Jose Amaujaq Kusugak Scholarship Application Period Opens
ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦᑕ ᐊᖓᔪᖅᑳᖓᑦ ᑳᑎ ᑕᐅᑐᓐᖏ ᐅᓪᓗᒥ ᑐᓴᖅᑎᑦᓯᔪᖅ ᑐᒃᓯᕋᐅᑎᖃᕐᓂᖅ ᑖᑦᓱᒧᖓ ᔫᓯ ᐊᒪᐅᔭᖅ ᑯᓱᒐᖅ ᐃᓕᓐᓂᐊᒃᑲᓐᓂᕈᑎᒃᓴᑦ ᒪᑐᐃᕐᓂᐊᕐᓂᖓᓂᒃ ᐱᓇᓱᐊᕈᓯᐅᓂᐊᖅᑐᖅ, ᐊᐃᐳᕈ 1, 2012.
ᑕᑕᑎᕆᐊᓖᑦ ᐱᔭᐅᔪᓐᓇᖅᑐᑦ ᓄᓇᕗᑦ ᑐᓐᖓᕕᒃᑯᑦ ᑐᑭᓯᒋᐊᖅᑎᑦᓯᕕᐊᓂ ᖃᕆᓴᐅᔭᒃᑯᑦ ᐊᒻᒪ ᑐᑭᓯᒋᐊᕈᑎᒃᓴᑦ ᑲᑎᖅᓱᖅᓯᒪᔪᑦ ᑐᓂᐅᖅᑲᐅᑕᐅᓪᓗᑎᒃ ᐃᓕᓐᓂᐊᕐᕕᓕᒫᓄᑦ, ᓄᓇᕗᒥ ᓯᓚᑦᑐᖅᓴᕐᕖᑦ, ᕼᐊᒻᓕᒃᑯᑦ ᐊᓪᓚᒡᕕᖏᑦ ᐊᒻᒪ ᓄᓇᓕᖕᓂ ᑐᓴᐅᒪᑎᑦᑎᔩᑦ.
“ᓄᓇᕗᑦ ᑐᓐᖓᕕᒃᑯᑦ ᑲᔪᓯᑎᑦᓯᒍᒪᑦᓯᐊᖅᑐᑦ ᐱᓕᕆᐊᕆᓚᐅᖅᑕᖓᓂᒃ ᔫᓯᐅᑉ ᐃᓅᓯᕐᒥᓂ ᓴᖅᑭᔮᖅᑎᓪᓗᒋᑦ ᐃᓄᐃᑦ ᐃᓕᖅᑯᓯᖏᑦ, ᐅᖃᐅᓯᖏᑦ ᐊᒻᒪ ᐱᔪᓐᓇᐅᑎᖏᑦ ᐊᑑᑎᖃᑦᓯᐊᖁᓪᓗᒋᑦ ᐃᓄᓕᒫᓄᑦ, ᐃᓚᐅᓗᑎᒃ ᐃᓕᓂᐊᖅᑎᓄᑦ ᖁᑦᓯᖕᓂᖅᓴᓂ ᐃᓕᓐᓂᐊᕈᒪᔪᓄᑦ,” ᐅᖃᖅᑐᖅ ᑕᐅᑐᓐᖏ.
ᐊᒻᒪᑦᑕᐅᖅ, ᐱᐊᓂᓚᐅᕐᓗᒍ ᑕᑕᑎᕆᐊᓖᑦ, ᑐᒃᓯᕋᖅᑐᖅ ᑎᑎᕋᕆᐊᖃᕐᓂᐊᖅᑐᖅ 500 ᐅᖃᐅᓯᕐᓂᒃ ᐅᓂᒃᑳᕐᓗᓂ ᖃᓄᖅ ᐊᑐᕐᓂᐊᕐᒪᖔᕐᒥᒋᑦ ᐃᓕᓐᓂᐊᕐᓂᓂ ᓴᖅᑭᔮᖅᑎᑦᓯᒍᑎᒋᓗᒋᑦ ᐃᓄᐃᑦ ᐱᔪᓐᓇᐅᑎᖏᓐᓂᒃ, ᑭᓇᐅᓂᖏᓐᓂᒃ, ᐅᖃᐅᓯᖏᓐᓂᒃ ᐊᒻᒪ ᐃᓕᖅᑯᓯᖏᓐᓂᒃ. ᑎᑎᕋᖅᑕᐅᔪᓕᒫᑦ ᐅᓂᒃᑳᑦ ᑎᑎᕋᖅᓯᒪᓪᓚᕆᒋᐊᓖᑦ, ᐃᔾᔪᐊᖅᓯᒪᓐᖏᓪᓗᑎᒃ ᓴᖅᑭᑎᑕᐅᕌᓂᒃᓯᒪᔪᓄᑦ ᐊᓯᖏᓐᓄᑦ ᑎᑎᕋᖅᑎᓄᑦ. ᐱᐅᒋᔭᐅᓂᖅᓴᐅᒐᔭᖅᑐᖅ ᑐᒃᓯᕋᖅᑐᑦ ᐃᓚᐅᒃᐸᑕ ᐃᓕᓐᓂᐊᕐᓂᒃᒧᑦ ᐅᕝᕙᓘᓐᓃᑦ ᐃᓄᐃᑦ ᐅᖃᐅᓯᖏᓐᓂᒃ. ᑭᓯᐊᓂ ᐊᓯᖑᒎᕈᓐᓇᖅᑐᑦ ᑖᓐᓇ ᑐᒃᓯᕋᖅᑐᖅ ᑕᑯᑭᓴᐅᑎᑦᓯᑦᓯᐊᖅᐸᑦ ᖃᓄᖅ ᐃᓕᓐᓂᐊᕈᑎᒋᓂᐊᕐᓂᕐᒥᓂᒃ ᐊᒻᒪ ᐃᑲᔫᑎᓂᐊᕐᓂᖏᓐᓂᒃ ᐱᓕᕆᐊᖏᑦ ᖁᕝᕙᕆᐊᖅᑕᐅᓂᖏᓐᓄᑦ ᐃᓄᐃᑦ ᐱᔪᓐᓇᐅᑎᖏᑦ.
ᑖᓐᓇ ᐃᓕᓐᓂᐊᒃᑲᓐᓂᕈᑕᐅᔪᓐᓇᖅᑐᖅ ᑐᓂᔭᐅᓂᐊᖅᑐᖅ ᒪᕐᕉᖕᓄᑦ ᐃᓅᖕᓄᑦ ᐊᑐᓂ ᐱᓗᑎᒃ $5,000 ᐃᓕᓐᓂᐊᕈᑎᒃᓴᓂᒃ ᐃᓕᑕᕆᔭᐅᓯᒪᔪᓄᑦ ᖁᑦᓯᖕᓂᖅᓴᓄᑦ ᐃᓕᓐᓂᐊᕐᕕᒃ. ᓄᓇᕗᑦ ᑐᓐᖓᕕᒃᑯᑦ ᐃᓱᒪᓕᐅᖅᑎᖏᑦ ᕿᒥᕐᕈᓂᐊᖅᑐᑦ ᑐᒃᓯᕋᐅᑎᓂᒃ ᐊᒻᒪ ᓂᕈᐊᕐᓗᑎᒃ ᐃᓕᓐᓂᐊᖅᑎᓂᒃ ᒪᓕᒡᓗᒋᑦ ᐃᓕᓐᓂᐊᖅᑕᖏᑦ, ᑎᑎᕋᖅᑕᖏᑦ ᐅᓂᒃᑳᖅᓯᒪᔪᑦ ᐊᒻᒪ ᖃᐅᔨᒋᐊᒃᑲᓐᓂᕐᕕᐅᔪᓐᓇᖅᑐᑦ.
ᑐᒃᓯᕈᐅᑏᑦ ᐱᔭᐅᓯᒪᓕᕆᐊᖃᖅᑐᑦ ᔪᓚᐃ 9, 2012, ᓄᓇᕗᑦ ᐅᓪᓗᖓ. ᐃᓕᓐᓂᐊᖅᑏᑦ ᐊᑎᖃᖃᑕᐅᔪᑦ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑎᓂ ᐆᒃᑐᕈᓐᓇᖅᑐᑦ ᐃᓕᓐᓂᐊᒃᑲᓐᓂᕈᑎᒃᓴᒥᒃ.