Call for proposals: Inuktut Education Innovation Fund
(ᓄᕕᑉᐱᕗᕆ 7, 2021, ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓ (ᑐᙵᕕᒃᑯᑦ) ᑐᓴᕐᑎᑦᑎᕗᑦ ᑐᒃᓯᕋᕈᑎᓕᐅᕈᔨᓪᓗᑎᒃ ᓴᖅᑭᑕᐅᕋᑖᕐᓯᒪᔪᓂᒃ ᐃᓄᒃᑐᑦ ᐃᓕᓴᐃᓂᕐᒧᑦ ᖃᓄᖅᑑᕆᐊᕈᑎᒃ ᑮᓇᐅᔭᑦ. ᐃᓄᒃᑐᑦ ᐃᓕᓴᐃᓂᕐᒧᑦ ᖃᓄᖅᑑᕆᐊᕈᑎᑦ ᑮᓇᐅᔭᑦ ᓴᖅᑭᑕᐅᓯᒪᕗᑦ ᐱᑕᖃᖁᓪᓗᒍ ᐊᒻᒪ ᐱᕕᒃᓴᖃᕈᓐᓇᖁᓪᓗᒋᑦ ᐃᓄᐃᑦ ᐱᕙᓪᓕᐊᖁᓪᓗᒋᑦ ᐃᓄᐃᑦ ᐅᖃᓪᓚᒍᓯᖏᑦ ᐊᒻᒪ ᐃᓕᖅᑯᓯᖏᓐᓂᒃ ᐃᓕᓴᓂᕐᒧᑦ ᓄᓇᕗᑦ ᐃᓕᓐᓂᐊᕐᑐᓕᕆᔾᔪᓯᖏᓐᓂ.
“ᓄᓇᕐᔪᐊᕐᒥ ᐃᓄᐃᑦ ᐅᓪᓗᖓᓂ ᐊᒃᓱᐊᓗᒃ ᐊᓕᐊᓇᐃᒍᓱᒃᐳᖓ ᑐᓴᖅᑎᑦᑎᔪᓐᓇᕋᒪ ᓴᖅᑭᑕᐅᓂᖏᓐᓂᒃ ᐃᓄᒃᑐᑦ ᐃᓕᓴᐃᓂᕐᒧᑦ ᖃᓄᖅᑑᕆᐊᕈᑎᓂᒃ ᑮᓇᐅᔭᓂᒃ. ᐃᓄᒃᑎᒍᑦ, ᓴᓇᑐᒐᑦᑕ, ᐊᔪᙱᑦᑐᑕᓗᑦ ᐊᒻᒪ ᖃᐅᔨᓂᖃᕐᑐᑕ ᐅᖃᓪᓚᒍᓯᑦᑎᓐᓂᒃ ᐊᒻᒪ ᐃᓕᖅᑯᓯᑦᑎᓐᓂᒃ. ᑖᒃᑯᐊ ᑮᓇᐅᔭᑦ ᐱᕕᒃᓴᖃᖅᑎᑦᑎᒍᑕᐅᓂᐊᕐᐳᑦ ᐃᓄᖕᓄᑦ ᐊᑑᑎᖃᖅᑎᑦᑎᓗᑕ ᓴᓇᑐᓂᑦᑎᓐᓂᒃ ᐊᒻᒪ ᖃᐅᔨᒪᓂᑦᑎᓐᓂᒃ ᖃᓄᖅᑑᕆᐊᕐᓂᒃᑯᑦ ᐱᙳᐃᓂᕐᒥᒃ ᐃᓕᓐᓂᐊᕐᑐᓕᕆᔾᔪᓯᓂᒃ ᐱᖃᓯᐅᔾᔨᔪᓂᒃ ᐊᔾᔨᐅᖏᓐᓂᖏᓐᓂᒃ ᐊᒻᒪ ᐅᖃᓚᒍᓯᑦᑎᐊᕆᓐᓂᑎᓐᓂᒃ ᐊᒻᒪ ᐃᓕᖅᑯᓯᑦᑎᓐᓂᒃ.”
ᐅᖃᖅᑐᖅ ᑐᙵᕕᒃᑯᑦ ᐊᖓᔪᖅᑳᖓᑦ ᐊᓗᑭ ᑰᑦᑎᖅ.
ᑮᓇᐅᔭᑦ ᐅᑯᓇᖔᖅᑐᑦ ᐃᓄᒃᑐᑦ ᐃᓕᓴᐃᓂᕐᒧᑦ ᖃᓄᖅᑑᕆᐊᕈᑎᒃ ᑮᓇᐅᔭᑦ ᐊᑑᑎᖃᖅᑎᑕᐅᔪᓐᓇᕐᐳᑦ ᐅᑯᓄᖓ:
- ᖃᐅᔨᓴᕐᕈᑕᐅᓗᑎᒃ ᖃᓄᕐᑑᕈᓐᓇᕈᑕᐅᔪᓂᒃ, ᐃᓕᓴᐃᒍᓯᓂᒃ, ᐃᓕᓐᓂᐊᕈᑎᓕᐅᕈᑎᓂᒃ ᐊᒻᒪ ᐊᑲᐅᓂᕐᐹᒃᑯᑦ ᐊᑐᖅᑕᐅᓲᓂᒃ ᐃᓕᓴᐃᓂᕐᒧᑦ ᐃᓄᐃᑦ ᐅᖃᓪᓚᒍᓯᖏᓐᓂᒃ ᐊᒻᒪ ᐃᓕᖅᑯᓯᖏᓐᓂᒃ; ᐊᒻᒪᓗ
- ᓴᖅᑮᓂᕐᒥᒃ ᐱᒻᒪᕆᐅᔪᓂᒃ ᐃᖅᑲᓇᐃᔭᕐᑎᓂᒃ, ᐃᖅᑲᓇᐃᔮᒥᓄᑦ ᐃᓕᓐᓂᐊᑲᓐᓂᕐᕕᐅᔪᓐᓇᕐᑐᓂᒃ ᐊᒻᒪ ᐱᓕᕆᖃᑎᒌᒍᑕᐅᒍᓐᓇᕋᔭᕐᑐᓂᒃ ᐃᑲᔪᕐᓯᒍᑕᐅᔪᓐᓇᕐᑐᓂᒃ ᐃᓄᖕᓄᑦ ᐃᓕᓴᐃᔨᓄᑦ..