NTI Awaits Nunavut Court Decision On An Appeal Brought by the GN To Halt Education Equality Rights Lawsuit

(February 13-mi 2024-mi – Ikalokni, Nonavumi) Ublomi, Nonavumi Apiqhoeyit Uktovagotinik tohaktut uktovagonmik havitanit Kavamat Nonavumi (GN), apigivlogit Apikhoeyit atogoegeagani apikhoyotigugotikhak havitaohimayomik malguknit Inoenaet ilagenit ukoalo Nonavut Tungavik Timeoyumit (NTI) 2021-mi. Apikhutaoyomi, NTI-kot Inoenaelo ilaget kiniktut monagiyotikhamik ilagani oegoata 15 ovani Maligakyoami Ihomakhutinik Ihomaluknaegotiniklo kivgaktokhotit tamaeta Inoenaet. Inoenaet ilihaktut atoktunit nagogiyaolikmata Nonavumi ilihakvikmi atoktumi GN-kot notaguktikniganik ona Ilihaktolikinikut Maligakyoak, Inoelo Okaohenik Monagiyotinik Maligakyoak 2020-mi. GN-kot notaguktiknigit ahivaekmata maligakyoamit hivoani atogeakaktomik pipkaeyagani Inoenaktut ilihakniqmik Nonavumi ilihakvikni tamaeni ayoenigni 2019 tikinigani ukeop. Kiheani, GN-kot taya okagekmata pipkaeyamikni ataohikmik ilihagakhamik ayokiktutaoyomik Inoenaktut ona okaohikmik ilihaknikmi. “Inoenaet aheopkaelikmata Inoenaktut okagiknikmik kilamivalat ihomaloknakhivloni, Kavamat Nonavumi ilihakvikut atoktomik ayaogivalakmata ahoeyotimik ilagiyaeniklo anigotaoyonik,” okaktok Ikhivaotalik Aluki Kotierk. “Inoenaktut ilihaotikagaloakhotik Nonavumi ilihaktonik ataohenaogitomik titigaktaogaloakhotik GN-kot maligaeni 1999-mit, ilihaktut Nonavumi aheanik atoktakhakagitut kiheani ilihaktitaolotik Kavlonatut French-titolunet talvatoak. Ukeoktaktomi Inoenaet amigaenikhaoyomi, amigaenikhanit atokloagomayaeniklo okaohikni Inoenaktot, Inoet aheanik atoktakhakaginmata kiheani ilaolotik inoet ilihakveani atoktomi ilaopkaegitomik okaohigiyatik ilitkohigiyatiklo. Kanogilivaleaniga ihoetomik aktoknikakmat Inoenaknit ilihaktonit agivalaalikhoni.” Pikaginiga ihoaktomik ilihaknikmik Inoenaktut hatkigotaokmat ayokhaotinik Inoenakni, piyotaovloni togaotiyotimik ilihaknikmi tikitakhamik, amigaetkiyaovlotik havagitut atonetoni, ayokhaotivalalo manikhakheogotikhaet Inoenaet ilihaktut ukonanga atoktakhaenik Inoenaogitut ilihaktut Nonavumi. Pikaginiga ilihaknikmik pipkagaoyonik Inoenaktut anigotaolikmat Inoenakni, togaotiyotaovloni ilaoniginik Inoet ilitkohet kinaonigniklo atoktitaoginakhoniklo ihoetot nagogiyotaoyut atoktaenik Inoenaktut Inoelo ilitkohenik tongaveoyagani ilihateagotimikni iniktigakhamikni. Pikaginiga Inoenaet ataniktutat ilihaknikmi aktoknikakmat ilihageakataknikmik anigokhiyolo amigaenignik, togaotiyotaovlotik ilihaknikmi kanogiliyotinik ayoginiginiklo Inoenaet ilihaktut ihomagikpata Inoenaogitut ilihaktut. Ona piyotaoyok ayaniktonikhivaloaniganik inuyohikmi manikhakheogotinilo avimayotigini okoa Inoenaet Inoenaogitolo, manikhalo ayikegitotik amigaenigniklo kavamani havaktoni. "Inoet pineaknikata nanminik aolanikaligeamikni piyomayaptiknik Nonavumi, Inoenaet notakat toniyaoyageakaktut nakunikhanik ihoakotinik piyotikateageagani ilihaknikmi atoktomi, “okaktok Ikhivaotalik Kotierk. “Nonavumi Inoenaet ilihaktitaolimagitpata okaohigiyaet agayokamiknik atoktaolotik atatateagiyamiknilo, atoktitaoginmata atoknikakloaktonik piyotinik pivaligeamikni aolanikateaknik ona.” GN-kot pinahoakhimayut ihomagigitagani tukhiktanik Inoenaet ilaget NTI-kolo pilihaktilogo. “pigiagotat ahivageagani” atoktitaoginmat Apikhoeyonit March 2023-mi. GN-kot uktovagotanik ihomaleogotaoyomik tohaktaoyok ublomi. Ataotikut, malgukni kigolikni ukeokni, GN-kot atokhimayut pigeagotimiknik kigovageaktitagani apikhotaoyok hivomot aolagitagani apikhoeyotigut. NTI-kot koveahogigeagivot GN-kot pigeagotanik apikhoeyotigugotimik. Apikotaoyok apikhutaoyomi agiyuvloni opaloknakhivlonilo: GN-kot pipkaeyageakakata amigaetonik ilagani inoet ilihaotaenik pipkagaoyagani Inoenaktut, taema Inoet ilihaktut ayikenik atogeagani nakogotaoyonik inoet ilihaknikmit. Ihomagivlogit kilamik atogoekniganik Inoenaktut ayogiyotinik ihoetomiklo aktokniginit Kavlonatoenak ilihaknikmit Inoenaet ilihaktut, apikhoeyut apikhutaonagiktukhaoyok, apikhoeyut nalonaeteageagani ihoaktomik nalonaektaoyonit. Nonavumi Inoet piyageakaktut ona atoknikaktok apikhoeyut tohaktaoyagani nalonaektaoyonit pinagiktaoloni, NTI-kolo nahogiyut Apikhoeyit Uktovagotinik okakneakut ihomaleogotimiknik kilamik kigovakpaligitagani.

-30-

Tohaktiyotilikiyit Okakvikhat: Kevin Kablutsiak Hivolikhokti Tohaomayotinik Nonavut Tungavik Timeoyomi Kagitaoyami: media@tunngavik.com -mi

📄 2024 02 13 NR Nunavut Court Appeal s.15 Claim INUINNAQTUN