Anita Uuttuvak
Jose Amaujaq Kusugak: Iikaktuk ikhinaitumik, iingit ukaktut ukautikhainik inuulaktitlugu. Jose tunihimayut akhut inminik, inminiigutainik ovalo inminik inuutjutainik tunihimayuk ovalo inminik inuuhitjutainik ilakatimiinit Nunavumi piyaanganik takuyaani Nunavut iniktihimalikhutik. Ayongitait inuuhiani ayoikpiakhimapkaktait, hakugikhitivaktait ovalo himautailaikhuni angayukaak Ukiukaktumi, aniktailigiyit amigaitut Inuit Nunavumi. Angayukaagiyavut, angilgaptini ovalo ukpatiptini. Tamaitjutait naalaktauyuktumik akhut tamaihimayuk nunaptini. Aliahuniaktunga pikataklugit pinahuaktainik iliniagiakpaalivimi ilihagutainik ovalo hivunikhaptinik havagaagutikhait Inuktitut.
Inuuhimayunga Mitimatalimi, Nunavut, Inukmik aapakaktunga ovalo Kablunaamik amaamaktunga. Pingahunik ilakaktunga ovalo angiyut ilakatigiit. Angililikhunga, tamaat ilakatitka umayukhiukatigiilikpaktugut, nunaligalaami ovalo ikalukhiukatigiikhuta tamaat upingaami. Hamna ovamnut alianakpiaktuk ilaa aalanut nunamungaukatakhuta, alianaktuk autlaagiamik ovalo nigivluta mamaktunik. Ubluminut, kinikpaktunga kingulimnut alianak autlaaktakhuta amigaitunik ilakatigiinut! Kihimi piyaanganik ovamnut iliniagiakpaaligiaganik ublumi, taimaakhimaniaktunga iniktigiaganik piyumayatka tamaktitailigilugit Inuit inuuviviniit aliahuktamnik mikhaanut inuligiyit kauyimayatukangit.
Inuit kinguliit ovalo inuuviviniit akhut tamaktitailihimayut iklukatiptini angililiktitlunga. Amaamaga Inuungitkaluakkhuni, hamani nunakatigiigaakhimayuk akhuukhuni inminik tamaktitailigiyiinik Inuit inuuviviniit ovalo ukautait havagutainut ovalo aliagiyainut Ukiuktaktumi. Anaanatiaga aipaani, Ilisapi Uuttuvak, Inuuyuk akhut kingulikakhuni pihimayuk akhut ikpinagutainik inuuhimni. Una aknak akhut ilihaktihimayaanga mikhaanut Inuit kanuk ihumatjutainik ihuakhaitjutikhainut, nutaligiyiinut atuktait ovalo Inuit ukautait. Avalitumik amaamauplunga malgunik inuulgaminik ikniit, ayoikhaivalugit ovamnik iniktinahuaktitlunga piyumayamnik autlakatakhunga angilgamnit, pinahuakpaktunga akhut ilihaktilugit Inuit inuuhianik ilanganut ilakatigiinut inuuhianik.
Ilihagutimnik pinahuaniaktunga tuhaktitilugit Inuit inminiigutait piyaanganik Inuit ayonaitumi pilaagutikhainik kagitainik aniaktailigiyit ikayugutikhainik Inuktitut ukautainut. Pihimalugit Inuit aniaktailigiyiit ovalo tuhaktilaalutik ayokhagutainik kilamik, pihimalaaktavut inuuvivinivut ayonaitumik angilgaptini. Inuit autlalikpaktut Nunavumit nakuuhiyaanganik. Ilangit Jose ukakatakhimayait tukutinagu Inuit inminik munagiyukhat aniaktailigiyiit ovalo ikhingilutik ukakatigilugit tukutinagit. Hamna akhut maliinaktaga, ukpigivlugit ovalo ikayukhugit.
Aatjikutainut tamamik Kanatamiut nunakyuami, Inuit inminiigutikaktut ikayuktaulutik inminik ukautainut, naluhuilaalutik Inuk ilihagutikhainik kanugitjutainut inminik ukautainik. Ilihaktiungitkaluakhunga ublumi, pilaagumayunga atuklugit kauyimayatka ilihaklugit aalat Inuit inuuhiit ayoikhaitjutikhainik mikhaanut kanuk aniaktailigiyit ilaukatauniaktut nunakyuami inuuviviniit kauyimayatukanginik tunivaktainik Inutukait. Piyumayatka hivunikhaptini nakuutkiyauniaktut pigumik aatjikutainik titigagutainik ovalo ukautainik Inuktitut ukautait, kihimi pitinagit, nalungitavut angigutait ovalo kingitjutait atukhugit iivut!
Kauyimayakhait akhut hakugiktut ovalo nakuutiaktut autugutikhait inuuyaanganik ublumi. Angayukaaguyaanganik akhuunaktuk iluani ovalo hilataani ihumagiyainik nunaptini ovalo ikayuklugit hivunikhavut inuuyukhat nakuuyumik inuuyaaganik. Atuklugit ilihagutitka iniktigiaganik tikitumayatka ayoigiaganik mikhaanut kagitaligiyit, havagumayunga hivumut nuutitinahualugit inuuhiptinik akianut aalat
Bridgette Tattuinee
Pihimatjutikhait inuuvivinivut tamaktitailigiyiinik ikpinaktut aatjikutainut anikhaagutainik. Ukpigiyunga ilihagutivut iniyuituk inigaagapta ilihakvimit. Jose Kusugak atauhiuyuk Inuk akhuukhimayuk inuutitlugu pinahugutainik Nunavut nakuuyaanganik inuuvikhainik. Ilihimayait akhut maliktakhinik tamaminut. Ukpigiyunga inuuhia tuniyauyukhat aipaanut inuuyukhanut.
Angiktauhimayunga hivulimut ukiumi hitamanut Nunavut Ilihaktiit Ilihagutainik Pilihimayuit. Hamna hivuliuyuk ovamnut ikayugiaganik Inuit. Ukpigiyunga ininiaktaga pilihimayuit. Pinahuaniaktunga inikpiagutainik ilihagutikhait piguma inigutikhainik ilihagutikhait. Inuit Qaujimajatuqangit akhut ikpinagiyauyut Inuit ovalo ikpinaktut Inuit nalungilugit ovalo kauyimalugit, hanaihimanmata kauyimayainik Inutukait. Piniakhimayukhat ubluk tamaat inuuhiptinik. Ukaktitlunga Inuit Kauyimayatukanginik, akhut ukpigiyunga akhut havakhimayainik Jose pinahuatait puiguktauyukhaungitit.
Tamapta nalungitukhauyugut kinauyugut, nanimitauyugut, kinauyut ovalo huliniaktut inuutitlugit, nunakyuat nakuutkiyauniaktut nunait. Aalat Inuit ikpiginiaktait ovalo aliahugilugit. Inuit Josetut havangitkumik akhut hivunikhaptinik, namaniilimaitugut ublumi. Takulaaktugut, akhut nakuuyumik tikihimaliktugut Inuit, pikaliktitlugit Nunavut. Nunavut havaktakhakaktut kihimi aliagiyakhavut kanuk ungahikhimaliktugut hivunikhaptinik. Havakatigiiluta atauhiuyuk ikpinaktut kitkaniitut Qaujimajatuqangit. Pikangitpat, aalamungaulaitugut. Hamaniititlunga, havaniaktunga akhut pinahualugit ukauhivut ilanganut inuuvivinivut tamaktitailigilugit.
Nunavumi Nunataagutit Angigutaanut angigutauyuk kitkanit Inuit ovalo Kavamatukakut Kanatami. Ukpigiyunga angigutaanut ikayukhimayait amigaitut Inuit. Pikaktuk 42mik Ilangani. Nunavut Tunngavik Timinga pinahuakhimayut angigutait iniktigutikhainik.
Ukautivut ilaukatauyut ovaptinut kinautjutainik. Amigaitut Inuulgamiit, ovalo Inutukait ukaliktut Kablunaatitut ovalo aliangingitaga takuplugit. Ilangait Inuit naluliktait Inuktitut. Kanuk hamna pihimaliktut? Havakatigiiktukhauyugut hakugikhigutikhainik ukauhivut ilaa, tamalaamat atungitkuptigik ovalo munaginginguptinik.
Hivulikti Eva Aariak ukakhimayuk Nunavut pikaliktukhat 300mik ilihaktinik ukayuktunik Inuktitut piyaanganik iluaniitut Ilihaktiligiyit Pikuyakyuangit. Ungahiktut tikitakhavut kihimi pilaaktavut pinahuaktainik atauhimik ilihaktinut. Atauhik Inuk aalanguktilaaktut. Inutukavut tamakataliktut ukiuk tamaat. Piyukhauyugut angayukaanik munagiyakhainik ovalo tiguhimaliklugit hviunikhait takuyakhainik inuulgamiit.
Paknaiyagaagapta, ihumalikpaktugut mikhaanut ovalo huliniaktugut piyakhainik. Pingitkupta nakuuhilaituk ovaluniit kimagumik. Aatjikutaa ayoikhaitjutainik naluuyaktut, kihimi imaakhimayut. Ihumayunga ukauhivut hakugikhilutik ublumi ovalo hivunikhaptinut.
Jose Amaujaq Kusugak akhuugaakhimayuk Inunut. Ilihaktiguptigu Inuit, inuutjutaa ovalo kinauyuk tamalaituk. Akhut ikayuktaga ovalo koyagilugu akhut akhuukhimayainik. Pinahuaniaktunga tamaktitailigiyiinik inuuviviniit pitkutianik. Akhut ikpinagiyaga. Guuti munagilugit ilakatingit.
