Arctic Council Chair Appointment
ᓄᓇᕗᑦ ᑐᓐᖓᕕᒃ ᑎᒥᖓᑕ ᐊᖏᔪᖅᑳᖓ ᑳᑎ ᑕᐅᑐᓐᖏ ᑲᑎᓯᖅᑲᐅᔪᖅ ᐃᓄᐃᑦ ᓄᓇᕐᔪᐊᖅ ᐅᑭᐅᖅᑕᖅᑐᖓᓂ ᑲᑎᒪᔨᖏᓐᓂᒃ ᐅᓪᓗᒥ ᑐᓐᖓᓴᐃᓪᓗᓂ ᑐᓴᖅᑎᑦᓯᐅᑕᐅᖅᑲᐅᔪᒥ ᓄᓇᕗᒻᒥ ᑲᓇᑕᐅᑉ ᐱᖁᔭᓕᐅᕐᕕᔾᔪᐊᖓᓂ ᒪᓕᒐᓕᐅᖅᑐᖓ, ᐊᖓᔪᖅᑳᖅ ᓕᐅᓇ ᐊᒡᓘᒃᑲᖅ ᑎᒃᑯᐊᖅᑕᐅᓂᖓᓂᒃ ᐃᒃᓯᕙᐅᑕᕐᒧᑦ ᐅᑭᐅᖅᑕᖅᑐᒥ ᑲᑎᒪᔨᖏᓐᓄᑦ. ᑲᓇᑕᐅᑉ ᐊᖓᔪᖅᑳᕐᔪᐊᖓ ᓯᑏᕙᓐ Hᐊᐸ ᐅᖃᐅᓯᕆᓚᐅᖅᑖ ᑎᒃᑯᐊᕐᓯᓂᖅ ᐃᖃᓗᑦᑑᑦᑎᐊᒨᕐᓯᒪᓪᓗᓂ ᐃᒃᐸᑦᓴᖅ.
“ᑕᒪᓐᓇ ᑐᓴᕐᓂᑐᒻᒪᕆᒃ. ᒥᓂᔅᑕ ᐊᒡᓘᒃᑲᖅ ᐱᖕᒪᕆᐊᓘᔪᒥ ᐱᓕᕆᐊᖃᕐᓂᐊᓕᕐᓂᖓ ᒪᑭᑉᐸᓪᓕᐊᓂᕐᒥᒃ ᐊᑕᐅᓯᐅᖃᑎᒌᓐᓂᒃᑯᑦ ᓄᓇᕐᔪᐊᖅ ᐅᑭᐅᖅᑕᖅᑐᖓᓂ ᓄᓇᓕᔾᔪᐊᖏᓐᓄᑦ, ᐊᒻᒪᓗ ᐱᕚᓪᓕᕈᑕᐅᓂᐊᖅᑐᖅ ᑲᓇᑕᒥ ᑲᒪᒋᔭᒃᓴᖏᓐᓂᒃ ᐅᑭᐅᖅᑕᖅᑐᒥ ᑲᑎᒪᔨᖏᓐᓂ,” ᐅᖃᖅᑲᐅᔪᖅ ᑕᐅᑐᓐᖏ.
ᒥᓂᔅᑕ ᐊᒡᓘᒃᑲᖅ ᐱᓕᕆᐊᒃᓴᒥᓂᒃ ᐱᒋᐊᕈᒫᖅᑐᖅ ᔭᓐᒪᐃ, 2013, ᑲᓇᑕ ᑎᒍᓯᑉᐸᑦ ᐃᑦᓯᕙᐅᑕᖃᕐᓂᕐᒥᒃ ᓄᓇᕐᔪᐊᒥ ᑲᑎᒪᔨᓂ ᒪᕐᕉᓐᓄᑦ ᐅᑭᐅᓐᓄᑦ. ᑖᒃᑯᐊ ᑲᑎᒪᔩᑦ ᑲᑐᔾᔨᖃᑦᑕᓲᑦ ᐅᑭᐅᖅᑕᖅᑐᒨᖓᔪᓕᒫᓂᒃ ᐱᓕᕆᐊᖑᔪᓂᒃ, ᐊᒻᒪᓗ ᑖᒃᑯᓇᓃᖃᑕᐅᔪᑦ ᑲᓇᑕ, ᑎᐊᓐᒫᒃ, ᕕᓐᓚᓐ, ᐊᐃᔅᓚᓐ, ᓄᐊᕕᐃ, ᐅᓛᓴᒃᑯᑦ ᑲᑐᔾᔨᖃᑎᒌᕐᔪᐊᖏᑦ, ᓱᐃᑕᓐ ᐊᒻᒪᓗ ᒥᐊᓕᒐᒃᑯᑦ.
“ᖁᔭᒋᔭᕋ ᒥᓂᔅᑕ ᐊᒡᓘᒃᑲᖅ ᑐᓂᓯᒪᑦᓯᐊᕐᓂᖓᓂᒃ ᐊᖏᕐᓯᒪᓂᕐᒥᒍᑦ ᐃᖅᑲᓇᐃᔭᖃᑎᖃᕐᓂᐊᓂᕐᒥᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐊᕕᑦᑐᕐᓯᒪᓂᐅᔪᑦ ᒐᕙᒪᖏᓐᓂᒃ, ᑲᓇᑕᒥ ᓄᓇᖃᖅᑳᕐᓯᒪᔪᓂᒃ ᐃᓚᒋᔭᐅᓪᓚᑖᖅᑐᓂᒃ ᐊᒻᒪᓗ ᐊᓯᓕᒫᖏᓐᓂᒃ ᐅᑭᐅᖅᑕᖅᑐᒥᐅᑦ ᓄᓇᖏᓐᓂᒃ ᐱᕙᓪᓕᐊᒍᑎᒃᓴᓂᒃ ᐅᑭᐅᖅᑕᖅᑐᒥ ᑲᑎᒪᔩᑦ ᐱᓕᕆᐊᖏᓐᓂᒃ. ᑕᕝᕘᓇ ᑲᓇᑕ ᑐᑭᒧᐊᒃᑎᑦᓯᒍᓐᓇᕐᕕᖃᒃᑲᓂᕐᓂᐊᖅᑐᖅ ᓯᓚᕐᔪᐊᓕᒫᒥ ᑲᒪᒋᔭᐅᒋᐊᓕᖕᓂᒃ ᐅᔾᔨᕐᓇᑐᒻᒪᕆᐅᓂᖓᓂ ᐊᓯᔾᔨᐸᓪᓕᐊᓂᐅᔪᑦ ᐊᒻᒪᓗ ᐱᕙᓪᓕᐊᑎᑦᓯᒍᑕᐅᔪᑦ. ᑕᒪᓐᓇᑦᑕᐅᖅ ᒥᓂᔅᑕ ᐊᒡᓘᒃᑲᕐᒧᑦ ᐊᒻᒪᓗ ᐃᓄᓪᓚᑦᑖᓄᑦ ᐱᕕᒃᓴᐅᓂᐊᓕᖅᑐᖅ ᓇᓕᒧᒋᔭᐅᓕᖅᑎᑦᓯᓂᕐᒥᒃ ᓇᖕᒥᓂᖅ ᐋᖅᑭᒍᒪᔭᑦᑎᓐᓂᒃ ᑲᓇᑕᒥ ᖃᐅᔨᒪᓂᕐᒥᒃ ᑎᒍᓯᔾᔪᑕᐅᒃᑲᓂᕐᓗᓂ ᑐᑭᓯᐅᒪᔭᐅᓂᖓᓂᒃ ᐃᓅᓯᕐᒧᑦ, ᐱᖅᑯᓯᕐᒧᑦ ᐊᒻᒪᓗ ᑮᓇᐅᔭᓕᕆᓂᕐᑎᒍᑦ ᐊᑐᖅᑕᐅᓚᑦᑖᖅᑐᓂᒃ ᐃᓅᓯᖏᓐᓂ ᓄᓇᕐᔪᐊᕐᒥ ᓄᓇᖃᖃᑎᒋᔭᑦᑎᓐᓂ ᐅᑭᐅᑕᖅᑐᒥᐅᓂᒃ,” ᐅᖃᖅᑲᐅᔪᖅ ᑕᐅᑐᓐᖏ.