Jose Amaujaq Kusugak Memorial Scholarship Recipients Announced
(ᐊᐅᒡᒍᓯ 13, 2021 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓᓄᑦ (ᑐᓐᖓᕕᒃ) ᐊᖓᔪᖅᑳᖅ ᐊᓗᑭ ᑰᑦᑎᖅ ᖁᕕᐊᒃᑯᔨᔪᖅ ᐋᓐᔨᓚ ᒧᒃᔪᖕᓂᕐᒥᒃ ᐊᕐᕕᐊᒥᐅᑕᖅ ᐊᒻᒪᓗ ᔨᐊᓇ ᕿᓚᕝᕙᖅ−ᖃᖅᑲᓯᖅ ᐸᓐᓂᖅᑑᒥᐅᑕᖅ ᑐᓂᔭᐅᓚᐅᕐᓂᖏᓐᓄᑦ ᔫᓯ ᐊᒪᐅᔭᖅ ᑯᓱᒐᖅ (JAK) ᐃᖅᑲᐅᒪᔭᐅᔾᔪᑎᖓᓄᑦ ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᒥᒃ 2021.
JAK ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎ ᑐᓂᔭᐅᖃᑦᑕᖅᑐᖅ $5,000.00 ᐊᕐᕌᒍᑕᒫᑦ ᒪᕐᕉᓐᓄᑦ (2) ᐃᓕᓐᓂᐊᖅᑏᓐᓄᑦ ᑎᒍᓯᓯᒪᔫᓐᓄᑦ ᔫᓯ ᐊᒪᐅᔭᐅᓚᐅᖅᑑᑉ ᖁᕕᐊᒋᓚᐅᖅᑕᖓᓂᒃ ᑐᓂᓯᒪᓂᕆᓚᐅᖅᑕᖓᓂᓪᓗ ᐃᓕᓐᓂᐊᓂᕐᒧᑦ, ᐅᖃᐅᓯᕐᒧᑦ, ᐊᒻᒪᓗ ᓯᕗᒧᐊᒃᑎᑦᑎᓂᕐᒧᑦ ᐃᓄᐃᑦ ᐱᔪᓐᓇᐅᑎᖏᓐᓂᒃ.
ᐊᓐᔨᓚ ᐊᒻᒪᓗ ᔨᐊᓇ ᑕᒪᒃᑮᒃ ᐃᓕᓐᓂᐊᖅᑑᒃ ᓄᓇᕗᒻᒥ ᐃᓕᓴᐃᔨᒃᓴᓄᑦ ᐃᓕᓐᓂᐊᓂᕐᒥᒃ ᓄᓇᕗᑦ ᐅᑭᐅᖅᑕᖅᑐᒥ ᓯᓚᑦᑐᓴᕐᕕᒻᒥ ᑲᑐᔾᔨᖃᑎᖃᖅᑐᓂ ᒥᒨᕆᐅ ᐃᓕᓐᓂᐊᕕᔾᔪᐊᖓᓂᒃ ᓅᕕᓐᓛᓐ ᓄᓇᒋᔭᒥᒍᑦ.
“ᐊᕐᕌᒍᑦᑎᓐᓂ ᑐᓂᔭᐅᔫᒃ ᐋᔾᔪᒥᓇᕐᓂᖏᓐᓄᑦ ᐱᕕᐊᕆᔭᐅᔫᒃ ᓄᓇᖏᓐᓂ, ᑲᔪᓯᑦᓯᐊᕋᓱᐊᖅᑐᑎᒃ ᐱᓇᓱᐊᒻᒪᕆᓐᓂᕐᒥᒍᑦ ᐱᓇᓱᐊᕈᒪᔭᖏᓂᒃ ᐃᓕᓴᐃᔨᐅᓂᕐᒧᑦ ᓄᓇᕗᒻᒥ. ᑲᑦᓱᖓᖅᓯᒪᒍᑏᒃᑲ ᑐᓂᓯᒪᑦᓯᐊᕐᓂᖏᒃ ᖁᕕᐊᒋᔭᒥᓂᒃ ᐅᖃᐅᓯᓕᕆᓂᕐᒥᒃ ᐃᓕᖅᑯᓯᓕᕆᓂᕐᒥᓪᓗ ᐃᓕᓐᓂᐊᖅᑎᖁᑎᒥᓄᑦ ᐃᓕᓴᐃᖃᑦᑕᓛᕐᓂᖏᓐᓂᒃ. ᖁᕕᐊᒃᑯᑎᕚᒃᑲ ᐋᓐᔨᓚ ᐊᒻᒪᓗ ᔨᐊᓇ, ᐊᒻᒪᓗ ᐊᔪᙱᑦᓯᐊᕐᓂᐊᖁᕙᒃᑎᑦ 2021-2022 ᖁᑦᓯᓂᖅᓴᒥᒃ ᐃᓕᓐᓂᐊᓂᕐᒥ ᐊᕐᕌᒍᐊᓂ,” ᐅᖃᖅᑐᖅ ᐊᓗᑭ ᑰᑦᑎᖅ, ᑐᙵᕕᒃᑯᑦ ᐊᖓᔪᖅᑳᖓ.
ᑐᙵᕕᒃᑯᑦ ᖁᔭᓕᔪᑦ ᐃᓕᓐᓂᐊᖅᑎᓕᒪᓂᒃ ᐱᓇᓱᐊᖃᑕᐅᓚᐅᖅᑐᓂᒃ JAK ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᓂᒃ. ᑭᖑᓪᓕᖅ ᐃᓱᓕᕝᕕᒃᓴᖃᕐᓂᐊᓕᕐᒥᔪᖅ ᑐᒃᓯᕋᐅᓯᐅᕐᓂᕐᒧᑦ ᔫᓯ ᐊᒪᐅᔭᖅ ᑯᓱᒐᖅ ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᓂᒃ ᔪᓚᐃ 9, 2022. ᒫᓐᓇ ᓄᓇᕗᑦ ᑐᙵᕕᒃ ᐃᑲᔫᑎᒃᓴᓕᕆᔨᒃᑯᑦ (NTF) ᑐᒃᓯᕋᐅᑎᓂᒃ ᑐᓂᔭᐅᖃᑦᑕᓕᕐᒥᔪᑦ ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᓂᒃ ᐱᓇᓱᐊᕈᒪᔪᓄᑦ ᐊᒻᒪᓗ ᐊᔪᕈᓐᓃᓴᕐᓂᕐᒧᑦ ᐃᖅᑲᓇᐃᔮᒥᓪᓗ ᖁᕝᕙᕆᐊᕋᓱᐊᕐᓂᕐᒧᑦ ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᒃᓴᓂᒃ ᐊᐅᒡᒍᓯ 31, 2021-ᕈᕋᓱᐊᕐᓂᖓᓂ. ᑐᑭᓯᒋᐊᒃᑲᓂᕐᕕᒃᓴᖅ ᑖᒃᑯᓂᖓ ᐃᓕᓐᓂᐊᑲᓐᓂᖅᑐᓄᑦ ᐃᑲᔫᑎᓂᒃ ᑐᙵᕕᒃᑯᑦ ᐃᑭᐊᖅᑭᕕᖓᓂ ᐅᕙᓂ www.tunngavik.com.
ᑐᑭᓯᒋᐊᒃᑲᓂᕐᕕᒃᓴᖅ:
ᒪᓚᐃᔭ ᒥᑭᔾᔪᒃ
ᑐᑭᒧᐊᒃᑎᑦᑎᔨᒧᑦ ᑐᓴᐅᒪᔾᔪᑎᓕᕆᔨᒃᑯᓐᓂ ᐃᓕᓐᓂᐊᖅᑐᖅ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: (867) 975-4900/ᐊᑭᖃᙱᑦᑐᖅ: 1-888-646-0006
mmikijuk@tunngavik.com
www.tunngavik.com