(ᐄᑉᕈ 25, 2022, ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓ (ᑐᙵᕕᒃᑯᑦ) ᖃᐅᔨᒃᑲᐃᔪᑦ ᖁᕕᐊᒋᔭᖃᙱᓂᕐᒥᓂᒃ ᓄᓇᕗᑦ ᒐᕙᒪᒃᑯᑦ (GN) ᐊᑐᓕᖁᔭᖓᓂᒃ ᓴᒃᑯᑕᐅᖁᓪᓗᒍ ᑐᙵᕕᒃᑯᑦ ᐃᖅᑲᖅᑐᐃᕕᒃᑰᑎᑦᓯᓂᖓᓂᒃ ᓄᑕᖅᑲᑦ ᒪᒃᑯᑦᑐᓪᓗ ᐊᔾᔨᐅᑎᑕᐅᒋᐊᖃᕐᓂᖏᓐᓄᑦ (ᑖᓐᓇ “ᐃᖅᑲᖅᑐᐃᕕᒃᑰᑎᑦᓯᒍᑎ”) ᒪᓕᓪᓗᒋᑦ s.15 ᑲᓇᑕᒥ ᒪᓕᒐᕐᔪᐊᖅ ᐱᔪᓐᓇᐅᑎᓄᑦ ᐃᓱᒪᖅᓱᕈᓐᓇᓂᕐᒧᓪᓗ (ᑖᓐᓇ “ᒪᓕᒐᕐᔪᐊᖅ”). ᐆᑦᑑᑉᐱᕆ 13, 2021-ᒥ, ᑐᙵᕕᒃᑯᑦ, ᐃᓚᖃᖅᑐᑎᒃ ᐃᓄᖕᓂᒃ ᐸᓯᔭᒃᓴᖑᖅᑎᑦᓯᓂᕐᒧᑦ ᑭᒡᒐᖅᑐᐃᔪᓂᒃ ᕿᑐᕐᖓᓕᓐᓂᒃ ᐃᓄᓐᓂᒃ ᐃᓕᓐᓂᐊᖅᑎᓂᒃ, ᑐᓂᓯᓚᐅᖅᑐᑦ ᐃᖅᑲᑐᖅᑕᐅᑎᑦᓯᓂᕐᒧᑦ ᓇᓗᓇᐃᕈᑎᓂᒃ ᑲᔪᓯᑎᑦᓯᑉᐸᑕ ᐋᖅᑭᒋᐊᕈᑎᓂᒃ ᐃᓕᓐᓂᐊᕐᓂᓕᕆᓂᕐᒧᑦ ᐱᖁᔭᒥᒃ ᐊᒻᒪᓗ ᐃᓄᐃᑦ ᐅᖃᐅᓯᖓᑕ ᓴᐳᒻᒥᔭᐅᓂᖓᓄᑦ ᐱᖁᔭᒥᒃ, ᓄᓇᕗᑦ ᒐᕙᒪᒃᑯᑦ ᐊᐅᓚᑦᓯᒍᑎᒥᒍᑦ ᐱᕋᔭᐃᓯᒪᔪᑦ ᒪᓕᒐᖅᑎᒍᑦ ᓄᓇᕗᒻᒥ ᐃᓄᓐᓂᒃ ᑲᔪᓯᑎᑦᓯᓯᒪᙱᓐᓂᖏᓐᓄᑦ ᐃᓕᓐᓂᐊᑎᑦᓯᓂᕐᒥᒃ ᐃᓄᒃᑐᑦ ᐅᖃᐅᓯᕐᒥᒃ ᐃᓕᖅᑯᓯᕐᒥᓪᓗ, ᐊᒻᒪᓗ ᑕᐃᒪᐃᒻᒪᑦ ᓯᖁᒥᑦᓯᔪᑦ ᑐᙵᕕᔾᔪᐊᒃᑯᑦ−ᓴᐳᔾᔭᐅᓯᒪᔪᓂᒃ ᐊᔾᔨᒌᑎᑕᐅᓂᕐᒧᑦ ᐱᔪᓐᓇᐅᑎᓂᒃ ᓇᓗᓇᐃᖅᑕᐅᓯᒪᔪᓂᒃ ᒪᓕᒐᕐᔪᐊᒥ. ᐄᑉᕈ 4, 2022-ᒥ, ᓄᓇᕗᑦ ᒐᕙᒪᒃᑯᑦ ᑐᓂᓯᓚᐅᖅᑐᑦ ᐊᐅᓚᔾᔭᐃᒍᑎᒥᓂᒃ ᓄᖅᑲᑎᑦᓯᓂᕐᒧᑦ (ᑖᓐᓇ “ᐊᐅᓚᔾᔭᐃᒍᑎ”) ᑐᙵᕕᒃᑯᑦ ᐃᖅᑲᑐᖅᑕᐅᑎᑦᓯᓂᖓᓂᒃ ᓄᓇᕗᑦ ᐃᖅᑲᖅᑐᐃᕕᖓᓂ (ᑖᓐᓇ “ᐃᖅᑲᖅᑐᐃᕕᒃ”) ᐊᒻᒪᓗ ᑕᒪᐅᓈᖅᑎᓪᓗᒋᑦ, ᓄᓇᕗᑦ ᒐᕙᒪᒃᑯᑦ ᐊᐱᕆᔪᑦ ᐃᖅᑲᖅᑐᐃᕕᒃ ᓴᑦᑯᐃᖁᓪᓗᒍ ᐃᓘᓐᓈᓂᒃ ᐃᖅᑲᖅᑐᐃᕕᒃᑰᑎᑦᓯᒍᑕᐅᔪᒥᒃ ᓈᓚᒃᑕᐅᒍᓐᓇᖅᓯᓯᒪᑎᓐᓇᒍ ᐊᑕᖏᕐᓗᓂ ᐃᖅᑲᖅᑐᐃᕕᒃᑰᑎᑦᓯᒍᑕᐅᔾᔪᑎᖏᑦ. ᐊᐅᓚᔾᔭᐃᒍᑎᒥᒍᑦ, ᓄᓇᕗᑦ ᒐᕙᒪᒃᑯᑦ ᐊᐃᕙᔾᔪᑎᖓ ᐃᓄᐃᑦ ᐱᔪᓐᓇᐅᑎᖃᙱᓯᐊᕐᓂᖏᓐᓂᒃ ᐃᓄᒃᑐᑦ ᐃᓕᓐᓂᐊᓂᕐᒥᒃ, ᐊᒻᒪᓗ ᑐᒥᕕᔾᔪᐊᒃᑯᑦ ᐱᔪᓐᓇᐅᑎᑐᐊᑦ ᐅᖃᐅᓯᕐᒧᑦ ᑲᓇᑕᒥ ᐊᒃᑐᐊᔪᑦ ᐃᓅᓴᓐᓂᖅᓴᑦ ᐱᔪᓐᓇᐅᑎᖏᑦ ᖃᓪᓗᓈᑎᑐᑦ ᐅᐃᕖᑎᑐᓪᓗ, ᐃᓄᖃᕋᓗᐊᖅᑎᓪᓗᒍ ᐃᓄᓐᓂᒃ 85% ᑲᑎᓪᓗᒋᑦ ᐃᓄᒋᐊᒃᑎᒋᓂᖏᓐᓂ ᐊᒻᒪᓗ 94% ᐃᓕᓐᓂᐊᖅᑎᐅᓪᓗᑎᒃ ᓄᓇᕗᒻᒥ. ᐊᐅᓚᑦᓯᕕᒋᔭᐅᔪᓕᒫᑦ ᑲᓇᑕᒥ, ᐃᓕᓐᓂᐊᖅᑏᑦ ᕿᑐᕐᖓᓖᓪᓗ ᓵᙵᑦᓯᒋᐊᑐᖃᑦᑕᖏᑦᑐᑦ ᐊᐃᕙᔾᔪᑎᖃᕐᓗᑎᒃ ᒐᕙᒪᓕᕆᔨᐅᔪᑦ ᐱᔪᓐᓇᐅᑎᖏᓐᓂᒃ ᐃᓄᖁᑎᒥᓄᑦ. “ᑐᙵᕕᒃᑯᑦ ᐊᔭᐅᖅᑐᐃᖏᓐᓇᖅᓯᒪᔪᑦ ᓄᓇᕗᑦ ᒐᕙᒪᒃᑯᖏᓐᓂᒃ ᓴᕐᖓᑎᑦᓯᒋᐊᖁᓪᓗᒋᑦ ᐃᓄᒃᑐᑦ ᒐᕙᒪᒃᑯᑦ ᐃᓕᓐᓂᐊᕐᕕᖁᑎᖏᓐᓂ. ᑭᓯᐊᓂᓕ, ᓄᓇᕗᑦ ᒐᕙᒪᒃᑯᑦ ᑐᓴᖅᑎᑦᓯᒍᑎᖓ ᑐᑭᓯᓇᑦᓯᐊᖅᑐᖅ − ᐃᓄᒃᑐᑦ ᓱᕙᓕᑭᐊᖅ ᓇᓕᒧᒌᒥᒃ ᐃᓂᒋᔭᐅᔪᓂ ᒐᕙᒪᒃᑯᑦ ᐃᓕᓐᓂᐊᓂᕐᒧᑦ ᐊᐅᓚᔾᔪᑎᖏᓐᓂ, ᐊᒻᒪᓗ ᐃᓄᐃᑦ ᐊᖏᕆᐊᓂᖓ ᑖᓐᓇ ᐊᔾᔨᐅᖏᑎᑦᓯᓂᖅ,” ᐅᖃᖅᑐᖅ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ. ᓄᓇᕗᑦ ᒐᕙᒪᒃᑯᑦ ᐅᖃᖅᓯᒪᒻᒥᔪᑦ ᒐᕙᒪᒃᑯᑦ “ᐃᓱᒪᖅᓲᑎᖃᕈᓐᓇᖅᑐᑦ” ᐊᐅᓚᑦᓯᓂᕐᒥᒃ ᑲᔪᓯᑎᑦᓯᓂᕐᒥᒃ ᒪᓕᒐᙳᖅᑎᑕᐅᕙᓪᓕᐊᔪᓂᒃ ᐃᓱᒪᖅᓲᑎᖃᕐᓗᑎᒃ, ᐊᓪᓛᑦ ᓴᖅᑭᕈᑕᐅᒐᓗᐊᖅᐸᑦ ᐊᔾᔨᐅᙱᑎᑕᐅᓂᕐᒧᑦ ᐱᕋᔮᖑᓂᖏᓐᓂᒃ ᐃᓄᐃᑦ, ᐊᒻᒪᓗ ᐃᓱᒪᖅᓲᑎᖃᕐᓗᑎᒃ ᖃᓄᐃᑦᑐᒥᒃ ᐃᓕᓐᓂᐊᑎᑦᓯᓂᐊᕐᒪᖔᕐᒥᒃ ᐊᒻᒪᓗ ᓇᓕᐊᓐᓂᒃ ᐅᖃᐅᓯᕐᒥᒃ ᐃᓄᐃᑦ ᓄᑕᖅᑲᑦ ᐃᓕᓴᔭᐅᓂᐊᕐᒪᖔᑕ, ᐅᕗᖓᑦᓯᐊᖅ ᑕᑯᓐᓇᕐᓂᖏᓐᓄᑦ ᐃᓄᐃᑦ ᐊᐃᕙᔨᖏᓐᓄᑦ ᓴᒃᑯᑕᐅᓚᐅᖅᑐᖅ ᐊᐅᓚᑦᓯᔪᓐᓇᕐᓂᖅ ᐅᖃᐅᓯᕐᒥᒃ ᐃᓕᓴᐃᔾᔪᑕᐅᓂᐊᖅᑐᒥᒃ ᓄᓇᕗᑦ ᒐᕙᒪᒃᑯᖏᓐᓄᑦ. “ᓄᓇᕗᒻᒥ ᐃᓄᐃᑦ ᖁᑦᓯᑐᒻᒪᕆᒻᒥᒃ ᓂᕆᐅᖕᓂᖃᓚᐅᖅᑐᑦ ᐊᒻᒪᓗ ᓂᕆᐅᒋᔭᖃᖅᑐᑎᒃ ᓄᓇᕗᑦ ᒐᕙᒪᒃᑯᑦ, ᓴᖅᑭᖅᑕᐅᓯᒪᔪᑦ ᓄᓇᕗᑦ ᐊᖏᕈᑎᖏᑎᒍᑦ, ᑲᔪᓯᑎᑦᓯᓇᔭᕆᐊᖏᑦ ᐃᓄᐃᑦ ᓂᕆᐅᒋᔭᖏᓐᓂᒃ ᒐᕙᒪᒃᑯᑎᒍᑦ ᐃᓕᓐᓂᐊᕈᑕᐅᔪᓄᑦ ᐊᐅᓚᑕᐅᔪᓂᒃ ᑎᒍᒥᐊᑦᓯᐊᖅᑐᒥᒃ ᐱᖕᒪᕆᐅᑎᑦᓯᔪᒥᓪᓗ ᐃᓄᐃᑦ ᐅᖃᐅᓯᖓᓂᒃ. ᓄᓇᕗᑦ ᒐᕙᒪᒃᑯᑦ ᐊᐅᓚᔾᔭᐃᒍᑎᖓ ᑐᓴᖅᑎᑦᓯᔪᖅ ᑕᒻᒪᖅᑐᒥᒃ ᑐᓴᖅᑎᑦᓯᒍᑎᒥᒃ ᐃᓄᐃᑦ ᐊᐱᕆᒍᓐᓇᖏᓐᓂᖏᓐᓂᒃ ᐊᔾᔨᐅᑎᑕᐅᒍᒪᓂᕐᒥᒃ ᐃᓕᓐᓂᐊᕈᑎᒋᓂᐊᖅᑕᖏᓐᓂᒃ, ᐊᒻᒪᓗ ᐃᓄᐃᑦ ᐊᖏᑐᐃᓐᓇᕆᐊᓖᑦ ᐋᖅᑭᑦᓯᒪᔭᐅᔪᒥᒃ ᓴᖅᑭᕈᑕᐅᓂᐊᖅᑐᒥᒃ ᐅᑎᖅᑎᒐᑦᓴᐅᒍᓐᓃᕐᓗᓂ ᐅᖃᐅᓯᕐᒥᒃ ᔭᒐᐃᓂᕐᒥᒃ.” ᐅᖃᖅᑐᖅ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ.

-30-

ᑐᑭᓯᒋᐊᒃᑲᓂᕐᕕᒃᓴᖅ: ᒪᓚᐃᔭ ᒥᑭᔾᔪᒃ ᑐᑭᒧᐊᒃᑎᑦᑎᔨᐅᓂᕐᒥᒃ ᑐᓴᐅᒪᔾᔪᑎᓕᕆᔨᒃᑯᓐᓂ ᐃᓕᓐᓂᐊᖅᑐᖅ ᓄᓇᕗᑦ ᑐᙵᕕᒃ ᑎᒥᖓ ᐅᖄᓚᐅᑖ: (867) 975-4900/ᐊᑭᖃᙱᑦᑐᖅ: 1-888-646-0006 mmikijuk@tunngavik.com www.tunngavik.com

ᑲᒪᒋᔭᐅᓯᒪᓂᖓ: ᐃᓄᐃᑦ ᐅᖃᐅᓯᖓ ᐊᒻᒪᓗ ᐊᔾᔨᐅᑎᑕᐅᓂᕐᒧᑦ ᐱᔪᓐᓇᐅᑎᖏᑦ

• ᐱᙳᖅᑎᑕᐅᓚᐅᖅᓯᒪᒻᒪᓂᒃ ᓄᓇᕗᑦ 1999, ᓄᓇᕗᑦ ᑐᙵᕕᒃ ᑎᒥᖓᓂ ᐃᓚᒋᔭᐅᔪᑦ ᑲᔪᓯᑎᑦᓯᖃᑦᑕᖅᓯᒪᔪᑦ ᐊᒥᓱᐃᖅᓱᑎᒃ ᐊᕐᕌᒍᑕᒫᖅᓯᐅᒻᒥᒃ ᑲᑎᒪᓂᕐᒥᓂᒃ ᐱᖁᔨᕗᖔᕈᑎᒃᑯᑦ 1999, 2000, 2003, 2004, 2005, 2006, 2007, 2013, 2016, 2017, 2018 ᐊᒻᒪᓗ 2019, ᐅᖃᐅᔾᔨᓕᖅᑭᑦᑖᖃᑦᑕᖅᓯᒪᓪᓗᑎᒃ ᓄᓇᕗᑦ ᒐᕙᒪᒃᑯᖏᓐᓂᒃ ᐃᒪᐃᓕᐅᖁᓪᓗᒋᑦ;

-ᐃᓄᒃᑐᑦ ᐃᓕᓴᐃᔾᔪᑕᐅᓗᓂ ᐃᓕᓐᓂᐊᕆᐊᓕᕋᑖᓂᒃ ᐃᓕᓐᓂᐊᕐᓂᓕᓐᓄᑦ 12, -ᓇᓗᓇᐃᖅᓯᒪᓗᓂ ᐃᓕᓐᓂᐊᓂᕐᒧᑦ ᐊᐅᓚᓂᐅᔪᖅ ᐊᖏᖅᑕᐅᓯᒪᓗᓂ ᐃᓄᓐᓄᑦ ᕿᑐᕐᖓᓕᓐᓄᑦ ᐊᐅᓚᑕᐅᓗᓂ ᐃᓕᓐᓂᐊᕈᑕᐅᔪᓂ -ᓇᓗᓇᐃᖅᓯᒪᓗᓂ ᐃᓕᓐᓂᐊᕈᑎᑦᓴᓅᖅᑕᐅᓯᒪᓗᑎᒃ ᐃᓄᐃᑦ ᐅᖃᐅᓯᖓ ᐃᓕᖅᑯᓯᖓᓗ, - ᓇᓗᓇᐃᖅᓯᒪᓗᓂ ᐃᓄᐃᑦ ᐃᓕᓴᐃᔩᑦ ᐃᑲᔪᖅᑕᐅᓯᒪᑦᓯᐊᕐᓂᕋᓗᐊᕐᒪᖔᑕ ᐃᓕᓴᐃᔨᒃᓴᓄᑦ ᐃᓕᓐᓂᐊᓂᕐᒥᒃ, ᐱᓕᖕᒪᓴᕐᓂᕐᒥᒃ, ᐃᖅᑲᓇᐃᔭᖅᑎᑖᕐᓂᕐᒥᒃ, ᐊᒻᒪᓗ ᐃᖅᑲᓇᐃᔭᐃᓐᓇᕈᑎᒃᓴᖏᓐᓂᒃ

• ᐃᓱᒫᓘᑎᓪᓗᐊᑕᑦ ᓴᖅᑭᖅᑕᐅᓚᐅᖅᑐᑦ ᑭᖑᓪᓕᖅᐹᒥ ᑭᒃᑯᑐᐃᓐᓇᕐᓂᒃ ᑐᓴᕆᐊᕐᓂᕐᒥᒃ 2018 ᓄᓇᕗᓕᒫᒥ ᓄᓇᓕᖕᓄᑦ ᐳᓚᕋᕐᓂᐅᓚᐅᖅᑐᓂ;

-ᐃᓄᓐᓂᒃ ᐃᓕᓴᐃᔨᑭᑦᓴᕐᓂᖅ, ᐊᒻᒪᓗ ᐃᑲᔪᖅᑕᐅᑦᓯᐊᙱᓗᐊᕐᓂᖏᑦ ᐃᓄᐃᑦ ᐃᓕᓴᐃᔨᑦᓴᐃᑦ ᐃᓕᓐᓂᐊᕐᓂᖏᓐᓂ, ᐱᓕᖕᒪᒃᓴᐅᑎᓂ, ᐃᖅᑲᓇᐃᔭᕐᕕᖕᓂ ᐃᓕᓐᓂᐊᖅᑎᑕᐅᔪᓂ, ᐃᖅᑲᓇᐃᔭᖅᑎᑖᕐᓂᕐᒥᒃ ᐊᒻᒪᓗ ᐃᖅᑲᓇᐃᔭᐃᓐᓇᕈᑎᒃᓴᓂᒃ, -ᐱᑕᖃᙱᓗᐊᕐᓂᖓ ᐃᓄᒃᑐᑦ ᐃᓕᓐᓂᐊᕈᑎᒃᓴᓂᒃ, ᐊᑐᕋᑦᓴᓂᒃ ᐊᒻᒪᓗ ᐃᑲᔫᑎᒃᓴᓂᒃ ᐃᓄᓐᓄᑦ ᐃᓕᓴᐃᔨᓄᑦ, ᐊᒻᒪᓗ ᐋᖅᑭᑦᓱᐃᔪᓐᓇᖏᓐᓂᖅ ᐱᐅᔪᓂᒃ ᐃᓕᓐᓂᐊᕈᑎᓂᒃ ᐃᓄᐃᑦ ᐅᖃᐅᓯᖓᒍᑦ ᐃᓕᖅᑯᓯᖓᒍᓪᓗ, ᐃᓚᒋᔭᐅᓗᑎᒃ ᐅᖃᐅᓯᖃᖃᑎᒌᙱᓐᓂᕐᓂ ᐊᑐᖅᑕᐅᔪᒪᔪᓂᒃ, -ᐊᐳᖅᑕᕐᕖᑦ ᐃᓚᓕᐅᔾᔭᐅᓯᒪᖁᓪᓗᒋᑦ ᐃᓄᐃᑦ ᐃᓐᓇᐃᑦ ᐃᓕᓴᐃᔨᐅᓗᑎᒃ, -ᐊᔪᖅᑎᑕᐅᔪᑦ ᕿᑐᕐᖓᓖᑦ ᐊᒻᒪᓗ ᓄᓇᓖᑦ ᐃᓄᖏᑦ ᐊᐅᓚᑦᓯᓂᕐᒥᒃ ᐱᔪᓐᓇᐅᑎᖃᕐᓂᕐᒥᓪᓗ ᐃᓕᓐᓂᐊᕈᑕᐅᔪᓂᒃ ᓄᓇᓕᓐᓂ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑎᒍᑦ, ᐊᒻᒪᓗ ᐱᔪᒐᕆᔭᐅᔪᓂᒃ ᐱᓯᒪᐃᓐᓇᓂᕐᒥᒃ ᐊᑐᖃᑦᑕᖅᑕᖏᓐᓂᒃ ᐊᐅᓚᑦᓯᔪᓐᓇᐅᑎᖏᓐᓂᒃ (ᓲᕐᓗ, ᐃᓕᓐᓂᐊᕕᖕᒥ ᐃᓕᓐᓂᐊᖅᑕᑦ, ᐊᑕᖐᔪᑦ ᐃᓕᓐᓂᐊᕐᓃᑦ, ᐃᓕᓐᓂᐊᕕᓐᓂ ᐊᖓᔪᖅᑳᓂᒃ ᐃᖅᑲᓇᐃᔭᖅᑎᑖᖃᑦᑕᕐᓂᖅ, ᐅᓪᓗᖅᓯᐅᑏᑦ, ᐊᓯᖏᓪᓗ), ᐊᒻᒪᓗ ᐊᔪᖅᑎᑕᐅᓂᖅ ᐊᐅᓚᑦᓯᓂᕐᒥᒃ ᐱᔪᓐᓇᐅᑎᖃᕐᕕᒋᔭᖏᓐᓂᒃ ᐱᕕᒃᓴᑭᑦᑎᑕᐅᓂᕐᓗ ᐃᑲᔪᖅᑕᐅᔾᔪᑎᓄᑦ ᐊᑐᕋᑦᓴᓂᓪᓗ, -ᐊᔪᖅᑎᑕᐅᔪᑦ ᐃᓕᓐᓂᐊᖅᑏᑦ ᑲᔪᓯᓂᖏᑦ ᐃᓕᓐᓂᐊᕕᒻᒥ, ᐃᓕᓐᓂᐊᑲᓐᓂᖅᑐᓄᑦ ᐃᓕᓐᓂᐊᕐᓃᑦ, ᒪᑭᒪᔾᔪᑎᓂᒃ ᐃᖅᑲᓇᐃᔮᒃᓴᓂᓪᓗ ᐱᕕᒃᓴᖃᖅᑎᑕᐅᓃᑦ ᐃᓅᓯᕐᒥ ᐱᕚᓪᓕᕈᑎᒃᓴᑦ ᐊᒻᒪᓗ ᐱᑕᖃᙱᓗᐊᕐᓂᖓ ᐱᓕᕆᖃᑎᒌᓐᓂᖅ ᐱᕙᓪᓕᐅᑎᓇᔭᖅᑐᓂᒃ ᐃᓕᓐᓂᐊᕆᐊᖃᑦᑕᖅᑐᓄᑦ

• ᑐᙵᕕᒃᑯᑦ ᑐᓂᓯᓚᐅᖅᑐᑦ ᓇᖕᒥᓂᖅ ᓄᓇᕗᒻᒥ ᐃᓕᓐᓂᐊᓂᕐᒧᑦ ᐋᖅᑭᒋᐊᕈᑎᓂᒃ ᐱᖁᔭᓂᒃ ᐅᑭᐊᑦᓵᖓᓂ 2019, ᐊᑐᖔᕋᑦᓴᒥᒃ ᐋᖅᑭᒍᑎᒃᓴᓄᑦ ᐱᖁᔭᒃᓴᖅ 25, ᐱᖁᔭᖅ ᐋᖅᑭᒋᐊᕈᑎ ᐃᓕᓐᓂᐊᕐᓂᓕᕆᓂᕐᒧᑦ ᐱᖁᔭᓄᑦ ᐊᒻᒪᓗ ᐃᓄᐃᑦ ᐅᖃᐅᓯᖓᑕ ᓴᐳᒻᒥᔭᐅᓂᖓᓄᑦ ᐱᖁᔭᓄᑦ, ᑐᓂᔭᐅᓚᐅᖅᑐᑦ ᓄᓇᕗᑦ ᒐᕙᒪᒃᑯᖏᓐᓄᑦ ᑲᔪᓯᑎᑕᐅᓚᐅᙱᓐᓂᖓᓂ ᐱᖁᔭᒃᓴᖅ 25 ᓄᓇᕗᑦ ᒪᓕᒐᓕᐅᕐᕕᖓᓂ ᐆᑦᑑᑉᐱᕆ 2020. ᓄᓇᕗᒻᒥ ᐃᓕᓐᓂᐊᕐᓂᓕᕆᓂᕐᒧᑦ ᐋᖅᑭᒋᐊᕈᑎᒧᑦ ᐱᖁᔭᖅ ᓴᖅᑭᖅᑕᐅᓯᒪᒍᑎᖃᓚᐅᖅᑐᖅ ᐃᓄᒃᑐᑦ ᐅᖃᐅᓯᖅ ᐃᓕᓴᐃᒍᑕᐅᔪᓐᓇᖁᓪᓗᒍ ᐃᓕᓐᓂᐊᕆᐊᓕᕋᑖᓂᒃ ᐃᓕᓐᓂᐊᕐᓂᓕᓐᓄᑦ 12, ᐃᓄᐃᑦ ᐊᐅᓚᑦᓯᒍᓐᓇᖁᓪᓗᒋᑦ ᓇᖕᒥᓂᖅ ᐃᓕᓐᓂᐊᑎᑦᓯᒍᑎᒋᓂᐊᖅᑕᒥᓂᒃ, ᐊᐅᓚᑦᓯᔪᓐᓇᕐᕕᖃᕐᓂᖅ ᐃᓄᒃᑐᑦ ᐅᖃᐅᓯᕐᒥᒃ ᐃᓕᖅᑯᓯᕐᒥᓪᓗ ᐃᓕᓐᓂᐊᕈᑎᒃᓴᓂᒃ, ᐃᓄᐃᑦ ᐃᖅᑲᓇᐃᔭᕐᓂᖏᓐᓄᑦ ᐸᕐᓇᐅᑎᑦ ᓄᓇᕗᑦ ᒐᕙᒪᒃᑯᑦ ᐃᓕᓴᐃᒍᑎᒃᓴᖏᓐᓂᒃ, ᐱᓕᖕᒪᒃᓴᐅᑎᓂᒃ, ᐃᖅᑲᓇᐃᔭᖅᑎᑖᕐᓂᕐᒥᒃ ᐊᒻᒪᓗ ᐱᓯᒪᐃᓐᓇᓂᕐᒥᒃ ᐃᓄᒃᑐᑦ−ᐅᖃᐅᓯᓕᓐᓂᒃ ᐃᓕᓴᐃᔨᓂᒃ, ᐊᒻᒪᓗ ᐊᓯᖏᓐᓂᒃ ᐋᖅᑭᑦᓯᒪᐅᑎᒃᓴᓂᒃ ᐱᕚᓪᓕᕈᑎᒃᓴᖏᓐᓂᒃ ᐃᓕᓐᓂᐊᓂᕐᒥᒃ ᑎᒍᒥᐊᖏᓐᓇᓂᕐᒥᒃ.

• ᐃᖅᑲᖅᑐᐃᕕᒃᑰᑎᑦᓯᒍᑕᐅᔪᖅ ᑎᑎᕋᖅᓯᒪᔪᖅ ᓇᓗᓇᐃᕈᑕᐅᔪᖅ ᓄᓇᕗᑦ ᒐᕙᒪᒃᑯᑦ ᕿᐱᓘᑎᖃᖅᓯᒪᔪᑦ ᐊᔾᔨᐅᑎᑕᐅᓂᕐᒧᑦ ᐱᔪᓐᓇᐅᑎᓂᒃ ᐊᒻᒪᓗ ᑲᔪᓯᑎᑦᓯᓂᕐᒥᒃ ᐊᐅᓚᑕᐅᔾᔪᑎᓂᒃ ᐱᕋᔮᖃᖅᓯᒪᓂᕐᒥᒃ ᐊᔾᔨᐅᙱᑎᑦᓯᓂᕐᒧᑦ ᐱᕕᒃᓴᖃᖅᑎᑦᓯᒐᑎᒃ ᐃᓄᓐᓂᒃ ᐃᓕᓐᓂᐊᖅᑎᓂᒃ ᐃᓕᓐᓂᐊᑎᑦᓯᒍᑕᐅᔪᓄᑦ ᐴᖅᓯᓯᒪᓂᕐᒥᒃ ᐊᐅᓚᑕᒥᓄᑦ ᓱᖑᔪᕐᔪᐊᖑᑎᑕᐅᓂᖅᓴᐅᓂᓕᒻᒧᑦ ᐅᖃᐅᓰᓐᓂᒃ ᖃᓪᓗᓈᑎᑐᑦ ᐅᐃᕖᑎᑐᓪᓗ, ᐊᒻᒪᓗ ᕿᐱᓗᑦᑐᒋᑦ ᐃᓕᓐᓂᐊᖅᑎᑕᐅᓂᖏᓐᓂᒃ ᓇᖕᒥᓂᖅ ᐅᖃᐅᓯᕐᒥᒍᑦ ᐃᓕᖅᑯᓯᕐᒥᒍᓪᓗ. ᐃᖅᑲᖅᑐᐃᕕᒃᑰᑎᑦᓯᒍᑕᐅᔪᖅ ᓱᖅᑯᐃᕈᑕᐅᔪᖅ ᑕᒪᓐᓇ ᐱᕋᔮᖃᕐᓂᐅᓂᖓᓂᒃ ᐊᔾᔨᐅᖏᑎᑕᐅᓂᕐᒧᑦ:

a) ᓱᕋᐃᔪᖅ ᓴᐳᔾᔨᓯᒪᓂᕐᒥᒃ, ᐱᓯᒪᐃᓐᓇᓂᕐᒥᒃ ᐊᒻᒪᓗ ᓯᐊᒻᒪᑎᑦᓯᓂᕐᒥᒃ ᐃᓄᐃᑦ ᐅᖃᐅᓯᖓᓂᒃ ᐃᓕᖅᑯᓯᖓᓂᓪᓗ; ᐊᒻᒪᓗ b) ᐊᒃᑐᐃᓯᒪᔪᖅ ᐃᓄᐃᑦ ᐃᓕᓐᓂᐊᖅᑏᑦ ᑎᑭᐅᑎᒍᓐᓇᕐᓂᖏᓐᓂᒃ ᐃᓕᓐᓂᐊᓂᒃᑯᑦ ᑎᒍᓯᓯᒪᓂᕐᒥᒃ, ᐊᒻᒪᓗ ᓴᙲᓕᑎᑦᓯᔪᖅ ᐃᓕᓐᓂᐊᑲᓐᓂᕈᓐᓇᕋᔭᕐᓂᖏᓐᓂᒃ, ᐃᖅᑲᓇᐃᔮᓂᒃ ᐊᒻᒪᓗ ᑮᓇᐅᔭᓕᐅᕋᓱᐊᕈᑎᒃᓴᓄᑦ ᐃᓚᒋᔭᐅᓂᕐᒥᒃ.

• ᐱᓇᓱᐊᖅᑎᒋᔭᐅᔪᑦ ᐃᖅᑲᖅᑐᐃᕕᒃᑰᑎᑦᓯᓂᕐᒧᑦ ᑎᑎᕋᖅᓯᒪᔪᒥᒃ ᓄᓇᕗᑦ ᑲᒪᓯᓇᖓ ᐊᒻᒪᓗ ᓴᐳᔾᔨᔨᕐᔪᐊᖅ ᓄᓇᕗᒻᒥ ᑭᒡᒐᖅᑐᐃᔨᐅᓪᓗᑎᒃ ᓄᓇᕗᑦ ᒐᕙᒪᒃᑯᖏᓐᓂᒃ, ᑐᙵᕕᒃᑯᓐᓂᒃ ᐊᒻᒪᓗ ᐃᓄᓐᓂᒃ ᕿᑐᕐᖓᓕᓐᓂᒃ ᐃᓕᓐᓂᐊᖅᑎᓄᑦ ᓄᓇᕗᒻᒥ ᒐᕙᒪᒃᑯᓐᓂ ᐃᓕᓐᓂᐊᓂᕐᒧᑦ ᐊᐅᓚᓂᕆᔭᖓᒍᑦ.

• ᐃᖅᑲᖅᑐᐃᕕᒃᑰᖅᓯᒍᑕᐅᔪᖅ ᑎᑎᕋᖅᓯᒪᔪᖅ ᐱᓇᓱᐊᒐᐅᔪᖅ ᓄᓇᕗᒻᒥ ᐃᖅᑲᖅᑐᐃᕕᖕᒥ ᐋᖅᑭᒍᑎᒃᓴᓯᐅᕐᓂᕐᒥᒃ ᐃᖅᑲᖅᑐᐃᕕᒃᑯᑦ−ᑎᓕᓯᔾᔪᑕᐅᔪᒥᒃ ᓇᓗᓇᐃᖅᓯᓂᕐᒥᒃ ᓄᓇᕗᑦ ᒐᕙᒪᒃᑯᓐᓄᑦ ᑲᒪᒋᐊᖁᓪᓗᒋᑦ ᐅᑯᓄᙵᖓᔪᓂᒃ ᑲᒪᒋᕙᓪᓕᐊᒋᐊᓕᓐᓂᒃ;

a) ᐋᖅᑭᑦᓱᐃᓂᕐᒧᑦ ᐊᑐᓕᖅᑎᑦᑎᕙᓪᓕᐊᓂᕐᒧᑦ ᐸᕐᓇᐅᑎᓂᒃ ᑐᓴᕆᐊᕐᕕᖃᕐᓂᕐᒧᑦ ᑐᙵᕕᒃᑯᓐᓂᒃ ᑕᖅᑮᑦ ᐊᕐᕕᓂᓖᑦ ᐃᓗᐊᓂ ᐃᖅᑲᖅᑐᐃᕕᐅᑉ ᑎᓕᓯᔾᔪᑎᖓᒍᑦ, b) ᐃᓄᐃᑦ ᐅᖃᐅᓯᖓᓂᒃ ᐃᓕᓐᓂᐊᖅᑎᑕᐅᓗᑎᒃ ᐃᓕᓐᓂᐊᕐᓂᓖᑦ 4-ᒥᒃ 12-ᒧᑦ ᑕᓪᓕᒪᑦ ᐅᑭᐅᑦ ᐃᓗᐊᓂ ᐃᖅᑲᖅᑐᐃᕕᐅᑉ ᑎᓕᓯᔾᔪᑎᖓᒍᑦ, c) ᐅᓂᒃᑳᕆᐊᖅᑐᖃᑦᑕᕐᓗᓂ ᐃᖅᑲᖅᑐᐃᕕᒃᑯᑦ ᐱᕙᓪᓕᐊᓂᖓᓂᒃ ᑲᔪᓯᑎᑕᐅᕙᓪᓕᐊᓂᖓᑕ ᐸᕐᓇᐅᑎᐅᑉ ᐃᓄᒃᑐᑦ ᐅᖃᐅᓯᕐᒥᒃ ᐃᓕᓐᓂᐊᓂᕐᒧᑦ

• ᐊᓯᐊᒍᖔᕈᓐᓇᕈᑕᐅᒻᒥᔪᖅ, ᐃᖅᑲᖅᑐᐃᕕᒃᑯᑦ ᐊᑭᓖᑎᑦᓯᓇᓱᐊᕐᓂᕐᒧᑦ ᓇᓗᓇᐃᖅᓯᒍᑎᒃᓴᖅᓯᐅᕈᑎ ᐋᖅᑭᒋᐊᕆᐊᓕᖕᓂᒃ ᒪᓕᒐᑦᓴᓃᑦᑐᓂᒃ ᑎᑎᕋᖅᑕᐅᓯᒪᔪᓅᖓᔪᓂᒃ ᐃᓄᐃᑦ ᐅᖃᐅᓯᖓᓂᒃ ᐃᓕᓐᓂᐊᑎᑦᓯᓂᕐᒧᑦ ᐊᕐᕌᒍᐊᓂ 2039 ᓯᖁᒥᑦᓯᒍᑕᐅᔪᖅ ᐃᓄᓐᓂᒃ ᕿᑐᕐᖓᓕᓐᓂᒃ ᐊᒻᒪᓗ ᐃᓕᓐᓂᐊᖅᑎᓂᒃ ᐊᒻᒪᓗ ᑲᔪᓯᑎᑕᐅᔭᕆᐊᖃᕈᓐᓃᖅᑐᖅ ᐅᕝᕙᓘᓐᓃᑦ ᐊᑐᓕᖅᑎᑕᐅᓯᒪᓗᓂ.

• ᓄᓇᕗᑦ ᒐᕙᒪᒃᑯᖏᑦ ᓱᓕ ᑐᓂᓯᔭᕆᐊᓖᑦ ᓴᐳᔾᔨᓯᒪᓂᕐᒧᑦ ᓇᓗᓇᐃᕈᑎᓂᒃ ᑭᒡᒍᑎᓂᒃ ᑐᙵᕕᒃᑯᑦ ᐃᖅᑲᖅᑐᐃᕕᒃᑰᑎᑦᓯᒍᑎᖏᓐᓂᒃ ᐊᑭᓖᑎᑦᓯᓂᕐᒧᑦ ᑐᓂᔭᐅᓚᐅᖅᑐᒥᒃ ᐆᑦᑑᑉᐱᕆ 13, 2021 ᐊᒻᒪᓗ ᐋᖅᑭᒋᐊᖅᑕᐅᑲᓐᓂᓚᐅᖅᑐᒥᒃ ᐊᒻᒪᓗ ᑐᓂᔭᐅᓪᓗᓂ ᔭᓐᓄᐊᓕ 28, 2022.

📄 2022 04 25 NTI News Release GN Motion to Dismiss NTIs s.15 Claim Inuk