Inuit Organizations Challenge the Government of Nunavut’s Move to Transfer Mining Companies’ Property Tax Liabilities to Inuit

(ᐊᐅᒐᔅᑎ 11, 2022, ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓ (NTI) ᐊᒻᒪᓗ  ᐊᕕᒃᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᑦ (ᑲᑐᔾᔨᖃᑎᖃᕐᓗᑎᒃ ᓄᓇᕗᑦ ᑐᙵᕕᒃᑯᓐᓂᒃ, "ᐃᓄᐃᑦ ᑲᑐᔾᔨᖃᑎᒌᖏᓐᓂᒃ") ᐃᖅᑲᖅᑐᐃᕕᖕᒧᐊᖅᓯᒍᑎᖃᕐᑐᑦ ᐊᐅᒐᔅᑎ 10, 2022 ᓵᖓᑦᓯᓪᓗᑎᒃ ᓄᓇᕗᑦ ᒐᕙᒪᒃᑯᑦ ᐊᐅᓚᔾᔭᑦᑕᖓᓂᒃ ᓄᒃᑎᕆᓂᕐᒧᑦ ᐅᔭᕋᓐᓂᐊᖅᑏᑦ ᑲᒻᐸᓃᑦ ᐱᖁᑎᓄᑦ ᑖᒃᓯᔭᐅᑎᓂᒃ ᐊᑭᓕᖅᓱᖅᑕᒥᓂᒃ ᐃᓄᓐᓄᑦ. ᒪᐃ 27, 2022−ᒥ, ᓄᓇᕗᑦ ᒐᕙᒪᒃᑯᖏᑦ ᑲᔪᓯᑎᓚᐅᖅᑕᖓ ᐱᖁᔭᒃᓴᖅ 55 – ᐱᖁᔭᖅ ᐋᖅᑭᒋᐊᕈᑦ ᓇᖕᒥᓂᖁᑕᐅᔪᓂᒃ ᖃᐅᔨᓴᓂᕐᒧᑦ ᐊᒻᒪ ᑖᒃᓯᓕᕆᓂᕐᒧᑦ ᐱᖁᔭᓄᑦ (PATA), ᑲᔪᓯᑎᑕᐅᓚᐅᖅᑐᖅ ᐊᒻᒪᓗ ᐊᖏᕈᑕᐅᓪᓗᓂ ᓯᑉᑎᒻᐱᕆ 2021 ᐃᓄᐃᑦ ᑲᑐᔾᔨᖃᑎᒌᑦ ᓈᖕᒪᒃᓴᑎᓐᓇᒋᑦ. ᐱᖁᔭᒃᓴᖅ 55, ᐊᓯᖏᓪᓗᑦᑕᐅᖅ, ᓄᒃᑎᕆᔾᔪᑎ ᓇᖕᒥᓂᖁᑕᐅᔪᓄᑦ ᑖᒃᓯᓂᒃ ᐊᑭᓕᖅᓱᐃᓂᕐᒥᒃ ᐅᔭᕋᓐᓂᐊᖅᑏᑦ ᑲᒻᐸᓃᑦ ᐱᖁᑎᖏᓐᓂᒃ ᑲᒻᐸᓂᒃᑯᓐᓂᒃ ᐃᓄᓐᓄᑦ, ᐱᖁᑏᑦ ᐃᓄᐃᑦ ᓄᓇᖁᑎᖏᓐᓃᑉᐸᑕ (IOL) ᐃᓄᐃᑦ ᑎᒍᒥᐊᖅᑕᖏᓐᓂ ᐅᔭᕋᓐᓂᐊᕋᑦᓴᓂᒃ ᑕᐃᔭᐅᔪᓂᒃ ᐊᒻᒪᓗ ᑐᓂᔭᐅᓐᓂᕋᓗᐊᖅᐸᑕ ᑐᓂᔭᐅᓐᓂᖏᒃᑲᓗᐊᖅᐸᑕᓘᓐᓃᑦ ᐃᓄᐃᑦ ᑲᑐᔾᔨᖃᑎᒌᑦ ᐃᓵᔪᓂᒃ ᑲᒻᐸᓂᒥᒃ. ᐃᓄᐃᑦ ᑲᑐᔾᔨᖃᑎᒌᑦ ᐊᑭᓕᑦᓴᓂᒍᓐᓇᖅᑐᑦ ᒥᓂᔭᓃᑦᑐᓂᒃ ᑮᓇᐅᔭᓂᒃ ᑖᒃᓯᓄᑦ ᐊᑭᓕᖅᓱᕆᐊᓕᓐᓂᒃ ᐅᔭᕋᓐᓂᐊᖅᑏᑦ ᑲᒻᐸᓂ ᐊᑭᓖᓐᓂᖏᑉᐸᑕ ᑲᑕᑦᑐᒥᓂᐅᑉᐸᑕᓘᓐᓃᑦ. ᐱᔾᔪᑕᐅᓪᓗᓂ ᐅᔭᕋᓐᓂᐊᖅᑏᑦ ᑲᒻᐸᓃᑦ ᓇᖕᒥᓂᖁᑎᖃᕐᒪᑕ ᐊᐅᓚᑦᓯᓪᓗᑎᓪᓗ ᐅᔭᕋᓐᓂᐊᖅᑏᑦ ᐱᖁᑎᖏᓐᓂᒃ ᐊᒻᒪᓗ ᐋᖅᑭᒋᐊᕈᑎᓂᒃ, ᑕᒪᓐᓇ ᓄᓇᕐᔪᐊᓕᒫᒥ ᐊᑐᖅᑕᐅᖃᑦᑕᖅᑐᖅ ᑲᓇᑕᒥ ᒐᕙᒪᒃᑯᑦ ᓄᐊᑦᓯᒍᑎᒋᓪᓗᓂᒋᑦ ᓇᖕᒥᓂᖁᑕᐅᔪᓂᒃ ᑖᒃᓯᔭᐃᑎᑦᓯᓂᒃᑯᑦ ᑐᕋᐃᓐᓇᖅᑐᒥᒃ ᐅᔭᕋᓐᓂᐊᖅᑎᓂᒃ ᑲᒻᐸᓂᓂᒃ. “ᓅᑎᕆᓂᖅ ᐅᔭᕋᖕᓂᐊᖅᑎᑦ ᑲᒻᐸᓃᑦ ᐱᖁᑎᖏᓐᓄᑦ ᑖᒃᓰᔭᕈᑎᑦ ᐊᑭᓕᕆᐊᓕᖏᓐᓂᒃ ᐃᓄᖕᓄᑦ ᓇᓗᓇᖅᐳᖅ ᐊᒻᒪ ᐅᑎᒐᒃᓴᐅᙱᖦᖢᓂ, ᓱᕋᐃᕗᖅ ᓄᓇᕗᒻᒥ ᐊᖏᕈᑎᒥᒃ. ᑭᖑᑉᐱᐊᕆᐊᕈᑎᕐᔪᐊᒻᒪᕆᐊᓗᒃ ᐊᖅᑯᑎᒃᑯᑦ ᐋᖅᑭᒋᐊᕈᑎᓄᑦ. ᒪᓕᒐᒃᓴᖅ 55 ᐃᓕᑕᖅᓯᖏᒻᒥᔪᖅ ᐃᓄᐃᑦ ᑎᒥᖁᑎᖏᓐᓂᒃ ᐊᒻᒪᓗ ᐃᓄᐃᑦ ᓄᓇᖁᑎᖏᓐᓂᒃ – "ᐊᓯᖏᓐᓂᒃ ᑭᒃᑯᑐᐃᓐᓇᕐᓄᑦ ᑎᒥᐅᔪᓂᒃ ᓄᓇᕗᒻᒥ ᐱᔭᕆᐊᖃᖅᑎᑕᐅᔪᖃᙱᑦᑐᖅ ᑐᐃᕈ ᓄᓇᖁᑎᒧᑦ ᑖᒃᓰᔭᐅᑎᓄᑦ ᐊᑭᓕᒐᒃᓴᓄᑦ ᓇᖕᒥᓂᕆᔭᕐᓄᑦ ᐅᔭᕋᖕᓂᐊᕐᕕᖕᓄᑦ ᑲᒻᐸᓂᐅᔪᓄᑦ",” ᐅᖃᖅᐳᖅ ᐊᖓᔪᖅᑳᖅ ᐊᓗᑭ ᑰᑎᖅ ᑐᙵᕕᒃᑯᓃᙶᖅᑐᖅ. ᐊᕐᕌᒎᖅᑲᐅᔫᓐᓂᒃ ᒪᕐᕉᓐᓂᒃ, ᐃᓄᐃᑦ ᑲᑐᔾᔨᖃᑎᒌᑦ ᓈᖕᒪᒃᓴᖃᑦᑕᖅᓯᒪᙱᓕᖅᑭᑦᑖᔪᑦ ᐃᓚᖏᓐᓂᒃ ᑎᑎᕋᖅᑕᐅᖃᑕᐅᔪᒪᔪᓂᒃ ᒪᓕᒐᒃᓴᓂ ᐱᖁᔭᒃᓴᒧᑦ 55. ᐊᕐᕌᒍᑕᒫᖅᓯᐅᒻᒥᒃ ᑲᑎᒪᑎᓪᓗᒋᑦ ᓅᕙᐃᒻᕙ 2021, ᑐᙵᕕᒃᑯᓐᓂ ᐃᓚᒋᔭᐅᔪᑦ ᑲᔪᓯᑎᑦᓯᓚᐅᖅᑐᑦ ᐱᖁᔨᕗᖔᕈᒻᒥᒃ ᑲᔪᓯᑎᑦᓯᖁᔨᓇᑎᒃ ᐱᖁᔭᒃᓴᖅ 55−ᒥ ᓴᙱᓂᖅᐹᒃᑯᑦ. ᑐᙵᕕᒃᑯᓐᓂ ᐃᓚᒋᔭᐅᔪᑦ ᑎᓕᓯᓚᐅᕐᒥᔪᑦ ᑐᙵᕕᒃᑯᓐᓂᒃ RIA−ᓂᓪᓗ ᐃᑯᓪᓚᑎᑦᓯᒍᑎᒃᓴᒥᒃ ᐋᖅᑭᑦᓱᖁᔨᓪᓗᑎᒃ ᐅᓗᕆᐊᓇᖅᑐᒦᙱᑲᓐᓂᕈᑎᒃᓴᒥᒃ ᓴᖅᑭᕋᔭᖅᑐᒥᒃ ᐱᖁᔭᒃᓴᖅ 55 ᐊᒻᒪᓗ ᐊᑦᑕᓇᐃᖅᓯᒪᒍᑎᒃᓴᖏᓐᓂᒃ ᐱᔪᒪᔭᖏᓐᓂᒃ ᐃᓄᐃᑦ. ᐃᓄᐃᑦ ᑲᑐᔾᔨᖃᑎᒌᑦ ᐊᓯᖅᑯᕝᕕᖃᔾᔮᒍᓐᓃᖅᑐᑦ ᑭᓯᐊᓂ ᑲᔪᓯᑎᑦᓯᓗᑎᒃ ᐅᑯᓂᖓ ᐋᖅᑭᒋᐊᖅᓯᒪᒍᑎᒃᓴᓂᒃ, ᐊᓯᖏᓐᓂᓗᑦᑕᐅᖅ:

• ᑮᓇᐅᔭᒃᑲᓂᕐᓂᒃ ᓇᓪᓕᐅᒃᑯᒫᖃᕐᓗᑎᒃ ᐊᑭᓕᖅᓱᖅᑕᐅᔪᓂᒃ ᐅᔭᕋᓐᓂᐊᖅᑎᓄᑦ ᑲᒻᐸᓂᓄᑦ;
• ᐊᖏᕈᑕᐅᒃᑲᓐᓂᕆᐊᓖᑦ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᐱᖁᑎᕐᔪᐊᓄᑦ ᐅᕝᕙᓘᓐᓃᑦ ᐋᖅᑭᒋᐊᕈᑎᓄᑦ ᓴᓇᔭᐅᒋᐊᓕᖕᓄᑦ IOL−ᓂ ᐃᓄᐃᑦ ᑎᒍᒥᐊᕐᕕᒋᔭᖏᓐᓂ ᐅᔭᕋᓐᓂᐊᕋᑦᓴᓄᑦ ᓇᓗᓇᐃᖅᓯᒪᔪᓄᑦ; ᐊᒻᒪᓗ
• ᐊᑐᖅᑕᐅᑲᓐᓂᕆᐊᓖᑦ ᐊᔪᕐᓇᖏᓐᓂᓕᒫᖓᒍᑦ ᐱᐅᓂᖅᐹᓂᒃ, ᐊᔭᕋᓐᓂᐊᕐᓂᕐᒧᑦ ᐱᐅᓯᒋᐊᕈᑕᐅᔪᑦ, ᐃᓪᓗᐃᑦ ᐊᒻᒪᓗ ᐱᖁᑎᕐᔪᐊᑦ ᓴᓇᔭᐅᒍᓐᓇᖏᓪᓗᑎᒃ IOL−ᓂ ᐃᓄᐃᑦ ᑎᒍᒥᐊᕐᕕᖏᓐᓂ ᐅᔭᕋᓐᓂᐊᕋᑦᓴᓄᑦ ᑕᐃᔭᐅᓯᒪᕕᖏᓐᓄᑦ.

ᓄᓇᕗᑦ ᒐᕙᒪᒃᑯᑦ ᐃᓱᒪᓕᐅᕈᑎᖃᖅᓯᒪᓕᖅᑐᖅ ᐱᖁᔭᒃᓴᖅ ᐊᑐᓕᖅᑎᑕᐅᖁᓪᓗᒍ, ᖃᐅᔨᒪᑎᑕᐅᒐᓗᐊᖅᖢᑎᒃ ᖃᔅᓯᑲᓪᓛᓗᖕᓂ ᒪᓕᒐᖅᑎᒍᑦ ᐊᒻᒪ ᐱᓪᓚᕆᐊᓗᖕᓂ ᐱᔾᔪᑕᐅᔪᓂᒃ ᐊᒃᑐᐊᓂᓕᖕᓂᒃ ᑖᒃᑯᓄᖓ ᐱᖁᔭᒃᓴᒧᑦ ᐃᓄᐃᑦ ᑲᑐᔾᔨᖃᑎᒌᓄᑦ ᓈᒻᒪᒋᔭᐅᙱᑦᑐᓂᒃ, ᐊᒻᒪᓗ ᐊᑭᑦᑐᐸᓪᓕᐊᑐᐃᓐᓇᕐᓂᖏᓐᓂᒃ ᐅᔭᕋᓐᓂᐊᖅᑏᑦ ᑲᒻᐸᓃᑦ ᐱᓕᕆᐊᖏᓐᓄᑦ ᓄᓇᕗᒻᒥ. ᐃᓄᐃᑦ ᑲᑐᔾᔨᖃᑎᒌᑦ ᒫᓐᓇ ᐊᓯᐊᒎᕐᕕᒃᓴᖃᕈᓐᓃᖅᑐᑦ ᓵᙵᑦᓯᓗᑎᒃ ᑭᓯᐊᓂᐅᓕᖅᑐᑦ ᑖᑦᓱᒥᖓ ᒪᓕᒐᑦᓴᒥᒃ ᐃᖅᑲᖅᑐᐃᕕᒃᑯᑦ. “ᑕᒪᓐᓇ ᐃᓱᒪᒋᔭᐅᑦᑎᐊᖅᓯᒪᙱᒻᒪᑦ ᒪᓕᒐᑦᓴᖅ,” ᐅᖃᖅᐳᖅ ᐊᖓᔪᖅᑳᑉ ᑐᒡᔨᐊ ᔭᐃᒥᓯ ᐃᑦᑐᓗᒃ. “ᑎᓕᐅᕆᓪᓚᕆᒃᐳᒍᑦ ᓄᓇᕗᑦ ᒐᕙᒪᒃᑯᖏᓐᓂᒃ ᐃᓱᒪᒃᓴᕐᓯᐅᕈᑎᖃᒃᑲᓐᓂᖁᓪᓗᒋᑦ ᑕᒪᑐᒥᖓ, ᐋᖅᑭᒋᐊᖅᓯᓗᑎᒡᓗ ᐱᖁᔭᒃᓴᒥᒃ ᐋᖅᑭᒋᐊᖅᑕᐅᒋᐊᓕᖕᓂᒃ.”

-30-

ᑐᑭᓯᒋᐊᒃᑲᓂᕐᕕᒃᓴᖅ: ᓵᓐ ᐅᐊᑦ`ᔅHᐊᓐ ᑐᓴᐅᒪᔾᔪᑎᓕᕆᔨᒃᑯᑦ ᑐᑭᒧᐊᒃᑎᑦᑎᔨᖓᓄᑦ ᐃᑲᔪᖅᑎ ᓄᓇᕗᑦ ᑐᙵᕕᒃ ᑎᒥᖓ ᐅᖄᓚᐅᑖ: (867) 975-4900/ᐊᑭᖃᙱᑦᑐᖅ: 1-888-646-0006 SWatchorn@tunngavik.com www.tunngavik.com  

📄 2022 08 11 PATA Bill 25 NR inuk