ᐅᖅᑯᓯᔭᐃᑦ ᐃᓐᓇᕐᓄᑦ - ᐃᓐᓇᕐᓄᑦ ᐃᑲᔫᑎᒃᓴᓂᒃ

NTI BOARD APPROVES FUNDING INCREASE TO INUIT ELDERS SUPPORT PROGRAM

(ᔭᓄᐊᕆ 25, 2024 – ᐃᖃᓗᐃᑦ, ᓄᓇᕗᑦ) ᑕᒪᑐᒪᓂ ᐱᓇᓱᐊᕈᓯᕐᒥ, ᓄᓇᕗᑦ ᑐᙵᕕᒃᑯᑦ ᑲᑎᒪᔨᖏᑦ ᐊᖏᖅᓯᓚᐅᖅᐳᑦ ᐱᐅᓯᒋᐊᖅᑕᐅᔪᓂᒃ ᐅᖅᑯᔾᔭᐃᑦ ᐃᓐᓇᕐᓄᑦ ᐃᓐᓇᕐᓄᑦ ᐃᑲᔫᑎᒃᓴᓂᒃ ᐱᓕᕆᐊᒧᑦ.

ᐱᐅᓯᒋᐊᖅᑎᑕᐅᔪᑦ ᐊᖏᖅᑕᐅᓯᒪᔪᑦ ᑲᑎᒪᔨᓄᑦ ᐃᓚᖃᖅᐳᑦ ᐱᑎᑦᑎᓂᕐᒥᒃ $175−ᓂᒃ ᑕᒪᐃᓐᓄᑦ ᐊᔪᖅᑎᑕᐅᙱᑦᑐᓄᑦ ᐃᓐᓇᕐᓄᑦ, ᕿᒪᕉᑎᓪᓗᑎᒃ ᖁᓕᕇᒃᑐᓂᒃ ᐊᑐᖅᑕᐅᕙᒃᑐᓂᒃ ᐊᑐᖅᑕᐅᓚᐅᖅᑐᒥᒃ ᑕᐃᒪᙵᑦ ᐱᓕᕆᐊᖑᔪᖅ ᐱᒋᐊᓚᐅᖅᑎᓪᓗᒍ 1999−ᒥ. ᑕᒪᓐᓇ ᑭᒡᒐᖅᑐᐃᕗᖅ ᐅᓄᖅᓯᒋᐊᖅᓯᒪᔪᓂᒃ ᑕᒪᐃᓐᓄᑦ ᑲᑎᙵᓂᐅᔪᓄᑦ ᐃᓐᓇᕐᓄᑦ ᐊᑭᓕᖅᑕᐅᕙᒃᑐᓄᑦ ᐱᓕᕆᐊᖑᔪᒥᑦ. ᒫᓐᓇᐅᔪᖅ, ᐃᓐᓇᐃᑦ ᐃᓅᓂᑯᑦ 1944−ᒥ ᓯᕗᓂᐊᒍᓪᓘᓐᓃᑦ ᑕᖅᑭᑕᒫᑦ ᐃᑲᔫᓯᐊᖅᑖᖅᐸᒃᖢᑎᒃ $150−ᓂᒃ, ᐃᓐᓇᐃᑦ ᐃᓅᓂᑯᑦ 1945−ᒥ ᐱᑎᑕᐅᕙᒃᖢᑎᒃ $135−ᓂᒃ, ᐃᓐᓇᐃᓪᓗ ᐃᓅᓂᑯᑦ 1946−ᓗ 1955−ᓗ ᐊᑯᓐᓂᖏᓐᓂ ᐱᕙᒃᖢᑎᒃ ᑕᖅᑭᑕᒫᑦ ᐊᑭᓕᖅᑕᐅᕙᒃᖢᑎᒃ $120−ᓂᒃ. ᓄᓇᕗᑦ ᑐᙵᕕᒃᑯᑦ ᑲᑎᒪᔨᖏᑦ ᐅᖓᕙᕆᐊᖅᑎᑦᑎᓚᐅᕆᕗᑦ ᐱᓕᕆᐊᒃᓴᒧᑦ ᐱᔪᓐᓇᖅᑎᑕᐅᔪᓂᒃ ᐃᓐᓇᕐᓄᑦ ᐃᓅᓚᐅᖅᑐᓄᑦ ᔭᓄᐊᕆ 1, 1956−ᒥ ᑎᓯᐱᕆ 31, 1958−ᒧᑦ. ᑕᒪᕐᒥᒃ ᐊᓯᔾᔨᕐᓂᕆᔭᐅᔪᑦ ᐊᑐᓕᕐᓂᐊᖅᐳᑦ ᐄᐳᕈ 1, 2024−ᒥ.

"ᓄᓇᕗᒻᒥ ᐃᓄᐃᑦ ᐃᒃᐱᒍᓱᑦᑎᐊᖅᐳᑦ ᐃᓐᓇᕐᓂᒃ ᑐᑦᑕᕐᕕᒋᔭᐅᓪᓗᑎᒃ ᓄᓇᓕᑦᑎᓐᓂ, ᐅᖃᐅᓯᕐᒥᒃ ᖃᐅᔨᒪᓂᕆᔭᐅᔪᒥᒡᓗ ᑎᒍᒥᐊᖅᑎᐅᓪᓗᑎᒃ, ᐸᖅᑭᔨᐅᒐᔪᒃᖢᑎᒡᓗ ᐊᓯᖏᓐᓄᑦ ᐃᓚᒋᔭᐅᔪᓄᑦ ᖃᑕᙳᑎᖏᓐᓄᑦ," ᐅᖃᓚᐅᖅᐳᖅ ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ. "ᐃᓅᓇᓱᐊᕐᓂᕐᒧᑦ ᐊᑭᑦᑐᖅᐸᓪᓕᐊᑐᐃᓐᓇᖅᑎᓪᓗᒋᑦ, ᐱᓗᐊᖅᑐᒥ ᓂᖀᑦ ᐊᑭᑦᑐᖅᐸᓪᓕᐊᑐᐃᓐᓇᖅᑎᓪᓗᒋᑦ, ᐱᒻᒪᕆᐅᕗᖅ ᐃᑲᔪᕋᓱᒋᐊᖃᕐᓂᓕᒫᑦᑎᓐᓂ. ᖁᕕᐊᓱᒃᐳᖓ ᓄᓇᕗᑦ ᑐᙵᕕᒃᑯᑦ ᑎᒥᖓᑦ ᐃᑲᔪᖅᑐᐃᓂᖅᓴᐅᔪᓐᓇᓕᕐᓂᖏᓐᓂᒃ ᑕᒪᑐᒥᖓ ᐊᓐᓂᕆᔭᐅᔪᒥᒃ ᐃᓅᖃᑎᒌᖕᓂᑦᑎᓐᓂ."

ᐃᓐᓇᐃᑦ ᑕᖅᑭᑕᒫᑦ ᐊᑭᓕᖅᑕᐅᖃᑦᑕᕇᖅᑐᑦ ᐱᓇᔪᒃᑲᓐᓂᕆᐊᖃᙱᑦᑐᑦ ᐱᓕᕆᐊᒧᑦ. ᐅᓄᖅᓯᒋᐊᖅᑕᐅᓂᖏᑦ ᑕᖅᑭᑕᒫᑦ ᐊᑭᓕᖅᓲᑕᐅᕙᒃᑐᑦ ᐊᑐᓕᖅᑎᑕᐅᑲᐅᑎᒋᓂᐊᖅᐳᑦ ᐱᒋᐊᕐᓗᓂ ᐊᐃᕐᕆᓕ 1, 2024−ᒥ. ᑐᑭᓯᒋᐊᒐᒃᓴᑦ ᐱᓇᔫᑎᓪᓗ ᐅᖅᑯᔾᔭᐃᑦ ᐃᓐᓇᕐᓄᑦ ᐃᓐᓇᕐᓄᑦ ᐃᑲᔫᑎᓄᑦ ᐊᑐᐃᓐᓇᐅᔪᑦ ᓄᓇᕗᑦ ᑐᙵᕕᒃᑯᑦ ᐃᑭᐊᖅᑭᕕᖓᓂ Tunngavik.com ᐅᕝᕙᓘᓐᓃᑦ ᓄᓇᓕᖕᓂ ᑐᓴᐅᒪᑎᑦᑎᔨᑦ ᑎᑎᕋᕐᕕᖓᓂ ᑕᒪᐃᓐᓂᒃ ᓄᓇᕗᒻᒥ ᓄᓇᓕᖕᓂ.

ᓄᓇᕗᒻᒥ ᐸᐸᑦᑎᔨᒃᑯᑦ ᑮᓇᐅᔭᖃᖅᑎᑦᑎᓲᖑᕗᑦ ᐃᑲᔫᑎᓄᑦ ᐊᑭᓕᐅᑎᓄᑦ 560-ᓄᑦ ᐃᓐᓇᕐᓄᑦ ᐃᓅᓚᐅᖅᑐᓄᑦ ᑎᓯᐱᕆ 31, 1948-ᒥ ᓯᕗᓂᐊᒍᓪᓗ. ᑮᓇᐅᔭᖃᖅᑎᑕᐅᓂᖏᑦ 1,137 ᐃᓐᓇᐃᑦ ᐃᓅᓂᑯᑦ ᔭᓄᐊᕆ 1, 1949-ᒥᑦ ᑎᓯᐱᕆ 31, 1958-ᒧᑦ ᓄᓇᕗᑦ ᑐᙵᕕᒃᑯᑦ ᑎᒥᖓᓐᓃᙶᖅᑐᑦ ᐅᔭᕋᖕᓂᐊᒐᒃᓴᓄᑦ ᑮᓇᐅᔭᖅᑖᕆᔭᐅᕙᓪᓕᐊᔪᑦ.

ᐃᓱᓕᓐᓂᖓ.

Contact:
ᐃᕙᓗᐊᕐᔪᒃ ᒥᐅᕆᑦ
ᑐᑭᒧᐊᑦᑎᑦᓯᔨ ᑐᓴᐅᒪᖃᑦᑕᐅᑎᓕᕆᓂᕐᒧᑦ
ᓄᓇᕗᑦ ᑐᙵᕕᒃᑯᑦ ᑎᒥᖓᑦ
media@tunngavik.com
ᐅᖄᓚᐅᑖ: (867) 975-4941
ᐊᑭᖃᙱᑦᑐᒃᑯᑦ: 1-888-646-0006

ᐊᐱᖅᑯᑕᐅᒐᔪᒃᑐᑦ