Nunavut Tunngavik Clarifies Policies and Suspension
(September 1, 2010 - Iqaluit, Nunavut)
1. Nunavut Tunngavikkut Timingat maligaghait ihivriuqtauhimayut angiqtauhimaplutiklu 2008-mit, hapkua iliqahiutiyut kihimi nutqarutaunngittut, NTI-kut Atukkiutjiutit Piannait Niuvrutit Maligaghaq, NTI-kut Kiinauyaqtuqniqmut Maligaghaq, NTI-kut Aullaaqtaqniqmut Maligaghaq taamnalu NTI-kut Aulapkaiyiqyuat Ikayuutainut Maligaghaq (taapkua "Ihuaqtut Maligaghat"). Hapkua ihivriuqtauhimayut angiqtauplutiklu NTI-kut Aulapkaiyiinit atulihaaqtillugu 2009 angiqtautqighuni NTI-kut Angayuqqaat itillugu NTI-kut Aulapkaiyiqyuat katimatillugit Qauyuittumi September 2009-mi. Naunaiqhitiyaungmata Angayuqqaaq atuqpaktaanik atukkiutinik piannanik NTI-kut November, 2009-mi, hapkua Katimayiit kinguvaqtittihimayaat February-mut 2010-mi, katimatillugit Iqaluktuuttiami, talvani Katimayiit angitqighimayut maligaghanik NTI-kut Angayuqqaangat itillugu.
2. NTI-kut Kuapuriisanut Atukkiutinik Piannainik atuqtup qaittiyughaq naunaitkutinik titiqqanik niuviqhimayainut iniqtaghanullu kiinauyanut naunaitkutainik. Naunaitkutit huitkumik piyauyughat tigumiaqtimik piannamik. Havaktit ikayuinnarialgit piannamik tigumiaqtimik iniqhinahuarumik kiinauyanik naunaitkutainik, kihimi naunaitkutat huitkumik tunilaitkumiklu naunaitkutinik havaghuni aullaaqtitauhimagumi akiinik taamna piannaqmik tigumiaqtuq inminik pilaitkumi. Talvani maligaghami titiraqhimayuq taimaa tigumiaqtuq piannamik 10-nik uplunik iniriaqaqtait naunaitkutat kiinauyanut pihimagumigik piannanut Visa-nut naunaitkutiit, piyauvaktut tatqiqhiut tamaat. Angayuqqaaq qaffiiqhuni hivituhivagaat iniqvighait naunaitkutit, kihimi piyuittuq huli.
Talvani maligaghami naunaittiaqtuq taimaa taamna piannaq atukkiutit atuqtaghaunngittuq inmingnut. Maligaghani titiraqhimayuq taimaa, atukkiutit piyaulaitkumi havakviat niuvigainut (qanukiaq hunanut (taimaatut, iniqhimaitkumik naunaitkutit), piannaqmik tigumiaqtuq utiqtiyaghait kiinauyait NTI-kunnut atuqhimayait inmikkut 10-nik upluit naatinnagit. Taamna tigumiaqtuq piannaqmik atuqhimayainik havaghuni aullaaqtilluni utiqtitauniaqtuq. Talvani maligaghami titiraqhimayuq taimaa kinguvaqtittilaittut piannap naunaitkutait iniqtaunngitkumik.
3. NTI-kut aulavaktut angiqtauhimayunit maligaghanut havauhighanutlu imaalu titiraqhimayunik maligaghaliuqhimayuittuq imaalu "angutitqiktup angirutiit" ahiagut taapkua maligaghait. Ilitturiyaugumi taapkua ilangi ikayuutit angirutitlu ahianiittut maligaghat, hapkua unipkaaqtauyughaugaluit ihivriuqhitillugit Ihuaqtut Maligaghanik.
4. Naunaitkutit kinnguqhimayunut Angayuqqaap Atukkiutighaanut Piannaqmut ihivriuqtauliqtut January, 2009-mi. Havaktivut havaqluaqhutik ilittuqhitivaktutlu ihumaaluutinik nuigaangamik, January, 2009-mit, tajjalu huli ihuinaarutiqainnaqtut Angayuqqaaqlu.
5. Kiinauyait atuqtaghait quviahuutighaanut $20,000-taalauyuq ukiuq tamaat. Hapkua ihivriuqtauvaktut ukiuq tamaat tuniyauvaghutiklu NTI-kut Angayuqqaanganut imaalu naunaitkutauyuq taimaa avatqulaittuq akighait.
6. NTI-kut Katimayiit pitquhimayut imaa taimaaqtittihimalugu NTI-kut Angayuqqaangat talvunga October 30-mut, 2010. Una upluq aallannguqtaulaittuq NTI-kut Katimayiit pitquhimagumik kihimi Katimayiit katimalitqigumik ihumaliurumiklu.