Criminal Records Checks for NTI Elections

ᓄᓇᕗᑦ ᑐᓐᖓᕕᒃᑯᑦ ᑎᒥᖓᓄᑦ ᓂᕈᐊᖅᑐᓕᕆᔨᒻᒪᕆᒃ ᓈᓐᓯ ᖃᕆᑕᖅ-ᓕᓐᑎᐅ ᐅᓪᓗᒥ ᐅᖃᖅᑲᐅᔪᖅ ᓂᕈᐊᕋᑦᓴᐅᒍᒪᓂᐊᖅᑐᑦ ᑐᓐᖓᕕᒃᑯᑦ ᓂᕈᐊᕐᓂᖓᓄᑦ ᐊᖓᔪᖅᑳᑉ-ᑐᒡᓕᐊᓄᑦ ᑏᓰᒻᕙ 8, 2014 ᑐᒃᓯᕋᐅᓯᐅᕈᓐᓇᓕᖅᑐᑦ ᐸᓖᓯᒃᑯᑎᒍᑦ ᖃᐅᔨᓴᕈᑎᓂᒃ ᐱᕋᔭᓯᒪᔪᒥᓃᑦ ᓇᓗᓇᐃᖅᑕᐅᓯᒪᓂᖏᓐᓂᒃ, ᑲᑐᔾᔨᖃᑎᒌᑦ ᓂᕈᐊᕐᓂᕐᒧᑦ ᒪᓕᒐᑦᓴᖏᓐᓃᖃᑕᐅᔪᑎᒍᑦ.

ᐊᓯᔾᔨᖅᑕᐅᓂᖓ ᐊᖏᖅᑕᐅᓚᐅᖅᑐᖅ ᑐᓐᖓᕕᒃᑯᑦ ᐊᕐᕌᒍᑕᒫᕐᓯᐅᒻᒥᒃ ᑲᑎᒪᓂᕆᓚᐅᖅᑕᖓᓂ. ᓂᕈᐊᕋᑦᓴᐅᒍᒪᔪᑦ ᑐᓂᓯᔭᕆᐊᖃᖅᑎᑕᐅᔪᑦ ᓇᓕᖅᑲᐅᖏᑦᑐᒥᒃ ᐸᓖᓯᒃᑯᑎᒍᑦ ᐱᕋᔭᓯᒪᒻᒪᖔᑕ ᖃᐅᔨᓴᖅᑕᐅᒍᑎᖏᓐᓂ ᑐᓂᓯᒍᑎᒃ ᓂᕈᐊᕋᑦᓴᓐᖑᕈᑎᒥᓂᒃ. ᖃᐅᔨᓴᕈᑎᒥᓂᖅ ᒫᓐᓇᕐᓂᐅᓂᖓᓂᒃ ᓇᓗᓇᐃᕐᓯᒪᖁᓪᓗᒍ, ᓂᕈᐊᕋᑦᓴᑦ ᐱᓇᓱᐊᕐᓯᒪᒋᐊᓖᑦ ᐅᓪᓗᓂᒃ 90-ᓂᒃ ᑐᖔᓂ ᓂᕈᐊᕋᑦᓴᓕᐅᕐᓇᖅ ᒪᑐᐃᓚᐅᓐᖏᓐᓂᖓᓂ ᐆᑦᑑᕝᕙ 27-31. ᖃᕆᑕᖅ-ᓕᓐᑎᐅ ᐅᖃᖅᑐᖅ ᖃᐅᔨᒋᐊᖅᑕᐅᒍᑎᒥᓃᑦ ᐸᓖᓯᒃᑯᓐᓂᒃ ᐱᐊᓂᒃᑕᐅᓯᒪᔭᕆᐊᖃᕐᓂᖏᓐᓂᒃ ᔪᓚᐃ 27 ᑭᖑᓂᐊᓂ.

ᐱᓇᐊᓱᕈᓰᓐᓂᒃ ᒪᕐᕈᕌᕋᔪᓲᖑᓂᖏᓐᓄᑦ ᖃᐅᔨᓴᖅᑕᐅᒍᑎᒥᓃᑦ ᐱᕋᔭᓚᐅᕐᓯᒪᓂᕐᒧᑦ, ᑐᓐᖓᕕᒃᑯᑦ ᓂᕈᐊᖅᑎᑦᓯᓂᖓᓄᑦ ᓂᕈᐊᕋᑦᓴᐅᒍᒪᓂᐊᖅᑐᑦ ᑲᒪᔭᕇᕐᓯᒪᒋᐊᖃᕐᓂᐊᖅᑐᑦ ᓂᕈᐊᕋᑦᓴᓕᐅᕐᓇᐅᑉ ᑐᖔᓂ.

ᓂᕈᐊᕋᑦᓴᐅᒍᒪᔪᑦ ᐊᒻᒪᓗ ᓂᕈᐊᖅᑏᑦ ᑲᓇᑕᒥᐅᑕᐅᔭᕆᐊᓖᑦ, 16-ᓂᒃ ᐅᑭᐅᖅᑖᕐᓯᒪᓗᑎᒃ ᑏᓰᒻᕙ 8, 2014 ᐊᒻᒪᓗ ᐊᑎᖃᖃᑕᐅᓗᑎᒃ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᓂ.
ᓂᕈᐊᕋᑦᓴᓕᐅᕈᑏᑦ ᐱᔭᐅᔪᓐᓇᖅᑐᑦ ᓂᕈᐊᖅᑐᓕᕆᔨᒻᒪᕆᒻᒥᒃ, ᓄᓇᓕᖕᓂ ᑐᖅᑲᑕᕐᕕᖕᓂᒃ, ᐅᕝᕙᓗᓐᓃᑦ ᑐᓐᖓᕕᒃᑯᑦ ᐃᑭᐊᖅᑭᕕᖓᓂᒃ ᓂᕈᐊᕋᑦᓴᓕᐅᕐᓇᖅ ᒪᑐᐃᕐᐸᑦ.

ᓂᕈᐊᖅᑏᑦ ᓂᕈᐊᕐᓂᐊᖅᑐᑦ ᐊᖓᔪᖅᑳᑉ-ᑐᒡᓕᐊᓂᒃ ᑐᓐᖓᕕᒃᑯᑦ ᑲᑎᒪᔨᖏᓐᓄᑦ. ᐊᖓᔪᖅᑳᑉ-ᑐᒡᓕᐊ ᑲᑎᒪᔨᐅᖃᑕᐅᓂᐊᕐᒥᔪᖅ ᑐᓐᖓᕕᒃᑯᑦ ᓯᕗᓕᖅᑏᑦ ᑲᑎᒪᔨᖏᓐᓄᑦ ᐊᒻᒪᓗ ᐃᒃᓯᕙᐅᑕᕆᔭᐅᓗᓂ ᒪᕐᕉᓐᓄᑦ ᑐᓐᖓᕕᒃᑯᑦ ᑲᑎᒪᔨᖏᑕ ᑲᑎᒪᔨᕋᓛᖏᓐᓄᑦ, ᑖᒃᑯᓅᖓ ᐃᓄᐃᑦ ᐃᓅᓯᖏᓐᓄᑦ ᐃᓕᖅᑯᓯᖏᓐᓂᓪᓗ ᖃᐅᔨᒪᔨᑕᑦ ᑲᑎᒪᔨᕋᓛᖏᓐᓄᑦ ᐊᒻᒪᓗ ᐃᓄᐃᑦ ᐆᒪᔪᓕᕆᓂᕐᒧᑦ ᐊᕙᑎᓕᕆᓂᕐᒧᓪᓗ ᖃᐅᔨᒪᔨᑕᑦ ᑲᑎᒪᔨᕋᓛᖏᓐᓄᑦ.

Nancy Karetak-Lindell
Chief Returning Officer
Tel: (867) 975-3899 Fax: (867) 979-1487
Toll-free: 1- 844-NTI-VOTE (684-8683)
elections@tunngavik.com
www.tunngavik.com