Nunavut Tunngavik Disappointed by Polar Bear Quota Reduction
(March 5, 2010 – Kangiqhiniq, Nunavut) Nunavut Tunngavikkut Timingat Tuklia Angayuqqaap Kiinauyaliqiyinut Raymond Ningeocheak uplumi uqaqtuq taimaa quviahunngittuni ihumaliuqhimayainut ikiklivaalliqhugit Anguyaghat Qikiqtaalungmi nanurnik105-nguyunit talvunga 65-nguqhugit anguyaghait hitamat ukiut atuqtughani. Ihumaliuqtauhimayuq tuhaqtitauhimayuq uplumi Kavamatkut Nunavunmi Ministauyuq Avatilirinirmut Daniel Shewchuk-mit. Anguyaghait ikikliyauniaqtut mihingnaittumik 10-nik nanurnik ukiuq tamaat nutaamik kititautaaqhimagumik anguyaghait.
Ningeocheak uqaqhimayuq ihumaaluutiqaqhuni ihumaliuqhimayumit naunaitkutiqaramik utuqqanik, kinguvaqtittiplugulu ihumaliuqhimayaat GN-kut October-mi, 2008-mi, ikiklivaalliqtailiquplugit anguyaghait uqautigitaaqhimaittumik Inuitlu.
“Hivulliq ihumaliuqtauhimayuq Inuit ukpiriyait ihumagiplugit. Una nutaaq ihumaliuqtauhimayuq ihuinaarutauyuq nutaanik anngutighaliqinikkut havauhiinik Inungnullu” uqaqhimayuq Ningeocheak.
Ningeocheak apiqhiyuq Minista Shewchuk-mit ikayuquplugit Inuit nunallaanit, taapkualu Mittimatalik, Kangiqtugaapik Qikiqtaryuaqlu. “Ministauyuq munaqhittiaqtughaq Inungnik ikayurahuaqhugit aqtuqtauhimayut kavamatkut ihumaliuqhimayainit. Ikiklitillugit mihingnautauniaqtuq Inungnit kiinauyaliurnikkut taapkunani nunallaanit.”
Ningeocheak uqaqhimayuq taimaa tuhaqhimayuq Inungnit nanuit amigaiqpalliayut ukiut atuqtuni, kihimi GN-kut uqaqtut taimaa ikiklivaalliqturiplugit. GN-kut uqaqhimayut taimaa qauyihaiyumaplutik Qikiqtaalungmi parnaiyaiyumayut.