Fisheries Issues Narwhal Tusk Ban Without Consulting Inuit
ᓄᓇᕗᑦ ᑐᙵᕕᒃ ᑎᒥᖓᑦᑕ ᐊᖓᔪᖅᑳᖓᑦ ᖄᑕᓂ ᑕᐅᑐᖏ ᐅᑉᓗᒥ ᐅᖃᖅᑐᖅ ᐅᑯᐊ ᐱᓕᕆᕝᕕᐊᓐᓂ ᐃᖃᓗᓕᕆᔨᑦ ᐊᒻᒪᓗ ᐃᒪᒻᒥᐅᑕᓕᕆᔨᑦ ᐃᙲᓐᓇᖅ ᓴᖑᑎᑕᐅᖁᓪᓗᒋᑦ ᐃᓱᒪᓕᐊᖏᑦ ᐃᓱᓕᑎᑦᑎᓯᒪᓂᕆᔭᖏᓐᓂᑦ ᑕᐅᖅᓯᐅᑎᖃᑦᑕᕐᓂᕐᒥᑦ ᐊᒡᓚᖑᐊᓖᑦ ᕿᓇᓗᒐᐃᑦ ᑑᒑᖏᓐᓂᑦ ᐅᑯᓄᖓ 17-ᓄᑦ ᓄᓇᕗᒥ ᓄᓇᓕᖕᓄᑦ.
ᐃᖃᓗᓕᕆᔨᑦ ᐊᒻᒪᓗ ᐃᒪᕐᒥᐅᑕᓕᕆᔨᒃᑯᑦ ᖃᐅᔨᒃᑲᐃᓚᐅᖅᑐᑦ ᓄᓇᕗᑦ ᑐᙵᕕᒃ ᑎᒥᖓᓐᓂᑦ ᑕᒪᑦᓱᒧᖓ ᓄᖅᑲᖅᑎᑦᑎᓂᕐᒥᑦ ᐱᓇᓱᐊᕈᓯᐅᓚᐅᖅᑐᒥᑦ. ᓄᓇᕗᑦ ᑐᙵᕕᒃ ᑎᒥᖓᑦ ᖃᐅᔨᑎᑕᐅᓚᐅᖏᑦᑐᑦ ᐃᓱᓕᑎᑦᑎᓂᐅᔪᓂᑦ ᐊᔪᓕᖅᑎᑦᑎᓂᒃᑯᑦ ᓯᕗᓂᐊᒍᑦ ᐃᓕᓯᓂᐊᓕᖅᑎᓪᓗᒋᑦ ᓄᖅᑲᖅᑎᑦᑎᔾᔪᑎᓂᑦ, ᐊᒻᒪᓗ ᐃᓄᐃᑦ ᐅᖃᕐᕕᐅᓚᐅᖏᑦᑐᑦ. ᐃᖃᓗᓕᕆᔨᑦ ᐊᒻᒪᓗ ᐃᒪᕐᒥᐅᑕᓕᕆᔨᒃᑯᑦ ᐱᒋᐊᓂᕐᓂᖏᑦ ᓱᕋᐃᔪᑦ ᐃᓄᐃᑦ ᐊᖑᓇᓱᖕᓂᕐᒧᑦ ᐱᔪᓐᓇᐅᑎᖏᓐᓂᑦ ᐃᓕᖓᔪᑦ ᐃᓗᐊᓂ ᐅᑯᐊ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑎᓂ.
“ᐃᖃᓗᓕᕆᔨᑦ ᐊᒻᒪᓗ ᐃᒪᕐᒥᐅᑕᓕᕆᔨᒃᑯᑦ ᐱᔪᓐᓇᐅᑎᖃᖏᑦᑐᑦ ᐃᓕᓯᓂᕐᒥᑦ ᑕᐃᒪᐃᑦᑐᓂᑦ ᐃᓱᓕᑎᑦᑎᔾᔪᑎᓂᑦ ᐊᔪᓕᖅᑎᑦᑎᓂᕐᒧᑦ ᐃᓄᖕᓄᑦ, ᐱᓗᐊᖅᑐᒥᑦ ᐊᒥᓲᓂᖏᑦ ᑲᔪᓯᑦᑎᐊᖅᑎᓪᓗᒋᑦ, ᐊᒻᒪᓗ ᐊᖑᓇᓱᐊᖅᑕᐅᕙᒃᑐᑦ ᐊᒥᓲᓂᖏᑦ ᖃᑉᐱᐊᓇᖏᑎᓪᓗᒋᑦ ᑖᒃᑯᐊᓄᖓ ᐆᒪᔪᓄᑦ,” ᐅᖃᖅᑐᖅ ᑕᐅᑐᖏ. “ ᓄᓇᕗᑦ ᑐᙵᕕᒃ ᑎᒥᖓᑦ ᐃᓱᒪᕙᓪᓕᐊᔪᖅ ᐱᖁᔭᑎᒍᑦ ᐊᑐᕈᒪᓂᕐᒥᑦ ᒫᓐᓇ.”
ᑕᐅᑐᒃᑕᖏᑦᑎᒍᑦ ᐅᑯᐊ ᐃᖃᓗᓕᕆᔨᑦ ᐊᒻᒪᓗ ᐃᒪᕐᒥᐅᑕᓕᕆᔨᒃᑯᑦ ᐱᖁᔭᖏᑦ, ᐅᑯᐊ ᑲᑎᒪᕕᒃᔪᐊᕐᓂᐅᕙᒃᑐᑦ ᓯᓚᕐᔪᐊᒥ ᑕᐅᖅᓯᐅᑎᖃᑦᑕᕐᓂᕐᒧᑦ ᐊᑦᑕᓇᖅᑐᒦᑦᑐᓄᑦ ᐆᒪᔪᓄᑦ ᑕᐅᖅᓯᐅᑎᖃᑦᑕᕐᓂᕐᒧᑦ ᐱᔪᓐᓇᐅᑎᑦ ᐊᑐᖅᑕᐅᔾᔮᖏᓐᓂᑦ ᑐᓂᔾᔪᑕᐅᓗᑎᒃ ᑑᒑᓄᑦ ᐱᑕᖅᑕᐅᔪᓄᑦ ᐅᑯᓇᖓ ᐊᐅᔪᐃᑦᑐᒥᑦ, ᐃᒃᐱᐊᕐᔪᖕᒥᑦ, ᖃᐅᓱᐃᑦᑐᒥᑦ, ᑲᖏᖅᑐᒑᐱᒃ, ᕿᑭᖅᑕᕐᔪᐊᖅ, ᐸᖕᓂᖅᑑᖅ, ᐃᖃᓗᐃᑦ, ᑭᒻᒥᕈᖅ, ᑭᖓᐃᑦ, ᓴᓪᓕᒧᖅ, ᓇᐅᔮᑦ, ᓴᓂᕋᔭᒃ, ᐃᒡᓗᓕᒑᕐᔪᒃ, ᑲᖏᖅᖠᓂᖅ, ᑎᑭᕋᕐᔪᖅ, ᐊᕐᕕᐊᑦ ᐊᒻᒪᓗ ᓴᓂᑭᓗᐊᖅ. ᓄᓇᓕᑦ ᐱᔪᓐᓇᖅᑎᑕᐅᔪᑦ ᑲᔪᓯᓂᐊᖅᖢᑎᒃ ᑕᐅᖅᓯᐅᔾᔨᖃᑦᑕᕐᓂᕐᒧᑦ ᐊᒡᓚᖑᐊᓖᑦ ᕿᓇᓗᒐᐃᑦ ᑑᒑᖏᓐᓂᑦ ᐅᑯᐊ ᑰᒑᕐᔪᒃ, ᑕᓗᕐᔪᐊᖅ, ᐅᖅᓱᖅᑑᖅ, ᐃᒡᓗᓕᒃ ᐊᒻᒪᓗ ᒥᑦᑎᒪᑕᓕᒃ.
“ᐃᖃᓗᓕᕆᔨᑦ ᐊᒻᒪᓗ ᐃᒪᕐᒥᐅᑕᓕᕆᔨᒃᑯᑦ ᐃᓱᒪᓕᐊᖓᑦ ᑕᑯᒃᓴᐅᔪᖅ ᐃᓕᖓᓪᓗᓂ ᓱᓕᖏᑦᑐᑦ ᖃᐅᔨᒪᔨᕐᔪᐊᒃᑯᑦ ᑲᑎᓯᒪᔭᖏᓐᓂᑦ, ᖃᐅᔨᒪᖏᒃᑲᓗᐊᖅᑐᒍᑦ ᐱᔾᔪᑎᒋᓪᓗᒋᑦ ᐅᖃᖃᑎᖃᖅᓯᒪᖏᓐᓂᖏᑦ ᐃᓄᖕᓂᑦ,” ᐅᖃᖅᑐᖅ ᑕᐅᑐᖏ. ᖃᐅᔨᒪᔨᕐᔪᐊᒃᑯᑦ ᖃᐅᔨᓴᕈᑎᖏᑦ ᓇᓚᐅᖅᑕᖅᓯᒪᔪᑦ ᐊᒡᓚᖑᐊᓕᒃ ᕿᓇᓗᒐᐃᑦ ᐊᒥᓲᓂᖏᓐᓂᑦ ᐃᒪᓐᓇ 80,000-ᖑᓂᖏᓐᓂᑦ ᓴᖏᔪᐊᓗᒃ ᑕᒪᓐᓇ ᑲᓇᑕᒥᓂ ᐃᓕᖓᓂᖏᑦ. ᐃᓄᐃᑦ ᐊᖑᕙᒃᑐᑦ ᐱᑕᖅᑕᖏᑦᑎᒍᑦ ᐃᒻᒪᖄ ᐊᒥᓲᓂᓕᑦ 500-ᓂᑦ ᐅᑭᐅᓕᒫᒧᑦ.