Government of Nunavut, Nunavut Tunngavik Inc., call on Nunavummiut to help reduce poverty
ᐃᖃᓗᐃᑦ, ᓄᓇᕗᑦ (ᐋᒃᑐᐸ 18, 2010) – ᐄᕙ ᐋᕆᐊᒃ, ᓄᓇᕗᒻᒥ ᓯᕗᓕᖅᑎ, ᔭᐃᒥᓯ ᐃᑦᑐᓗᒃ, ᐊᖏᔪᖅᑳᖑᑲᐃᓐᓇᖅᑐᖅ, ᓄᓇᕗᑦ ᑐᙵᕕᒃᑯᓐᓄᑦ, ᐅᓪᓗᒥ ᓇᓗᓇᐃᖅᓯᖅᑲᐅᔫᒃ ᑲᑐᔾᔨᖃᑎᒌᓪᓗᑎᒃ ᐊᑦᓱᕉᑎᖃᕐᓂᐊᕐᖓᑕ ᐊᔪᖅᓴᓗᐊᖃᑦᑕᕐᓂᖅ ᐱᔪᓐᓃᕐᔫᒥᑎᑕᐅᒐᓱᐊᖁᓪᓗᒍ ᓄᓇᕗᒻᒥ. ᐃᓇᑦᓯᔫᒃ ᓄᓇᕗᒻᒥᐅᓕᒫᓂᒃ ᐃᓚᐅᖃᑕᐅᖁᔨᓪᓗᑎᒃ.
“ᐊᔪᖅᓴᓗᐊᖃᑦᑕᕐᓂᕐᒥᒃ ᐱᔪᓐᓃᕐᔫᒥᑎᑦᓯᒐᓱᐊᕐᓂᖅ ᓯᕗᓪᓕᐅᔾᔨᒍᒪᓯᒪᖓᑦ ᒐᕙᒪᒋᔭᑦᑕ,” ᐅᖃᖅᓯᒪᔪᖅ ᓯᕗᓕᖅᑎ ᐋᕆᐊᒃ. “ᐊᔪᖅᓴᓗᐊᖃᑦᑕᕐᓂᖅ ᐊᑦᑐᐃᓂᖃᖅᐸᒻᒪᑦ ᐃᓘᓐᓇᑎᓐᓂᒃ, ᐊᑕᖏᕐᓗᑕᓗ ᐊᑦᓱᕉᑎᒋᒋᐊᖃᕐᓂᐊᖅᑕᕗᑦ. ᑲᑐᔾᔨᓗᑕ ᓇᓗᓇᐃᖅᓯᓯᒪᓂᐊᖅᑐᒍᑦ ᓄᓇᕗᒻᒥ ᐊᐅᓚᑕᐅᔪᓐᓇᖅᑐᓂᒃ ᐸᕐᓇᐅᑎᑕᖃᖁᓪᓗᒍ ᐱᔪᓐᓃᕐᔫᒥᑎᑕᐅᒐᓱᐊᖁᓪᓗᒍ ᐊᔪᖅᓴᓗᐊᖃᑦᑕᕐᓂᖅ ᐊᕐᕌᒎᓂᐊᖅᑑᓐᓂᒃ ᒪᕐᕉᓐᓂᒃ, ᐱᑕᖃᕈᓐᓃᑦᓯᐊᒻᒪᕆᖁᓪᓗᒍᓗ ᐊᔪᖅᓴᓗᐊᖃᑦᑕᕐᓂᖅ ᓯᕗᓂᑦᓴᑎᓐᓂ.”
ᔭᐃᒥᓯ ᐃᑦᑐᓗᒃ ᓇᓗᓇᐃᖅᓯᓚᐅᖅᑐᖅ ᓄᓇᕗᑦ ᑐᙵᕕᒃᑯᑦ ᐱᓕᕆᖃᑕᐅᒍᒪᓂᕋᖅᑐᒋᑦ ᒐᕙᒪᒃᑯᓐᓄᑦ ᐊᔪᖅᓴᓗᐊᕈᓐᓃᖅᑕᐃᓕᒪᓂᕐᒧᑦ ᐱᓕᕆᐊᖅ ᐅᖃᐅᓯᐅᓚᐅᖅᑎᓪᓗᒍ ᒫᑦᓯᒥ ᑕᕝᕙᓂ ᐊᕐᕌᒍᒥ. “ᓄᓇᕗᑦ ᑐᙵᕕᒃᑯᑦ ᑭᐅᑦᓴᐅᑎᒋᓚᐅᖅᑐᑦ ᐱᓕᕆᖃᑎᖃᕈᒪᓂᕋᖅᑐᑎᒃ ᒐᕙᒪᒃᑯᓐᓂᒃ ᐊᓯᖏᓐᓂᓪᓗ ᑲᑐᔾᔨᖃᑕᐅᓂᐊᖅᑐᓂᒃ ᐋᖅᑭᑦᓱᐃᕙᓪᓕᐊᓗᑎᒃ ᐊᑐᓕᖅᑎᑦᓯᕙᓪᓕᐊᓗᑎᓪᓗ ᐊᔪᖅᓴᓗᐊᕈᓐᓃᖅᑕᐃᓕᒪᓂᕐᒧᑦ ᖃᓄᖅᑑᕈᑎᓕᐅᕐᓂᕐᒧᑦ ᓄᓇᕗᒻᒧᑦ,” ᐅᖃᖅᓯᒪᔪᖅ.
ᐊᔪᖅᓴᓗᐊᕈᓐᓃᖅᑕᐃᓕᒪᓂᕐᒧᑦ ᖃᓄᖅᑑᕈᑎ ᐱᔭᕇᖅᑕᐅᕕᑦᓴᓕᒃ 2011 ᓄᙳᐊᓂ. ᐋᖅᑭᑦᓱᖅᑕᐅᓛᖅᑐᖅ ᐱᖓᓲᓕᖓᓗᓂ: ᓄᓇᓕᓕᒫᓂ ᐅᖃᖃᑎᖃᓚᐅᕐᓗᑎᒃ; ᐊᕕᑦᑐᖅᓯᒪᓂᐅᔪᓂ ᑲᑎᒪᑎᑦᓯᖃᑦᑕᕐᓗᑎᒃ; ᐊᒻᒪ, ᑭᖑᓪᓕᖅᐹᒥ ᐊᔪᖅᓴᐅᓗᐊᖃᑦᑕᓂᕐᒧᑦ ᑲᑎᒪᕐᔪᐊᖅᑎᑦᓯᓗᑎᒃ ᐃᖃᓗᓐᓂ. ᓴᖅᑭᖅᑕᐅᔪᑦ ᐋᖅᑭᑦᓱᐃᒍᑎᐅᓂᐊᖅᑐᑦ ᐊᑐᓕᖅᑎᑦᓯᕙᓪᓕᐊᒍᑎᐅᓗᑎᓪᓗ ᐊᔪᖅᓴᓗᐊᕈᓐᓃᖅᑕᐃᓕᑎᑦᓯᓂᕐᒧᑦ ᖃᓄᖅᑑᕈᑎᒥᒃ ᓄᓇᕗᒻᒥ.
ᐱᓕᕆᐊᖑᓂᐊᖅᑐᑦ ᐃᑲᔪᖅᓱᖅᑕᐅᓂᐊᖅᑐᑦ ᓯᕗᓕᖅᑎᖃᕐᓗᑎᒃ ᑭᒡᒐᖅᑐᐃᔪᓂᒃ ᒐᕙᒪᒃᑯᓐᓂᒃ, ᐃᓄᐃᑦ ᑲᑐᔾᔨᖃᑎᒌᖏᓐᓂᒃ, ᑮᓇᐅᔭᓕᐅᕋᓱᐊᖅᑎᐅᙱᑦᑐᑦ ᑎᒥᖁᑎᖏᓐᓂᒃ ᓇᒻᒥᓂᖃᖅᑎᐅᔪᓂᓪᓗ. ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ ᒥᓂᔅᑕᖓᑦ ᐲᑕ ᑕᑉᑑᓇ ᑭᒡᒐᖅᑐᐃᓂᐊᖅᑐᖅ ᓄᓇᕗᑦ ᒐᕙᒪᒃᑯᖏᓐᓂᒃ.
“ᐅᑭᐅᖑᓂᐊᖅᑐᒥ ᑐᓴᖃᑦᑕᕈᒪᓂᐊᖅᑐᒍᑦ ᓄᓇᕗᒻᒥᐅᓕᒫᓂᒃ ᐊᔪᖅᓴᓗᐊᖃᑦᑕᕐᓂᐅᑉ ᒥᑦᓵᓄᑦ ᓄᓇᓕᓐᓂ,” ᐅᖃᖅᓯᒪᔪᖅ ᑕᑉᑑᓇ. “ᐊᔪᖅᓴᓗᐊᑦᑕᐃᓕᒪᓂᕐᒧᑦ ᐸᕐᓇᐅᑎ ᑲᔪᓯᑦᓯᐊᕈᑕᐅᓂᐊᖅᑐᖅ ᐃᓚᐅᖃᑕᐅᓕᖅᑲᑕ ᑭᒃᑯᓕᒫᑦ: ᐃᓅᖃᑎᒌᑦ, ᑮᓇᐅᔭᓕᐅᕋᓱᐊᖅᑎᐅᙱᑦᑐᑦ ᑎᒥᐅᔪᑦ, ᓇᒻᒥᓂᖃᖅᑎᐅᔪᑦ, ᐃᓄᐃᑦ ᑲᑐᔾᔨᖃᑎᒌᖏᑦ ᒐᕙᒪᓕᒫᓪᓗ.”
ᓯᕗᓕᖅᑎ ᐋᕆᐊᒃ ᐊᒻᒪᓗ ᐊᖏᔪᖅᑳᖑᑲᐃᓐᓇᖅᑐᑦ ᐃᑦᑐᓗᒃ ᑎᑎᕋᖅᓯᒪᔫᒃ ᐊᑐᓂᑦ ᓄᓇᓕᓐᓂ ᒐᕙᒪᓄᑦ ᐃᓇᑦᑐᒋᑦ ᐱᕕᖃᖅᑎᑦᓯᖃᑦᑕᖁᓪᓗᒋᑦ ᓄᓇᖅᑲᑎᒥᓂᒃ ᐅᖃᐅᓯᖃᕈᓐᓇᕐᓗᑎᒃ ᐃᓱᒪᒋᔭᒥᓂᒃ ᐊᔪᖅᓴᓗᐊᖃᑦᑕᕐᓂᐅᑉ ᒥᑦᓵᓄᑦ. ᑲᑎᒪᑎᑕᐅᖃᑦᑕᓂᐊᖅᑐᑦ ᓄᓇᓕᓕᒫᓂ ᑕᖅᑭᐅᓂᐊᖅᑐᓂ ᓯᑕᒪᓂ ᐅᖃᐅᓯᑦᓴᕆᔭᐅᔪᓕᒫᑦ ᑐᓴᖅᑕᐅᒍᓐᓇᖅᓯᖁᓪᓗᒋᑦ.
“ᓄᓇᓖᑦ ᓯᕗᒃᑲᑕᖅᑎᐅᖁᒐᑦᑎᒍ ᑕᒪᑐᒧᖓ ᐱᓕᕆᐊᑦᑎᓐᓄᑦ,” ᐅᖃᖅᓯᒪᔪᖅ ᒥᓂᔅᑕ ᑕᑉᑑᓇ. “ᒐᕙᒪᒃᑯᑦ ᓄᓇᕗᑦ ᑐᙵᕕᒃᑯᓪᓗ ᐃᑲᔪᖅᓱᐃᓂᐊᖅᑐᑦ ᐅᖃᐅᓯᐅᕙᓪᓕᐊᒍᓐᓇᖁᓪᓗᒍ ᐊᔪᖅᓴᓗᐊᖃᑦᑕᕐᓂᖅ ᓄᓇᕗᒻᒥ ᓄᓇᓕᓕᒫᓂ. ᑭᒃᑯᓕᒫᑦ ᐃᓚᐅᖃᑕᐅᒋᐊᓖᑦ ᐅᐸᓕᖓᐃᔭᐃᑎᓪᓗᑕ ᖃᓄᖅᑑᕈᑎᒥᒃ.”
- 30 -
ᑐᑭᓯᒋᐊᒃᑲᓐᓂᕈᒪᒍᕕᑦ, ᖃᐅᔨᒋᐊᕐᕕᒋᒍᓐᓇᖅᑕᐃᑦ: ᕗᕌᓐᑯ ᐳᓯᐊᒥ ᑐᑭᒧᐊᒃᑎᑦᑎᔨ ᑐᓴᐅᒪᖃᑦᑕᐅᑎᓕᕆᔨᒃᑯᓐᓂ ᓄᓇᕗᑦ ᑐᙵᕕᒃ ᑎᒥᖓᑦ ᐅᖃᓘᑖ: (867) 975-4939 ᐊᑭᖃᖏᑦᑐᖅ: 1-888-646-0006 ᐄᒪᓕ ᕗᑦᔅ ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ ᓯᕗᓕᖅᑎᐅᑉ ᐊᓪᓚᕝᕕᖓᓂ (867) 975-5059 ewoods@gov.nu.ca