Narwhal Tusk Trade Restriction Partially Lifted
ᓄᓇᕗᑦ ᑐᓐᖓᕕᒃᑯᑦ ᐊᖏᔪᖅᑳᖓᑕ ᑐᒡᓕᐊ ᔭᐃᒥᓯ ᐃᑦᑐᓗᒃ ᑐᓴᖅᑎᑦᓯᖅᑲᐅᔪᖅ ᐃᒪᕐᒥᐅᑕᓕᕆᔨᒃᑯᑦ ᐃᓚᖓᒍᑦ ᐅᕿᓪᓕᒋᐊᖅᑕᐅᒐᓛᒋᐊᖓ ᓯᓚᕐᔪᐊᒥ ᓂᐅᕐᕈᑎᖃᖃᑦᑕᕐᓂᕐᒧᑦ ᑭᒡᓕᖃᖅᑎᑕᐅᓂᖓ ᐊᓪᓚᓐᖑᐊᑦ ᑐᒑᖏᓐᓂᒃ ᐱᓇᓱᐊᕈᓯᑦᑎᓐᓂ.
“ᑐᓴᕈᒥᓇᖅᑐᕐᔪᐊᕌᓗᒃ ᑕᒪᓐᓇ,” ᐅᖃᖅᑲᐅᔪᖅ ᐃᑦᑐᓗᒃ. “ᐃᒪᕐᒥᐅᑕᓕᕆᔨᒃᑯᑦ ᐊᓪᓚᓐᖑᐊᑦ ᑑᒑᖏᓐᓂᒃ ᓂᐅᕐᕈᑎᖃᖃᑦᑕᓂᕐᒧᑦ ᓄᖅᑲᑎᑦᓯᒻᒪᑕ 17-ᓄᑦ ᓄᓇᕗᒻᒥ ᓄᓇᓕᓐᓄᑦ ᐊᕐᕌᓂ, ᐃᓱᒪᓕᐅᕈᑕᐅᓂᖓᒍᑦ ᐋᖅᑭᑦᑕᐅᓂᖓ ᐊᐱᖅᑯᑎᒃᓴᖅᑕᖃᓚᐅᕐᒪᑦ ᖃᓪᓗᓈᑦ ᖃᐅᔨᓴᖅᑎᕐᔪᐊᖏᑕ ᖃᐅᔨᓴᕈᑎᒥᓂᖏᓐᓂᒃ ᑲᑎᖅᓱᖅᑕᐅᓯᒪᔪᓂᒃ ᐃᓚᖓᓂᒃ ᖃᖓᑕᔫᒃᑯᑦ ᖃᐅᔨᓴᕈᑕᐅᓚᐅᖅᑐᑦ 2003-ᒥ. ᑭᐳᑦᑎᑕᐅᓂᖓ ᐃᓱᒪᓕᐅᕈᑕᐅᓚᐅᖅᑑᑉ ᑖᒃᑯᓇᓐᖔᖅᓯᒪᔪᑦ ᖃᖓᑕᔫᒃᑯᑦ ᖃᐅᔨᓴᕈᑎᒥᓂᕐᓂᒃ ᑲᖏᕐᖢᕐᒥ (Admiralty Inlet) ᐃᑉᐱᐊᕐᔫᑉ ᖃᓂᖏᔮᓂ 2010-ᒥ. ᑕᒪᓐᓇ ᑐᑭᓕᒃ ᐃᓄᐃᑦ ᐃᑉᐱᐊᔪᒻᒥ, ᑲᖏᕐᖢᒑᐱᒃ, ᕿᑭᖅᑕᕐᔪᐊᖅ, ᐸᓐᓂᖅᑑᖅ ᐊᒻᒪᓗ ᐃᖃᓗᓐᓂ ᓯᓚᕐᔪᐊᒥ ᓂᐅᕐᕈᑎᖃᒃᑲᓐᓂᖃᑦᑕᕈᓐᓇᕐᓂᐊᓕᕐᒥᔪᑦ ᐊᓪᓚᓐᖑᐊᓄᑦ ᑑᒑᓂᒃ ᐊᒻᒪᓗ ᑮᓇᐅᔭᑎᒍᑦ ᐊᑭᓖᑎᑕᐅᒋᐊᑐᖃᑦᑕᔾᔮᒍᓐᓃᖅᑐᑦ ᐃᒪᕐᒥᐅᑕᓕᕆᔨᒃᑯᑦ ᖃᐅᔨᓴᕈᑎᒥᓂᖏᓐᓄᑦ ᑲᑎᖅᓱᒐᐅᓯᒪᔪᑐᖃᕐᓄᑦ,” ᐅᖃᓚᐅᖅᑐᖅ.
ᐃᒪᕐᒥᐅᑕᓕᕆᔨᒃᑯᑦ ᐋᖅᑮᒻᒪᑕ ᓂᐅᕐᕈᑎᖃᖃᑦᑕᓂᕐᒧᑦ ᑭᒡᓕᖃᖅᑎᑦᓯᓂᕐᒧᑦ ᑏᓰᒻᕙ 2010-ᒥ, ᑐᓐᖓᕕᒃᑯᑦ ᑲᖐᓵᖅᑕᐅᖏᑦᓯᐊᓚᐅᖅᑐᑦ ᑭᒡᓕᓕᐅᖅᑕᐅᓂᖓᓂᒃ ᓯᕗᓂᐊᒍᑦ ᓄᖅᑲᖅᑎᑕᐅᓚᐅᓐᖏᓐᓂᖏᓐᓂ, ᐊᒻᒪᓗ ᐃᓄᐃᑦ ᑐᓴᕆᐊᕐᕕᐅᖏᑦᓯᐊᖅᑐᑎᒃ. ᐃᒪᕐᒥᐅᑕᓕᕆᔨᒃᑯᑦ ᐱᓕᕆᓕᕐᓂᓚᐅᕐᒪᑕ ᓯᖁᒥᑦᓯᓪᓗᑎᒃ ᑲᓇᑕᐅᑉ ᒐᕙᒪᒃᑯᖏᑕ ᒪᓕᒐᖅᑎᒍᑦ ᐱᓂᐊᕐᓂᕋᐅᑎᒋᓯᒪᔭᖏᓐᓂᒃ ᑐᓴᕆᐊᕐᕕᖃᑦᓯᐊᖃᑦᑕᓛᕐᓂᐊᓂᕐᒧᑦ ᑐᑭᓯᑦᓯᐊᓚᐅᕐᓗᑎᒃ ᑐᓴᕆᐊᕐᕕᖃᖃᑦᑕᓂᐊᕐᓂᕐᒧᑦ ᐃᓄᖕᓂᒃ. ᑐᓐᖓᕕᒃᑯᑦ ᓴᖅᑮᓕᓚᐅᖅᑐᑦ ᒪᓕᒐᖅᑎᒍᑦ ᓵᓐᖓᑦᓯᔾᔪᑎᒃᓴᒥᓂᒃ, ᑭᓯᐊᓂᓕ ᓄᖅᑲᖅᑎᓚᐅᖅᑖᑦ ᐃᒪᕐᒥᐅᑕᓕᕆᔨᒃᑯᑦ ᐊᖏᕈᑎᖃᕐᒪᑕ ᑐᓴᕋᓱᐊᕐᓂᕐᒧᑦ ᐃᓚᒋᔭᐅᓂᐊᕐᓂᕐᒥᒃ, ᐊᒻᒪᓗ ᐱᓕᕆᖃᑎᖃᕐᓂᐊᓂᕐᒥᒃ ᐃᓄᖕᓂᒃ ᐃᓱᒪᓕᐅᕈᑕᐅᓇᓱᐊᕐᓂᖏᓐᓄᑦ ᐊᓪᓚᓐᖑᐊᑦ ᐊᐅᓚᑕᐅᓂᖏᓐᓅᖓᔪᓂᒃ ᐊᒻᒪᓗ ᓂᐅᕐᕈᑎᖃᖃᑦᑕᓂᕐᒧᑦ.
ᐃᒪᕐᒥᐅᑕᓕᕆᔨᒃᑯᑦ ᐃᓱᒪᓕᐅᕈᑎᒋᓚᐅᖅᑖᑦ ᐃᓚᖓᒍᑦ ᐅᕿᓪᓕᒋᐊᖅᓯᓂᐊᕐᓂᕐᒥᒃ ᓂᐅᕐᕈᑎᖃᖃᑦᑕᕐᓂᕐᒧᑦ ᑭᒡᓕᓕᐊᕆᓯᒪᔭᒥᓂᒃ ᑐᓴᖅᑎᑦᓯᒍᑕᐅᓚᐅᖅᑐᖅ ᑕᕝᕙᓂ ᐱᓇᓱᐊᕈᓯᑦᑎᓐᓂ ᐃᒪᕐᒥᐅᑕᓕᕆᔨᒃᑯᑦ ᓴᖅᑮᓚᐅᖅᑎᓪᓗᒋᑦ 2010 ᐊᒻᒪᓗ 2011 ᐊᓪᓚᓐᖑᐊᖃᑦᓯᐊᕐᓂᖓ ᖃᐅᔨᓴᖅᑕᐅᓂᖓᒍᑦ ᖃᐅᔨᔭᐅᓚᐅᕐᒪᑦ ᐅᓂᒃᑳᓂᒃ ᓯᑕᒪᓂ ᑖᒃᑯᓇᓐᖓᑦ ᐊᕐᕕᓂᓕᓐᓂᒃ ᐊᐅᔭᖅᓯᐅᕆᐅᖅᑐᕐᕕᒋᕙᑦᑕᖏᓐᓂᒃ ᐊᓪᓚᓐᖑᐊᑦ ᓄᓇᕗᒻᒥ. ᑭᒡᓕᓕᐊᖑᓯᒪᔪᖅ ᓱᓕ ᑲᔪᓯᓂᐊᖅᑐᖅ ᑑᒑᖏᓐᓄᑦ ᐊᓪᓚᖑᐊᖅᑕᐅᒥᓃᑦ ᐊᐅᔭᖅᓯᐅᕆᐊᖅᑐᕐᕕᒋᕙᑦᑕᖏᓐᓂ Jones Sound ᐊᒻᒪᓗ ᑕᓯᐅᔭᕐᔪᐊᖅ ᐅᐊᖕᓈᓂ-ᑐᓄᓂᕐᒥ ᐊᓪᓚᓐᖑᐊᖏᓐᓂᒃ.