Nunavut Tunngavik Reacts to Territorial Budget
(March 9, 2010 – Iqaluktuuttiaq, Nunavut) Nunavut Tunngavikkut Timingat Hivulliq Tuklianut Angayuqqaangat James Eetoolook uqaqhimayuq Kavamatkunnut Nunavunmi Kiinauyaqtuqtaghainut 2010/11-mi inuuhiqattiaqnikkut ilitquhiqtuqtunullu atuqtaulluaqtullu, NTI-kullu havaqatigiyumaplugit kavamatkut irinigiyainik, ilihainirmik, uqauhiliqinirmik, ilitquhiliqinirmik, iklughaliurnikkut, aimaviilliuqtunik ihariattittailinirmutlu. Kiinauyalirinirmut Minista Keith Peterson haavitittiyuq ippaghaq iinauyaqtuqtaghanik talvani Nunavunmi Maligaliuqvingmi.
Eetoolook uqaqhimayuq taimaa GN-kut ilittuqhittiaqtughat qanuq ihumayut hannaiyumaplutik atughaaqtughanik ilittuqhittiaqvighanik iklughat mighaagut. Uqaqhimayuq taimaa NTI-kut GN-kullu iniqhimayaat taamna Nunavunmi 10-nik Ukiunik Atuqtauyughat Inuit Ikluqpaghanut Parnaiyaqhimayait talvani 2004-mi, kihimi taamna tuhaqtitauhimangmat kavamaqyuatkunnit kiinauyaghat 2006-mi, amihuuyut maliktaghat parnaiyaqhimayunit ighinnaqtauhimayut. Eetoolook uqaqhimayuq taimaa NTI-kut havaqatigiyumaplugit GN-kut ikluqpaghanut mighaagut, kihimi havaqatigiittiaqtughat.
Aajjikkutavyaatut, taamna $1.5 milian-taalait tuniyauyughat malruk ukiut atuqtaghanit ihivriurumaplugu munaqhiniq nutaqqanik, ikayuutait maligaitalu, Eetoolook uqaqhimayuq taimaa NTI-kut ilauyughat hapkua aullaqtitautillugit, maligahuaqhugu Ilangat 32 talvani Nunavunmi Nunataarutikkut Angirutinit. Uqaqhimayuqtauq taimaa NTI-kut pitquiyumayut GN-kunnit angmaqtirniqmik titiraqvighaanik Nutaqqanik Inulramminiklu Kivgaqtuiyip irinahugahuaqlutik.
Eetoolook uqaqhimayuq taimaa kiinauyaqtuqtaghanit aallannguqtuqanngittuq, NTIkullu naahuriyut taimaa GN-kut inittiaqhimayunik malittiaqtauyughaniklu iniqhiyughat talvanngat $1.3 milian-taalanit.
“NTI-kut quviahuktut takuyaami kiinauyaghaqpallianianiarmata taapkua Piqqusilirivvik, Nunavunmi Ilihaqpaallirvik Hananikkut, iniqnirit ilihaqvighainik taapkualu Inuit Uqausinginnik Taiguusiliuqtiit. NTI-kut iniqhiyumayut hapkuninnga aullaqvighaaniklu ilihaqpaallirvighaat hananikkut, qiniqhiaghaaqtavut,” uqaqtuq Eetoolook.
Uqaqhimayuqtauq taimaa NTI-kut quviahuktut kiinauyaghanut atuqtauyughanik aullaqtittiyughanut aimavighailliuqtunut titiraqvighainik ihariattittailinirmutlu.
“Ihariattiniq ingattauyuq Nunavunmiunut, NTI-kullu angiqhimavut ihuaqhaqtauyughaq. NTI-kut quviahuutigivaatlu Minista Peterson ilitaqhimagamiuk taamna ihuinaarutauyuq. NTI-kut havaqatigittiarumayait GN-kut ahiillu ilauyut talvunga Nunavunmi Pivalliayuliqiyitkunnut tutqighainahuaqhutik ihariattittailinirmut
atuqtaghainik,” uqaqhimayuq. Ihariattittailinirmut atuqtaghait iliqahiutiyauyughat taapkununnga Nunavunmi Pivalliayuliqinirmut Atuqtaghait, taapkua NTI-kut
ikayuqpagait huli 2003-mit.