European Union Seal ban Suspended
ᓄᓇᕗᑦ ᑐᙵᕕᒃ ᑎᒥᖓᑦᑕ ᐊᖓᔪᖅᑳᑉ ᑐᖏᓕᐊ ᑮᓇᐅᔭᓕᕆᔨ ᕋᐃᒪ ᓂᖏᐅᑦᓯᐊᖅ ᐅᖃᖅᑐᖅ ᖁᕕᐊᓲᑎᖃᕐᓂᕋᖅᖢᓂ ᐅᑯᐊ ᑕᕆᐅᑉ ᐊᑭᐊᓂ ᑲᑐᔾᔨᖃᑎᒌᑦ ᑐᒃᓯᕋᐅᑎᒋᓯᒪᔭᖓᑦ ᓇᑦᑎᕐᓄᑦ ᓄᖅᑲᖅᑎᑦᑎᓯᒪᓂᖅ ᓄᖅᑲᖅᑎᑕᐅᑲᐃᓐᓇᖅᓯᒪᓕᕐᒪᑦ ᒪᓕᒐᖑᕐᓂᐊᓚᐅᕐᓂᐊᓄᑦ ᐊᑐᓕᕐᓗᓂᓗ ᐅᑉᓗᒥ. ᑕᒪᓐᓇ ᓄᖅᑲᖅᑎᑦᑎᓯᒪᓂᖅ ᓇᑦᑎᓂᑦ ᐊᔪᓕᖅᑎᑦᑎᓇᔭᓚᐅᖅᑐᖅ ᐊᐅᓪᓚᖅᑎᑦᑎᖃᑦᑕᕐᓂᕐᒥᑦ ᓇᑦᑎᓂᑦ ᓴᓇᓯᒪᔪᓂᑦ ᑕᐅᕗᖓ ᑕᕆᐅᑉ ᐊᑭᐊᓄᑦ ᓄᓇᓕᒃᔪᐊᓄᑦ. ᑲᓇᑕᒥᐅᑦ ᐊᒻᒪᓗ ᐊᑯᑭᒃᑐᒥᐅᑦ ᐃᓄᖏᑦ ᐊᒻᒪᓗ ᐃᖅᑲᖅᑐᐃᕕᖕᒧᑦ ᐳᖅᓯᓯᒪᔪᑦ ᐱᒋᐊᖅᑎᑦᑎᓚᐅᖅᑐᑦ ᒪᓕᒐᑎᒍᑦ ᐱᒋᐊᖅᓯᓂᕐᒥᑦ ᐅᑭᐅᖅ ᐱᒋᐊᓕᓵᖅᑎᓪᓗᒍ ᐊᒻᒪᓗ ᐃᓕᓯᓪᓗᑎᒃ ᑐᒃᓯᕋᐅᑎᒥᑦ ᐃᓗᐊᓂ ᓄᖅᑲᖅᑎᑦᑎᑲᐃᓐᓇᕈᑎᒃᓴᒥᑦ ᐱᒋᐊᖅᓯᓂᕐᒥᑦ ᔪᓚᐃᑦ, 2010-ᒥ.
“ᑕᒪᓐᓇ ᐱᐅᔪᒻᒪᕆᐊᓗᑦ ᑐᓴᖅᖢᒍ ᐃᓄᖕᓄᑦ ᐊᒻᒪᓗ ᑮᓇᐅᔭᓕᐅᕈᑎᒃᓴᓄᑦ ᓄᓇᕗᒥ,” ᐅᖃᖅᑐᖅ ᓂᖏᐅᑦᓯᐊᖅ. “ᓂᕆᐅᒃᑐᖓ ᑕᒪᓐᓇ ᑲᔪᓯᓂᐊᕐᒪᑦ ᑎᑭᐅᑎᓗᓂ ᓄᖅᑲᖅᑎᑦᑎᓪᓚᑦᑖᕐᓂᕐᒧᑦ ᐲᖅᓯᓗᓂ ᐅᑯᐊ ᑕᕆᐅᑉ ᐊᑭᐊᓂ ᑲᑐᔾᔨᖃᑎᒌᑦ ᒪᓕᒐᖓᓐᓂᑦ.”
ᑕᐃᒪᐃ ᐅᑯᐊ ᑕᕆᐅᑉ ᐊᑭᐊᓂ ᒪᓕᒐᑦ ᐃᓗᓕᖃᖅᑑᒐᓗᐊᖅ ᐃᓚᐅᑎᑕᐅᖏᓐᓂᖏᓐᓂᑦ ᐲᖅᑕᐅᓯᒪᓪᓗᑎᒃ ᐃᓄᐃᑦ, ᐃᓄᐃᑦ ᐅᒃᐱᕈᓱᒃᑐᑦ ᑕᒪᓐᓇ ᐃᓚᐅᑎᑕᐅᖏᓐᓂᕐᒧᑦ ᐲᖅᑕᐅᓯᒪᓂᖅ ᓈᒻᒪᔾᔮᖏᒻᒪᑦ ᐊᒻᒪᓗ ᐊᑑᑎᖃᖏᓪᓗᓂ ᓴᖏᓂᐊᒍᑦ ᓄᖅᑲᖅᑎᑦᑎᓂᕐᒧᑦ ᐱᒻᒪᕆᐊᓗᖏᓂᑦ ᓱᕈᐃᓂᕐᒥᑦ ᐃᓄᑦ ᐃᓅᔾᔪᑎᒋᕙᒃᑕᖏᓐᓄᑦ ᐊᒻᒪᓗ ᐃᒻᒪᖄ ᑲᑕᒃᑎᑦᑎᓗᑎᒃ ᓇᑦᑎ ᕿᓯᖏᓐᓂᑦ ᓂᐅᕕᐊᓴᖃᖅᑎᑦᑎᕙᖕᓂᕐᒧᑦ.