NTI Applies for Judicial Review over Narwhal Tusk Ban

ᓄᓇᕗᑦ ᑐᙵᕕᒃ ᑎᒥᖓᑦᑕ ᐊᖏᔪᖅᑳᖓ ᑳᑎ ᑕᐅᑐᙱ ᓇᓗᓇᐃᖅᓯᔪᖅ ᐅᓪᓗᒥ ᑐᙵᕕᒃᑯᑦ ᑐᓂᓯᖅᑲᐅᒻᒪᑕ ᕿᒥᕐᕈᖁᔨᓪᓗᑎᒃ ᐃᓱᒪᓕᐅᕈᑕᐅᓯᒪᔪᒥᒃ ᒐᕙᒪᑐᖃᒃᑯᑦ ᐃᖅᑲᖅᑐᐃᕕᖓᒍᑦ ᐊᑭᕋᖅᑐᕐᒪᑕ ᐃᒪᕐᒥᐅᑕᓕᕆᔨᒃᑯᑦ ᓄᖅᑲᑎᑦᓯᓯᒪᓂᖏᓐᓂᒃ ᓂᐅᕐᕈᑎᖃᕈᓐᓇᕐᓂᖏᓐᓂᒃ ᑐᒑᓂᒃ ᐊᒻᒪ ᐊᓯᖏᑦ ᐊᒃᑐᐊᓂᖃᖅᑐᓂᒃ ᑖᒃᑯᓇᓐᖓᑦ 17-ᖑᔪᓂᒃ ᓄᓇᕗᒻᒥ ᓄᓇᓕᐅᔪᓂᒃ.

ᐃᒪᕐᒥᐅᑕᓕᕆᔨᒃᑯᑦ ᖃᐅᔨᒃᑲᐃᓚᐅᖅᑐᑦ ᑐᙵᕕᒃᑯᓐᓂ ᓄᖅᑲᑎᑦᓯᓂᕐᒥᓂᒃ ᐅᓪᓗᓕᖅᓯᒪᖏᑦᑐᒃᑯᑦ ᑎᑎᖅᑲᒃᑯᑦ ᑎᓯᐱᕆᐅᑎᓪᓗᒍ. ᑐᙵᕕᒃᑯᑦ ᖃᐅᔨᒪᔮᖅᑎᑕᐅᓚᐅᖏᑦᑐᑦ ᓄᖅᑲᑎᑦᓯᓂᐅᓂᐊᖅᑐᒥᒃ ᓯᕗᓂᐊᒍᑦ ᐊᑐᓕᖅᑎᑕᐅᓚᐅᖅᑎᓐᓇᒍ, ᐊᒻᒪ ᐃᓄᐃᑦ ᑐᓴᕆᐊᕐᕕᐅᓚᐅᕐᓇᑎᒃ. ᐃᒪᕐᒥᐅᑕᓕᕆᔨᒃᑯᑦ ᓯᖁᒥᑦᑎᓯᒪᔪᑦ ᐃᓄᐃᑦ ᐊᖑᓇᓱᒍᓐᓇᓂᕐᒧᑦ ᐱᔪᓐᓇᐅᑎᖏᓐᓂᒃ ᐃᓛᒃᑰᖓ 5-ᒥ ᓇᓗᓇᐃᖅᓯᒪᔪᑦ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᑎᒍᑦ.

ᑎᑎᖅᑲᐅᓯᐊᓚᐅᖅᑎᓪᓗᒋᑦ ᐃᒪᕐᒥᐅᑕᓕᕆᔨᒃᑯᓐᓂ, ᑐᙵᕕᒃᑯᑦ ᐊᐱᕆᓚᐅᖅᑐᑦ ᐃᒪᕐᒥᐅᑕᓕᕆᔨᒃᑯᓐᓂ ᐃᓱᒪᓕᐅᕈᑎᒋᓯᒪᔭᖓᓂᒃ ᓄᖅᑲᖁᔨᓪᓗᑎᒃ. ᐃᒪᕐᒥᐅᑕᓕᕆᔨᒃᑯᑦ ᐊᖏᓚᐅᖏᑦᑐᑦ. ᑕᐅᑐᙱ ᐅᖃᖅᑐᖅ ᑐᙵᕕᒃᑯᑦ ᐊᓯᐊᒎᕐᕕᖃᓚᐅᕈᓐᓃᕐᒪᑕ ᓴᐳᔾᔨᔭᕆᐊᖃᕐᒪᑕ ᐃᓄᐃᑦ ᐱᔪᓐᓇᐅᑎᖏᓐᓂᒃ.

“ᐃᒪᕐᒥᐅᑕᓕᕆᔨᒃᑯᑦ ᐃᓱᒪᓕᐅᕆᐊᖃᙱᑦᑐᑦ ᑕᐃᒫᒃ ᖃᐅᔨᒋᐊᖅᑳᓚᐅᖏᓪᓗᑎᒃ ᐃᓄᓐᓂᒃ ᐊᒻᒪ ᒪᓕᑦᑕᐅᔭᕆᐊᖃᖅᑐᓂᒃ ᐋᖅᑭᒃᓯᒪᔪᓂᒃ ᐊᖏᕈᑎᐅᑉ ᐃᓗᐊᓂ,” ᐅᖃᖅᑐᖅ ᑕᐅᑐᙱ. “ᑐᙵᕕᒃᑯᑦ ᑕᐅᑐᑦᑕᖓᒍᑦ, ᐃᒪᕐᒥᐅᑕᓕᕆᔨᒃᑯᑦ ᐃᓱᒪᓕᐅᖅᓯᒪᔪᑦ ᖃᐅᔨᓴᕈᑎᒥᓂᖅᑎᒍᑦ ᐊᐱᖅᑯᑎᖃᕐᓇᖅᑐᓄᑦ. ᐃᒪᕐᒥᐅᑕᓕᕆᔨᒃᑯᑦ ᖃᐅᔨᓴᕈᑎᒥᓂᖏᑦ ᑕᑯᒃᓴᐅᑎᑦᓯᔪᑦ ᐊᒥᓲᑦᑎᐊᕐᓂᖏᓐᓂᒃ, ᐊᒻᒪ ᐱᑕᖅᑕᐅᕙᒃᑐᑦ ᐊᑦᑕᓇᖅᑐᒦᓕᕈᑕᐅᖏᓐᓂᖏᓐᓄᑦ. ᑐᙵᕕᒃᑯᑦ ᓱᓕ ᐅᓂᒃᑳᕆᐊᖅᑐᕕᒃᓴᖃᓚᐅᖏᒻᒪᑕ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ, ᑖᒃᑯᐊ ᓴᖅᑭᑕᐅᓯᒪᔪᑦ ᐊᖏᕈᑎᑎᒍ ᖃᐅᔨᒪᔨᐅᔭᕆᐊᖃᖅᖢᑎᒃ ᐃᓄᐃᑦ ᐊᖑᓇᓱᒍᓐᓇᕐᓂᖏᓐᓂᒃ ᑲᒪᑦᓯᐊᓂᐊᕐᓗᑎᒃ.

ᐃᒪᕐᒥᐅᑕᓕᕆᔨᒃᑯᑦ ᓂᐅᕐᕈᑎᖃᕐᓇᑎᑦᓯᖏᓚᑦ ᑐᒑᕐᓂᒃ ᐅᑯᓇᖔᖅᑐᓂᒃ ᐊᐅᓱᐃᑦᑐᖅ, ᐃᒃᐱᐊᕐᔪᒃ, ᖃᐅᓱᐃᑦᑐᖅ, ᑲᖏᖅᑐᒑᐱᒃ, ᕿᑭᖅᑕᕐᔪᐊᖅ, ᐸᓐᓂᖅᑑᖅ, ᐃᖃᓗᐃᑦ, ᑭᒻᒥᕈᑦ, ᑭᙵᐃᑦ, ᓱᓪᓖᑦ, ᓇᐅᔮᑦ, ᓴᓂᕋᔭᒃ, ᐃᒡᓗᓕᒑᕐᔪᒃ, ᑲᖏᖅᖠᓂᖅ, ᑎᑭᕋᕐᔪᐊᖅ, ᐊᕐᕕᐊᑦ ᐊᒻᒪ ᓴᓂᑭᓗᐊᖅ. ᓄᓇᓖᑦ ᓱᓕ ᓂᐅᕐᕈᑎᖃᕈᓐᓇᖅᑎᑕᐅᔪᑦ ᑐᒑᕐᓂᒃ ᐅᑯᐊᖑᔪᑦ ᑯᒑᕐᔪᒃ, ᑕᓗᕐᔪᐊᖅ, ᐅᖅᓱᖅᑑᖅ, ᐃᒡᓗᓕᒃ ᐊᒻᒪ ᒥᑦᑎᒪᑕᓕᒃ.

-30-