NTI Board of Directors Allocate Funding for Inuit Early Learning and Child Care Funding, Infrastructure, and Improve Compassionate Travel Program

ᓴᒃᑯᑕᐅᑲᐅᑎᒋᔭᕆᐊᓕᒃ (ᒫᑦᓯ 27, 2024 – ᐃᖃᓗᐃᑦ, ᓄᓇᕗᑦ) ᐱᓇᓱᐊᕈᓯᐅᓚᐅᖅᑐᒥ ᓄᓇᕗᑦ ᑐᙵᕕᒃ ᑎᒥᖓᑕ ᑲᑎᒪᔨᖏᑦ ᐃᑭᐊᖅᑭᕕᑎᒍᑦ ᐃᕐᖐᓐᓇᖅ ᑲᑎᒪᓂᖃᓚᐅᖅᑐᑦ, ᐱᒻᒪᕆᐅᔪᓂᒃ ᐃᓱᒪᓕᐅᖅᑐᑎᑦ ᓄᓇᕗᑦ ᐃᓄᖏᖕᓄᑦ. ᑲᑎᒪᔩᑦ ᐊᖏᖅᓯᓚᐅᖅᑐᑦ ᓴᓂᕐᕙᖅᑕᐅᓂᖏᖕᓂᒃ $1.38 ᒥᓕᐊᓐ ᐃᓄᙳᐃᓂᕐᒧᑦ ᑐᑭᒧᐊᑦᑎᑦᑎᔩᑦ ᕿᕐᒥᕈᓇᓪᓗᑎᑦ ᓇᓖᕌᕋᒃᓴᓂᑦ ᐋᖅᑭᒋᐊᖅᑕᐅᒻᒪᕆᓐᓂᖓᓂᒃ ᐃᓄᖕᓄᑦ ᓯᕗᒃᑲᖅᑕᖅᑕᐅᔪᒧᑦ ᐊᒻᒪᓗ ᐃᓄᖕᓄᑦ ᐊᐅᓚᑕᐅᓂᐊᖅᑐᓄᑦ ᐃᓕᓐᓂᐊᓕᓵᕐᓂᕐᒧᑦ ᐱᔨᑦᑎᕋᕈᑎᓂᑦ. ᐃᓄᙳᐃᓂᕐᒧᑦ ᑐᑭᒧᐊᑦᑎᑦᑎᔩᑦ ᐱᓕᕆᐊᒃᓴᖃᖅᑎᑕᐅᓪᓗᑎᑦ ᑲᑎᒪᔨᕋᓛᖑᕗᑦ ᑭᒡᒐᖅᑐᐃᔨᖃᐅᖅᑐᑦ ᓄᓇᕗᑦ ᑐᙵᕕᒃ ᑎᒥᖓᓂᒃ ᐊᒻᒪᓗ ᐱᖓᓱᑦ ᐊᕕᑦᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᖕᓂᒃ ᐊᒻᒪᓗ ᖃᐅᔨᓴᕋᔭᖅᑐᓂᑦ ᓇᓖᕌᕋᒃᓴᐅᔪᓂᑦ ᐊᓯᔾᔨᖅᑕᐅᖁᓪᓗᒍ ᐃᓕᓐᓂᐊᓕᓵᖅᑐᓕᕆᓂᖅ ᐊᒻᒪᓗ ᐸᐃᕆᕕᓕᕆᓂᖅ ᓄᓇᕗᒻᒥ, ᐊᒻᒪᓗ ᐊᑐᖅᑕᐅᓂᖏᑦᑕ $16.4 ᒥᓕᐊᓐ ᑮᓇᐅᔭᑦ ᐊᐅᓚᑦᑎᒍᑎᒃᓴᖏᑦ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᓕᓵᕐᓂᕐᒧᑦ ᐊᒻᒪᓗ ᐸᐃᕆᕕᓕᕆᔾᔪᓯᖏᑦ. ᑲᑎᒪᔩᑦ ᐊᖏᖅᓯᓚᐅᕐᒥᔪᑦ ᑮᓇᐅᔭᖃᖅᑎᑕᐅᖁᓪᓗᒋᑦ ᐅᑯᓂᐊ ᐱᓕᕆᐊᑦ: $5 ᒥᓕᐊᓐ ᑮᓇᐅᔭᑦ ᐊᑐᓂ ᓴᓇᒋᐊᖅᑕᐅᓂᖏᑦᑕ ᐊᑯᓂᐅᔪᒧᑦ ᐸᖅᑭᕖᑦ ᐃᓐᓇᒻᒪᕆᖕᓄᑦ ᐊᕐᕕᐊᓂ, ᐅᖅᓱᖅᑑᖅ, ᐊᒻᒪᓗ ᐃᒡᓗᓕᒃ; $4 ᒥᓕᐊᓐ ᑮᓇᐅᔭᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᖕᓄᑦ ᐋᖅᑭᒃᓱᖅᑕᐅᒐᔭᕐᓂᖓᑕ ᖃᐅᔨᓴᕐᕕᒃ ᐊᒻᒪᓗ ᖃᐅᔨᓴᕈᓐᓇᓂᕐᒧᑦ ᒪᑭᒪᐅᑎᖏᑦ ᐱᓕᒻᒪᒃᓴᕐᕕᒻᒥ ᒥᑦᑎᒪᑕᓕᖕᒥ; $1 ᒥᓕᐊᓐ ᑮᓇᐅᔭᑦ ᐃᑲᔪᖅᑕᐅᓂᖓ ᐋᖅᑭᒃᓱᖅᑕᐅᒐᔭᕐᓂᖓᑕ ᑕᒪᐃᓐᓅᖓᔪᖅ ᓄᓇᓖᑦ ᐊᐅᓚᑦᑎᔾᔪᑎᒃᓴᖏᑕ ᑭᙴᒪᒋᔭᐅᔪᑦ ᖃᐅᔨᓵᖑᓂᖓ; ᐊᒻᒪᓗ $15 ᒥᓕᐊᓐ ᑮᓇᐅᔭᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᖕᓄᑦ ᓴᓇᔭᐅᓂᖏᑦᑕ ᐱᖓᓱᑦ ᐸᐃᕆᕖᑦ ᕿᑭᖅᑖᓗᖕᒥ. ᑲᑎᒪᔩᑦ ᐊᖏᖅᓯᓚᐅᖅᑐᑦ ᐱᖓᓱᓂᑦ ᐱᒻᒪᕆᐅᔪᓂᑦ ᐊᑐᐊᒐᕐᓂᒃ:

• ᓄᓇᕗᒻᒥ ᐃᓄᐃᑦ ᓯᓚᑦᑐᓴᕐᕕᒻᒥ ᐃᓕᓐᓂᐊᓕᓵᕐᓂᕐᒧᑦ ᐱᓕᕆᐊᑉ ᐊᑐᐊᒐᖓ, ᑕᕝᕗᙵᖓᓕᖁᓪᓗᒍ ᐃᓄᐃᑦ ᓯᓚᑦᑐᓴᕐᕕᒻᒧᑦ ᐃᓕᓐᓂᐊᖅᑏᑦ ᐃᑲᔫᑎᒃᓴᖏᑦᑕ ᐱᓕᕆᐊᖓᓄᑦ, ᐊᐅᓚᑕᐅᔪᖅ ᓄᓇᕗᑦ ᑐᙵᕕᒃ ᑎᒥᖓᓄᑦ ᐊᒻᒪᓗ ᐊᕕᑦᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᖕᓄᑦ, ᐊᑐᓕᖅᑎᑕᐅᖁᓪᓗᒍ ᑲᓇᑕᒥ ᐃᓄᐃᑦ ᓯᓚᑦᑐᓴᕐᕕᒻᒥ ᐃᓕᓐᓂᐊᕐᓂᖏᑦᑕ ᖃᓄᖅᑑᕈᑎᖓ. ᑖᓐᓇ ᐊᑐᐊᒐᖅ ᒪᓕᑦᑐᖅ ᒪᑭᒋᐊᖅᑕᒃᑯᑦ ᐃᓱᒪᓕᐅᕈᑎᒋᓚᐅᖅᓯᒪᔭᖓ ᔮᓐᓄᐊᕆ 2024-ᖑᑎᓪᓗᒍ ᐃᑲᔫᑕᐅᒐᔭᕐᓗᑎᑦ $5 ᒥᓕᐊᓐ ᑮᓇᐅᔭᑦ ᐱᓕᕆᐊᕐᒧᑦ ᐊᑐᖅᑕᐅᒐᔭᕐᓗᑎᑦ ᑕᒫᓂ ᐊᕐᕌᒍᒥ ᐊᒻᒪᓗ ᐊᕐᕌᒍᓂᐊᖅᑐᒥ, ᐊᒻᒪᓗ ᐊᔾᔨᖃᖅᑐᓂ ᓄᓇᕗᑦ ᑐᙵᕕᒃ ᑎᒥᖓᑕ ᐃᓚᒋᔭᐅᔪᑦ 2023-ᒥ ᐊᕐᕌᒍᑕᒫᑦ ᑲᑎᒪᓂᖃᖅᑎᓪᓗᒋᑦ ᑲᓇᑕᒥ ᒐᕙᒪᒃᑯᓐᓂ ᑮᓇᐅᔭᖃᖅᑎᑕᐅᖁᔨᔾᔪᑎᖓ ᑕᒪᐃᓐᓂ ᐱᓕᕆᐊᖅ.
• ᐊᑐᐊᒐᖅ ᐊᐅᓚᑕᐅᓂᖓᓄᑦ ᐊᔾᔨᐅᙱᑦᑐᓂᑦ ᑐᙵᕕᓖᑦ ᑮᓇᐅᔭᖏᑦ, ᑐᑭᒧᐊᑦᑎᑕᐅᖁᓪᓗᒋᑦ ᓄᓇᕗᑦ ᑐᙵᕕᒃ ᑎᒥᖓᑕ ᐃᓱᒪᓕᐅᖅᐸᓪᓕᐊᔾᔪᓯᖓ ᓂᕈᐊᕐᓗᑎᑦ ᑭᒃᑯᑦ ᐱᒐᔭᕐᒪᖔᑕ ᐊᒻᒪᓗ ᓴᓂᕐᕙᐃᓗᑎᑦ ᐊᔾᔨᐅᙱᑦᑐᓂᑦ ᑐᙵᕕᓖᑦ ᑮᓇᐅᔭᖃᖅᑎᑕᐅᓂᖏᑦ.
• ᐃᓚᙵᖅᑐᓄᑦ ᐊᐅᓪᓚᕈᑏᑦ ᐃᑲᔫᑎᖏᑦᑕ ᐱᓕᕆᐊᑉ ᐊᑐᐊᒐᖓ ᐋᖅᑭᒋᐊᖅᑕᐅᓪᓗᓂ ᐊᒻᒪᓗ ᐊᒥᓱᕈᕆᐊᖅᑎᑕᐅᔪᑦ ᐊᑐᖅᑕᐅᕙᑦᑐᒥ ᐃᓚᙵᖅᑐᓄᑦ ᐊᐅᓪᓚᕈᑏᑦ ᐃᑲᔫᑎᖏᑦ ᐱᓕᕆᐊᕐᒥ, ᐱᖃᓯᐅᑎᓪᓗᒋᑦ ᐊᓯᖏᑦ, ᐊᑭᓕᐅᑕᐅᒐᔭᖅᑐᑦ ᐊᐅᓪᓚᕈᑏᑦ ᐊᑭᖏᖕᓂᒃ ᐱᖓᔪᐊᓐᓂ ᐃᓚᒋᔭᐅᔪᑉ ᐃᓚᙵᖅᑐᒥᓂᑉ ᐊᑭᓕᐅᑕᐅᖃᑦᑕᖁᓪᓗᒋᑦ, ᐃᓚᒋᐊᖅᓯᓪᓗᑎᑦ ᐃᓚᖏᖕᓂᒃ ᑐᔪᕐᒥᕕᒻᒧᑦ ᐊᑭᖏᑦ ᐊᐅᓪᓚᖅᐸᓪᓕᐊᔪᓄᑦ ᑎᑭᕝᕕᒋᒐᓱᐊᖅᑕᒥᓄᑦ, ᐊᒻᒪᓗ ᐃᓚᖏᑦ ᓄᓇᒃᑰᕐᓗᓂ ᐊᐅᓪᓚᖅᐸᓪᓕᐊᓗᓂ ᐊᑭᖏᑦ ᐊᑭᓕᐅᑕᐅᔾᔪᑎᐅᖃᑦᑕᕋᔭᖅᑐᑦ.

ᑲᑎᒪᔩᑦ ᖃᒪᓂ’ᑐᐊᖅ, ᓄᓇᕗᒻᒥ, ᑲᑎᒪᓂᐊᓚᐅᖅᑑᒐᓗᐊᑦ, ᑭᓯᐊᓂᓕ ᓯᓚᑲᒻᒪᐅᓂᖓᓄᑦ ᐃᓚᒋᔭᐅᔪᑦ ᑭᕙᓪᓕᕐᒨᖅᐸᓪᓕᐊᔪᑦ ᓄᓇᓕᒻᒧᑦ ᐊᐅᓪᓚᕈᓐᓇᓚᐅᙱᑦᑐᑦ. ᓄᓇᕗᑦ ᑐᙵᕕᒃ ᑎᒥᖓ ᐸᕐᓇᓚᐅᖅᓯᒪᓚᐅᕐᒪᑕ ᓄᓇᓕᒻᒥᐅᓂᑦ ᓂᕆᕕᔾᔪᐊᖅᑎᑦᑎᓂᐊᕐᓗᑎᑦ ᓄᓇᓕᓐᓂ ᐱᙳᐊᕐᕕᖓᓂ. ᓄᓇᕗᑦ ᑐᙵᕕᒃ ᑎᒥᖓ ᑐᓂᓯᖔᓕᓚᐅᖅᑐᑦ ᐃᓄᐃᑦ ᓂᕿᖏᓐᓂᒃ ᓂᐅᕕᐊᒥᓃᑦ ᓂᕆᕕᔾᔪᐊᕐᓂᕐᒧᑦ ᑖᒃᑯᓄᖓ ᕼᐊᒻᓚᒃᑯᑦ ᐸᕐᓇᓯᒪᔭᖓᓄᑦ ᓇᓪᓕᐅᓂᖅᓯᐅᕈᑎᒃᓴᖏᑕ.

-30-

ᐱᕙᓪᓕᐊᔪᓕᕆᔨᒃᑯᑦ ᖃᐅᔨᒋᐊᕈᓐᓇᖅᑐᑦ: ᑭᐊᕙᓐ ᖃᑉᓗᑦᓯᐊᖅ ᑐᑭᒧᐊᑦᑎᑦᑎᔨ ᑐᓴᐅᒪᔪᓕᕆᔨᒃᑯᓐᓄᑦ ᓄᓇᕗᑦ ᑐᙵᕕᒃ ᑎᒥᖓ media@tunngavik.com

📄 2024 03 27 DRAFT NR NTI BoD meeting FINAL.INUK