NTI and Regional Inuit Organizations Announce the Rollout of Nunavut Inuit Post-Secondary Education Program
ᓴᖅᑭᑕᐅᑦᓴᐅᑎᒋᒋᐊᓕᒃ
(ᔪᓚᐃ 2, 2024 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓ (ᑐᙵᕕᒃ) ᐊᒻᒪᓗ ᐊᕕᑦᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᑦ ᑐᓴᖅᑎᑦᓯᔪᑦ ᐃᓕᓴᕆᔭᐅᓯᒪᔪᒃᑯᑦ ᐊᐅᓚᔾᔭᑦᑕᐅᓂᖓᓂᒃ ᓄᓇᕗᒻᒥ ᐃᓄᐃᑦ ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎ (IPSEP) ᑕᕝᕙᙶᖅᑐᖅ ᓄᑖᒥᒃ, ᑲᑐᔾᔭᐅᓪᓗᓂ ᑲᒪᒋᔭᐅᔪᒥᒃ, ᓄᓇᕗᒻᒥ ᐃᓄᐃᑦ ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᓄᑦ ᐊᑐᐊᒐᕐᒥᒃ ᐊᖏᖅᑕᐅᓚᐅᖅᑐᒥᒃ ᑐᙵᕕᒃᑯᑦ ᑲᑎᒪᔨᖏᓐᓄᑦ ᒫᑦᓯ 2024. ᐊᑐᓕᖅᑎᑕᐅᓂᖓ ᑲᑐᔾᔭᐅᔪᖅ ᐊᑐᐊᒐᖅ ᐱᒋᐊᕐᓂᐊᖅᑐᖅ 2024-ᒧᑦ ᐅᑭᐊᒃᓵᕐᒥ ᐃᓕᓐᓂᐊᖅᑎᓪᓗᒋᑦ.
ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᑦ, ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᑦ, ᐊᒻᒪᓗ ᑲᑭᕙᒃ ᑲᑐᔾᔨᖃᑎᒌᑦ ᓇᓗᓇᐃᖅᑕᐅᓯᒪᔪᑦ ᐊᕕᑦᑐᖅᓯᒪᔪ ᐊᐅᓚᑦᓯᔨᐅᓂᐊᖅᑐᑦ ᑭᒡᒐᐅᓗᑎᒃ (RDA) ᐃᑲᔫᑎᒧᑦ, ᑐᓂᓯᖃᑦᑕᕐᓗᑎᒃ ᐃᓕᓐᓂᐊᖅᑎᓄᑦ ᐃᑲᔫᑎᓂᒃ ᐊᑐᐃᓐᓇᐅᔪᓂᒃ ᓄᓇᕗᒻᒥ ᐃᓄᓐᓄᑦ ᑲᓇᑕᓕᒫᒥ.
“ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎ ᐱᖕᒪᕆᐅᔪᖅ ᓄᓇᕗᒻᒥ ᐃᓄᐃᑦ ᑎᒍᓯᒃᑲᓐᓂᖁᓪᓗᒋᑦ ᐊᔪᙱᓐᓂᕆᔭᐅᒋᐊᓕᖕᓂᒃ ᓯᕗᓕᕈᑎᑦᓴᖏᓐᓂᒃ ᓄᓇᕗᒻᒥ ᐅᓪᓗᒥ, ᖃᐅᑉᐸᑦ, ᐊᒻᒪᓗ ᓯᕗᓂᑦᓴᑎᓐᓄᑦ,” ᐅᖃᖅᑐᖅ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ. “ᐱᑕᖃᕆᐊᖃᕐᓂᖓ ᐱᖕᒪᕆᐅᓂᖃᕐᒥᔪᖅ ᑐᙵᕕᒃᑯᓐᓄᑦ ᐊᒻᒪᓗ RDA−ᓄᑦ ᐃᑲᔪᖅᑕᐅᖁᓪᓗᒋᑦ ᐃᓘᓐᓈᒍᑦ ᐃᓄᐃᑦ ᐊᒻᒪᓗ ᐃᓕᑉᐸᓪᓕᐊᓂᖏᓐᓄᑦ. ᑲᑐᔾᔭᐅᓪᓗᑎ ᐊᑐᐊᒐᓕᐊᖑᔪᖅ ᐊᒻᒪᓗ ᐊᑐᐊᕋᑦᓴᑦ IPSE ᐃᑲᔫᑎᓄᑦ ᐃᑲᔫᑕᐅᓂᐊᖅᑐᖅ ᐃᓄᐃᑦ ᐃᓕᓐᓂᐊᖅᑏᑦ ᐃᓱᒫᓘᑐᐃᓐᓇᖏᓪᓗᑎᒃ ᓇᑭᑦ ᑮᓇᐅᔭᓕᑕᐅᒍᓐᓇᕋᔭᕐᒪᖔᕐᒥᒃ ᐃᓕᓐᓂᐊᖅᑕᒥᓄᑦ, ᐊᒻᒪᓗ ᐃᓱᒪᒋᔭᖃᖔᕐᓗᑎᒃ ᐃᓕᓐᓂᐊᑲᓐᓂᖅᑕᒥᓄᑦ ᐱᕙᓪᓕᐊᒍᑎᑦᓴᒥᓂᒃ.”
IPSEP ᐱᓇᓱᐊᒐᖅ ᐃᑲᔫᑎᑦᓴᓕᐊᖑᓯᒪᔪᖅ ᐱᕚᓪᓕᕈᑎᑦᓴᓄᑦ ᐃᓄᐃᑦ ᐃᓕᓐᓂᐊᑲᓐᓂᖅᑐᓄᑦ ᖁᕝᕙᑲᓐᓂᖁᓪᓗᒋᑦ ᑎᑭᐅᑎᓯᒪᓗᑎᒃ ᓇᓕᒧᖃᕐᓗᓂ ᓄᓇᖃᖅᑳᖅᓯᒪᔫᖏᑦᑐᓄᑦ ᑲᓇᑕᒥ. IPSEP ᐃᑲᔫᑎᑦᓴᖅ ᐃᓕᓐᓂᐊᖅᑐᓄᑦ ᐱᖓᓱᑎᒍᑦ: ᑐᕋᐃᓐᓇᖅᑐᒥᒃ ᑮᓇᐅᔭᑎᒍᑦ ᐃᑲᔫᑎ ᐃᓕᓐᓂᐊᕕᖕᒦᒍᑎᓄᑦ, ᐃᓅᔾᔪᑎᑦᓴᓄᑦ ᐊᒻᒪᓗ ᐊᓯᖏᓐᓄᑦ ᐊᑭᓕᖅᓱᕆᐊᓕᖕᓄᑦ ᐊᑦᑐᐊᔪᓄᑦ ᐃᓕᓐᓂᐊᑲᓐᓂᓂᕐᒧᑦ; ᑐᕋᐃᓐᓇᖏᑦᑐᒥᒃ ᐃᑲᔫᑎᑦ ᓲᕐᓗ ᐃᓕᓴᐃᔨᖃᒃᑲᓂᕐᓂᖅ ᐃᓅᓯᓕᕆᔨᒥᓪᓗ; ᐊᒻᒪᓗ ᓄᓇᓕᓐᓄᑦ ᐃᓚᐅᑎᑕᐅᒋᐊᒃᑲᓐᓂᕈᑎᑦᓴᓂᒃ ᐃᓚᒋᔭᐅᓗᑎᒃ ᖃᐅᔨᒋᐊᖃᑦᑕᕐᓂᖅ ᐅᖃᖃᑎᖃᖃᑦᑕᓂᕐᓗ.
ᑖᒃᑯᐊ IPSEP ᑮᓇᐅᔭᖅᑑᑎᑦᓴᖅᑖᖑᓯᒪᔪᑦ ᐊᕐᕌᒍᕋᓴᓐᓄᑦ ᐊᖏᕈᑕᐅᓯᒪᔪᒥᒃ ᓄᓇᖃᖅᑲᖅᓯᒪᔪᓄᑦ ᐱᔨᑦᓯᖅᑎᓄᑦ ᑲᓇᑕᒥ (ISC). ᒪᑭᒋᐊᖅᑕ ᐃᓄᐃᑦ ᐱᓕᖕᒪᓴᕐᓂᕐᒧᑦ ᑯᐊᐳᕇᓴᓐ ᐊᖏᕈᑎᖃᖅᓯᒪᒻᒥᔪᑦ ᐃᑲᔫᑎᓂᒃ $5-ᒥᓕᔭᒨᖓᔪᓂᒃ ᐊᑕᐅᓯᕐᒧᑦ ᑮᓇᐅᔭᓕᕆᓐᓇᑉ ᐊᕐᕌᒍᐊᓄᑦ ᐊᑯᕐᖓᖏᖕᓂ 2023- 2025 ᐋᖅᑭᒋᐊᕈᑎᒃᓴᓂᒃ ᑮᓇᐅᔭᑎᒍᑦ ᖄᖏᐅᑎᖃᑦᑕᓂᕐᒥᒃ ᐃᑲᔫᑎᑎᒍᑦ ᐱᔪᒐᕆᔭᒻᒪᕆᐅᓂᖏᓐᓄᑦ ᐃᑲᔫᑎᑦ. ᑐᙵᕕᒃᑯᑦ ᑮᓇᐅᔭᓖᖁᔨᓯᒪᔪᑦ IPSEP−ᒥᒃ.
ᑲᔪᓯᙱᓐᓂᖓᓂ, ᑐᙵᕕᒃᑯᑦ ᐱᓇᓱᐊᖏᓐᓇᓂᐊᖅᑐᑦ ᑮᓇᐅᔭᓕᑕᐅᒃᑲᓐᓂᕈᑎᑦᓴᓂᒃ ᐃᑲᔫᑎᓄᑦ ᑕᒪᕐᒥᒃ ᓄᓇᕗᒻᒥ ᐃᓄᐃᑦ ᐊᑐᐃᓐᓇᖃᕈᒪᔪᑦ ᐃᑲᔫᑎᑦᓴᓂᒃ ᐃᑲᔪᖅᑕᐅᓂᕐᒥᓂᒃ ᐃᑉᐱᒍᓲᑎᑦᓴᖏᓐᓂᒃ ᐱᓇᓱᐊᒐᕐᒥᓂᒃ ᐃᓕᓐᓂᐊᕕᒃᑯᑦ ᐃᓕᓐᓂᐊᖅᑎᑕᐅᓂᕐᒥᒃ ᐊᒻᒪᓗ ᐱᕚᓪᓕᕈᑎᑦᓴᖏᓐᓂᒃ ᐃᓅᓯᕐᒥᓂ.
ᓄᓇᕗᒻᒥ ᐃᓄᐃᑦ ᐃᓕᓐᓂᐊᖅᑎᑦ ᑐᑭᓯᒋᐊᒃᑲᓐᓂᕈᒪᔪᑦ IPSEP−ᒥᒃ ᖃᐅᔨᒋᐊᖃᑦᑕᖁᔭᐅᔪᑦ RDA−ᖏᓐᓂᒃ ᐅᑯᓄᖓ:
ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᑦ
ᐅᖄᓚᐅᑖ: (867)-983-2458 ᑲᓱᕈᑎᖓ 1013
ᐊᑭᖃᙱᑦᑐᖅ: 1-833-854-0062
ᐃᑭᐊᖅᑭᕕᖓ: https://www.kitia.ca/contact/
ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᑦ
ᐅᖄᓚᐅᑖ: (867) 645-5725
ᐊᑭᖃᙱᑦᑐᖅ: 1-800-220-6581
ᐃᑭᐊᖅᑭᕕᖓ: https://www.kivalliqinuit.ca/contact-2/
ᑲᑭᕙᒃ ᑲᑐᔾᔨᖃᑎᒌᑦ (ᕿᑭᖅᑕᓂ ᓄᓇᖓᓂ)
ᐅᖄᓚᐅᑖ: (867) 979-0911
ᐊᑭᖃᙱᑦᑐᖅ: 1-800-561-0911
ᐃᑭᐊᖅᑭᕕᖓ: https://www.kakivak.ca/en/contact
-30-
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᑦᓴᖅ: ᐃᕙᓗᐊᕐᔪᒃ ᒦᕆᑦ ᑐᑭᒧᐊᒃᑎᑦᑎᔨ ᑐᓴᐅᒪᔾᔪᑎᓕᕆᔨᒃᑯᓐᓂ ᓄᓇᕗᑦ ᑐᙵᕕᒃ ᑎᒥᖓ media@tunngavik.com
-30-
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᑦᓴᖅ: ᐃᕙᓗᐊᕐᔪᒃ ᒦᕆᑦ ᑐᑭᒧᐊᒃᑎᑦᑎᔨ ᑐᓴᐅᒪᔾᔪᑎᓕᕆᔨᒃᑯᓐᓂ ᓄᓇᕗᑦ ᑐᙵᕕᒃ ᑎᒥᖓ media@tunngavik.com