Food Security Strategy and Action Plan Released
ᓄᓇᕗᒻᒥ ᓂᕿᖃᐃᓐᓇᖅᑎᑦᑎᓂᕐᒧᑦ ᑲᑎᒪᕐᔪᐊᕐᓂᖅ ᐅᓪᓗᒥ ᓴᖅᑮᕗᑦ ᓄᓇᕗᒻᒥ ᓂᕿᖃᐃᓐᓇᖅᑎᑦᑎᓂᕐᒧᑦ ᐊᒻᒪᓗ ᖃᓄᐃᓕᐅᕐᓂᕐᒧᑦ ᐸᕐᓇᐅᑎᒥ ᓯᕗᓪᓕᕐᒥ ᐅᓪᓗᕐᒥ ᑲᓇᑕᓕᒫᒥ ᑳᖕᓇᕐᓂᕐᒧᑦ ᐅᔾᔨᖅᓱᕐᓂᖅ ᐱᓇᓱᐊᕈᓯᖓ. ᑐᕌᒐᖃᖅᑐᖅ ᓴᖅᑮᓂᕐᒥᒃ ᓄᓇᕗᒻᒥᐅᓄᑦ ᓈᒻᒪᒃᑐᒥᒃ ᐱᖃᕈᒪᓂᖅ ᐊᑦᑕᕐᓇᖏᓪᓗᓂ, ᐃᓕᖅᑯᓯᕆᔭᐅᔪᑎᒍᑦ, ᐊᑭᑐᓗᐊᖏᑦᑐᖅ, ᓂᕿᑦᑎᐊᕙᐃᑦ, ᐊᒻᒪᓗ ᓴᖅᑭᑎᑦᑎᓗᓂ ᓂᕿᓅᖓᔪᓂᒃ ᓴᖅᑭᔮᖅᑎᑦᑎᓂᕐᒥᒃ ᐃᓄᐃᑦ ᐱᒻᒪᕆᐅᒋᔭᖏᑎᒍᑦ, ᒪᑭᒪᓇᓱᖕᓂᕐᒧᑦ ᐊᒻᒪᓗ ᐊᕙᑎᓕᕆᓂᕐᒥᑦ ᐊᐅᓚᐃᓐᓇᖅᑎᑦᑎᓂᕐᒥ.
ᐊᕐᕕᓂᓖᑦ ᐱᓕᕆᐊᖑᓂᐊᖅᑐᑦ ᖃᐅᔨᔭᐅᔪᑦ ᐋᖅᑭᐅᒪᑎᑦᑎᔪᖅ ᑐᑭᒧᐊᕈᑎᖓᓂᒃ ᐊᒻᒪᓗ ᖃᓄᐃᓕᐅᕐᓂᕐᒧᑦ ᐸᕐᓇᐃᓂᕐᒥ; ᓂᕿᓪᓚᑦᑖᑦ, ᓂᐅᕕᕐᕕᖕᓂᖔᖅᑐᑦ ᓂᖀᑦ, ᓄᓇᓕᖕᒥ ᓂᕿᓕᐊᖑᖃᑦᑕᖅᑐᑦ, ᐃᓅᓯᕐᒥ ᐊᔪᖖᒋᔾᔪᑕᐅᔪᑦ, ᐱᓕᕆᐊᒃᓴᑦ ᐊᒻᒪ ᓄᓇᓕᖕᓂ ᖃᐅᔨᑎᑕᐅᔪᑦ, ᐊᒻᒪᓗ ᐊᑐᐊᒐᐃᑦ ᒪᓕᒐᒃᓴᐃᓪᓗ.
“ᑳᖕᓇᖏᑎᑦᑎᔾᔫᒥᓂᖅ ᐊᒻᒪᓗ ᐊᖏᒡᓕᒋᐊᖅᑎᑦᑎᓂᖅ ᓂᕿᖃᐃᓐᓇᖅᑎᑦᑎᓂᕐᒥᒃ ᑭᒃᑯᓕᒫᓄᑦ ᐱᓕᕆᐊᒃᓴᐅᖕᒪᑦ ᐃᓄᖕᓄᑦ, ᑲᑐᔾᔨᖃᑎᒌᓄᑦ ᐊᒻᒪᓗ ᒐᕙᒪᒃᑯᓐᓄᑦ ᑕᐃᒪᐃᓐᓂᖓᓄᑦ ᐱᓕᕆᓂᖅ ᑲᑎᒪᕕᒡᔪᐊᕐᓂᕐᒧᑦ ᐱᒻᒪᕆᐅᕗᖅ,” ᐅᖃᖅᑐᖅ ᒫᓂᑲ ᐃᐅᓪ, ᒥᓂᔅᑕ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓄᑦ, ᓄᓇᕗᒻᒥ ᒐᕙᒪᖓᓂ. “ᑐᑭᒧᐊᕈᑎᒃᓴᖅ ᐊᒻᒪᓗ ᖃᓄᐃᓕᐅᕐᓂᕐᒧᑦ ᐸᕐᓇᐅᑎ, ᐊᑐᓕᖅᑎᑉᐸᓪᓕᐊᖏᓐᓇᖅᑕᕗᑦ, ᐋᖅᑭᒃᓯᒪᖕᒪᑦ ᑕᖏᖃᖅᑐᖅ ᑎᑎᕋᖅᓯᒪᓕᖅᑎᑕᐅᓯᒪᔪᑦ ᖃᐅᔨᔭᐅᖁᓪᓗᒍ ᐊᑐᐃᓐᓇᐅᓂᖓᓂᒃ, ᑎᒍᑐᐃᓐᓇᒐᒃᓴᐅᓪᓗᓂ, ᐊᒥᒐᖏᓐᓂᖓᓂᒃ ᐊᒻᒪᓗ ᐊᑐᕐᓂᕐᒥᒃ ᓂᕿᓂᒃ.”
ᑲᑎᒪᕕᒡᔪᐊᕐᓂᖅ ᐱᓕᕆᐊᒃᓴᐅᓪᓗᓂ ᑲᑎᖖᒐᓗᑎᒃ ᓄᓇᕗᒻᒥ ᑲᑎᒪᓂᕐᒥ ᐊᔪᖅᓴᕐᓂᕐᒥᒃ ᒥᒃᖠᑎᑦᑎᓂᕐᒧᑦ, ᐃᒃᓯᕚᖅᑎᐅᖃᑕᐅᓪᓗᑎᒡᓗ ᓄᓇᕗᒻᒥ ᒐᕙᒪᒃᑯᖏᑦ ᐊᒻᒪᓗ ᓄᓇᕗᑦ ᑐᖖᒐᕕᒃᑯᑦ. ᑲᑎᒪᕕᒡᔪᐊᕐᓂᕐᒧᑦ ᐃᓚᒋᔭᐅᔪᑦ ᐃᓚᐅᑎᑦᑎᔪᑦ ᒐᕙᒪᒃᑯᓐᓂ ᐃᖅᑲᓇᐃᔭᕐᕖᑦ, ᐃᓄᐃᑦ ᑲᑐᔾᔨᖃᑎᒌᖏᑦ, ᒐᕙᒪᐅᖏᑦᑐᑦ ᑲᑐᔾᔨᖃᑎᒌᑦ ᐊᒻᒪᓗ ᓇᖕᒥᓂᖃᖅᑎᐅᔪᑦ.
“2010-ᖑᑎᓪᓗᒍ, ᐃᓕᑦᑎᓚᐅᖅᑐᒍᑦ ᐅᓄᕐᓂᖅᓴᑦ ᐃᒡᓗᒥᐅᑕᕇᑦ, ᐃᓚᐅᓪᓗᑎᒃ ᐃᓕᓐᓂᐊᓪᓗᐊᖅᑐᑦ ᐊᕐᕌᒍᖃᖅᑐᑦ, ᐊᑐᖃᑦᑕᖅᑐᑦ ᓂᕿᖃᐃᓐᓇᕈᓐᓇᖏᓐᓂᕐᒥᒃ, ᐊᒃᑐᐃᓂᖃᖃᑦᑕᖅᑐᖅ ᐋᓐᓂᐊᕐᓂᕐᒧᑦ ᐊᒻᒪᓗ ᖃᓄᐃᖏᑦᑎᐊᕐᓂᖓᓂᒃ ᐊᒻᒪᓗ ᐊᐳᖅᓯᒪᓕᖃᑦᑕᖅᑐᑦ ᐃᓅᔪᑦ ᐃᓚᐅᔭᕆᐊᒃᓴᖅ ᐃᓕᓐᓂᐊᕐᓂᕐᒥᒃ ᐊᒻᒪᓗ ᐃᖅᑲᓇᐃᔭᕐᓂᕐᒥᒃ,” ᐅᖃᖅᑐᖅ ᓄᓇᕗᑦ ᑐᖖᒐᕕᒃᑯᑦ ᐃᒃᓯᕙᐅᑕᖓᑕ ᑐᒡᓕᐊ ᔭᐃᒥᓯ ᐃᑦᑐᓗᒃ. ᐱᓕᕆᖃᑎᒌᒃᖢᑕ ᐱᓇᓱᖕᓂᑦᑎᒍᑦ ᓄᓇᕗᒻᒥ ᓂᕿᖃᐃᓐᓇᖅᑎᑦᑎᓂᕐᒥᒃ ᑲᑎᒪᕕᒡᔪᐊᕐᓂᕐᒥ, ᓄᓇᕗᑦ ᑐᖖᒐᕕᒃᑯᑦ ᑎᒍᒥᐊᖅᓯᑦᑎᐊᖅᐳᑦ ᑕᒪᐃᓐᓂᒃ ᐊᑐᖅᑎᑕᐅᓂᖏᓐᓂᒃ ᖃᓄᐃᓕᐅᕐᓂᕐᒧᑦ ᐸᕐᓇᐅᑎᑦ, ᐃᒪᐃᑦᑎᐊᖁᔨᒐᓗᐊᕆᕗᒍᑦ ᓄᓇᕗᒻᒥᐅᓕᒫᑦ ᐱᔪᓐᓇᕈᑎᖃᕐᓗᑎᒃ ᐊᑭᑭᑦᑐᓂᒃ, ᓂᕿᑦᑎᐊᕙᖕᓂᒃ ᑲᔪᓯᑦᑎᐊᕈᓐᓇᖁᓪᓗᒋᑦ ᐃᓕᓐᓂᐊᕐᓂᕐᒥᒃ ᐊᒻᒪᓗ ᐃᖅᑲᓇᐃᔭᕐᓂᕐᒥᒃ.”
ᐊᑐᓕᖅᑎᑕᐅᓂᖏᓐᓄᑦ ᑐᑭᒧᐊᕈᑎᒃᓴᖅ ᐊᒻᒪᓗ ᖃᓄᐃᓕᐅᕐᓂᕐᒧᑦ ᐸᕐᓇᐅᑎᑦ, ᓄᓇᕗᒻᒥ ᓂᕿᖃᐃᓐᓇᖅᑎᑦᑎᓂᕐᒧᑦ ᑲᑎᒪᕕᒡᔪᐊᕐᓂᖅ ᐱᓇᓱᐊᖅᑕᐅᔪᑦ ᑐᑭᖃᓕᕐᓗᑎᒃ ᐱᕙᓪᓕᐊᕐᔪᐊᕐᓗᑎᒃ ᑲᔪᓯᑦᑎᐊᕋᓱᖕᓂᕐᒧᑦ ᓄᐊᑕᐅᑦᑎᐊᕈᒪᓂᕆᔭᖏᓐᓂᒃ ᓂᕿᖃᐃᓐᓇᖅᑎᑦᑎᓂᕐᒧᑦ ᓄᓇᕗᒻᒥ.
###
ᐱᕙᓪᓕᐊᔪᓕᕆᓂᕐᒧᑦ ᖃᐅᔨᒋᐊᕐᕖᑦ: ᐋᑐᐃ ᓚᒥᐅ ᑐᓴᐅᒪᑎᑦᑎᓕᕆᓂᕐᒧᑦ ᐊᒻᒪᓗ ᑭᒃᑯᑐᐃᓐᓇᕐᓄᑦ ᑐᓴᒐᒃᓕᕆᔨ ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᓄᓇᕗᒻᒥ ᒐᕙᒪᖓᑦ 867-975-5949 Alemieux@gov.nu.ca ᑭᐅᕆ ᒪᒃᑲᓚᔅᑭ ᑐᑭᒧᐊᖅᑎᑦᑎᔨ ᑐᓴᐅᒪᑎᑦᑎᓕᕆᓂᕐᒧᑦ ᐊᐅᓚᑦᑎᕕᓕᕆᔨᒃᑯᑦ ᓄᓇᕗᑦ ᑐᖖᒐᕕᒃ. 867-975-4914 kmccluskey@tunngavik.com