᓄᑦ ᐱᔾᔪᑎᐅᔪᑦ ᑭᒃᑯᓕᒫᑦ ᐊᑦᑕᓇᖅᑐᒦᑦᑕᕆᐊᖃᖏᓐᓂᖏᓐᓂᑦ ᐊᒻᒪᓗ ᓄᓇᕗᑦ ᑐᙵᕕᒃ ᑎᒥᖓᑦ ᑕᐃᒪᖓᓂ ᐃᓗᐃᑦᑐᒥᑦ ᐃᑲᔪᖅᑐᐃᓯᒪᔪᑦ ᐊᑦᑕᓇᖅᑕᐃᓕᒪᑎᑦᑎᓂᕐᒧᑦ ᑲᒪᖃᑦᑕᕐᓂᕐᒥᑦ ᐊᒻᒪᓗ ᐴᖅᓯᕝᕕᓂᑦ ᖁᑭᐅᑎᓄᑦ.”
2002-ᒥ ᓄᓇᕗᑦ ᑐᙵᕕᒃ ᑎᒥᖓᑦ ᓵᓯᓯᒪᔪᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ ᐱᑉᓗᒋᑦ ᓚᐃᓴᐃᑦ ᐊᒻᒪᓗ ᓇᓗᓇᐃᔭᐃᔭᕆᐊᖃᕐᓂᕐᒧᑦ ᑎᑎᖅᑐᖅᑕᐅᑎᑦᑎᓗᓂ ᐱᔭᕆᐊᖃᖅᑐᑦ ᒪᑯᓄᖓ ᖁᑭᐅᑎᓄᑦ ᐱᖁᔭᓂᑦ ᒪᓕᒐᓂᑦ ᐱᑉᓗᒋᑦ ᐃᒪᓐᓇ, ᐃᓚᖓᒍᑦ, ᐱᑕᖃᖏᓗᐊᕐᓂᐅᔪᑦ ᖁᑭᐅᑎᓕᕆᓂᕐᒧᑦ ᐃᓕᓐᓂᐊᕐᓂᐅᔪᓂᑦ ᐊᑐᐃᓐᓇᐅᑎᑦᑎᔨᓂᑦ ᐊᒻᒪᓗ ᐃᓄᐃᑦ ᐅᖃᐅᓯᖏᓐᓂᑦ ᐱᔨᑦᑎᕋᕈᑎᒃᓴᓂᑦ ᐱᔪᓐᓇᖅᑎᑕᐅᑯᑉᓗᒋᑦ ᐃᓄᐃᑦ ᐱᔪᓐᓇᕐᓂᖏᓐᓄᑦ ᓚᐃᓴᓂᑦ ᐊᒻᒪᓗ ᓇᓗᓇᐃᔭᐃᕝᕕᓄᑦ ᖁᑭᐅᑎᓄᑦ, ᑭᓯᐊᓂ ᑕᐃᒪᖓᓂᑦ ᐱᓇᓱᐊᓚᐅᖅᓯᒪᖏᓐᓇᑦᑕ ᓵᓯᓂᕐᒥᑦ ᐊᑦᑕᓇᖏᑦᑐᒥᑦ ᑲᒪᔭᕆᐊᖃᕐᓂᕐᒥᑦ ᐊᒻᒪᓗ ᐴᖅᓯᑯᖕᓂᑦ ᐱᔭᕆᐊᖃᖅᑐᑦ ᐱᖁᔭᓂᑦ.
ᑲᒪᓂᖅ ᐊᒻᒪᓕ ᐴᖅᓯᕕᑦ ᖁᑭᐅᑎᓄᑦ ᒪᓕᒐᒃᓴᑦ ᒪᓕᒃᖢᒋᑦ ᐅᑯᐊ ᖁᑭᐅᑎᓄᑦ ᐱᖁᔭᑦ ᑕᒪᐃᓐᓄᑦ ᖁᑭᐅᑎᓂᑦ ᓇᖕᒥᓂᖃᖅᑐᓄᑦ, ᐃᓚᒋᓪᓗᒋᑦ ᐃᓄᐃᑦ ᑭᓯᐊᓂ ᐊᒥᓲᖏᒻᒪᑕ ᐱᔾᔪᑎᒃᓴᑦ ᐃᑲᔪᕈᑎᐅᓗᑎᒃ ᐊᑐᐃᓐᓇᐅᓗᐊᖏᒻᒪᑕ ᑐᓴᖅᑎᑦᑎᓂᕐᒥᑦ ᓇᖕᒥᓂᖃᖅᑐᓂᑦ ᐱᔭᕆᐊᖃᖅᑕᖏᓐᓄᑦ ᐊᑦᑕᓇᖅᑕᐃᓕᒪᑎᑦᑎᓂᕐᒥᑦ ᑲᒪᓂᕐᒥᑦ ᐊᒻᒪᓗ ᐴᖅᓯᕕᒃᓴᓂᑦ ᖁᑭᐅᑎᓄᑦ.
“ᐱᑕᖃᕆᐊᖃᖅᑐᖅ ᐊᑐᖅᑕᐅᔪᓐᓇᖅᑐᓂᑦ ᑐᓴᐅᒪᖃᑦᑕᐅᑎᓂᕐᒧᑦ ᑐᑭᓯᒍᑎᒃᓴᓄᑦ ᐃᓄᖕᓄᒃ ᐃᓄᒃᑎᑐᑦ ᐱᑉᓗᒋᑦ ᐱᔭᒃᓴᒻᒪᕆᖏᑦ ᐊᑦᑕᓇᖅᑕᐃᓕᒪᑎᑦᑎᓂᕐᒧᑦ ᖁᑭᐅᑎᖏᓐᓄᑦ. ᐊᑐᐃᓐᓇᐅᑎᑦᑎᔭᕆᐊᖃᖅᑐᒍᑦ ᐊᑐᖅᑕᐅᔪᓐᓇᖅᑐᓂᑦ ᐊᑦᑕᓇᖅᑕᐃᓕᑎᑦᑎᓂᕐᒧᑦ ᐴᖅᓯᕕᒃᓴᓂᑦ. ᓄᓇᕗᑦ ᑐᙵᕕᒃ ᑎᒥᖓᑦ ᓂᕆᐅᒃᑎᐊᖅᑐᑦ ᐱᓕᕆᖃᑎᖃᕐᓂᐊᕐᓂᕐᒥᑦ ᑕᒪᐃᓐᓂᒃ ᑲᓇᑕᒥ ᐊᒻᒪᓗ ᐅᑭᐅᖅᑕᖅᑐᒥ ᒐᕙᒪᐅᔫᖕᓂᒃ ᐃᒪᓐᓇ ᓇᓗᓇᐃᔭᐃᑦᑎᐊᕐᓂᕐᒧᑦ ᐱᑕᖃᑦᑎᐊᖁᑉᓗᒋᑦ ᓄᓇᓕᖁᑎᕗᑦ ᑕᒪᑯᓂᖓ ᐱᒻᒪᕆᐅᔪᓂᑦ ᐱᔾᔪᑎᒃᓴᓄᑦ.”
ᓄᓇᕗᑦ ᑐᙵᕕᒃ ᑎᒥᖓᑦ ᐅᖃᕐᒥᔪᑦ ᐅᑯᓄᖓ ᑲᓇᑕᐅᑉ ᒐᕙᒪᑉᑯᖏᓐᓂᑦ ᓄᑖᖑᖅᑎᑕᐅᖁᑉᓗᒋᑦ ᐊᖏᖃᑎᒌᒐᓱᐊᕈᑎᑦ ᐋᔩᖃᑎᒌᒃᓂᒃᑯᑦ ᐃᓚᒋᓗᒋᑦ ᓄᓇᕗᑦ ᑐᙵᕕᒃ ᑎᒥᖓᑦ ᐃᒪᓐᓇ ᐱᒋᐊᕐᓗᒋᑦ ᐊᑐᕐᓗᒋᑦ ᒪᓕᒐᒃᓴᐃᑦ ᓱᖃᖓᓗᐊᖁᓇᒋᑦ ᐊᑐᐃᓐᓇᐅᑎᑕᐅᔪᑦ ᒪᑯᓄᖓ ᖁᑭᐅᑎᓄᑦ ᐊᑐᖅᐸᒃᑐᓂᑦ ᐃᒪᓐᓇᓗ ᐅᑯᐊ ᓄᓇᖃᖅᑳᖅᓯᒪᔪᑦ ᐊᑐᓕᕐᓗᑎᒃ ᒪᓕᒐᒃᓴᐅᔪᓂᑦ ᓴᖅᑭᑦᑎᓗᑎᒃ ᐃᒪᓐᓇ “ᐊᑐᖅᑕᐅᔪᓐᓇᖅᑐᑦ ᓄᓇᕗᒥ ᖁᑭᐅᑎᓄᑦ ᐊᑐᖅᑎᐅᔪᓂᑦ”.
-30-